Dithuto Ka Go Amogela Baeng Le Go Rapela

Ka fa botlhaba jwa Thaba ya Lotlhware, dikilometara di ka nna tharo go tswa kwa Jerusalema go na le motsana wa Bethani. (Johane 11:18) Jesu o ya kwa Motseng oo, a bo a ya kwa legaeng la ga Maratha le Marea. Bone le kgaitsadiabone e bong Lasaro ke ditsala tsa ga Jesu, mme ba mo amogela ka diatla tsoopedi.

Ke tlotla e kgolo go etelwa ke Mesia. Maratha o lebile pele go apeela Jesu dijo tse di monate, ka jalo o simolola go dira dijo tse dintsi. Fa Maratha a ntse a semeletse, Marea ene o ntse fa dinaong tsa ga Jesu o mo reeditse. Fa nako e ntse e ya, Maratha o raya Jesu a re: “Morena, a ga o re sepe fa nnake a ntlogetse ke dira dilo ke le nosi? Mmolelele gore a tle go nthusa.”—Luke 10:40.

Jesu ga a kgale Marea, go na le moo o gakolola Maratha ka gonne a tshwenyegile thata ka go dira dijo tse dintsi, a re: “Maratha, Maratha, o a tlhobaela e bile o tshwenyegile ka dilo tse dintsi. Mme gone, go tlhokega dilo di sekae fela, kgotsa se le sengwe fela. Marea ene o tlhophile selo sa botlhokwa, mme ga se kitla se tsewa mo go ene.” (Luke 10:41, 42) Jesu a re ga go tlhokege gore motho a fetse nako e ntsi a dira dijo tse dintsi. Go tlhokega dijo tse di motlhofonyana fela.

Se Maratha a se dirang ga se phoso. O batla go bontsha moya wa go amogela baeng. Mme e re ka a tlhomile mogopolo mo go direng dijo, seo se dira gore a se ka a utlwa dithuto tsa botlhokwa tse Morwa Modimo a di rutang! Jesu o gatelela gore Marea ene o tlhophile selo sa botlhokwa, se se tla mo solegelang molemo ka bosakhutleng e bile e le thuto ya botlhokwa e rotlhe re tshwanetseng go nna re e gopotse.

Mo lekgetlong le lengwe, Jesu o ruta thuto e nngwe gape mme le yone e le botlhokwa. Morutwa mongwe o raya Jesu a re: “Morena, re rute go rapela, fela jaaka Johane le ene a rutile barutwa ba gagwe.” (Luke 11:1) Jesu o setse a kile a dira jalo ngwaga pelenyana mo Therong ya gagwe ya kwa Thabeng. (Mathaio 6:9-13) Le fa go ntse jalo morutwa yono a ka tswa a ne a seyo ka nako eo, ka jalo Jesu o boeletsa dintlha tsa botlhokwa. Go tswa foo o dira setshwantsho se se gatelelang botlhokwa jwa gore ba rapele ba sa kgaotse.

O ba raya a re: “A re re mongwe wa lona o na le tsala mme o ya kwa go yone bosigogare a bo a e raya a re, ‘Tsala, nkadime dinkgwe di le tharo, ka gonne tsala e nngwe ya me e sa tswa go nketela e tswa kgakala mme ga ke na sepe se nka mo fang sone.’ Le fa go ntse jalo, yo o mo teng ga ntlo o mo araba a re: ‘Tlogela go ntshwenya. Ke setse ke lotletse setswalo, le bongwanake ba bannye ba robetse le nna mo bolaong. Nka se kgone go tsoga ka go naya senkgwe.’ Ke a lo bolelela, le fa gone a ka se ka a tsoga mme a mo naya senkgwe ka gonne e le tsala ya gagwe, eleruri o tla tsoga a bo a mo naya sepe fela se a se tlhokang ka ntlha ya go bo a mo kopa a sa ineele.”—Luke 11:5-8.

Jesu ga a reye gore Jehofa ga a batle go reetsa dithapelo tsa rona jaaka tsala e go buiwang ka yone mo setshwantshong e ne e gana. Go na le moo, o bontsha gore fa e le gore motho yo o neng a sa batle go thusa tsala ya gagwe o kgonne go e araba ka gonne e ne e kopa e sa ineele, ga go pelaelo gore Rraarona yo o kwa legodimong o tla araba dithapelo tse di tswang pelong tsa batlhanka ba gagwe ba ba ikanyegang! Jesu o tswelela a re: “Ke lo raya ke re, nnang lo kope mme lo tla newa; nnang lo batle mme lo tla bona; nnang lo kokote mme lo tla bulelwa. Gonne mongwe le mongwe yo o kopang o a amogela, mongwe le mongwe yo o batlang o a bona, e bile mongwe le mongwe yo o kokotang o tla bulelwa.”—Luke 11:9, 10.

Go tswa foo Jesu o gatelela ntlha ya gagwe ka go dira pharologanyo fa gare ga borre ba batho le Jehofa, a re: “Tota ke rre ofe mo go lona yo e reng fa morwawe a mo kopa tlhapi a bo a mo naya noga mo boemong jwa tlhapi? Kgotsa fa a kopa lee a bo a mo naya phepheng? Ka jalo, fa lona, le fa gone lo le bosula, lo kgona go naya bana ba lona dimpho tse di molemo, ga go pelaelo gore Rraalona yo o kwa legodimong le ene o tla naya ba ba mo kopang moya o o boitshepo fa ba o kopa!” (Luke 11:11-13) Ruri go a kgatlha go itse gore Rraarona o iketleeleditse go re reetsa le go re naya se re se tlhokang!