Bona Boammaaruri Ka Botlalo!
“GA KE ise ke ko ke bone leina leo mo Bibeleng ya me,” Francisco o ne a akgela jalo. Ba ne ba sa tswa go tlotla ka leina Jehofa le mongwe wa Basupi ba ga Jehofa. Ka boammaaruri, o ne a ka seka a bona leina la Modimo mo Bibeleng ya gagwe, eo e leng kgatiso ya thanolo ya Almeida ya Sepotokisi ya 1969. Ga e na leina Jehofa. Francisco ke Mokatoliki wa kwa Brazil, yo a yang kwa Miseng Sontaga mongwe le mongwe gape o ipelela go ipalela Bibela mo legaeng la gagwe. Mme o ne a kgatlhiwa ke leina Jehofa.
Modimo ke Mang?
Basupi ba ne ba lere kgatiso e nngwe ya thanolo ya Almeida mo bekeng e e latelang. Ba ne ba bapisa dikgatiso tse pedi tseno mo go Pesalema 83:18. Mme ba ne ba bona eng? Temana eo e balega jaana mo kgatisong eo ya 1966: “Wena yoo o leng wena fela leina la gago e leng JEHOFA, o Mogodimodimo o okame lefatshe”! Lefa go ntse jalo, kgatiso ya 1969 e ne e dirisa leina “MORENA” go na le go dirisa “JEHOFA.” “A o a bona, ba fetotse sengwe fano,” Mosupi o ne a rialo, mme a bo a botsa jaana: “‘Morena’ eleruri ga se leina, a ga go jalo?” “Nnyaa,” Francisco o ne a bua jalo. O ne a oketsa jaana a galefile: “Tota ba ne ba direla eng seno?”
Seno se ne sa dira gore go dirwe patlisiso ka leina la Modimo. Ka sekai, Francisco o ne a ithuta gore go ya ka The Catholic Encyclopedia (1910), Jehofa ke “leina la Modimo tota mo Tesetamenteng e Kgologolo.” O ne a ithuta gape gore leina leo le tlhaga ka makgetlo a a ka nnang 7 000 mo “Tesetamenteng e Kgologolo,” eo bontsi jwa yone bo neng jwa kwalwa ka puo ya Sehebera. Ga go na moranodi ope yo o nang le tshwanelo ya go fetola leina la ga Jehofa la mmatota a le fetola go nna lereo le le sa utlwaleng la Morena. Francisco o ne a batla go itse boammaaruri kaga leina Jehofa, mme o ne a bo bona mo Bibeleng ka boyone le ka go dira patlisiso ka tshwanelo.
Boemo jwa ga Jesu Ke Bofe?
Jaaka re bone mo setlhogong se se fetileng, ditumelo tsa lefatshe di leswefaditse boammaaruri bo le bontsi thata. Basupi ba ga Jehofa fa ba le mo bodiheding jwa bone jwa ntlo le ntlo go diragala gore ba nne le tshono ya go itse gore batho ba dumela eng. Gone ke boammaaruri gore seno se a farologana go ya ka mafelo, mme dikgopolo tse dingwe di a tshwana. Ka sekai, beng ba matlo bangwe fa ba bodiwa gore ‘Leina la Modimo ke mang?’ ba re, ‘Ke Jesu.’ Fa ba rialo ba kaya gore Jesu ke Modimo Mothatayotlhe. Mme a kgopolo eno e boammaaruri?
Akanya ka dintlha tse di latelang. Jesu o ne a rapela Rraagwe jaana: “Botshelō yo bo sa khutleñ ke yo, gore ba gu itse, wèna, Modimo o o osi, o o boamarure, le èna eo u mo romileñ, eboñ Yesu Keresete.” (Yohane 17:3) A o lemogile gore Jesu ga a ka a ipitsa “Modimo o o osi, o o boamarure” mme o ne a bitsa Rraagwe wa selegodimo jalo? Ka gone, barutwa ba ga Jesu ba pele ba ne ba bua sentle fa ba ne ba mo raya ba re: “Amarure u Morwa Modimo.” Jesu ka boene o ne a bua jaana: “Ke Morwa Modimo.” Ka gone, boammaaruri ke gore Jesu ga se Modimo Mothatayotlhe, mme ke Morwa wa ga Jehofa Modimo.—Mathaio 14:33; Yohane 10:36.
