Jehofa O Nneile Nonofo

JAAKA GO BOLETSE EKUMBA OKOKA

KE NE ka tsholelwa mo lelapeng la “Bokeresete” kwa nageng nngwe ya kwa Afrika Bogare, mme ke ne ka gola ke rata Modimo. Rre e ne e le moreri yo o tlwaelegileng fela yo o tlhaga mme gantsi ke ne ke tlhola ke tsamaya le ene go ya go ruta kwa kerekeng kana fa a ne a ya go tshwara dithapelo mo malapeng a batho. Ereka ke ne ke lebega ke le mosimanyana yo o tlhoafetseng, bareri ba bangwe ba ne ba ntlhopha gore ke dire le moperesiti kwa Miseng. Ba bile ba bo ba mpolelela gore letsatsi lengwe gongwe ke tla rata go ithutela go nna moperesiti ka bonna.

Lefa go ntse jalo, bosigo ke ne ke etelela pele mo go opeleng le mo go bineng mo setlhopheng sa diopedi tsa mo lefelong la rona, ebong Matumba-Ngomo. Fa ke le mo tirong eo, ke ne ka kopanela le makawana le makgarebe a kgaolo ya rona mo boitsholong jo bo sa siamang jwa mefuta yotlhe. Mme ke ne ke ntse ke lebeletse pele go nna le mosadi a le mongwe mme kgabagare ke ye kwa legodimong go ya go nna le “baitshepi.” Ke ne ke sa bone go le botlhokwa go phepafatsa botshelo jwa me gonne, go ya ka thuto ya Katoliki, maleo otlhe a me a ne a itshwarelwa ka mantsiboa a Lamatlhatso mongwe le mongwe fa ke ipolela maleo.

Mathata A A Simologa

Ka 1969, fa ke ne ke santse ke ithuta kwa koletšheng, ke ne ka simolola go utlwa ditlhabi mo malokolong a me. Ke ne ke sa itse gore di ne di bakiwa ke eng, mme mo dikgweding tse di neng tsa latela, di ne tsa nna maswe le go feta. Lemororo batsadi ba me e ne e le Bakatoliki ba ba itsegeng thata, ba ne ba swetsa go nkisa kwa dingakeng tse di farologaneng tsa maselamose, tseo di neng di bolela gore ke loilwe ke mongwe, mme ba itumelela gore dithapelo tsa bone le melemo ya bone e tla nkalafa. Lefa go ntse jalo, ke ne ka simolola go tsamaya ke tlhotsa, mme ka 1970 ke ne ke palelwa go tsamaya gotlhelele, le eleng lefa ke ne ke ikokotlela ka thobane. Ka nako eo, ke ne ka akanya gore malatsi a me a go kgona go tsamaya a tla tloga a fela.

Kgabagare rre o ne a swetsa ka gore a nkise kwa kokelong ya Wembo Nyama ka February 1972. Ke ne ka nna kwa kokelong ka lobaka lo loleele mo eleng gore ebile ba ne ba simolola go mpitsa mong wa yone! Batho ba ne ba tla kwa kokelong ba alafiwa ba bo tsamaya, mme nako nngwe moragonyana ba tle ka bothata jo bongwe gape mme nna ke ntse ke le teng koo! Rre o ne a tshwanela go ya kwa gae go ya go kotula reisi, mme ka nako eno ke ne ke setse ke nyetse ke na le bana ba babedi mme mosadi wa me yo o rategang o ne a ntlhokomela, a tshwanela go ya go batla tiro gore a kgone go re tlamela ka tse re di tlhokang lemororo a ne a na le dingwaga di le 21 fela.

Lefa go ntse jalo, boemo jono bo ne bo tshwenya maikutlo a me thata. Ke ne ke na le dingwaga di le 24 fela mme ke ntse ke nnela maswe kwa pele, fa ditsala tsa me tsone di ne di atlega, bontsi jwa bone jaanong bo na le ditiro tse di tlhomameng. Mo go nna go ne go lebega gore go tla nna molemo mo go botlhe fa nka ipolaya. Ka gone, ke ne ka kgaoganya bana ba me le bomorwarre dilo tsotlhe tse ke neng ke na le tsone ke sa ba bolelele se ke se akantseng. Ke ne ka sala fela ka hempe e ke neng ke e rata thata e ke neng ke batla gore ke fitlhiwe ka yone.

