A O Latela Ditaolo?

RRE yo o lorato o atisa go naya bana ba gagwe ditaolo gore ba atlege mo botshelong le gore ba tle ba nne bagolo ba ba itumetseng. Bana bao ba ratang batsadi ba bone le go ba tlotla ba amogela ditaolo tseo ka gonne ba itse gore di diretswe gore ba bone molemo. Ka mo go tshwanang, Rraarona wa selegodimo yo o lorato Jehofa, o naya batlhanka ba gagwe kaelo e e tla dirang gore ba atlege ba bo ba itumele mo matshelong a bone. Ka gone, go botlhokwa go latela ditaolo tse Modimo o di re nayang ka Lefoko la gagwe, Bibela, le phuthego ya gagwe e e mo lefatsheng.

Mo Lelapeng

Re newa ditaolo mo dilong tse di farologaneng. Nngwe ya tsone ke mo lelapeng. Modimo o tlhodile lenyalo le lelapa. Bibela e bolela gore Modimo o ne wa nyadisa banyalani ba ntlha ba batho wa bo wa ba raya wa re ba tshole bana. (Genesise 1:27, 28; 2:22-24) Mmopi o neetse maloko otlhe a lelapa ditaolo ka ditiro tsa bone tse di farologaneng. Ka sekai, monna yo o nyetseng le rre ke tlhogo ya lelapa, seo se rayang gore o na le boikarabelo jwa go ntsha taolo, go le naya dijo, diaparo, legae, go le sireletsa, le go le naya kotlhao. Gape o dira ditshwetso tse di botlhokwa tsa lelapa. Monna yo o nyetseng, o tshwanetse go akanyetsa mosadi wa gagwe a bo a mo tlotle jaaka sejana se se bokoa. (Baefesia 5:22, 23; 1 Timotheo 5:8; 1 Petere 3:7) Mosadi yo o nyetsweng o tshwanetse go ikobela monna wa gagwe, a mmontshe tlotlo e e boteng, a bo a mo thuse le go mo tlatsa. Dikwalo di bontsha gape gore bana ba tshwanetse go utlwa batsadi ba bone.—Genesise 2:18; Baefesia 6:1-3; 1 Petere 3:1, 2.

Go diragala eng fa ditaolo tseno di itlhokomolosiwa? Go nna le dikgogakgogano le dintwa fa banna ba ba nyetseng ba sa akanyetse basadi ba bone, le fa basadi ba ba nyetsweng ba sa tlotle botlhogo jwa banna ba bone. Ebile tota dilo tseo di ile tsa dira gore manyalo a mantsi a senyege. Go tlhoka kutlo le boganana jwa bana di ile tsa tlisetsa batsadi ba bantsi masetlapelo tota. Gantsi, batsadi ke bone ba ba nang le molato ka go bo ba sa godisa bana ba bone ka kotlhao e e tshwanetseng ka gone ba ba rumola.—Baefesia 6:4.

Lemororo badirediloago, baithutatlhaloganyo, le ba bangwe ba ile ba neela dikakantsho tse dintsi tse di farologaneng tsa kafa go ka rarabololwang mathata a lelapa ka gone, ga go na kgakololo e e nang le katlego go gaisa ditaolo tseo Mmopi a di neetseng tsa lelapa tse di mo Bibeleng. Go di latela go lere boitumelo le kgotsofalo tsa mmatota.—Pesalema 19:7-9.

Mo Phuthegong

Re tshwanetse go latela ditaolo tseo Tlhogo ya phuthego ya Bokeresete, ebong Jesu Keresete, e di neelang ka “motlhanka eo o boikañō le eo o botlhale,” mosele o o tlhophilweng wa phuthego ya Modimo e e mo lefatsheng. (Mathaio 24:45-47; Baefesia 5:23) Maloko otlhe a phuthego a tshwanetse go dira tumalanong le kaelo e e neetsweng gore go nne le kagiso le kutlwano. Ka sekai, bao ba eteletseng pele mo go ruteng mo phuthegong le mo go thuseng batho ba bangwe ba tshwanetse go kgomarela dikaelo tse ba di newang ke phuthego ya ga Jehofa. Seno se tla dira gore ba dire tiro ya bone ka botswerere. Ditaolo di ka nna tsa bo di le malebana le kafa ba ka nnang le seabe ka gone mo tirong ya go rera, kafa mathata a phuthego a ka rarabololwang ka gone, kafa kgakololo le kgothatso di ka neelwang ka gone, kafa ba ba utlwileng botlhoko ba ka gomodiwang ka gone, jalo le jalo. Gape go na le dikaelo tsa kafa dipokano tse di layang le tse di agelelang botlhe ba ba kopanelang le phuthego ya Bokeresete di baakanyediwang ka gone.—Ditihō 20:20; Baroma 12:6-8; Bagalatia 6:1; 1 Bathesalonia 3:1-3.

Bagolwane ba phuthego, kana balebedi ke bone bao segolobogolo ba tshwanetseng go tlhoma sekao se se molemo mo go seno. Setlhopha se se Laolang se ntsha ditaolo tseo bagolwane ba tshwanetseng go di latela ka kelotlhoko le ka boikanyegi. Ba tshwanetse go dira gore di tshwanele di bo di kgone go dirisiwa mo maemong a lefelo la bone. Re tshwanetse go gakologelwa gore phuthego ya Bokeresete e kaelwa ke Jesu Keresete. O kgona go bona ka botlalo seo diphuthego tsotlhe tse di mo lefatsheng di se tlhokang, mme o di naya kgothatso le go di thusa kafa di tlhokang ka gone. Ka gone, bagolwane ga ba a tshwanela go diega go dirisa dikaelo dipe fela tseo ba di amogelang mo phuthegong ya Modimo ya bolegodimo. Seno e tla nna sekao se se molemo tota mo go botlhe ba ba leng mo phuthegong nngwe le nngwe mme se tla ba thusa gore ba utlwane ka bobone ba bo ba utlwane le bakaulengwe ba bangwe botlhe ba Bakeresete mo lefatsheng lotlhe.—Ditihō 15:1-31; Bahebera 13:7; Tshenolō 5:6.

Matswela A A Itumedisang

Fa moagi a aga kago e tona, o latela dipolane tsa bathadi ba dipolane gore kago ya gagwe e tle e nne lobaka lo loleele. Noa o ne a laelwa go aga araka mo metlheng e e neng e tletse thubakanyo tota pele ga Morwalela. O ne a bolelelwa gore a e age jang le gore a tsenye batho bafe le diphologolo dife gore di falole Morwalela o o tlang. Noa o ne a dira jang? Bibela ya re: “Noa a diha yalo: mo go cotlhe tse Modimo o di mo laoletseñ, a diha hèla yalo.” Noa le bao ba neng ba le mo arakeng ke bone fela bao ba neng ba falola Morwalela. (Genesise 6:5, 13-22; 7:23) Gompieno, re tshela mo metlheng e e tshwanang le motlha wa ga Noa, mme leno ke lone lebaka leo Modimo o tlileng go senya baikepi ka lone. Bibela e re bolelela dikgato tse re tshwanetseng go di tsaya gore re tle re nne gone mo bafaloding.—Mathaio 24:37-39; 2 Petere 3:5-7, 11.

Ka gone, a re amogeleng ditaolo tse Jehofa a di re nayang ka Lefoko la gagwe le le kwadilweng le ka phuthego ya gagwe e e mo lefatsheng ka go di anaanela re bo re di dirise. Fa re dira seno re tla atlega le go itumela re bo re boloka matshelo a rona.