Ditshwantsho—Selo sa Konokono Se se Ka Dirisiwang go Fitlhelela Dipelo

DAFIDE o ne a ntse a sia go boloka botshelo jwa gagwe. Mmaba wa gagwe ke Saule, kgosi e e tloditsweng ya Iseraele. Lefa go ntse jalo, Saulo o ila Dafide tota, o tletse lefufa. Ereka boikaelelo jwa kgosi eno e ne e le go mmolaya, e ne e na le masole a le 3 000. Dafide le banna ba gagwe ba ne ba iphitlhile kwa gare ga logaga mo nageng, gonne ba ne ba le babotlana thata ka palo.

Jaaka Dafide le banna ba gagwe ba ne ba phuthega jalo mo lefifing, go diragala sengwe se se gakgamatsang. Kgosi Saule o tsena mo go lone legaga leo go tla go ikhutsa. Dafide o nanabelela mmaba wa gagwe, a tshotse sebolao ka seatla. Mme se se gakgamatsang banna ba ga Dafide, ga a bolaye kgosi. O sega fela moja wa kobo ya ga Saule. Dafide o ikwatlhaela le eleng selo seno se a se dirileng ka go bolela jaana: “A go se tualo ha nka dihèla morèna oa me selō se, e le motlodiwa oa ga Yehofa, me ke ka mo ntshetsa lecōgō ya me, ka a le motlodiwa oa ga Yehofa.”—1 Samuele 24:1-6.

Pego eno ya Bibela e re ruta thuto e kgolo kaga go tlotla maemo a taolo a Modimo o a nayang batho. E fitlhelela le pelo, gongwe ebile le go feta kgakololo e e newang ka tlhamalalo. Ao ke maatla a dipego tse di kwadilweng mo Lefokong la Modimo go re di re kaele.—Baroma 15:4.

Ka mo go tshwanelang he, Basupi ba ga Jehofa ba leka go dira se se fetang fela go bua dintlha fela fa ba rera mafoko a a molemo, fa ba tshwara dithuto tsa magae tsa Bibela, fa ba neela dipuo tsa Dikwalo, kana ba neela bosupi jo eseng jwa ka tlwaelo. Ba leka go fitlhelela dipelo ka go bolela maitemogelo le go dirisa ditshwantsho. Theocratic Ministry School Guidebook ya bone e tlhalosa jaana: “Ditshwantsho di tsosa kgatlhego ebile di tlhomolola dikgopolo tsa botlhokwa. Di dira gore motho a akanye le go dira gore go nne motlhofo go tshwara dintlha tse disha. Ditshwantsho tse di tlhophilweng sentle di dira gore kgang e ikuele jaaka e e rutang e bo e ame maikutlo. . . . Ka dinako tse dingwe, setshwantsho se ka dirisiwa go fenya kganetso kana botlhokakitso.”a—Tsebe 168.

Warren DuBois o kwadile jaana mo bukeng ya gagwe Essentials of Public Speaking: “A mokwadi kana sebui se supe dikgopolo tsa sone ka ditiro kana mafoko a a buiwang ke batho, o tla bona le kgang e e sa kgatlheng e simolola go nna le botshelo le go kgatlha.” Ka jalo, go tsenya botshelo le go kgabisa molaetsa o o setseng o kgatlha le o o nayang botshelo eleruri go tla thusa badihedi ba Bakeresete go fitlhelela dipelo.

Ditshwantsho Tse Di Rutang

Ke setshwantsho sa mofuta ofe seo se leng mosola thata? Gantsi ke seo se theilweng mo sengweng seo bareetsi ba ka kgonang go se tlhaloganya. Jesu Keresete o ne a tlhoma sekao se se molemo mabapi le seno. Mo Thutong ya gagwe ya kwa Thabeng, Jesu o ne a bua ka dilo tse di itsegeng thata jaaka letswai, dipone, le dinonyane. (Mathaio 5:1–7:29) Ka sekai, batho botlhe ba ne ba itse dipone tse di neng di tshubiwa ka lookwane lwa motlhware le tseo ka dinako dingwe di neng di bewa mo ditlhomong tsa dipone. Ka gone, barutwa ba ga Jesu ba tshwanetse ba bo ba ne ba lemoga gore ba tshwanetse go tshola lesedi la semoya fa a ne a ba bolelela jaana: “Batho ga ba ke ba chuba lobōnè, go tla ba lo huhumetsa tlhatse ga seèlō, me ba lo tlhōme mo setlhomoñ hèla; me lo phatsimèle botlhe ba ba mo tluñ. Hèla yalo a lesedi ya lona le phatsimè ha pele ga batho, gore ba bōnè ditihō tsa lona tse di molemō, me ba galaletsè Rra eno eo o kwa legodimoñ.” (Mathaio 5:15, 16) Ditshwantsho tse di motlhofo tseo di tshwanelang kgang di tla thusa badihedi ba Bakeresete go sedifatsa dikgopolo le dithuto tsa Bibela.

