Nna Gone kwa Kopanong ya “Ikanye Jehofa” Ya Kgaolo ya 1987

ABO ke setlhogo se se molemo jang ne seo re nang le sone sa dikopano tsa kgaolo tsa 1987: “Ikanye Yehofa”! Eleruri go ikanya ga rona Jehofa go re tlhaola mo lefatsheng lotlhe. Ba bangwe botlhe ba ikanya dilo tse di ntseng jaaka dikhumo tsa bone, botlhale jwa bone, maatla a bone kana babusi le baeteledipele ba bone ba sepolotiki le babodumedi. Ka bonako botlhe ba ba ntseng jalo ba tla swabisiwa botlhoko.​—Pesalema 146:3, 4.

Go ikanya mongwe kana sengwe go kayang? Go ya ka batlhalosa-mafoko, “Go ikanya go kaya go ikaega ka sengwe kana ka mongwe gotlhelele le ka tlhomamo.”a Ee, ebile eo ke tsela eo re ikutlwang kaga gone. Re baya tsholofelo ya rona mo go Jehofa gotlhelele le ka tsholofelo.

Re tlhokomedisiwa ka mo go tlhokafalang ka gone gore re ikanye Jehofa gantsi-ntsi mo Lefokong la Modimo. Bapesalema ba bolela ka moo ba neng ba ikanya Jehofa ka gone kgapetsa: “Me ke ikanya mo go Yehofa.” “Me ke ne ke ka ikanya wèna, Yehofa.” Mafoko a bone gakolola ka mafoko a nngwe ya dipina tsa Bogosi tsa rona: “Yehofa ke botshabèlō yoa rona, Modimo oa rona eo re ikanyañ mo go ena . . . Yehofa ke kagō ea phemèlō, lehelo la botlhe ba ba siameñ.”​—Pesalema 31:6, 14.

Dikwalo di re laela kgapetsa gore re ikanye Modimo, tse di jaaka: “Ikanye Yehofa, u bo u dihè molemō.” “U ikanye Yehofa ka pelo eotlhe ea gago, me u seka ua ikaèga tlhaloganyō ea gago hèla.” (Pesalema 37:3; Diane 3:5) Lefoko la Modimo gape le re bolelela ka batlhanka ba ba ikanyegang ba ga Jehofa ba duelwa ka ntlha ya go bo ba mo ikantse mo dinakong tsa di pharagobe tse dikgolo. Mogare ba ba ntseng jalo gone go na le Kgosi Hesekia, Ebedimeleke, Bahebera ba bararo, le Daniele.​—2 Dikgosi 18:5; Yeremia 39:18; Daniele 3:28; 6:23.

Re bontsha jang gore re ikanya Jehofa? Tsela e nngwe ke ka go itse Jehofa le go mo reetsa mo Lefokong la gagwe. Jesu Keresete o re neetse tsela eno e e motlhofo: “Batlañ pele Bogosi yoa gagwè, le tshiamō ea gagwè; me dilō ootlhe lo tla di okelèdiwa.” Ee, fa re ikanya Jehofa ka pelo ya rona yotlhe, re baya dikgatlhego tsa Bogosi jwa gagwe kwa pele mo matshelong a rona le go latela tsela ya boitshwaro jo bo siameng.​—Mathaio 6:33.

Ke ka ntlha yang go ikaega ga rona go Jehofa go tshwanela gore go nonofe? Ka ntlha ya dikgatelelo tseo di tlisiwang mo go rona ka nako nngwe le nngwe. Mo go ba bangwe ke pogiso ka tlhamalalo, mo go ba bangwe ke diteko tsa go dira phoso. Mo go ba bangwe gape go ikanya ga bone go lekwa ka phatlafalo ya go itshoka. Go tla ga rona kopanong ya kgaolo ke nngwe ya dithuso tseo Jehofa a ileng a baakanyetsa ka tsone mo metlheng jalo ya bofelo.

Mono ngwaga kopano e tla nna ya malatsi a le mararo a a tletseng, Labotlhano, Matlhatso, le Sontaga. Ka diphetogo mo boleeleng jwa dithulaganyo, thulaganyo eno e tla nna le mo e ka nnang selekanyo se se tshwanang sa dintlha le sa ngwaga tlola. Boikaelelo jwa dikarolo tseno tsa thulaganyo, re ka tlhomamisega, e tla go nonotsha go ikanya ga rona Jehofa gammogo le phuthego ya gagwe e e bonalang eo a e dirisang mo nakong eno.

Jalo a Mosupi mongwe le mongwe wa ga Jehofa Mokeresete a ikemisetse gore a nne gone bobotlana mo go nngwe ya dikopano tseno. Tla le bana ba gago. Nna teng mo pineng e e simololang le thapelo ka Labotlhano mo mosong mme o dule go fitlhela ka e e tswalang le thapelo ka Sontaga Thapama. Tla ka Bibela, buka ya dipina, buka ya go tsaya dintlha, le pensele. Tsena ka botlalo mo moyeng wa seo se neelwang go akareletsa dipina le dithapelo. Tlhokomela ka kelotlhoko seo se neelwang. Mme a re tlhomamiseng gore go ikgabisa le boitshwaro jwa rona ka dinako tsotlhe di seka tsa kgobiwa.

Molao-motheo ono wa Dikwalo, ‘jala ka bogolo, roba ka bogolo,’ o dira mo go nneng gone ga rona kwa Kopanong ya Kgaolo ya “Ikanye Jehofa.” Fa re tsaya thulaganyo eno yotlhe ka tlhoafalo, e tla tsamaya ka masego go tswa mo kopanong eno ebile e tla nna tshegofatso e e kgolwane mo go ba bangwe.​—2 Bakorintha 9:6.

[Ntlha e e kwa tlase]