Go Bontsha Boikanyegi Jwa Bokeresete mo New Caledonia

DILO di ne di sa iketla mo paradaiseng Masimologofng a 1985, tsogologelane ya sepolotiki e ne e bolaile batho ba le 20 mo setlhaketlhakeng sa South Paciñc sa New Caledonia. Seno se ne sa dira gore makasine wa Maclean’s o akgele ka go re: Setlhaketlhake seno se setse se simolola go tshwana le Northern Ireland, se kgaoganye ka makgamu a mabedi a a tlhomeletseng fela thata a a bileng a ilana.”

Seemo se ne se bifile mo go maswe ka January 1985 mo eleng gore Tautona wa France ebong François Mitterrand o ne a itlhaganela ka bofefo go tswa bogareng jwa lefatshe mo loetong lo lo sa rulaganyediwang la Matlhatso go ya kwa Nouméa, motsemogolo wa setlhaketlhake seo. Baagi ba setlhaketlhake seo, ba sa dumalane mo go se ba se ratang, ba ne ba tlhoafaletse go ntshetsa maikutlo a bone kwantle mo loetong lwa gagwe. Baagi ba pele, ba kgoromediwa ke baeteledipele ba bodumedi ba bile ba batla go ngaparela go tlholega ga bone ga bo-Melanesia, ba ne ba leka ka natla go fedisa puso ya France ya dingwaga tse di fetang 130. Mo letlhakoreng je lengwe, ditlogolwana tse dintsi tsa Polynesia wa Yuropa le baagedi ba Asia, le eleng ba-Melanesia, ba ne ba supa fa ba rata puso ya France ba bile ba buelela gore puso ya yone e tswelele.

Fa dilo di eme jalo, ka one Matlhatso ao, Basupi ba ga Jehofa ba le 1 561 le ditsala tsa bone ba ne ba phuthegile mo Nouméa go supa boikanyegi jwa bone phatlalatsa Lefa go ntse jalo, boikanyegi jwa bone e ne e se jwa setlhopha sepe sa lotso kana puso ya selefatshe; e ne e le go ikanyega mo Bogosing jo bo tlhomilweng jwa Modimo. Go ne go diragetse jang gore ba bo ba le mo Nouméa mo letsatsing leno? Mme ebile, go ne go diragetse jang gore ba bo ba le mo New Caledonia tota?

Ditshimologo tsa Boikanyegi jwa Bokeresete

New Caledonia e na le seo o ka se lebelelang ka paradaise ya South Pacific​—e na le maemo a loapi a a itumedisang mo ngwageng yotlhe, maungo a a nonneng a a rokotsang mathe, dijwalo tse dintsi tse di kgatlhang fa di lejwa, le motswako wa mebala e mentle wa batho ba Melanesia, ba Polynesia, ba Asia, le ba Yuropa ba ba 150 000.

E ne ya bonwa ka 1774 ke Captain James Cook, mosepela-lewatle yo o itsegeng wa Britain le motlhotlhomisi, mme ya nna lefatshe le le busiwang ke Franoe ka 1853. Ba ba neng ba sala morago batlhotlhomisi ba ntlha le babapatsi ka bonako fela e ne e le barongwa ba La-Bodumedi. Batho ba ba neng ba ba ñtlhela koo ka phepafalo ba ne ba tlhoka go gololwa mo ditirong dingwe tse di sa siamang. Barongwa ba ne ba atlega, ka sekai, mo go fediseng go jewa ga batho. Gape ba ne ba itsise batho Bibela ba bo ba e ranolela mo dipuong tse nne tsa lefelo leo. Ka mo go akgolegang, ba ne ba akareletsa leina la Modimo, ba le ranola Iehova kana Jehova ka puo ya lefelo leo. Lefa go ntse jalo, go ne go tlhokega mo gontsi.

Ka bo-1930 setlhopha sa Basupi ba ga Jehofa se ne sa tsaya loeto la lewatle se feta ka Loyalty Islands se gasa dibuka tsa Bibela. Magareng a bo-1950 Basupi ba sekae ba Australia ba ne ba fudugela kwa New Caledonia. Lemororo ba ne ba kobiwa morago, tiro e ne ya atlega, mme ka 1967 palo ya Basupi ba lefelo leo e ne e godile go feta lekgolo. Ka 1976 Mokgatlho wa Watch Tower o ne wa tlhoma ofisi ya lekala mo Nouméa wa ba wa tlhokomela go agiwa ga Holo ya ntlha ya Bogosi ya setlhaketlhake seo.a