Gongwe ditshwantsho tse di neng di le maatla thata tsa ga Jesu e ne e le tse di neng di bua thata ka batho. Ela tlhoko pego e e mo go Luke dikgaolo 15 le 16. Bakwadi le Bafarisai ba ne ba kgala Jesu ka gore o ne a amogela baleofi le bakgethisi. O ne a araba ka go anela dikgang tseo di neng di tlhotlheletsa tota ka batho. O ne a bua ka modisa yo a neng a bone nku ya gagwe e e timetseng, mosadi yo a neng a bone ledi la gagwe le le timetseng, morwa sesinyi yo a neng a boetse gae, le motlhanka yo o sa siamang.

Ditshwantsho tsa mmatota le dilo tsa mmatota tsa botshelo tse di diragetseng di ka nna mosola thata mo modiheding wa Mokeresete. Ka sekai, ela tlhoko kafa Alexander H. Macmillan, yoo a neng a tsamaya thata jaaka sebui sa phatlalatsa ka dingwaga tse di ka nnang 60, a neng a tlhalosa boammaaruri jwa Bibela kaga baswi ka teng. Mo bogautshwaneng fela pele rraagwe yoo a neng a dumela gore moya ga o swe a swa, Macmillan o ne a tlotla jaana le ene:

“Rre o ne a mpotsa potso e e tlhamaletseng eno: ‘Morwaaka, a ke tlile go jewa ke bodutu mo lebitleng fa ke santse ke emetse gore bogosi bo simolole tiro ya jone ya go lere boitekanelo mo lefatsheng?’

“Eo e ne e le potso e lekau le neng le ka se ka la kgona go e araba ka tlhamalalo ka tsela e e tla kgotsofatsang monnamogolo yono yo a neng a ise a ko a akanye ka tsela eno.

“Fa ke araba ke ne ka mmotsa jaana: ‘Rra we, a o letse sentle mo bosigong jwa maabane?’

“O ne a araba jaana, ‘Ee, morwaaka, ke robetse sentle fa ngaka e sena go nnaya dipilisi tsa go robala.’

“‘A o ne o jewa ke bodutu fa o ne o robetse?’

“‘Nnyaa, ke ne ke sa jewe ke bodutu. Ke ne ke eletsa ekete nka tshwarela boroko ruri, ka go bo ke ne ke sa utlwe ditlhabi dipe.’”

A. H. Macmillan o ne a balela rraagwe Yobe 14:13-15 le 3:17-19 a bo a bolela jaana: “Jaanong o a bona rra, batho ba ba suleng ba mo borokong jwa loso ebile ga ba itse sepe fa ba le mo boemong joo, ka jalo ba ka jewa jang ke bodutu?”

A tsela e e molemo ruri ya go ruta! Fa e le gore o mongwe wa Basupi ba ga Jehofa, le wena o ka dirisa dikwalo le ditshwantsho go ikuela mo dikakanyong le mo dipelong tsa batho.

Go Bona Ditshwantsho

Mme gone, o ka bona kae ditshwantsho tse di rutang kana maitemogelo a mmatota a botshelo a dilo tse di diragetseng? Bontsi jwa tsone bo ka tsewa mo letloleng la letlotlo la dilo tse di go diragaletseng ka bowena. Ka sekai, a o tlhoka go supa kafa go nna le tumelo go thusang ka teng, kafa thapelo e leng maatla ka teng, kana kafa bodihedi bo itumedisang ka teng? Fa e le gore o Mokeresete o o ineetseng, o tla umaka ditiragalo tse di farologaneng tse di diragetseng mo botshelong jwa gago. O ka nna wa utlwa maitemogelo a a molemo kwa dipokanong tsa phuthego kana fa o ntse o bua le Bakeresete ba bangwe. Kana o ka bala boitemogelo bongwe jo bo kgatlhang go Yearbook of Jehovah’s Witnesses. Ebile tota, Watch Tower Publications Index e re isa kwa maitemogelong a a kwadileng a a tswang mo lefatsheng lotlhe.