Go Simolola Botshelo Jo Bosha

Ka nako eo mongwe wa Basupi ba ga Jehofa o ne a robadiwa mo bolaong jo bo fa thoko ga jwa me. Lemororo leitlho le lengwe la gagwe le ne le foufetse ebile a ka nna a foufala le lengwe, o ne a simolola go neela bosupi jo bo tswang mo Bibeleng kaga Jehofa le Bogosi. O ne a tswa mo kokelong morago ga malatsi a sekae mme o ne a laela Basupi bangwe ba ba neng ba mo etela gore ba ntlhokomele. Fa re sena go tlotla go ya kwa pele, le bone ba ne ba tshwanela go tsamaya, mme mongwe wa bone o ne a tswelela go ithuta le nna ka go nkwalela. O ne a nnaya dibuka tse di farologaneng tsa go ithuta Bibela tseo ke neng ke itumelela go di bala.

Ke ne ka amogela dijo tsa semoya ka tsela eno, mme go tshwenyega ga me mo boikutlong go ne ga fetoga boitumelo. Go ne go lebega gore kereke ya me e ne e ntse e nnosa “asiti,” mme jaanong ke ne ke amogela metsi a botshelo mahala. Ke ne ka leboga Jehofa mo pelong ya me go bo a nkgolotse mo tumelabotlhoding, e e ntseng jaaka Tharonngwe, go sa sweng ga moya wa motho, go boifa baswi, le go rapela borremogologolwane.

Jaanong ke ne ke batla go tswa mo kokelong. Mme ke ne ka utlwalela gore go na le malapa mangwe a mabedi a badihedi ba nako e e tletseng a a tlileng go abelwa go tla mo Wembo Nyama, ka jalo ke ne ka swetsa go ba leta. Abo ke ne ka itumela jang ne fa kgabagare ba tla go mpatla kwa bolaong jwa me kwa kokelong! Jaanong ke ne ka kgona go tsweledisa thuto ya me ya Bibela pele ka namana mo boemong jwa go e tsweledisa ka poso.

Morago ga malatsi a sekae, ke ne ka ba botsa gore a ba nna le dipokano kwa Holong ya Bogosi jaaka ke ne ke badile jalo mo dimakasineng. Ba ne ba mpolelela fela ka bopelonomi gore ba tshwarela dithuto tsotlhe mo mokgorong wa mongwe wa bone. Ba ne ba mpolelela gape gore ba tla itumelela go nkisa koo ka baesekele! Lemororo ke ne ke na le ditlhabi tse di botlhoko mo mokokotlong le mo malokololong otlhe a me ke ne ke itumelela go ya kwa dipokanong tsotlhe. Fa ke sena go tshwanelega, ke ne ka simolola go isa pego ya me kgwedi nngwe le nngwe jaaka mmoledi yo o sa kolobediwang, go simolola ka April 1974.

Ke ne ka bontsha boineelo jwa me mo go Jehofa ka go kolobediwa mo metsing dikgwedi tse tharo morago ga foo. Ke ne ke rerela badiri ba tsa kalafi ba kwa kokelong, balwetsi ba koo, barongwa ba Baporotesetanta ba ba neng ba tlile go eta, le maloko a lelapa la me—lemororo bone ba ne ba nkganetsa thata. Ka nako eno ke ne ke neela bosupi fa ke robetse mo bolaong kana ke le mo setulong sa me sa maotwana sa balwetsi seo kokelo e neng e se nkadimile go fitlha ke ithekela sa me.

