Karolo 2: Tsela e Mokeresete a Tshwanetseng go Tshela ka Yone

Fa o ntse o ithuta Baebele, o ne wa itse gore Jehofa o batla gore o dire eng le gore o ka tshela jang ka melao ya gagwe. Gore o kgone go dirisa se o se ithutileng, gongwe o ne wa tshwanelwa ke go dira diphetogo di le mmalwa mo tseleng e o lebang botshelo ka yone le mo tseleng e o itshwarang ka yone. E re ka jaanong o dirile tshwetso ya go tshela ka melao ya ga Jehofa e e siameng, o tshwanelega go nna moreri wa dikgang tse di molemo.

Dipotso tse di latelang di tla go thusa gore o nne o gopotse melao e e siameng ya ga Jehofa mme di tla go gakolola dingwe tsa dilo tse o ka di dirang gore o nne mongwe wa batlhanka ba gagwe ba a ba amogelang. Tshedimosetso eno e tla go thusa go tlhaloganya gore goreng go le botlhokwa go dira dilo tsotlhe ka segakolodi se se siameng le ka tsela e e bontshang gore o tlotla Jehofa.—2 Bakor. 1:12; 1 Tim. 1:19; 1 Pet. 3:16, 21.

E re ka o setse o ithutile go le gontsi ka Jehofa, ga go pelaelo gore o tla ikobela melao ya gagwe e bile o tla tswelela o mo direla. Dipotso le makwalo a a latelang di tla go thusa gore o sekaseke gore a o tlhaloganya sentle lebaka la go bo o tshwanetse go ikobela thulaganyo ya ga Jehofa mo phuthegong, mo lelapeng le gore Jehofa o leba jang dipuso tsa lefatshe leno. Gape tshedimosetso eno e tla go thusa go lebogela thulaganyo e Jehofa a e dirisang go ruta batho ba gagwe le go ba thusa gore ba nne le tumelo e e nonofileng. Dithulaganyo tseo di akaretsa go ya dipokanong le go tsaya karolo mo go tsone fa maemo a gago a letla.

Gape karolo eno e tla go thusa go bona botlhokwa jwa go tsaya karolo ka metlha mo tirong ya go rera ka Bogosi Jwa Modimo le go thusa ba bangwe go itse Jehofa le go itse gore o tlile go direla batho eng. (Math. 24:14; 28:19, 20) Gape e tla go thusa go bona gore go ineela mo go Jehofa Modimo le go kolobediwa ke kgang e e masisi. Itse gore Jehofa o itumelela go bo o bontsha gore o lebogela bopelomi jo bo sa go tshwanelang jo a go bontshitseng jone.

1. Baebele ya re Bakeresete ba tshwanetse go leba lenyalo jang? Go ya ka Baebele, ke lebaka lefe le le letlelelang motho go tlhala?

• “A lo ne lwa se ka lwa bala gore yo o neng a ba bopa go tswa kwa tshimologong o ne a ba dira monna le mosadi a ba a re, ‘Ka lebaka leno monna o tla tlogela rraagwe le mmaagwe mme o tla ngaparela mosadi wa gagwe, mme bobedi jono bo tla nna nama e le nngwe’? Mo e leng gore ga ba tlhole ba le babedi, mme ke nama e le nngwe. Jalo, se Modimo a se kopantseng mmogo a motho ope a se se kgaoganye. . . . Le fa e le mang yo o tlhalang mosadi wa gagwe, fa e se ka lebaka la kgokafalo, mme a nyala yo mongwe o dira boaka.”—Math. 19:4-6, 9.

2 Ke eng fa batho ba sa tshwanela go nna mmogo ba sa nyalana semolao? Fa e le gore o nyetse kgotsa o nyetswe, a lenyalo la gago le kwadisitswe semolao?

• “Tswelela o ba gakolola gore ba nne mo taolong ba bo ba nne kutlo mo dipusong le mo balaoding jaaka babusi.”—Tito 3:1.

• “A lenyalo le tlotlege mo go botlhe, le bolao jwa lenyalo bo nne bo sa leswafala, gonne Modimo o tla atlhola bagokafadi le baakafadi.”—Baheb. 13:4.

3. Seabe sa gago ke eng mo lelapeng?

• “Reetsa kotlhao ya ga rrago, morwaaka, mme o se ka wa latlha molao wa ga mmago.”—Dia. 1:8.

