Ke ka Ntlha Yang fa go Tsere Lobaka Jaana go Rarabolola Kgang Eno?

BOLAODI jwa Modimo e ne e se kgankgolo mo dingwageng tse di ka nnang 6 000 tse di fetileng. Fa a wetsa tiro ya gagwe e ntle ya go bopa, “Modimo oa bōna señwe le señwe se o se dihileñ, me, bōnañ, ga bo go le molemō thata.” (Genesise 1:31) Morago o ne a tsena mo pakeng ya go “ikhutsa”; mme gone, e se gore o ne a lapile. Go na le moo, o ne a khutlisa go bopa dilo mo lefatsheng, a tlhomamisegile gore boikaelelo jwa gagwe jo bo molemo ka dilo tseno bo tla atlega.—Genesise 2:1-3; Isaia 55:11.

Boikaelelo joo e ne e le eng? Jehofa o ne a baya banyalani bao ba ntlha mo lefelong le le bidiwang tshimo ya Edena. Tiro ya bone ya ntlha e ne e le go tlhokomela legae la bone la paradaise, go akaretsa le diphologolo tsa yone tse dintsi tse di farologaneng. Gape ba ne ba tshwanetse go tshola bana le go ba godisa. Fa nako e ntse e tsamaya, ba ne ba tla atolosetsa Paradaise go ya kwa bokhutlong jwa lefatshe fa lelapa leno le ntse le gola, ba dira jalo tumalanong le molao wa Modimo wa gore ba ‘fenye lefatshe.’ Ka gone, e ne e tla re kgabagare lefatshe le nne legae le lentle, le le tletseng ka lelapa le le itumetseng le le le utlwanang le direla Rraabone wa selegodimo. Seo e ne e le boikaelelo jwa Modimo jwa kwa tshimologong.—Genesise 1:27, 28; 2:8, 15, 20-22.

A Adame le Efa ba ne ba tla nna le seabe mo go diragatseng boikaelelo jono go fitlha kwa bokhutlong? Seo se ne se ikaegile ka gore a ba ne ba tla tswelela ba dirisana mmogo le jone ka go dira go ya ka ditaolo tsa Mmopi wa bone. Go reetsa ditaolo ga bone go ne go se ga bofofu ga go tlhoka go akanya. Ba ne ba neilwe go itlhophela fela ka kgololesego, ka go bo Modimo o ne o batla gore ba mo direle ka dipelo tse di itumetseng. O ne a ba naya teko e e motlhofo tota a batla go ba gakolola ka tsela e e bonalang gore ke molaodi. Ba ne ba ka ja dilo tsotlhe tse di neng di le mo tshimong kwantle ga se le sengwe. Go ne go na le setlhare sengwe sa maungo seo Modimo a neng a bolela jaana kaga sone: “Ka tsatsi ye u yañ ga shōna rure u tla shwa.”—Genesise 2:16, 17.

Mafoko ano a re bolelela gore Adame le Efa ba ne ba sa bopelwa gore ba tsofale ba bo ba swa. Loso lo ne lo tla tla fela fa ba ne ba ka tlola taolo e e motlhofo eno. Fa Adame le Efa ba ka bo ba ile ba reetsa taolo ya Modimo, ba ka bo ba santse ba tshela mo lefatsheng gompieno e le batsadi ba bana ba ba itekanetseng.—Bona molaomotheo o o boletsweng mo go Pesalema 37:29.

Lefa go ntse jalo, sengwe sa dibopiwa tsa Modimo tse e leng baengele, seo jaanong se bidiwang Satane se ne sa tshwaya tsela eo Modimo o neng o busa ka yone phoso. O ne a kgothaletsa Efa go ja loungo lo lo ileditsweng, ka bonokwane a akantsha gore fa a ne a ka tswa kafa tlase ga bolaodi jwa Modimo, . . . o ne a tla tshela sentle. Lefa go ntse jalo, boikaelelo jwa mmatota jwa ga Satane, e ne e le go eletsa go nna modimo wa losika lono lwa batho lo lo neng lo tlile go nna gone.—Genesise 3:1-5; Mathaio 4:8, 9; Yohane 8:44.

