Go Ikanyega go Raya Eng?

GO IKANYEGA go raya go nna boammaaruri le go sa tsietse. Go ikanyega go raya gore o nne tekatekanyo fa o dirisanya le ba bangwe—o dira ka tlhamalalo, ka tsela e e tlotlegang, o se motsietsi kana moaki. Motho yo o ikanyegang ke yo o thokgamo. Ka go bo a le boikanngo ka metlha yotlhe, ga a kitla a tsietsa mogagabo. Rotlhe re batla go tshwarwa jalo, a ga go jalo? A mme he boikanyego le ka motlha bo ka nna jo bo sa tlholeng bo bereka?

Mokeresete o akofa a bona mo ditlhalosong tse di fa godimo gore ke ka ntlhayang fa mongwe le mongwe yo o iphakang gore ke moobamedi wa boammaaruri a tshwanetse go nna motho yo o ikanyegang. (Yohane 4:24) O obamela “Yehofa . . . Modimo oa boamarure.” (Pesalema 31:5; Tito 1:2) Ka mo go utlwalang, ke “banna ba boammaaruri” fela ba ba tshwanelegang go mo emela.—Ekesodo 18:21, New World Translation Reference Bible, mokwalo o o kwa tlase.

Boikanyego bo ama dikarolo di le dintsi tsa matshelo a rona, jalo go a utlwala gore ke eng fa moaposetoloi Paulo a ne a re: “Re eletsa go tshela ka go tlhōka macoketsane [boikanyego] mo diloñ cotlhe.” Seo se akareletsa go bua ga rona, tiro, dikgang tsa mo lapeng, ditirisano tsa rona tsa kgwebo, le mo go dirisaneng lefa e ka nna patlafalo efe e puso e e bayang mo go rona kafa molaong.—Bahebera 13:18.

Mo Go se Re se Buang

Go na le ditsela di le dintsi—lemororo gantsi di lejwa jaaka tse di senang molato ebile di amogelesega—tseo batho ba sa bueng boammaaruri mo go tsone. Ba bua maaka ka dioura tseo ba di berekileng mo tirong, ba raya bana ba re ba bolelele batho maaka, ba neela baemedi ba inšhorense disetatemente tse di phoso, ba bua maaka ba re baa lwala gore ba tle ba seka ba ya go theogela, fa re umaka fela di sekae.

Fa gongwe seo re se bolelelang ba bangwe se tshwanetse go kwadiwa. Ka mabaka mangwe, batho bao le ka motlha ba ka sekeng ba bue maaka ka molomo ba ikutlwa gore ke selo se se farologanyeng fa ba bega dipoelo tsa bone gore ba kgethisiwe kana ba kwalela ba kgethiso-dithoto dilwana tse ba di rekileng fa ba le mo molelwaneng wa mafatshe-fatshe. Go tsietsa mono go ja makgetho a batho. A seo ke lorato lwa mmannete lwa moagelani? Mme gape, a Bakeresete ga ba tlamege go ‘ntshetsa Kaesara dilo tse eleng tsa ga Kaesara’?—Luke 20:25; 10:27; bona gape Baroma 13:1, 2, 7, 8.

Mo go se re se buang, ruri re batla go etsa “Modimo oa boamarure,” eseng “rra aōna maaka.” (Pesalema 31:5; Yohane 8:44) Batho ba ba pelo e thata ba ka nna ba bua tshokamo go timetsa le go tsietsa. Mme fa re aketsa moagelani wa rona ga se go mo rata. Kwantle ga moo, baaki ga ba na isagwe epe ya mmannete.—Baefesia 4:25; Tshenolō 21:27; 22:15.

Mo Tirong

Go dira tiro ka boikanyego gore o bone tuelo e e amogelwang ke patlafalo e e utlwalang e e kafa Dikwalong. (Bakolosa 3:22-24) Lefa go le jalo, go na le diketekete tsa bautswa-nako bao ba senyang nako ya khampani ka maitapoloso a maleele, bao ba tlang tirong morago ga nako le go emelela pele ga nako, bao ba senyang nako e ntsi ba ipaakanya mo mmeleng morago ga go goroga kwa tirong, bao ba itirisetsang founo ya kwa tirong ka nako e telele ba sa letlelelwa, bao ba tsamaisang dikgwebo tsa bone ka nako ya tiro, le eleng go ja boroko mo tirong. Go utswa ga bone go tlhatlosetsa mongwe le mongwe ditlhwatlhwa.