• “Monna ke tlhogo ya mosadi wa gagwe jaaka Keresete le ene a le tlhogo ya phuthego, ka ene e le mmoloki wa mmele ono . . . Banna, tswelelang lo rate basadi ba lona, fela jaaka Keresete le ene a ne a rata phuthego.”—Baef. 5:23, 25.

• “Borre, lo se ka lwa tshwenya bana ba lona, mme tswelelang lo ba godisetsa mo kotlhaong le mo taolong ya mogopolo ya ga Jehofa.”—Baef. 6:4.

• “Lona bana, utlwang batsadi ba lona mo go sengwe le sengwe, gonne seno se itumedisa thata mo Moreneng.”—Bakol. 3:20.

• “Lona basadi ba lo nyetsweng, nnang mo taolong ya banna ba lona,”—1 Pet. 3:1.

4. Ke eng fa re tshwanetse go bontsha gore re tlotla botshelo?

• “[Modimo] o naya batho botlhe botshelo le mohemo le dilo tsotlhe. . . . Ka ene re na le botshelo mme re a tshikhinyega e bile re gone.”—Dit. 17:25, 28.

5. Goreng re sa tshwanela go bolaya ope, tota le ngwana yo o iseng a tsholwe?

• “Fa go direga gore banna ba lwe ba bo ba utlwisa mosadi yo o moimana botlhoko thata mme . . . fa go ka tlhaga kotsi e e ka mmolayang, foo o ntshe moya mo boemong jwa moya.”—Ekes. 21:22, 23.

• “Matlho a gago a ne a mpona ke le losea lo lo mo popelong, Mme dikarolo tsotlhe tsa lone di ne di kwadilwe mo bukeng ya gago, Malebana le malatsi a di bopilweng ka one Mme go ne go ise go nne le e le nngwe fela ya tsone.”—Pes. 139:16.

• ‘Jehofa o tlhoile . . . diatla tse di tshololang madi a a se nang molato.’—Dia. 6:16, 17.

6. Molao wa Modimo o a reng ka madi?

• ‘Ithibeng mo . . . mading le mo dilong tse di kgamilweng.’—Dit. 15:29.

7. Goreng re tshwanetse go rata bakaulengwe le bokgaitsadi?

• “Ke lo naya taelo e ntšha, ya gore lo ratane; fela jaaka ke lo ratile, gore le lona lo ratane. Botlhe ba tla itse gore lo barutwa ba me ka seno, fa lo ratana.”—Joh. 13:34, 35.

8. Fa motho a tshwerwe ke bolwetse jo bo tshelanwang kgotsa jo bo ka nnang kotsi mo go ba bangwe: (a) Ke eng fa a tshwanetse go tila go tlamparela batho kgotsa go ba suna? (b) Goreng a sa tshwanela go utlwa botlhoko fa ba bangwe ba sa mo laletse kwa magaeng a bone? (c) Ke ka ntlha yang fa motho yo o ka tswang a na le bolwetse jo bo tshelanwang a tshwanetse go dira diteko tsa madi pele a simolola go ratana? (d) Ke ka ntlha yang fa motho yo o nang le bolwetse jo bo tshelanwang a tshwanetse go itsise morulaganyi mo setlhopheng sa bagolwane ka jone pele a kolobediwa?

• “Lo se ka lwa kolota ope le fa e le sepe, fa e se go ratana . . . ‘O rate moagelani wa gago jaaka o ithata.’ Lorato ga lo direle moagelani bosula.”—Bar. 13:8-10.

• “Lo tlhokomela, e seng go kgatlhegela dilo tse di amang lona fela, mme gape go kgatlhegela le dilo tse di amang ba bangwe.”—Bafil. 2:4.

9. Goreng Jehofa a lebeletse gore re itshwarele ba bangwe?

• “Tswelelang lo itshokelana e bile lo itshwarelana lo gololesegile fa mongwe a na le lebaka la go ngongorega ka yo mongwe. Le eleng jaaka Jehofa a ne a lo itshwarela a gololesegile, jalo le lona dirang jalo.”—Bakol. 3:13.