Ereka Jehofa a ne a neile banyalani bao ba ntlha sengwe le sengwe seo ba neng ba se tlhoka, Efa o tshwanetse a ka bo a ile a goletsa bolaodi jwa gagwe mme a gana dilo tseo Satane a neng a di akantsha. Lefa go le jalo, se se utlwisang botlhoko ke gore o ne a tswelela fela go tlola molao wa Modimo. Morago ga foo, Adame o ne a tlhopha go latela tsela e e boeleele ya mosadi wa gagwe. Ka gone banyalani bano ba ba neng ba gagamalela maikutlo a bone, ba ne ba tsuologela Modimo mmogo le Satane mme kgankgolo ya bolaodi jwa Modimo e ne ya tsoga.—Genesise 3:6.

Nako E E Neng E Tlhokega go Fedisa Kgankgolo Eno

Jehofa a ka bo a ile a senya batsuolodi ba bararo bao ka yone nako eo. Mme seo se ka bo se se kile sa araba dipotso tseo di neng di tsositswe ke botsuolodi joo jwa bone ka tsela e e kgotsofatsang. A motho o ne a ka kgona go ipusa ka katlego fela kwantle ga Modimo? A go ne go siame gore Modimo o batle gore go ikobelwe bolaodi jwa gagwe? Mo godimo ga moo, ka ntlha ya boitsholo jwa banyalani bao ba ntlha, a go ne go tla nna le batho bape bao ba neng ba tla itlhophela ka bobone fela go direla Modimo kwantle ga bogagapa—le eleng lefa ba lekwa ke Satane? (Yobe 1:7-11; 2:4) Go ne go tla tsaya nako e telele gore dipotso tseno di arabiwe. Go ne go tla tsaya nako e telele gape go nyeletsa dilo tse di tlisitsweng ke botsuolodi joo le go diragatsa boikaelelo jwa Modimo jwa go dira lefatshe paradaise e e neng e tla agiwa ke batho ba ba senang boleo. Re santse re emetse tharabololo ya bofelo ya dikgang tseno.

Tumalanong le molao wa gagwe, Modimo o ne wa amoga Adame le Efa tshiamelo ya go tshelela ruri. Ba ne ba sa tlhole ba tshwanela go nna le seabe mo go diragadiweng ga boikaelelo jwa gagwe jo bogolo. Lefa go ntse jalo, ba ne ba letliwa go nna le bana le go ba godisa. Ka boammaaruri Adame le Efa ba ne ba sa tlhole ba kgona go naya bana ba bone botshelo jo bo nonofileng, jo bo senang boleo. (Baroma 5:12) Mme lemororo dikokomana tse di neng tsa latela di ne tsa tsholwa di sa itekanela ebile di lebanwe fela ke loso, batho ba bantsi ba ne ba nna le tshono ya go bontsha gore ba eme kae mabapi le kgankgolo eno ya bolaodi.

Go Rarabolola Kgankgolo

Modimo o tlile go rarabolola dikgang tseno tse di amanang le bolaodi jwa gagwe jang? Ka tsela e nngwe dipotso tse di neng tsa tsosiwa bogologolo kwa Edena jaanong di arabilwe. Dingwaga tse di diketekete tsa hisitori ya motho di supile ka tsela e e botlhoko tota gore boiphako jwa ga Satane jwa gore Efa o ne a ka tshela botoka kwantle ga Modimo e ne e le maaka. Puso ya motho eo e itlhokomolosang Modimo e ntse e tswelela go palelwa. Ke fela jaaka Bibela e bolela jaana: ‘Motho o na le thata mo go yo mongwe fela go mo utlwisa botlhoko.’—Moreri 8:9.

