Paradaise ya Semoya
RE FITLHELA ditsholofetso tsa bomodimo tsa go busiwa ga Iseraela go tswa kwa lefatsheng la botshwarwa go ya kwa nagagaeng ya bone eo e neng e le marope mo dibukeng tse dintsi tsa boperofeti jwa Bibela. Modimo o ne o tla dira gore naga eo e e neng e le marope fela e lemiwe mme e jalwe, e ntshe maungo, mme e tlale ka batho le diphologolo; metsemegolo ya yone e ne e tla agiwa gape e bo e nne le baagi, mme batho ba ne ba tla bua ba re: “Lehatshe ye, ye le kileñ ya ne le shwahetse, le bile le hetogile le nntse yaka tshimo ea Edena.” (Esekiele 36:6-11, 29, 30, 33-35; bapisa Isaia 51:3; Yeremia 31:10-12; Esekiele 34:25-27.) Lefa go ntse jalo, dipolelelopele tseno di bontsha gape gore maemo a paradaise a ne a lebisitse mo bathong ka bobone, bao, ka go ikanyega mo Modimong, ba neng ba ka “kukunya” le go tlhoga jaaka “ditlhare tsa tshiamō,” ba ipelela go tlhogonolofala mo go kgatlhang ga semoya jaaka “tshimo e e nosiwañ,” bao ba amogelang masego a magolo a a tswang kwa Modimong ka go bo a ba amogela. (Isaia 58:11; 61:3, 11; Yeremia 31:12; 32:41; bapisa Pesalema 1:3; 72:3, 6-8, 16; 85:10-13; Isaia 44:3, 4.) Batho ba Iseraela ba ne ba kile ba nna mofine wa Modimo, tshimo ya gagwe, mme boikepo jwa bone le botenegi mo kobamelong ya boammaaruri bo ne bo bakile ‘go swaba’ ga tshwantshetso ga tshimo ya bone ya semoya, le eleng pele ga naga ya bone e senngwa ka mmatota.—Bapisa Ekesodo 15:17; Isaia 5:1-8; Yeremia 2:21.
Kwantle ga pelaelo seno se re naya sekopololo sa go tlhaloganya tlhaloso ya ponatshegelo ya ga Paulo (e go bonalang a e bone, ereka e le karolo ya go buelela ga gagwe boaposetoloi jwa gagwe) eo e umakiwang mo go 2 Bakorintha 12:1-7. Mmoni wa ponatshegelo eno o ne a phamolelwa kwa “legodimoñ ya boraro,” mme a tsena mo “paradaiseñ” mme a utlwa mantswe ao a neng a ka seka a buiwa. Gore paradaise e e neng e bonwa mo ponatshegelong eo e ne e ka supa boemo jwa semoya gareng ga batho ba Modimo, jaaka mo kgannyeng ya Baiseraele ba nama, go ka bonwa mo ntlheng ya gore phuthego ya Bokeresete le yone e ne e le “temō” ya Modimo, mofine wa gagwe wa semoya, oo modi wa one e neng e le Keresete Jesu mme o ungwa maungo a a galaletsang Modimo. (1 Bakorintha 3:9; Yohane 15:1-8) Ka gone e ne ya tseela morafe wa Iseraela sebaka fa o ne o santse o ratwa ke Modimo. (Bapisa Mathaio 21:33-43.) Lefa go ntse jalo, ponatshegelo ya ga Paulo, ka mo go utlwalang e tshwanetse ya bo e ne e supela mo nakong ya isagwe, gore e tle e nne karolo ya ‘tshenolo.’ (2 Bakorintha 12:1) Botenegi bo ne bo setse bo tla simologa mo phuthegong ya Bokeresete ebile bo ne bo setse bo le gone mo motlheng wa ga Paulo; bo ne bo tla felela ka boemo jo bo jaaka jwa tshimo e e tletseng mofero. (Mathaio 13:24-30, 36-43; Ditihō 20:29; 2 Bathesalonia 2:3, 7; bapisa Bahebera 6:7, 8.) Jalo, paradaise ya ponatshegelo ya ga Paulo ka mo go utlwalang e ne e ka seka ya nna gone fa boemo jo bo ntseng jalo bo ne bo le gone mme ka phepafalo e ne e supela kwa nakong ya ‘motlha wa thobo’ fa Bakeresete ba mmatota ba tla bo ba kgobokanngwa ke barobi ba baengele mme ba ipelela masego a a humileng le go tlhogonolofala mo semoyeng tseo di tswang kwa Modimong.
Lefa go ntse jalo, go bonala gore dipolelelopele tsa tsosoloso tse di kwadilweng ke baperofeti ba Bahebera di kopanyeletsa dilo dingwe tseo di neng di tla diragadiwa fela jaaka di ntse mo Paradaiseng e e tsosolositsweng ya lefatshe. Ka sekai, go na le dikarolo tse dingwe, mo go Isaia 35:1-7, tse di jaaka go fodisiwa ga difofu le digole, goo go ileng ga seka ga diragadiwa jaaka go ntse morago ga poelo-gae go tswa kwa Babelona wa bogologolo, ebile gape ga di diragadiwe ka tsela e e ntseng jalo mo paradaiseng ya Bokeresete ya semoya. Go tla bo go sa utlwale gore Modimo o ka tlhotlheletsa dipolelelopele tse di jaaka tse di mo go Isaia 11:6-9, Esekiele 34:25, le Hosea 2:18, ka boikaelelo jwa gore di nne le bokao jwa tshwantshetso kana jwa semoya fela, mme di sa diragadiwe ka mmatota mo batlhanka ba Modimo ba ka di itemogelelang ka mmatota.