10. O tshwanetse go dira eng fa mokaulengwe a go senya leina kgotsa a go tsietsa?

• “Fa morwarrago a leofa, tsamaya o ye go baya molato wa gagwe mo pepeneneng fa gare ga gago le ene lo le losi. Fa a go reetsa, o gapile morwarrago. Mme fa a sa reetse, tsaya a le mongwe kgotsa ba le babedi ba bangwe o tsamaye le bone, gore ka molomo wa basupi ba le babedi kgotsa ba le bararo kgang nngwe le nngwe e tle e tlhomamisiwe. Fa a sa ba reetse, bua le phuthego. Fa a sa reetse le yone phuthego, a a nne mo go wena fela jaaka motho wa ditšhaba le jaaka mokgethisi.”—Math. 18:15-17

11. Jehofa o leba jang maleo ano?

▪ Boitsholo jo bo sa siamang jwa tlhakanelodikobo

▪ Go obamela ditshwantsho

▪ Go ratana ga batho ba bong jo bo tshwanang

▪ Bogodu

▪ Go betšha

▪ Botagwa

• “Lo se ka lwa tsiediwa. Go le bagokafadi, le fa e le baobamedi ba medingwana, le fa e le baakafadi, le fa e le banna ba ba beetsweng maikaelelo a e seng a tlholego, le fa e le banna ba ba robalang le banna, le fa e le magodu, le fa e le batho ba ba bogagaru, le fa e le matagwa, le fa e le bagobolodi, le fa e le ba ba tsayang ka dikgoka ga ba na go rua bogosi jwa Modimo.”—1 Bakor. 6:9, 10.

12. O ikemiseditse go dira eng go tila boitsholo bope fela jo bo sa siamang jwa tlhakanelodikobo o ise nyale kgotsa o nyalwe?

• “Tshabang kgokafalo.”—1 Bakor. 6:18.

13. Goreng re sa tshwanela go dirisa dipilisi tse di tshwakgolang kgotsa tse di tagang?

• “Lo ise mebele ya lona setlhabelo se se tshelang, se se boitshepo, se se amogelesegang mo Modimong, e leng tirelo e e boitshepo ka maatla a lona a go akanya. Mme tlogelang go bopega jaaka tsamaiso eno ya dilo, mme lo fetolwe ka go fetola megopolo ya lona, gore lo iponele se thato ya Modimo e e molemo le e e amogelesegang le e e itekanetseng e leng sone.”—Bar. 12:1, 2.

14. Ke meetlo efe ya bodimona e Jehofa a e tlhoileng?

• “Go se ka ga fitlhelwa mo go wena . . . ope yo o dirisang boitseanape, yo o dirang maselamose kgotsa ope yo o batlang ditshupo dipe kgotsa moloi, kgotsa yo o dirisang lefoko la maselamose go kolopa ba bangwe kgotsa ope yo o lopang kgakololo mo go yo o buang le meya kgotsa yo o dirang tiro ya go bolelela ditiragalo pele kgotsa ope yo o botsang baswi.”—Dute. 18:10, 11.

15. Fa mongwe a dirile boleo jo bo masisi mme a batla gore Jehofa a mo itshwarele o tshwanetse go dira eng ka bonako?

• “Ke ne ka ipolela boleo jwa me mo go wena, mme ka se ka ka bipa tlolo ya me. Ke ne ka re: ‘Ke tla ipolela ditlolo tsa me mo go Jehofa.’”—Pes. 32:5.

• “A go na le motho yo o bobolang mo go lona? A a biletse banna ba bagolwane ba phuthego kwa go ene, mme a ba mo rapelele, ba mo tlotse ka leokwane ka leina la ga Jehofa. Mme thapelo ya tumelo e tla fodisa yo o bokoa, e bile Jehofa o tla mo kakatlolola. Gape, fa a dirile maleo, o tla a itshwarelwa.”—Jak. 5:14, 15.

16. Fa o itse gore Mokeresete o dirile boleo jo bo masisi o tshwanetse go dira eng?

• “Jaanong fa go direga gore moya o leofe ka go bo o utlwile go tlhapadiwa phatlalatsa mme e le mosupi kgotsa a bone seo kgotsa a itse ka sone, fa a sa se bege, foo a a arabele tlolo ya gagwe.”—Lefi. 5:1.

17. Re tshwanetse go dirisana jang le motho fa go sena go dirwa kitsiso ya gore ga e tlhole e le mongwe wa Basupi ba ga Jehofa?

• “Lo tlogele go ikopanya le motho yo o bidiwang mokaulengwe yo e leng mogokafadi kgotsa motho yo o bogagaru kgotsa moobamedi wa medingwana kgotsa mogobolodi kgotsa letagwa kgotsa yo o tsayang ka dikgoka, le gone lo se ka lwa ja le motho yo o ntseng jalo.”—1 Bakor. 5:11.

• “Fa mongwe a tla mo go lona mme a sa tlise thuto eno, lo se ka lwa ba lwa mo amogela mo magaeng a lona le ka motlha kgotsa lwa mo dumedisa.”—2 Joh. 10.

