Pego ya Baboledi ba Bogosi

Bosupi Jo Eseng jwa ka Tlwaelo Bo Nna le Maungo

JESU o ne a simolola puisano ya gagwe eo e neng ya felela ka bosupi jo eseng jwa ka tlwaelo mme e le jo bo nang le matswela fa a ne a raya mosadi wa Mosamaria kwa sedibeng a re: “A u ko u nnosè metse.” (Yohane 4:7) Le rona ka mo go tshwanang gompieno re ka bona matswela fa re dirisa ditshono tsotlhe go neela bosupi jo eseng jwa ka tlwaelo. Mokaulengwe mongwe wa kwa Australia o ne a simolola puisano nngwe ka go bala fela temana ya letsatsi a le kwa phakeng. Monna mongwe o ne a bona bukana eno mme a mmolelela gore le ene o kgatlhegela Dikwalo. E ne e le Mokatoliki fela ka leina yo o neng a rutilwe thutotlhagelelo kwa sekolong sa Katoliki mme jaanong o ne a sa itse gore a dumele eng. Mokaulengwe o ne a rulaganya gore a bone buka Life—How Did It Get Here? By Evolution or by Creation?a Malatsi a le mabedi moragonyana o ne a isa buka eo kwa a direlang gone, mme a fitlhela a seyo. Mokwaledi wa gagwe o ne a tsaya buka a re: “Ga re bolo go letela buka eno.”

Diura di le pedi moragonyana mokaulengwe o ne a amogela mogala go tswa kwa monneng yoo mme a batla dikopi tse dingwe tse pedi gape tsa buka ya Creation mme a kopa Basupi gore ba mo etele kwa ofising eo. Fa mokaulengwe a ya kwa ofising ya gagwe, o ne a fitlhela monna yoo a na le ba bangwe gape ba le babedi. Go ne ga simololwa thuto ya Bibela le bone, go akaretsa le mokwaledi, mme go ne ga rulaganyediwa gore mokaulengwe a ba etele gabedi ka beke. Mo dibekeng tse di latelang, mosetsana yo o ratanang le monna yono, ‘Mokeresete yo o tsetsweng sesha,’ o ne a tlhola a romela makwalonyana a botsa dipotso tsa Bibela. Kgabagare, le ene o ne a kopanela mo thutong, fela jaaka go ne ga dira mongwe yo a neng a tshwaraganetse kgwebo le monna yono le tsala ya gagwe, yo ene a neng a dumela thutotlhagelelo.

Ba ne ba tsweletsa dithuto tsa bone tsa Bibela ka metlha ka dikgwedi di le tlhano, mme thuto nngwe le nngwe ya bobedi mo bekeng e ne e tshwarelwa kwa phakeng. Lekawana le le ratanang le mokwaledi le ne le kopanela mo thutong eno ya setlhopha. Go ise go e kae, monna yo o tshwaraganetseng kgwebo le monna wa ntlha le tsala ya gagwe ba ne ba fudugela kwa Idaho kwa United States, koo ba neng ba tswelela ba ntse ba ithuta. Dibeke di sekae moragonyana, monna wa ntlha o ne a atamelwa ke monna yo a sa mo itseng, yo a neng a mmotsa gore go diragetse eng ka dipuisano tsa Bibela tseo di neng di tshwarelwa kwa phakeng. Go lebega gore, o ne a ntse a reetsa thuto. Go ne ga dirwa thulaganyo ya gore le ene a rutiwe.

Sotlhe seno se ne sa felela ka eng? Dikgwedi di le lesome le borobedi go tloga fa ba ne ba kopana kwa phakeng, monna wa ntlha le lekgarebe la gagwe, yoo pele e neng e le ‘Mokeresete yo o tsetsweng sesha,’ ba ne ba nyalane mme ba kolobeditswe. Mokwaledi le lekau le a neng a ratana le lone le bone ba ne ba nyalane mme ba kolobeditswe. Monna yo a neng a tshwaraganetse kgwebo nae le tsala ya gagwe bao ba neng ba ya kwa United States ba ne ba kolobeditswe, mme mongwe wa bone jaanong o direla jaaka mmulatsela yo o thusang wa ka metlha. Motho yo o neng a tlhola a reetsa dipuisano tsa Bibela kwa phakeng o ne a tswelela a ithuta. O ne a fudugela kwa Ireland, mme o ne a lebile pele gore a kolobediwe!

Sotlhe seno se ne sa diragala ka gonne mokaulengwe o ne a dirisa nako ya gagwe ya dijo tsa motshegare go dira bosupi jo eseng jwa ka tlwaelo, mme Jehofa o ne a segofatsa maiteko a gagwe. A le rona ka go tshwana re dirise tshono nngwe le nngwe go anamisa mafoko a a molemo go bao ba bolailweng ke tlala ya molaetsa wa Bogosi!

[Ntlha e e kwa tlase]