Boitshoko Bo Lere Melemo

Lemororo lelapa la me le ne le ganetsa, ke ne ka tswelela go tsamaya mo tseleng ya ga Jehofa mme ke ne ka segofadiwa thata. Mosadi wa me o ne a emela boammaaruri mme o ne a kolobediwa ka 1975. Re ne ra swetsa ka gore re ye go nna kwa Katako-Kombe, koo go neng go setse go tlhomilwe phuthego gone. Batsadi ba me ba ne ba tshwenyegile thata ka rona ka gonne motho mongwe o ne a ba reile a re Basupi botlhe ba tlile go bolawa ka 1975. Fa re sena go gana go tlogela mokgatlho ono, ba ne ba se ka ba tlhola ba re romelela dijo, mme re ne ra tlhoka dilo tse di bonalang tota. Ke gakologelwa nako nngwe fa morwaake yo mmotlana a ne a idibala ke tlala ka re ne re tlhotse letsatsi le le lengwe le sephatlo re sena dijo. Mme bakaulengwe ba rona ba Bakeresete ba ne ba re tlisetsa tlhapi le boupe. Moragonyana batsadi ba me ba ne ba simolola go re thusa gape, mme bakaulengwe ba rona ga ba ise ba ko ba emise go re thusa ka dilo tse di bonalang.

Ka February 1975 letsogo la me la moja le ne la swa mme la simolola go koafala. Mme ke ne ka nna ke ntse ke na le tumelo mme ke iketleedise go direla Jehofa ke itumetse. Ke itumelela go bolela gore letsogo la me le ne la nonofa gape, mme ke santse ke kgona go le tsamaisa gompieno, eleng seo se nthusang gore ke kgone go bula Bibela le go dirisa dikgatiso tsa Mokgatlho.

Go Nna Pelokgale Fa Pele Ga Babusi

Ka 1977, komišenara wa mo lefeong la rona o ne a ntatofatsa fa pele ga komišenara wa kgaolo, yoo a neng a tshwere mmulatsela yo o kgethegileng wa phuthego nngwe e e fa gaufi. Letsatsi lengwe lesole le ne la tla kwa go nna ka dipampiri tsa go tla go ntshwara. Ke ne ka rapela le lelapa la me, ka kgothatsa phuthego mme ka tsamaya le lone. Ke leboga moya wa ga Jehofa gonne ke ne ka kgona go araba ditatofatso tsa bone ka bopelokgale mme fa ke sena go bua le balaodi ba mo tikologong le ba sesole ke ne ka gololwa mmogo le mmulatsela yoo yo o kgethegileng.

Dikgwedi dingwe moragonyana, ke ne ka tshwarwa gape ke komišenara yo mongwe, mme Jehofa o ne a nthusa gore ke kgone go emela mafoko a a molemo ka boitumelo fela le ka bopelokgale. Ke ne ka bua le motho yono ka nako e telele, mme kwa bokhutlong o ne a nkgolola mme a kgarametsa setulo sa me sa maotwana ka boene go tswa mo ofising ya gagwe. Mme o ne a buela kwa tlase a re: “Tla kwa lelapeng la me mo maitsiboeng ano.” Ke ne ka kgona go simolola thuto ya Bibela le ene morago ga go mo etela ka makgetlonyana. Kgabagare ke ne ka nna le dithuto tse supa tsa Bibela le batho ba ba farologaneng ba puso. Bontsi jwa bone bo ne bo tla dipokanong tse di rulagantsweng tsa phuthego tsa mo lefelong leo.

Tirelo E E Kgethegileng

Lemororo ke ne ke lwala ke ne ka kopa Jehofa go nthusa go diragatsa ikano ya me ya go mo direla ka nonofo yotlhe ya me. Ke ne ka leka go fitlhelela seo babulatsela ba ba thusang ba tshwanetseng go se fitlhelela mme ke sa ikwadisa. Jehofa o ne a nthusa go atlega mme ke ne ka ikwadisetsa tiro eno ka dikgwedi tsa June go ya go October. Morago Mokgatlho o ne wa amogela kopo ya me ya go nna mmulatsela wa ka metlha, mme ke ne ka simolola tirelo eno ka November 1976. Ke ne ka tlala boitumelo fa ke ne ke amogela kabelo ya me jaaka mmulatsela yo o kgethegileng kwa phuthegong ya Katako-Kombe ka September 1977.