18. Goreng ditsala tsa gago e tshwanetse go nna batho ba ba ratang Jehofa?

• “Yo o tsamayang le batho ba ba botlhale o tla nna botlhale, mme yo o dirisanang le dimatla dilo ga di na go mo tsamaela sentle.”—Diane 13:20.

• “Lo se ka lwa tsiediwa. Go itlwaelanya le ba ba bosula go senya mekgwa e e molemo.”—1 Bakor. 15:33.

19. Goreng Basupi ba ga Jehofa ba sa ikamanye le dipolotiki?

• “Ga ba karolo ya lefatshe, fela jaaka nna [Jesu] ke se karolo ya lefatshe.”—Joh. 17:16.

20. Goreng o tshwanetse go ikobela melao ya puso?

• “A moya mongwe le mongwe o nne mo taolong ya balaodi ba bagolo, gonne ga go na taolo epe fa e se ka Modimo; balaodi ba ba leng gone ba eme ba tlhomilwe ke Modimo mo maemong a bone a a lekanyeditsweng.”—Bar. 13:1.

21. Fa molao wa dipuso o le kgatlhanong le molao wa Modimo o tla dira eng?

• “Re tshwanetse go utlwa Modimo e le mmusi bogolo go batho.”—Dit. 5:29.

22. Fa o batla tiro, ke ditemana dife tse di ka go thusang go batla tiro e e seng kgatlhanong le melao ya Modimo?

• “Setšhaba ga se kitla se tsholeletsa setšhaba se sengwe tšhaka, le gone ga ba kitla ba tlhola ba ithuta ntwa gape.”—Mika 4:3.

• “Tswang mo go ene [Babelona o Mogolo], batho ba me, fa lo sa batle go tlhakanela le ene mo maleong a gagwe, le fa lo sa batle go amogela karolo ya dipetso tsa gagwe.”—Tshen. 18:4.

23. Ke boitlosobodutu bofe jo o tshwanetseng go bo tlhopha mme ke bofe jo o tshwanetseng go bo gana?

• “Jehofa . . . o tlhoile ope fela yo o ratang thubakanyo.”—Pes. 11:5.

• “Tlhoang se se boikepo, ngaparelang se se molemo.”—Bar. 12:9.

• “Dilo le fa e le dife tse di boammaaruri, dilo le fa e le dife tse di tsewang ka masisi, dilo le fa e le dife tse di siameng, dilo le fa e le dife tse di itshekileng, dilo le fa e le dife tse di rategang, dilo le fa e le dife tse di buiwang molemo, le fa e le molemo ofe o o gone le selo le fa e le sefe se se tshwanelwang ke pako se se gone, tswelelang lo akanya ka dilo tseno.”—Bafil. 4:8.

24. Goreng Basupi ba ga Jehofa ba sa tlhakanye bodumedi jwa bone le madumedi a mangwe?

• “Ga lo ka ke lwa ja mo ‘tafoleng ya ga Jehofa’ le mo tafoleng ya madimona.”—1 Bakor. 10:21.

• “‘Jalo tswang mo gare ga bone, lo bo lo itomolole,’ go bua Jehofa, ‘mme lo tlogele go ama selo se se seng phepa’; ‘mme ke tla lo amogela.’”—2 Bakor. 6:17.

25. Ke melaometheo efe e e tla go thusang go itse gore a o tshwanetse go keteka meletlo mengwe kgotsa ga o a tshwanela go e keteka?

• “Mme ba tlhakana le ditšhaba Ba ithuta ditiro tsa tsone. Mme ba nna ba direla medingwana ya tsone, Mme ya nna seru mo go bone.”—Pes. 106:35, 36.

• “Baswi bone, ga ba itse sepe gotlhelele.”—Mor. 9:5.

• “Ga ba karolo ya lefatshe, fela jaaka nna ke se karolo ya lefatshe.”—Joh. 17:16.

• “Gonne nako e e fetileng e lekane gore lo bo lo dirile thato ya ditšhaba fa lo ne lo tswelela mo ditirong tsa boitshwaro jo bo repileng, dikeletso tse di fekeetsang, go nwa beine mo go feteletseng, mediro ya ditlhapelo, mekete ya go nwa, le kobamelo e e seng kafa molaong ya medingwana.”—1 Pet. 4:3.