O ka bolela boitemogelo ka tsela e e nang le mosola jang? Selo sa ntlha, go dira gore bareetsi ba gago ba nne ba ntse ba lebeletse sengwe go tla go thusa gore ba nne ba ntse ba go reeditse. Pele o bua boitemogelo o ka nna wa bolela jaana pele: “Mmulatsela mongwe o ne a kgona go itemogela ka namana kafa Jehofa a segofatsang bao ba mo ikanyang ka teng.” Ka bonako fela, bareetsi ba gago ba ipotsa gore ke masego afe a mmoledi yoo wa Bogosi a neng a a bona. Tlhomamisa gore o a ba bolelela.

Leka go bolela boitemogelo ka mafoko a gago. Bua dilo tsotlhe, ka go bo go dira jalo go nonotsha kgang ya gago. Ka go bolela ditiragalo tse di amegang ka tsela e e phepafetseng, o ka kgona go tlhotlheletsa bareetsi ba gago motlhofo fela. Mme tlhomamisa gore ga o remelele thata mo kgannyeng mo ba tla palelwang ke go bona lebaka la go bo o bolela boitemogelo joo. Gape, tila go feteletsa dilo, ka go bo lemororo seno se ka dira gore kgang e kgatlhe, go ka nna ga dira gore batho ba se ka ba dumela se o se bolelang. Ka lone lebaka le le tshwanang, tila go bua dilo tsa magatwe kana go bolela boitemogelo jo o senang boammaaruri jwa gore bo ntse jalo.

Go Tsenya Bibela Botshelo

Maitemogelo a a rutang thata a bonwa mo Bibeleng. Ka sekai, gongwe o batla go bontsha motho yo o ithutang Bibela kana bareetsi gore bana ba ka kgona go emela Jehofa Modimo. O ka nna wa swetsa go dirisa pego ya mosetsana yo o sa umakiwang ka leina yo a neng a bolelela mosadi wa ga Naamane kaga moperofeti wa ga Jehofa ebong Elisha. Sa ntlha, bala pego eo mo go 2 Dikgosi 5:1-5. Morago ga foo o ka nna wa botsa jaana: “O akanya gore go ne go le bokete go le kana kang mo mosetsaneng yono go boloka bothokgami mo Modimong mo nageng eo e go neng go obamelwa medimo ya maaka mo go yone? A ga a ka a dirisa bopelokgale go bua ka tsela e e tlhatswang pelo ka Jehofa le moperofeti wa gagwe?”

Go dira patlisiso pele go ka tswa go ile ga go thusa gore o tsenye botshelo mo pegong eo. O ka tswa o ne wa bona tshedimosetso e e mosola kafa tlase ga ditlhogo NAAMAN, SYRIA le ELISHA mo go Watch Tower Publications Index. Go leba ditshupiso mo go New World Translation of the Holy Scriptures go ka nna ga go lebisa kwa pegong e e mo go 2 Dikgosi le Pesalema 148:12, 13, koo re balang jaana gone: “Makau a na le basetsana; banna bagolo le banyana: A ba bakè leina ya ga Yehofa; gonne leina ya gagwè ke yeōna yeosi ye le goletsegileñ: kgalalèlō ea gagwè e godimo ga lehatshe le legodimo.” Abo seno se kgothatsa batho ba babotlana jang ne gore ba bue ka lefoko la Modimo ka bopelokgale!—Ditihō 4:29-31.

Fa o le modihedi wa Mokeresete, ‘u bone go ruta ga gago’ mabapi le seno. (1 Timotheo 4:16) Se bolele boammaaruri fela—bo supe ka ditshwantsho. Dira gore dipego tsa Bibela di tshele di nne le bokao. Dirisa maitemogelo le ditshwantsho tse di tshwanelang. Tseno ke ditsela tsa go fitlhelela pelo.

[Ntlha e e kwa tlase]

[Setshwantsho mo go tsebe 29]

Fela jaaka Jesu, badihedi ba motlha wa segompieno ba Bakeresete ba ka dirisa ditshwantsho go fetisa molaetsa wa bone le go fitlhelela dipelo tsa batho