Lefatshe Leno le Lebile Kae?
Kokomana eno mmogo le lefatshe di tlile go felela kae? Poresidente yo o tlhokafetseng wa United States, John F. Kennedy, o ne a bua jaana le UN General Assembly: “Re na le maatla a go dira kokomana eno go nna e e botoka fela thata mo hisitoring yotlhe ya lefatshe—kana go e dira gore e nne yone ya bofelo.” Go lebega baeteledipele ba motlha ono ba lefatshe ba ikutlwa ka tsela e e tshwanang. Seo Basupi ba ga Jehofa gantsi ba se utlwang fa ba le mo bodiheding jwa bone ke gore fa lefatshe leno le khutla, polanete ya Lefatshe e tla senngwa ke molelo kana ke ntwa ya nuklea. Go tshegetsa tumelo eo bangwe ba supa Tshenolō 21:1 e e buang jaana: “Me ka bōna legodimo ye lesha le lehatshe ye lesha; gonne legodimo ya ntlha le hetile, le lehatshe ya pele; le lewatlè ga le tlhole le leeō.”
Gantsi Bibela e dirisa lefoko “lehatshe” e tshwantshetsa, e raya batho. Sekai sa seno se fitlhelwa mo go Genesise 11:1 e e reng: “Me lehatshe yeotlhe ya bo le le puō e le ñwe hèla, le mahoko a le mañwe hèla.” (Bona gape 1 Dikgosi 2:1, 2; Pesalema 96:1.) Mo go Tshenolō 21:1, “legodimo ya ntlha” ga le reye polanete eno, mme le kaya mokgatlho wa batho ba ba boikepo ba ba tlileng go senngwa. Seno se tla bula tsela ya gore lefatshe le tsosolosiwe e nne Paradaise. (Luke 23:43; 2 Bathesalonia 1:6-9; Tshenolō 21:4) Mme seno se dumalana le Bibela yotlhe, eo e bontshang gore lefatshe tota ga le kitla le senngwa. Ka sekai, Pesalema 104:5 e bolela gore Modimo ‘o beile metheo ya lefatshe gore le tle le seka la tshikinngwa ka bosakhutleng.’ (Bapisa Moreri 1:4.) Eleruri, Jehofa o ne a ‘bopela lefatshe gore le [“agiwe,” NW]’ ka bosakhutleng.—Isaia 45:18.
Ke Ka Ntlhayang Fa O Tshwanetse go Bona Boammaaruri Jotlhe?
Dilo tse di umakilweng ke dikai fela tsa dikgopolo tse di phoso tse di tletsetletseng gompieno. Lefa go ntse jalo, fa mong wa ntlo a batla go reetsa, jaaka Francisco, Basupi ba ga Jehofa ba itumelela go bo tsela ya motlotlo o o sedifatsang wa boammaaruri jwa Dikwalo e bulega.
Go sa boneng boammaaruri ka botlalo go ka felela ka matswela a a hutsafatsang. Go tshwantsha: Fa Jesu a ne a le mo lefatsheng, bontsi jwa batho bo ne jwa patelediwa go dumela gore e ne e le mongwe wa barwa ba ga Maria le Josefe, yo e kileng ya bo e le mmetli kwa Nasaretha. Ke gone ka moo ba ileng ba seka mo reetsa. Gone mme ba ne ba buile sentle lefa e ne e se ka botlalo. Jesu e ne e le morwa wa ga Maria, yo o imilweng ka moya o o boitshepo. E ne e le morwa yo a neng a filwe Josefe, ebile tota o ne a kile a dira jaaka mmetli. (Mareko 6:3) Lefa go ntse jalo, a seo e ne e le boammaaruri jotlhe ka ene? Nnyaa! E ne e le Mesia ebile a tlile go nna “Kgosi ea dikgosi”! (Tshenolō 17:14; Luke 1:32-35; Ditihō 2:36) Batho ba bantsi ba ile ba seka ba bona tshiamelo eo e e se kitlang e boelediwa gape—ya go tsalana ka namana le Jesu fa a le mo lefatsheng ka gonne ga ba a ka ba bona boammaaruri jotlhe kaga Jesu.
