Dikopano tsa Kgaolo tsa “Tshiamiso ya Modimo”
ABO go na le pogo e ntsi jang ne mo lefatsheng ka ntlha ya go tlhoka tshiamiso! Go sa dirise thata kafa tshwanelong mo go anameng mo go dirwang ke babusi ba sepolotiki go feletse ka gore go nne le pogisego e e sa siamang. Dikeletso tsa bogagapa tsa kgwebo di gatelela batho, mme seo se felela ka mathata a le mantsi. Mme kwantle ga moo gape go na le kgatelelo e e dirwang ke baeteledi pele ba bodumedi gompieno ba ba tshwanang le balekane ba bone ba motlha wa ga Jesu, bao a neng a re ka bone: “Ba tla ba bōhe merwalō e e bokete, e e botlhoko go rwalwa, me ba e bee mo mahetleñ a batho: me bōnè ka bosi ga ba ke ba e tshikinya leha e le ka monwana wa bōnè.” (Mathaio 23:4) Mme gape go na le go sa dirise thata kafa tshwanelong go le gontsi mme mo go felela ka gore go seka ga nna le tshiamiso epe mo malapeng.
Ditiragalo di bontsha gore ke selo se se tla bong se sa thuse ka gope go lebelela mo bathong ba ba sa itekanelang, lefa ba ka tlhola ba na le maikutlo a a ntseng jang a a molemo, gore ba ka tokafatsa maemo. Mme kwa legodimong go na le Motho yo Mogolo le Moatlhodi, Jehofa. Ke Modimo wa tshiamiso. Kafa tshwanelong, Moshe o ne a opela ka go re: “Lehikwè, tihō ea gagwè e itekanetse: gonne ditsela tsa gagwè cotlhe ke tshiamishō; Modimo o o boikañō, o o senañ tshiamololō, ōna o tekatekanyō, o tshiamō.”—Duteronome 32:4.
E setse e le nako e telele Jehofa a ntse a itshoketse ditshiamololo tsotlhe tsa lefatshe leno, mme ga a kitla a tswelela go dira jalo ka nako e telele. Go na le nako e a e tlhomileng gore a tseye kgato mme he polelelo pele e e fitlhelwang go Isaia 14:4-7 e tla diragadiwa, e e solofetsang gore mefuta yotlhe ya bodipa e tla fela mme ‘lefatshe lotlhe le tla ikhutsa.’
Ka ntlha ya tumelo ya bone e e nonofileng mo ditsholofetsong tseno tsa boperofeti, Basupi ba ga Jehofa ba ipelela go bolela mo mafelong a a gaufi le a a kgakala gore Jehofa o tloga a fedisa kgatelelo yotlhe, bosula, le tshiamololo ka go tlisa puso e e feletseng ya Bogosi. Mme he ga go ne go nna ope yo o tla gobatsang kana go senya, ka go bo “lehatshe le tla bo le tletse kicō ea go itse Yehofa, yaka metse a khurumeditse lewatlè.”—Isaia 11:9.
Go itiisa tumelo ya rona mo dikatlholong tse di tshiamo tsa ga Jehofa, dikopano tsa kgaolo tsa 1988 di tla nna le setlhogo se se reng “Tshiamiso ya Modimo.” Go otlelela setlhogo seno ga go ne go re kgothaletsa fela go itsise tsholofelo ya rona kaga tshiamiso ya bomodimo mme gape go re kgothaletsa go dira tumalanong le tshiamiso ya bomodimo mo go sotlhe se re se dirang.
Jaaka batlhanka ba ga Jehofa, rotlhe re itse gore ka ntlha ya go leofa ga batsadi ba rona ba ntlha, tshekamelo ya rona ke ya go nna digagapa, re sena tshiamiso. Jalo re tla anaanela boikitsiso jo bo molemo joo re tla bo amogelang ka dithuto tsa Bibela, dipontsho, dipotsolotso, le diterama tseo di tla otlelelang kafa go tlhokafalang ka gone go tshwarelela mo tshiamisong ya bomodimo. Seno se tumalanong le taolo e e go Mika 6:8, ya ‘go dira ka tshiamo, le go rata boutlwelo botlhoko, le go sepela ka boikokobetso le Modimo wa rona.’ Seno se dira gore go nne le kutlwano, thitibalo, le boipelo; gape go re thusa mo go rereng mafoko a a molemo mo lefatsheng lotlhe.
Karolo e e tlhomologileng ya dikopano tseno e tla bo e le gore metse e le palonyana e tla golaganngwa go utlwa dipuo tse di kgethegileng ka maloko a Setlhopha se se Laolang sa Basupi ba ga Jehofa. Mme gape, mo dikopanong tseno barongwa mo lefatsheng lotlhe ba tla rulaganyediwa mesepele; seno gape se tla ba kgonisa gore ba etele bamalapa a bone gape.
Fa Jehofa a ratile, Dikopano tsa Kgaolo tsa “Tshiamiso ya Modimo” di tla simologa ka Labone ka 1:30 p.m. mme di tla digelwa ka 4:00 p.m. ka Sontaga. A re ipaakanyeng gore re bo re le gone fa thulaganyo e simologa mme re rulaganye gore re tla nna gone go fitlhela go wediwa ka pina le thapelo letsatsi le letsatsi. Tlaa o nyoretswe dijo tsa semoya mme o ipaakanyeditse go tsaya dintlha. Tlhomamisega gore Jehofa o re baakanyeditse “modihō” wa dilo tse di molemo tseo di tla re kgothatsang le go re tlhotlheleletsa tiro e e kwa pele.—Isaia 25:6; Sehela sa Dihela 2:4.
Ee, a mongwe le mongwe wa rona a ititee sehuba gore o tla amogela masego a magolo a semoya go tswa Kopanong ya Kgaolo ya “Tshiamiso ya Modimo.”