Kafa letlhakoreng le lengwe, go ile ga kwadiwa dilo tse dingwe tse dintsi tse di molemo mo dingwageng tse dintsi fa esale Adame le Efa ba leofa. Bontsi jwa batho bo ile jwa kgomarela bolaodi jwa ga Jehofa bo sa kgaotse, sekao se se tlhomologileng thata ke sa “Morwa Motho,” Jesu Keresete ka boene. (Mathaio 20:18; Bahebera 11:1–12:3) Bao ba ileng ba sala melao ya Modimo morago ba bo ba dumela fa e le molaodi ba ile ba fitlhela tsela eno e le e e gaisang tota. Ba ile ba itemogela boammaaruri jwa seane seno se se reng: “Tshegōhacō ea ga Yehofa ea humisa, me ga a ke a e oketsa ka bohutsana.” (Diane 10:22) Mo godimo ga moo, kgabagare ba tla kgona go nna le seabe mo tiragatsong ya boikaelelo jo bogolo jwa Modimo ka ntlha ya tsogo ya baswi eo a dirileng gore e nne gone.—Yohane 5:28, 29.

Jehofa ga a lebala boikaelelo jwa gagwe jwa ntlhantlha. Bao ba ganang bolaodi jwa gagwe ga ba kitla ba letliwa go nnela ruri mo lefatsheng ka bosakhutleng mme Bibela e tlhagisa ka gore go ise go e kae Modimo o tla tsaya kgato kgatlhanong le bone. Re bala jaana: “Bogale yoa Modimo . . . bo senolecwe boikèpō yotlhe le tshiamololō.” (Baroma 1:18) Bibela e bitsa go supiwa gono ga bogale jwa Modimo, Hara-Magedona, eo e tla supang kwantle ga pelaelo fela gore eleruri o gone. Tiragalo eo e tla falolwa fela ke ba ba amogelang bolaodi jwa gagwe. “Gonne bathōkgami ba tla aga mo lehatshiñ, le baitekanedi ba tla sala ba nntse rure mo go yeōna. Me baikepi ba tla kgaolwa ba tlosiwa mo lehatshiñ.”—Diane 2:21, 22.

Namane e Tona ya Kgankgolo le Wena

Mabapi le dintlha tseno, mongwe le mongwe wa rona—fela jaaka Adame le Efa—o tshwanetse go tlhopha. A re tla leka go tshela kwantle ga Modimo? Kana re tla ineela mo bolaoding jwa gagwe? Gakologelwa, eno ke kgankgolo e e botlhokwa thata e e go lebaneng gompieno. Dikgankgolo tse dingwe, lemororo di ka lebega di le botlhokwa, di amana fela le botshelo jwa gago jwa jaanong. Eno e amana le botshelo jo bo sa khutleng. Tshwetso e o e dirang e tla ama isagwe ya gago ya goyagoile.

O ka supa jang gore o amogela bolaodi jwa Modimo? Ka go ithuta Lefoko la gagwe, Bibela, ka botlhaga, mme o batla go dira tumalanong le thato ya gagwe le go dira mmogo le Bakeresete ba boammaaruri. (Sefania 2:2, 3) Fa o dira jalo, o tla nna le tsholofelo e e itumedisang ya go bona boikaelelo jo bogolo jwa Modimo bo diragadiwa. O tla bona fa tsholofetso e e molemolemo eno e diragadiwa: “Gonne e tla re kwa pelenyana, moikepi a bo a sa tlhole a le gōna . . . Me bapelonomi ba tla rua lehatshe; ba tla inatehisa mo letlotloñ ya kagishō.” (Pesalema 37:10, 11) Abo seo e le matswela a a molemolemo jang ne a botlhe ba ba ikobelang bolaodi jwa Modimo! Abo seo e le lebaka le le maatla jang ne la go dira tshwetso e e botlhale mo kgannyeng e e botlhokwatlhokwa eno!