Ke ne ka kgona go fitlhelela seno jang? Ke ne ke tsamaya tshimo ka setulo sa me sa maotwana ke thusiwa ke mosadi wa me yo o rategang le bakaulengwe mo phuthegong. Ka dinako dingwe ke ne ke tsamaya ke le esi ka dithobane. Ke ne ka wa gangwe kana gabedi. Ke ne ke nna jalo ke letile ke sa kgone go suta fa fatshe go fitlha fa motho mongwe a ne a feta foo mme a nthusa go ema a bo a nnaya dithobane tsa me gape. Ka metlha ke ne ke gakologelwa kafa baaposetoloi le barutwa ba ga Jesu ba neng ba iketleeditse ka gone. (Ditihō 14:21, 22; Bahebera 10:35-39) Nako le nako fa ke ne ke wa, ke ne ke rapela Jehofa gore a nthuse ke se ka ka kgobega marapo mme go na le moo a nneye nonofo ya go nna ke mo direla. Ka metlha ke ne ke gakologelwa tsholofetso eno e e molemolemo e e kwadilweng mo boperofeting jwa ga Isaia, e e reng “ediha gōna, setlhotsa se tla tlolañ yaka kwalata.”—Isaia 35:6.

Fa ke ntse ke oketsa tirelo ya me, ke ne ke ntse ke kgona go fenya bogole jwa me jwa mmele. Ka 1978 ke ne ka nna le tshiamelo ya go ya kwa Sekolong sa Bodihedi sa Bogosi kwa Lubumbashi, leo e neng e le loeto lwa dikilometara di le 2 000 ka llori, mokorwana le terena. Ka boammaaruri, Jehofa o ne a nnonotsha tota mo loetong lono. (Isaia 12:2; 40:29) Jaanong ke kgona le eleng go tsamaya—ka bothata—go fitlha go dimetara tse di ka nnang 100 kwa ntle ga dithobane. Ke tlhwatswegile pelo gore Jehofa o ne a utlwa thapelo ya me bogologolo ka 1973 ya gore a nneye maatla a go mo direla ke ititeile sehuba.

Kabelo E Ntšha

Ke ne ka amogela kabelo e ntšha ya tiro kwa phuthegong ya Lodja-Centre ka 1984 ke sena go nna mo phuthegong ya Katako-Kombe ka dingwaga tse supa. Ngwaga morago ga foo re ne ra simolola thuto ya buka dikilometara di le 12 go tloga foo, mme ka bonakonyana fela re ne ra simolola e nngwe dikilometara di le 30 go tswa fa go eo. Eno ya morago e ne ya nna setlhopha se se kwa thoko ka bonako mme ka 1988 se ne sa fetoga phuthego eo ke direlang jaaka mogolwane mo go yone jaanong.

Bobulatsela bo ile jwa ntsholegela molemo tota semoyeng mmogo le mo mmeleng. Fa ke tsamaya ka dithobane tsa me ke le mo tirelong, ke ne ke kgona go itshidila mmele ka tsela eo dingaka di neng di akantsha ka yone. Ke nonofile tota jaanong go feta fa ke ne ke simolola go bula tsela, mme keletso ya me ke gore ke itshoke mo tirong eno go fitlha kwa bokhutlong. Ke tlhoafaletse go bona kafa Jehofa a tla nthusang ka gone gore ke ‘tlole jaaka kwalata’ ka nako ya fa ke tla bo ke sa tlhole ke utlwa ditlhabi tse di botlhoko tseno tsa bolwetsi jwa me.

Ke leboga Rraarona wa selegodimo ka pelo ya me yotlhe ka a ile a nnaya nonofo, bopelokgale, le tirelo ya nako e e tletseng. Jaanong ke na le dingwaga di le 36 tseo di le 11 tsa tsone ke neng ke le mmulatsela, mme ke solofela go tswelela fela go sa kgathalesege gore go diragala eng mo isagweng. Ke ikaeletse go dirisa nonofo yotlhe ya me mo go tlotleng le mo go galaletseng Modimo o mogolo Jehofa.