Bogolo jang fa e sale nako eo, go dirilwe kgatelo-pele e kgolo mo go phutheng babusiwa ba ba ikanyegang ba Bogosi jo bo tlhomilweng jwa ga Jehofa mo ditlhopheng tsa ditso tsotlhe tse di farologaneng tsa naga eo. Ka sekai, batho ba le 17 000 ba Wallis le Futuna​—ditlhaketlhake tse dipotlana tse di kwa bokone jwa Fiji—​di nna mo New Caledonia. Bontsi jwa batho bano ba Wallis ke Bakatoliki ba bile ba ineetse ka botlalo mo kerekeng ya bone. Mme boikutlo jwa bone bo ntse bo fetoga ka jaana bontsi-ntsi jwa bone ba simolola go reetsa molaetsa wa Bogosi. Moruti mongwe, ka go tenwa ke seno, o ne a roma mosadi yo o neng a tlhokomela madi a kereke go ya go “busa dinku gore di seka tsa timela.” Lefa go ntse jalo, le ene o ne a reetsa. Go tswa foo morwadie, yo o neng a ithutela go nna morongwa kwa Rome, o ne a boela gae mme a amogela boammaaruri jwa Bibela jo bo rutwang ke Basupi ba ga Jehofa. Jaanong ene gammogo le mmaagwe ke Basupi ba ba ineetseng, ba ba ikanyegang.

Gompieno Basupi ba itsege gongwe le gongwe mo ditlhaketlhakeng tseno; mo mafelong mangwe, Mosupi a le mongwefela a lebanywe ke batho ba le 80. Mo setlhaketlhakeng sa Lifou, mmetli mongwe yo mmotlana o ne a tsena kereke ya Pentecostal. O ne a tsamaya le metse yotlhe, a itsise gore Keresete o ne a tla boela mo setlhaketlhakeng seo a bonala. Go supa tumelo ga gagwe ya gore dikhumo tsa dilo tse di bonalang di ne di sena mosola, o ne a tshuba phatlalatsa diaparo tsa gagwe le madi. Mme o ne a kgatlhegela se a neng a se bala mo pampitshaneng nngwe e e gatisitsweng ke Basupi ba ga Jehofa. Thuto ya Bibela ya ka metlha e ne ya mo thusa go nna le kitso ya boammaaruri ya Lefoko la Modimo. Gompieno, ke Mokeresete yo o leka-lekaneng, modihedi wa nako e e tletseng.

Go Ikanyega mo Bogosing jwa Modimo Tlase ga Teko

Tsogologelano ya sepolotiki le maemo a a tlhakatlhakaneng a a neng a tsoga ka 1984 a ne a direla bontsi jwa batho ba New Caledonia mathata, go kopanyeletsa le Basupi. Bangwe ba bano ba ne ba kgobokanelwa ba bo ba itewa fa ba ntse ba rera. Banna ba le bararo ba ne ba tsena mo legaeng la Mosupi mongwe, ba pateletsa monna yoo go ba neela dinotlolo tsa kara ya gagwe ba mo supile ka tlhobolo, mme morago ba utswa kara ya gagwe. Morongwa mongwe o ne a lemoga fa kara ya gagwe e ne ya tshubiwa ka molelo ya ba ya senngwa fa a santse a tshwere thuto ya Bibela.

Lefa baagi ba setlhaketlhake seo ba farologane mo boikanyegong jwa bone, Basupi bone​—go sa kgathalesege setlhopha sa lotso la bone—​ba bopagane mo boemong jwa bone jwa boitlhaodi. Baruti, ka ba tseneletse mo bopolotiking, ba dirisitse maemo a jaanong a ditsogologelano go tsosa go ilwa ga Basupi. Ka sekai, Basupi ba ba yang go tsaya batho ba ba kgatlhegang ka dikoloi go ya pokanong ba ne ba emisiwa. Molebedi wa bone yo o etang, yo o neng a ba etetse mo bekeng eo, o ne a swatolwa mo go nngwe ya dikara tse pedi mme a itewa, digalase tsa gagwe tsa matlho di ne tsa thubiwa. Motho mongwe yo o kgatlhegang o ne a kgoromelediwa go bapa le lebota mme a itewa go fitlhela tlhogo ya gagwe e tswa madi, mosadi wa gagwe yo o moimana a patelediwa go lebelela seo.