26. Ke dikai dife mo Baebeleng tse di go thusang go itse gore a o tshwanetse go keteka malatsi a botsalo kgotsa jang?

• “Jaanong mo letsatsing la boraro go ne ga diragala gore e bo e le letsatsi la botsalo jwa ga Faro, mme a direla batlhanka botlhe ba gagwe moletlo a ba a tsholetsa tlhogo ya molaodi wa batsholadinwelo le tlhogo ya molaodi wa babesi ba senkgwe mo gare ga batlhanka ba gagwe. Ka gone a busetsa molaodi wa batsholadinwelo kwa tirong ya gagwe ya motsholasenwelo . . . Mme molaodi wa babesi ba senkgwe a mo kaletsa.”—Gen. 40:20-22.

• “Mme e rile letsatsi la go tsalwa ga ga Herode le ketekwa morwadia Herodiase a le binela mme a itumedisa Herode fela thata mo a neng a mo solofetsa ka ikano gore o tla mo naya le fa e le eng se a se kopang. Mme ene, a laetswe ke mmaagwe, a re: ‘Mpha fano mo mogopong tlhogo ya ga Johane Mokolobetsi.’ mme ya roma gore Johane a kgaolwe tlhogo kwa kgolegelong.”—Math. 14:6-8, 10.

27. Goreng o tshwanetse go ikobela kaelo ya bagolwane?

• “Utlwang ba ba etelelang pele mo gare ga lona mme lo ikobe, gonne ba nna ba lebeletse meya ya lona jaaka ba ba tla ikarabelelang; gore ba dire jalo ka boipelo mme e seng ka go fegelwa, gonne seno se ne se tla lo gobatsa.”—Baheb. 13:17.

28. Goreng wena le ba lelapa la gago le tshwanetse go ipeela nako ya go bala le go ithuta Baebele?

• “O natefelelwa ke molao wa ga Jehofa, O balela molao wa gagwe kwa tlase motshegare le bosigo. Mme ruri o tla nna jaaka setlhare se se jetsweng fa melatswaneng ya metsi, Se se ntshang leungo la sone ka paka ya sone Se dikala tsa sone tse di nang le makakaba di sa swabeng, Mme sengwe le sengwe se a se dirang se tla atlega.”—Pes. 1:2, 3.

29. Goreng o rata go ya dipokanong le go tsaya karolo mo go tsone?

• “Ke tla bolela leina la gago mo go bomorwarre; Ke tla go baka mo gare ga phuthego.”—Pes. 22:22.

• “A re akanyetsaneng gore re tlhotlheletsaneng mo loratong le mo ditirong tse di molemo, re sa lese go phuthega mmogo ga rona, jaaka bangwe ba na le mokgwa oo, mme re kgothatsana, mme re dira jalo le go feta e re ka lo bona letsatsi le atamela.”—Baheb. 10:24, 25.

30. Ke tiro efe e e botlhokwa e Jesu a reng dire?

• “Jalo tsamayang mme lo dire batho ba ditšhaba tsotlhe barutwa, lo ba kolobetse . . . , lo ba rute go boloka dilo tsotlhe tse ke di lo laetseng.”—Math. 28:19, 20.

31. Ke boikutlo bofe jo Jehofa a batlang gore re nne le jone fa re thusa bakaulengwe le bokgaitsadi le fa re ntsha meneelo go tshegetsa tiro ya go rera?

• “Tlotla Jehofa ka dilo tsa gago tse di tlhwatlhwakgolo.”—Dia. 3:9.

• “A mongwe le mongwe a dire fela jaaka a sweditse mo pelong ya gagwe, e seng ka go ikgoga fela kgotsa ka go patelelwa, gonne Modimo o rata yo o nayang ka boitumelo.”—2 Bakor. 9:7.

32. Ke mathata afe a Bakeresete ba tla lebanang le one?

• “Go itumela ba ba bogiseditsweng tshiamo, e re ka bogosi jwa magodimo e le jwa bone. Go itumela lona fa batho ba lo kgoba ba bo ba lo bogisa e bile ba bua ka lona selo le fa e ka nna sepe fela se se boikepo ka ntlha ya me, e bile ba aka. Ipeleng lo bo lo tlolake ka boipelo, e re ka maduo a lona a le magolo kwa magodimong; gonne ba ne ba bogisa baporofeti pele ga lona ka tsela eo.”—Math. 5:10-12.

33. Goreng e le tshiamelo e e kgolo go kolobediwa go nna Mosupi wa ga Jehofa?

• “Lefoko la gago mo go nna le nna go itumela le go ipela ga pelo ya me; gonne leina la gago le bidiwa mo go nna, wena Jehofa Modimo.”—Jer. 15:16.