Mefuta e mengwe ya bogodu mo tirong e akareletsa go itseela didirisiwa le dilwana. Ba bangwe ba re seno ga se sepe fela fa e se go ituela ka ntlha ya go bo ba duelwa madi a a kwa tlase, jaaka ekete ba itepatepanya le mohiri yo o sonaga! Mme fa go itseelwa dilo kwantle ga kitso kana tetlelelo ya mong kana mohiri, seo tota ke tsela e nngwe ya go utswa.

Mo maemong ano otlhe, Mokeresete wa boammaaruri o tla dirisa kgakololo e e tlhotlheleditsweng: “Eo o ucwileñ a a se tlhole a ucwa: me bogolo . . . a a dihè se se molemō ka diatla tsa gagwè, gore a tlè a dihanè le se o ka se naeañ eo o tlhōkañ.”—Baefesia 4:28; Ditihō 20:35.

Lefa go le jalo, go tweng fa e le gore mohiri wa gago o go kopa gore o dire tiro nngwe ya boikanyologi kana e e seng kafa molaong mme a go tshosetsa ka gore o tla go leleka fa o ka seka wa dira jalo? Dingwe tsa dikai ke tseno: A re o lope madi mo mothong gore o tsentse tshipi e ntšha ya koloi mme gone go sa nna jalo; a re o tsenye dilwana tsa tlhotlhwa e potlana, le tse di seng thata mo dibokosong gore bareki ba tle ba lopiwe madi a a kwa godimo; a re o kwale gore “ditlhotlhwa di ile kwa tlase” mo dilwaneng, ntswa gone ditlhotlhwa tsa pele di ne di tshwana fela kana le eleng go nna kwa tlase. Bahiriwa ba le bantsi ba ka nna ba leba seno jaaka boikarabelo jwa mohiri, mme eseng jwa mmereki. Ke eng se Basupi ba ga Jehofa ba se dirileng fa ba ne ba lebagane le boemo jo bo ntseng jalo? Daryl J o anela jaana:

“Fa ke ntse ke bereka jaaka motsamaisa-kgwebo mo lebenkeleng la dijo, ke ne ka atamelwa ke batsamaisi ba kgwebo mme ba nkopa gore ke oketse dipoelo kwantle ga go tlhatlosa ditlhwatlhwa. Go dira seno, ba ne ba nkakantsha jaana: Ke tlhatlose bokete jwa dilwana dingwe, mme ke dire ditlankana ‘tsa maaka’ tsa patlo-madi go barekisi. Ke ditiro tse di tlwaelesegileng mme ke tsa boikanyologi.”

Daryl o ne a gana go bua se eseng sone le go tsietsa. (Diane 20:23) Dibeke di sekaenyana moragonyana o ne a lelekwa mo tirong. A o ne a se botlhale go dira gore lelapa la gagwe le tlhagelwe ke mathata ka ntlha ya go tlhoka tiro? A o ne a ikotlhaela go bo a ne a ikanyega? Nnyaa, ka go bo e ne ya re fa Mosupi yo mongwe a utlwalela se se neng se diragetse, a mo fa tiro. Daryl a re: “Mo dibekeng di ka nna tharo go ya go tse nne, ke ne ke boetse gape ke itlamela le balelapa la me mme ka tsela ya boikanyego. Ke go tsaya e le tshiamelo e e molemo go segofadiwa ke Jehofa ka ntlha ya bothokgami jwa me mo go ene.”

Mo letlhakoreng je lengwe, o ka nna wa bona tiro ka ntlha ya go bo o le boikanyego. Modiri mongwe mo khampaneng ya inšhorense ya mafatshe-fatshe o ne a gakolola mong wa lebenkele le le tswelelang sentle mo kgwebong mo Toronto, Canada, go fedisa bothata jwa gagwe jwa go utswelwa ke babereki ka go hira Basupi ba ga Jehofa. Modiri yoo o ne a tlhalosa ka go re: ‘Fa ke ntse ke le mo toropong e nngwe ke thapisediwa tiro ya me ya inšhorense, ke ne ka fitlhela gore gareng ga badirelwa ba bone go ne go na le mogolagang o mogolo wa marekisetso o o neng o thapile Basupi ba ga Jehofa fela go paka dilwana mo dishelofong bosigo. Ba ne ba ile ba latlhegelwa thata ka ntlha ya badiri ba bangwe mme fa e sale ba neela Basupi dilotlele mo bosigong gore ba pake dilwana ga baa latlhegelwa lefa e le ke sepe.’

