A o Eletsanako Eo ka Yone . . .

□ o ka kgonang go ikutlwa o bolokesegile mo legaeng la gago—go sa kgathalesege gore ke nako mang mo letsatsing?

□ go tla bong go sa tlhole go tlhokega dilotlole, maparego a go thibela dinokwane, dialamo, marobana a mejako a go leba se se kwa ntle, diterata tse di ageletsang matlo, badisa, dintša tse di disang, le dilo tse dingwe tsa go itshireletsa?

□ o ka kgonang go tsamaya mo mebileng o le esi o bolokesegile, le fa go le bosigo?

□ diokobatsi tse di kotsi le mathata a mangwe a a amanang le tsone e tla bong e le dilo tseo go lebetsweng ka tsone?

□ dintwa tsotlhe di tla bong di khutlile, go sa tlhole go dirwa ditlhabano ebile di sa tlhole di koegiwa mo mabolokelong?

□ o tla bong o sa tlhole o tshwenyega ka dijo, moya le metsi a a kgotletsweng?

□ borukhutlhi, go thopiwa ga batshwarwakananyo, le go tshosiwa ka dibomo go tla bong go nyeleditswe gotlhelele?

□ metswedi ya tlhago ya dikuno e tla bong e sireleditswe, e tlhokomelwa sentle, ebile e dirisiwa sentle ka botlhale gore e tswele botlhe molemo?

□ batho ba tla bong ba sa tlhole ba tlhotlhelediwa ke bogagapa le bopelotshetlha?

□ bana ba tla bong ba tswelela ba le kutlo mme ba tlotla batho ba bangwe mmogo le dithoto tsa bone?

□ basadi ba tla bong ba sa tlhole ba gatelelwa le go sa tshwarwe sentle?

□ melao le ditaolo di tla bong di sa gatelele mme di dirisiwa sentle ka tshiamo go solegela botlhe molemo?

□ puso e tla bong e dira ditshwetso e ikaegile ka dilo tse di tlhokegang tota mme eseng ka dipolotiki?

□ kgololesego le go lekalekana di tla bong di sa buiwe fela ka molomo mme e le dilo tse di dirwang?

□ go tla bong go sa tlhole go na le lehuma, mme botlhe ba tla bong ba na le dilo tsotlhe tse ba di tlhokang gore ba nne le boitekanelo, botshelo jo bontle, le boitumelo?

□ bana ba tla bong ba batliwa ebile ba tlhokomelwa sentle ba sa tlhole ba sotliwa kana ba latlhiwa?

□ bolwetsi le loso di tla bong di sa tlhole di le gone, mme ebile go sena dikgogodi tse di tshosang tsa malwetsi?

□ mongwe le mongwe yo o kopanang le ene a tla bong a le pelonomi, a iketleeditse go thusa, ebile a ikanyega?

□ botshelo jwa mongwe le mongwe bo tla bong bo tsewa bo le botlhokwa, mme botlhe ba ka kgona go nna le boitumelo jo bo nnelang ruri?

□ bodumedi bo tla bong bo sa tlhole bo kgaoganya batho, bo dira batho gore ba nne tlhogo di thata, bo baka letlhoo le dintwa?

□ botlhe ba tla bong ba na le mafelo a a lekaneng le a ba itumelelang go nna mo go one, go tlhoka magae e tla bong e le selo sa nako e e fetileng?

Fa e le gore o ka araba epe fela ya dipotso tse di fa godimo tseno ka ee, he o tla kgatlhegela go bala ditlhogo tse di latelang.