Lefa go le jalo Basupi ba itse gore boikanyegi jwa bone bo tlhamaletse Ba gakologelwa mafoko a ga Paulo a a reng: “Le botlhe ba ba ratañ go tshela ka poihōmodimo mo go Keresete Yesu ba tla bōna pogishō.”​—2 Timotheo 3:12; bona gape le Mathaio 10:16.

Ba Oketsega ka Boikanyegi go sa Kgathalesege Ditsogologelano

Magareng a 1984 Basupi ba ne ba bona go tlhokega go aga Holo ya Dikopano. Setsha se se tshwanetseng se ne sa bonwa mo thabeng e e lebaganeng le boemelo jwa dikepe jwa Nouméa, mme tiro e ne ya simololwa ka September. Mme ka November, ka baka la ditsogologelano tsa sepolotiki, balaodi ba ne ba thibelela batho mo matlong, gape go ne ga simololwa seemo sa tshoganetso Go sa kgathalesege mathata ano, Basupi go tswa mo setlhaketlhakeng seo sotlhe ba ne ba arabela tlhokegong ya thuso kwa lefelong la kago. Baithaopi ba ba ka nnang 400 ba ne ba tla ka nako e le nngwefela, mo go neng ga gakgamatsa babogedi Ereka tiro ya go aga e ne ya diragala mo malatsing a bofelo a boikhutso a dikole, basha ba le bantsi ba ne ba thusa. Mosetsanyana mongwe yo mmotlana o ne a re: “Seno e nnile boikhutso jo bo molemo go gaisa jotlhe jo ke kileng ka nna najo.” Mme go bona mosadi yo o dingwaga tse 60 wa Mosupi a tlhakanya semente le matlapana ka garawe go dira motswako wa konkoreiti go ne go lekanye go gakgamatsa moagi mongwe le mongwe yo o rutilweng!

Tiro e ne ya wediwa morago ga dikgwedi di le nne fela. Dithulaganyo tsa kgakolo di ne tsa dirwa, mme di ne tsa thulana le one mafelobeke a loeto lo lo sa lebelelwang la ga Mitterrand! Ka baka la boemo jwa bopolotiki jo bo neng bo ka nna jwa ya magoletsa, balaodi ba ne ba kopa gore Basupi ba tlosolose thulaganyo ya bone. Lefa go ntse jalo, molaodi wa ba pabalesego, yo o neng a kile a bona kopano ya Basupi mo France, o ne a ba raya a re: “Ke a lo itse batho ke lona. Re tla bo re sena mathata le lona. Lona itlhokomeleng kafa go tlhokegang ka teng fela; ga re na go kgoreletsana le dipokano tsa lona.”

Go ne ga tla batho ba feta 1 500 kwa thulaganyong e e molemo ya kgakolo, e e neng ya fela ka puo ya kgakolo e e neng ya neelwa ke Lyman Swingle, leloko le le etileng la Setlhopha se se Laolang sa Basupi ba ga Jehofa. Batla-pokanong eno, go sa kgathalesege tsogologelane ya batho ba lefatshe leo, ba ne ba supa go ikanyega mo Bogosing jwa ga Jehofa, boikanyegi jo bo ungwang mo New Caledonia. Go ñtlheletswe tlhora e ntšha ya baboledi ba Bogosi ba le 889, mme ditebelelo tsa koketsego e nngwe gape di dikgolo tota. Bosupi jwa seno bo ka bonwa mo palong ya batla-segopotsong sa loso la ga Keresete ba ba neng ba le 2 145 ka 1986.

Tiragalo ya bosheng ya tsogologelano ya sepolotiki e bontsha ka phepafalo gore bontsi jwa batho ba New Caledonia ba lebile go babusi ba batho go rarabolola mathata a bone. Mme ga go a nna jalo ka ba ba ikanyegang mo Bogosing jwa Modimo, ba tshepileng puso ya Modimo ka botlalo. Gareng ga mathata ano, go ne ga bonwa letshwao lengwe mo tseleng e kgolo e e kafa losing le le kafa botlhaba le le reng: “A Jehofa a Tswe!” Mme Jehofa, jaaka a emelwa ke Bogosi jwa gagwe jo bo tlhomilweng, o nnetse ruri. Ebile go ntse jalo le ka ‘baikanyegi ba gagwe.’​—Pesalema 37:28; bona gape le Pes 37:9-11, 22, 29, le 34.

[Dintlha tse di kwa tlase]

[Dimmapa mo go tsebe 25]

(Go bona mokwalo o o feletseng, leba kgatiso)

AUSTRALIA

[Mmapa]

NEW CALEDONIA

Lifou

LOYALTY ISLANDS

Nouméa