Ditsela tse Dingwe tsa go Ikanyega

Fa moadimi a santse a adima madi, gantsi o bontsha boikokobetso le tlotlo, mme ebile o bua mafoko a a tiisetsang gore o tla busa madi le gore o lebogela thuso eo. Mme fa nako e tla gore a duele sekoloto seo, baadimi bangwe ba tlelwa ke boikutlo jwa go nna batho ba ba sa tlhaloganyesegeng. Jalo he ke gantsi o tla fitlhelang ba galefile, ba le letlhoo, ba ngongorega ka gore ba setswe morago go re ba duele, le go bolela gore moadimi ga a na pelotlhomogi. Mo matlhong a moadingwi, moadimi yo o pelotshweu o fetogile jaanong o tshwana le mmaba! Lefa go le jalo, Bibela e bolela gore ‘moadimi yo o sa buseng o boikepo.’ (Pesalema 37:21; Baroma 13:8) Seno se tla nna jalo segolo bogolo fa e le gore moadingwi ga a dire maiteko ape go ntsha le eleng tuelo e potlana go bontsha bomolemo, mme ebile gongwe a sa dire maiteko ape go buisanya le moadimi.

Mo lelapeng, boikanyegi bo tlhokafala mo dikgannyeng di le dintsi: Tlhogo ya lelapa o tshwanetse go bolelela mosadi wa gagwe boammaaruri kaga madi a a a amogelang le tiriso ya madi; mosadi ene o tshwanetse go supa boikanyego mo go ene kafa a dirisang madi a lelapa ka gone; botlhe ba tshwanetse go nna batho ba ba thokgamo, go akareletsa le gore ba tlhakanele dikobo ba le bosi fela; go tshwanetse gore bana ba nne boammaaruri le go utlwa ditaolo tsa batsadi ba bone kaga ditsala tsa bone le mefuta ya boitloso-bodutu.—Baefesia 5:33; 6:1-3.

Mo go tsotlhe tse di boletsweng, go tshwanetse ga phepafala sentle gore Mokeresete wa mmannete o tshwanetse go ‘kgaogana le tshiamololo’—ditiro tse di boikepo le loungo lo lo bosula lo lo tsamayang mmogo le boikanyologi, go aka, go fora, go tsietsa, le tshenyego ya boitsholo.—2 Timotheo 2:19; Baroma 2:21-24.

Dituelo le Melemo

Go dira ka tekatekanyo le ka tlhamalalo, le go nna boammaaruri mo go ba bangwe, di kgothaletsa boikanyego. Ka gone, go nna le moya wa go ikanyana le go tshepana, mme seo se felela ka boikutlo jo bo phepa le dikamano tse di molemo. Boikanyego gape bo tlhagisa seemo sa go tshela ka thokgamo, go sena boiphemelo bope jo bo jang nako le dinonofo ka ntlha ya go sa tshepane, dipelaelelano, le go boifa ba bangwe.—Bapisa Isaia 35:8-10.

Boikanyego bo dira gore re nne le segakolodi se se phepa, seo se tlhokafalang thata gore re nne re ‘direle Modimo o o tshedileng tirelo e e boitshepo.’ (Bahebera 9:14; 1 Timotheo 1:19) Go ritibatsa motho mogopolo, go dira gore a robale sentle bosigo. O ka kgona go dirisanya le ba bangwe kwantle ga ditlhong. Fa motho a le boikanyego seo se fedisa gore a bo a na le poifo e e tshwenyang ya gore o ka nna a tshwarwa mo bosuleng. Ka tsela eno re nna batho ba ba nang le seriti le ba ba itlotlang. Seo go ka bolelwa jang gore ga se sa tlhola se bereka kana ga se dire?