Batla Boammaaruri Jotlhe
Motsemogolo wa Berea (o jaanong o bidiwang Véroia) wa Makedonia wa bogologolo o itsiwe ke babadi ba Bibela fela thata ka ntlha ya boikutlo jo baagi ba one ba lekgolo la ntlha la dingwaga ba neng ba bo akgolelwa thata. Boikutlo joo e ne e le bofe? Rekoto e bua jaana: “Ba amogetse lehoko [leo le neng le rerwa ke moaposetoloi Paulo] ka pelo e e etleetsegileñ, ba lotolotsa mo dikwaloñ ka malatsi aotlhe, ha dilō tse di nntse yalo.” Go ne ga felela jang? “Bantsi ba bōnè ba dumèla; le bahumagadi ba ba tlotlègañ ba Bagerika, le banna ba le bantsinyana.”—Ditihō 17:11, 12.
Boikutlo jwa baperofeti ba Modimo ba bogologolo le bone bo tshwanetswe go tlotlomadiwa tota. Ba ne ba “botsa, ba ba ba kèlèka ka tlhōahalō” kaga poloko e e neng e tlile go tla ka Mesia. (1 Petere 1:10) Modimo o ne wa segofatsa maiteko a bone. Ka gone he go phepafetse gore o ka seka wa tlhabanyetsa. Go ganelela mo go batleng le go tlhatlhoba dithuto ka kelotlhoko—eno ke yone tsela fela ya go bona boammaaruri jotlhe mo Bibeleng!
O ka nna wa ipotsa jaana, ‘Ke tshwanetse go simolola kae?’ Mosadi mongwe wa kwa Brazil o ne a bua jaana fa a sena go bala dikgatiso dingwe tsa Bokeresete: “Rona [ene le monna wa gagwe] re ne ra lemoga ka bonako fela gore re ne re tlhoka kitso e e oketsegileng ya mofuta o o ntseng jalo gore re bone dikarabo tsa dipotso tsa rona tse dintsi . . . Tswee tswee, nka bona jang Bibela le dibuka tse dingwe tseo di tla nthusang gore ke itse Rraarona wa selegodimo?” O ne a le mo tseleng e e siameng: go bala Bibela mmogo le dikgatiso tse di boammaaruri tse di thailweng mo Bibeleng. Fa o batla boammaaruri jotlhe, bulela Jehofa Modimo pelo ya gago mme o mo kope gore a go thuse. Mme tswee tswee tlhokomela mafoko ano a a kgothatsang: “Me ha moñwe oa lona a tlhōka botlhale, a a lōpè Modimo, o o naeañ botlhe ka bogolo, me o sa kgobe; me o tla bo nèwa. Me a a lōpè ka tumèlō, a sa belaele sepè.”—Yakobe 1:5, 6.
Batho ba le dimilione ba tlotla ka Bibela le Basupi ba ga Jehofa, ka gone ba botsa ka tlhagafalo ebile ba batlisisa boammaaruri ka kelotlhoko. Go ithuta le go dirisa kitso e e tlhomameng ka Modimo wa boammaaruri le Jesu Keresete go kaya botshelo jo bosakhutleng. (Yohane 17:3) Seo e ka nna lesego le le molemo tota mo go wena fa o ka batla mme wa bona boammaaruri jotlhe ka botlhaga.
[Setshwantsho mo go tsebe 7]
Boammaaruri jotlhe kaga Jesu ke gore e ne e le Mesia, eseng mmetli fela