A O A Gakologelwa?

A o ile wa ipelela go bala ditokololo tsa bosheng jaana tsa Tora ya Tebelo? Fa go ntse jalo, bona gore a o ka araba dipotso tse di latelang:

◻ Setlhogo sa boefangele jwa Bibela jwa motlha wa segompieno ke sefe?

Moko wa molaetsa wa boefangele jwa boammaaruri gompieno ke mafoko a a molemo a Bogosi jwa Modimo jo bo mo diatleng tsa ga Mmusi wa gagwe yo o tlhophilweng ke ene, ebong Jesu Keresete. Go akareletsa le dinnete tsotlhe tseo Jesu a buileng ka tsone le tseo barutwa ba gagwe ba kwadileng ka tsone. (Mathaio 24:14; 28:19, 20)—1/1, tsebe 4.

◻ Ke ka ntlhayang fa go le botlhokwa gore go tswelwe pele go rerwa mafoko a a molemo mo ditshimong tseo go senang matswela a a kalokalo kana tseo go senang matswela gotlhelele kwa go tsone?

Jehofa, ka Keresete Jesu, o ile a laela gore ‘mafoko a a molemo a rerwe mo lefatsheng lotlhe.’ (Mathaio 24:14) Fa batho ba gana go reetsa, seno se re neela sebaka sa gore re bontshe ka moo lorato lwa rona le boineelo jwa rona mo go Jehofa di leng boteng ka gone ka go dira se se siameng re sa kgaotse. Gape, lorato lwa rona lo re tlhotlheletsa gore re tlhagise baagelani ba rona ka seo isagwe e se tsholetseng setho. (1 Yohane 5:3; 2 Timotheo 4:2)—1/1, tsebe 26.

◻ Bodihedi jwa nako e e tletseng bo tlisetsa baboledi ba le bantsi ba Bogosi melemo efe?

Bo ba thusa gore ba tlhagolele maungo a moya ka botlalo ka mo go oketsegileng, gore ba bontshe batho lorato ka mo go oketsegileng, gore ba nne matsetseleko ka mo go oketsegileng mo bodiheding, le gore ba ikanye Jehofa go ya bokgakaleng jo bogolwane. Ka gone, ba ipelela kamano e e atamalaneng le Jehofa.—1/15, tsebe 26.

◻ Bakwadi botlhe ba Bibela ba ne ba supa ntlheng efe le kwa boikaelelong bofe jwa Modimo go sa kgathalesege mekgwa e e farologaneng e ba neng ba kwala ka yone?

Botlhe ba ne ba bontsha seo Jehofa Modimo a tla se dirang go dira gore setho se itumele gape le seo batho ka bongwe ba tshwanetseng ba se dira gore ba ke ba amogelwe ke Modimo.—2/1, tsebe 7.

◻ Mangwe a maduo le melemo ya go nna boikanyegi ke efe?

Go nna le moya wa go tshepana le go nna le tsholofelo, seo se felela ka boikutlo jo bo phepa le dikamano tse di molemo. Boikanyego gape bo dira gore o nne le segakolodi se se phepa, gape bo dira gore o ritibale mo mogopolong, e le gore motho a ke a lebane le ba bangwe a sa tshabe go tsenngwa matlho a batho. (Bahebera 9:14; 1 Timotheo 1:19)—2/15, tsebe 7.

◻ Modimo mothatayotlhe o utlwa dithapelo tsa bomang le go di araba?

Jehofa o utlwa dithapelo tseo di rapelwang ka mosele o o tshwanetseng, ebong Jesu Keresete; ka mokgwa o o tshwanetseng; le ka boikutlo jo bo tshwanetseng jwa mogopolo le pelo. Modimo o araba dithapelo tse di ntseng jalo go ya ka thato ya gagwe le ka nako ya gagwe eo a e tlhophileng.—3/15, tsebe 7.

◻ Ke tiragalo efe ya botlhokwa eo e diragetseng ka ngwaga wa bo-20 wa puso ya ga Kgosi Aretaserese (455 B.C.E.)?

Nehemia o ne a neelwa tetla ya gore a boele morago go ya go aga Jerusalema le dipota tsa yone sesha. Dingwaga tsa “diweke di le mashomè a shupa” tsa boperofeti jwa ga Daniele di ne tsa simologa ka taelo eno, tseo di neng di supela pele go go bonala ga ga Jesu jaaka “eo o tlodicweñ, eboñ kgōsana” ka nako e e tshwanetseng mo ngwageng wa 29 C.E. (Daniele 9:24, 25; Nehemia 1:1; 2:1-9)—3/15, ditsebe 28, 29.

◻ Tsela e e botoka go gaisa ya go rarabolola mathata a lelapa ke efe?

Ke ka lorato, ka gonne Bibela e gakolola jaana, “Gotlhe mo lo go dihañ, a go dihwè ka loratō.” Gape, “Loratō lo tlo lo bipe bontsi yoa dibe.” (1 Bakorintha 16:14; 1 Petere 4:8) Lorato lono lo tshwanetse lwa nna lo lo tswang kwa teng loo lo iketleeleditseng go tlodisa makoa a maloko a mangwe a lelapa matlho ao kwantle ga moo a ka kgopisang le go tsena motho mo ditshikeng.—4/1, ditsebe 6, 7.