Ka gone, go na le dituelo di le dintsi tsa jaanong le melemo e re tla e bonang le e e tla bonwang ke ba bangwe fa re le batho ba ba ikanyegang. Lefa go ntse jalo, go di feta tsotlhe, re tshwanetse go batla go ikanyega e se fela ka go bo e le tsela e e di fetang tsotlhe kana ka go bo re laelwa gore re ikanyege mme e le ka go bo re rata Rraarona Jehofa. Re batla go tshegetsa kamano ya rona e e tlhokegang thata le ene mme le gore a re amogele. Mme ebile gape re batla go ikanyega ka go bo re a bo re bontsha gore re rata wa ga rona. Ka jalo, ga motlhofo fela, go nna Mokeresete wa boammaaruri go raya go ikanyega.—Mathaio 22:36-39.

Mopesalema o re: “Yehofa, e mañ eo o tla tlhōla tlhōlañ mo motlaaganeñ oa gago? e mañ eo tla agañ mo thabaneñ ea gago e e boitshèpō? Ke motho eo o tsamaeañ ka thōkgamō, a diha tshiamō, a bile a bua boamarure mo peduñ ea gagwè. . . . leha e le go dihèla tsala ea gagwè boshula.” (Pesalema 15:1-3) Fa re tshela matshelo a go ikanyega jaaka baobamedi ba ga Jehofa, e tla re fa kafa tshwanelong a fedisa tsamaiso ya jaanong e e sa siamang lefa ‘boago jwa Modimo bo tla bo bo le mo bathong,’ re tla nna gareng ga bao ba tla ipelelang masego a go ya go ile jaaka ‘baeng ba gagwe.’ Mme he le ka motlha ga re kitla re nna ba ba feletsweng ke nako!—Tshenolō 21:1-5.

[Lebokoso mo go tsebe 5]

A O ka Kgona go Fenya Kgwetlho ya Boikanyego Jwa Gago?

Lefatshe le re nnang mo go lone le gwetlha tumelo ya rona le boikemisetso jwa rona go dira se se siameng. Le ntse ka tsela eo le gatelelang gore re iketeletse kwa pele, le eleng ka go tlhokomologa ba bangwe.

A ke pono ya gago e e pelo e phepa ya gore boikanyego ke tsela e e di fetang tsotlhe? A tumelo ya gago e nonofile thata mo eleng gore e tla go boloka o ikanyega fa o tlelwa ke dikgatelelo le teko? Ka sekai, o ne o tla dirang fa:

◻ Morago ga o sena go tlhoka tiro ka dikgwedi di le dintsi, o bona namane e tona ya madi ao a ka duelelang dikoloto tsa gago a bo a go salele?

◻ Go tsietsa mo ditlhatlhobong tse di botlhokwatlhokwa mo sekolong sa gago e le yone fela tsela e o ka bonang maduo a a kwa godimo ka yone mme seo se ka tlhomamisa itsholelo ya gago ya isagwe?

◻ Gore o tle o itsiwe jaaka moitseanape go tlhokafala gore o fetole mokwalo wa gago wa patlisiso gore e tle pego ya gago e gatisiwe?

◻ Fa o ntse o le mo malatsing a boikhutso mo nageng e nngwe, o reka selwana se se madi a a kwa godimo ka tlhotlhwa e e kwa tlase mme go se bega kwa molelwaneng go tla tlhoka gore o duele lekgetho le le kwa godimo?

[Lebokoso mo go tsebe 6]

Ditiro tsa Boikanyego ga di a Felelwa ke Nako

A batho ba santse ba amega kaga ba gagabo? Ee, lemororo dikoranta di bega ka ditiro tsa boikanyego jaaka ekete di ne di sa tlwaelesega mme ka gone di tshwanetse go begwa mo dikgannyeng.

Mapodise mo Fort Wayne, Indiana, U.S.A., ba ne ba leka go okisa magodu ka go tsenya TV ya madi a a kwa godimo mo kareng e e sa lotlelwang. Ba ne ba lebelela ka dibeke di le mmalwa go bona se se tla diragalang. “Se re neng ra se bona fela e ne e le batho bao e reng ba feta fa kareng ba lebe mo teng mme ba bone TV, ba bule lebati, ba lotlele lebati, ba le tswale mme ba tsamae.” Ka go dira jalo ba ne ba bontsha boikanyegi.

