Dipotso tse di Tswang go Babadi

■ A go siame gore Mokereseke a letlelele loaro lwa wa losika yo o suleng?

Bibela ga e akgele ka tlhamalalo kaga loaro lwa moswi, mme go na le dikgopolo tse dingwe tse di mabapi tsa Bibela tse Mokeresete a ka di seka-sekang. Morago go ka dirwa phetso ya botho go kobilwe se se sedimosiwang ke ditemana tseo le dintlha tsa seemo se go buiwang ka sone.

Loaro lwa moswi ke go tlhatlhoba setopo ka karo (go bua dinama) gore go bonwe se se bakileng loso. Gape go ka neela boikitsiso kaga diphelelo tsa bolwetse kana kafa bo dirang ka teng. Pono ya bodumedi bongwe kaga dikaro tsa baswi e amilwe ke dithuto tse eseng tsa Dikwalo. Ka sekai, encyclopedia ya Katoliki e bolela jaana: “Setopo sa moswi se tshwanetse go tlotliwa fela jaaka moya wa sone wa pele . . . Se tla felela se tsogile le moya wa sone, ka nako ya tsogo ya batho botlhe, se tsogela botshelong jo bosakhutleng . . . Go ka nna ga bo go na le nako e e rileng gareng ga go swa ga motho le go tswa ga moya.” Lefa go ntse jalo, Bibela e bontsha gore fa motho (moya o o tshedileng) a swa, o nna moya o o suleng. (Genesise 2:7; 7:21-23; Lefitiko 21:1, 11) Go tweng ka mmele wa gagwe? Mabapi le “bana ba batho” le “diphōlōhōlō” ka bobedi, re bala jaana: “Me cotlhe di cwa mo mmuñ, me di hetoge mmu gapè.” (Moreri 3:18-20) Ka nako ya tsogo, Modimo ga o na go tsosa mmele o o sa bolong go fetoga lorole fela. mme o tla aba mmele kafa o ratang ka teng.​—Bona 1 Bakorintha 15:38, 47, 48.

Go na le ntlha e nngwe e e ka seka-sekiwang ya pono ya Bibela kaga baswi malebana le loaro lwa baswi. Modimo o ne wa laola Baiseraela jaana: “Lo se ka loa itshegakèla bashwi mebele ea lona, leha e le go ikwala mmele ka gopè: Ke nna Yehofa.” (Lefitiko 19:28; Duteronome 14:1, 2; Yeremia 47:5; Mika 5:1) Ee, batho ba Modimo ba ne ba sa tshwanela go etsa merafe e e ba dikologileng ka go segaka mebele ya bone ba supa go utlwisiwa botlhoko ke baswi lefa e le ka baka la mabaka mangwe a bodumedi jwa maaka. Taolo e tshwanetse gape ya bo e ne ya kgothaletsa Baiseraele go tlotla mebele ya bone jaaka dibopiwa tsa Modimo.​—Pesalema 100:3; 139:14; Yobe 10:8.

Bakeresete ka go tshwana ba tshwanetse go tlotla matshelo a bone le mebele ya bone eo ba e neetsweng ke Modimo, ka tshwanelo. (Baroma 12:1) Bangwe ba feditse ka gore pono eno ya go tlotla mmele e tshwanetse go bopa go akanya ga bone kaga go ariwa ga baswi. Ba ne ba ikutlwa gore kwantle ga fa go na le mabaka mangwe a a pateletsang ka tsela e sele, ba ka bona go le botoka gore setopo sa moratiwa wa losika se seka sa tlhatlhobiwa ka go ariwa. Ba ne ba itse gore mo mafelong mangwe madi a tsewa mo ditopong tse di arilweng go tla go tshelwa mo bathong kana go dirisiwa mo dilong tse dingwe, e le dilo tse ba sa batleng go tsaya karolo mo go tsone.a

Ke ka ntlha yang he fa Bakeresete ba bangwe ba letleletse loaro lwa baswi? Ba lemoga gore Bibela ga e akgele ka tlhamalalo ka mofuta ono wa kalafi. Gape ba ka ne ba lemogile gore mo Egepeto Baiseraele ba ne ba letlelela dingaka tsa Egepeto go omeletsa ditopo tsa bo Jakobe le Josefa, mo go tshwanetseng ga bo go ne ga tlhoka gore go tsewe dikgato dingwe tsa karo go ntsha mateng. (Genesise 50:2, 3, 26) Gompieno mo mabakeng mangwe, molao wa naga o tlhoka gore go diriwe loaro lwa moswi. Ka sekai fa motho yo monana yo o itekanetseng sentle a swa fela go sena lebaka lepe, go ka patelesega gore setopo se tlhatlhobiwe. Ka mo go phepafetseng, fa molao o pateletsa gore go dirwe loaro lwa moswi, Bakeresete ba gakologelwa kgakololo ya ‘go ineela mo babusing ba bagolo.’​—Baroma 13:1, 7; Mathaio 22:21.

Le eleng mo kgannyeng ya motho yo o neng a tlhokometswe ke ngaka, mme ka gone go itsiwe se se ka neng se bakile loso go ariwa ga moswi go ka nna ga neela tshedimosetso e e mosola. Bana ba ba swetsweng ba ka batla go itse se tota se bakileng loso e le gore ba oketse boikitsiso jwa bone jwa seemo sa kalafi sa lelapa la bone. Boikitsiso jo bo ntseng jalo bo ka ama kalafi ya bone kana tsela ya bone ya botshelo ya isagwe. Gape, go na le mabaka a mangwe a go bo bangwe ba letleletse loaro lwa moswi. Pego ya go tlhatlhobiwa ga setopo e e dirwang ka go ithutiwa ga ditogwa tsa mmele e ka thusa lelapa go tshwanelegela ditshwanelo tsa baswelwa, jaaka ka go neela bosupi jwa bolwetse jwa makgwafo a a ntshofetseng jo bo amanang le moepo wa magala. Bangwe ba bile ba bona gore loaro lwa moswi le ka oketsa kagiso ya mogopolo wa bone ka go ba thusa go tlhaloganya seo se bakileng kana se sa bakang loso lwa moratiwa. Batho ba eseng ba lapa le bone ba ka kopanyelediwa. Ba-losika ba ka bona gore go letlelela loaro lwa moswi go ka thusa ngaka go tlhaloganya se se bakileng bolwetse, mme he a kgone go ka alafa ba bangwe botoka.

Ka baka la seo, go a tshwanela gore Bakeresete ba tlotle mebele ya bone, mme go na le dintlha tse dingwe tse ba ka di seka-sekang mo go direng phetso ya fa e le gore a ba ka letlelela loaro lwa moswi kana nnyaa mo boemong jo bo rileng.

[Ntlha e e kwa tlase]