Setlhogo sengwe sa koranta ya Canada se ne sa bolela kaga go busiwa ga madi a a neng a latlhegile ka ntlha ya phelelo e e molemo e e nnang gone ka ntlha ya thuto ya Bibela:

“Basamaria ba ba Molemo ba sireletsa maitapoloso.”—The Windsor Star

“Pat yo o ikanyegang o busitse $421 [R628].”—The Spectator

“Go busiwa ga $983 [R1 467] go tsosolosa tumelo ya mogwebi.”—The Toronto Star

Mo dipakeng tseno tsotlhe, ba ba neng ba busa madi a a neng a latlhegile e ne e le Basupi ba ga Jehofa. Mo go ya ntlha, Basupi ba le babedi ba babotlana bao ba neng ba le mo bodiheding jwa ntlo le ntlo ba ne ba sela sepatšhe mme ba se busetsa mosadi mongwe. O ne a re: “Ke akanya gore basimane bao ke ba ba thata go bonwa. . . . Tota, seo ruri se tsosolosa tumelo ya gago mo bothong jwa batho.” E re ka a ne a tswa ka kwantle ga toropo, go ka bo go ile ga nna motlhofo fela mo basheng bao go ipolokela madi ao, mme ba ne ba re: “E ne e se sepe. Re ne re direla mongwe selo se se molemo.”

Pego ya bobedi le yone e ne e ama moeti. “Mme thaelo e ne ya seka ya etsaetsisa mogopolo wa [yo o setseng],” koranta ya bega. Mosedi o ne a tlhalosa gore o ne a le mongwe wa Basupi ba ga Jehofa, “mme re dumela thata-thata mo boikanyegong.”

Mo kgannyeng ya boraro, motho yo o neng a latlhegelwa ke madi “o ne a ipolela gore o ne a setse a latlhegetswe ke tumelo gotlhelele mo bathong ka kakaretso.” Monna wa Mosupi mongwe yo o neng a sela sephuthelo sa pampiri ya madi o ne a bolelela mmegi wa dikgang gore go gogwa ke Bibela e ne e le sone sephiri sa teng: “Seo se ne sa tlhofofaletsa mosadi wa me” go a busa.

Mo kgannyeng e nngwe, Basupi bangwe ba babedi ba ba neng ba ntse ba tsamaya ka ntlo le ntlo ba ne ba sela enfelopo e e neng e na le madi a tuelo. Fa ba e isa kwa mapodiseng a lefelo leo, ramapodise yo o neng a le mo tirong o ne a bolela gore ga go ise go ko go nne le pego epe kaga madi a a latlhegileng. Mosupi o ne a akantsha gore seno se anamisiwe mo seteitšhaneng sa radio ya lefelo leo. Lepodise le ne la lebega le tsietsegile. O ne a re: “O dira maiteko a mantsi go busa madi ano. O wa kereke efe?” Fa Mosupi a araba, ramapodise o ne a re: “Ke ne ke ntse ke akantse jalo, ka go bo ke lona fela ba ba ikanyegang go ka dira maiteko a a ntseng jalo.”

Fa mongwe wa Basupi ba ga Jehofa a ntse a tsamaya ka ntlo le ntlo ebong W. K——, o ne a kgatlhantshiwa ke kopo nngwe e e sa tlwaelesegang. Monna mongwe le mosadi wa gagwe mo ntlong eo ba ne ba lwala thata mme ba tshwanetse go ya go baya madi kwa bankeng mo tsatsing leo. Ba ne ba kopa gore a Mosupi o ne a ka ba direla jalo. Fa a sena go dumalana, o ne a neelwa $2 000 (R4 000) wa madi a dipampiri go a isa kwa bankeng. Fa a boa kwa bankeng, o ne a patelesega go botsa ka go re: “Ke eng fa o inkanya mme gone o sa nkitse?” O ne a araba ka go re: “Re a itse, mongwe le mongwe o a itse, gore Basupi ba ga Jehofa ke bone fela ba o ka ba ikanyang.”

Lemororo ruriruri go na le batho ba ba ikanyegang ba ba fitlhelwang mo mafatsheng a mangwe otlhe, gammogo le Basupi ba ga Jehofa, go bonala gore tota ke ba ba thata go bonwa mo eleng gore go tshwanela gore go buiwe ka bone. Abo re ka leboga jang ne go bo thuto ya Bibela kaga boikanyego e tlhagisitse matswela a a mosola le a a dirang!