Go Gololwa ga Memeno ya Bofelo ya Lewatle Le Le Suleng

ERILE ka September yo o fetileng, leparego le le sa bolong go thibela bakanoki ka masomesome a dingwaga kgabagare le ne la tloga. Go ne go lebega okare kgotlhang e e masisi eo e ntseng e le fa gare ga baithuti ba Memeno ya Lewatle le le Suleng e fedile, lemororo go ka tswa go ne go simologile kgotlhang e nngwe gape.

Memeno ya Lewatle le le Suleng e ne ya bonwa mo magageng gaufi le Lewatle le le Suleng ka 1947 le mo dingwageng tseo di ileng tsa latela. Di ne di le mosola thata go bontsha go tlhomama mo go botlhokwa ga tshedimosetso e e mo ditemaneng tsa Dikwalo tsa Sehebera le go sedimosa gore boemo jwa bodumedi kwa Palesetina bo ne bo ntse jang ka nako ya fa Jesu a ne a le mo lefatsheng. (Isaia 40:8) Lemororo memeno mengwe e ne ya gatisiwa ka bonako, ka 1991 memeno e e batlileng e tshwara 400 e ne e ntse e ise e gatisiwe ebile e ka se ke e bonwe ke bontsi jwa bakanoki. Bontsi jwa bone, jaaka Porofesara Ben Zion Wacholder, ba ne ba ikutlwa ba “swabisitswe ke go lemoga gore fa go ka tswelela go gatisiwa ka bonya jalo rotlhe re tla bo re sule fa lefatshe le bona mekwalo ya Lewatle le le Suleng.”

Mme lefa go ntse jalo boemo joo bo ne jwa fetoga ka September yo o fetileng. Selo sa ntlha, Porofesara Wacholder le modiri ka ene, Martin Abegg, ba ne ba bega gore ba ne ka botlhale ba dirisitse khomputara go kwalolola tshedimosetso eno e e sireleditsweng thata. Go tswa foo, Laeborari ya Huntington ya kwa San Marino, kwa California, kwa U.S.A, e ne ya itsise gore ba ne ba na le ditshwantsho tsa mekwalo ya ntlhantlha ya seatla le gore ba ne ba batla go di neela bakanoki ba ba tlotlegang thata kwantle ga dithibelo dipe. Go bonala sentle gore, go ne go dirilwe dikaelo tsa ditshwantsho di le mmalwa tsa memeno eno go tlhomamisa gore e bolokwa e le gone. Ditlhopha tsa ditshwantsho dingwe di ne di bolokilwe mo mafelong a a farologaneng, mme labofelo se sengwe se ne sa felela se le kwa Laeboraring ya Huntington.

Mokanoki mongwe o ne a re go fetoga gono ga dilo ‘ke sengwe se mo bakanoking se tshwanang le go digwa ga Lebota la Berlin.’ Bagatisi ba ba itsegeng kafa molaong ba ne ba re go gatisiwa ga tshedimosetso e e mo khomputareng le go gololwa ga ditshwantsho e ne e le ‘go utswa.’ Gongwe, kgogakgogano kaga melaometheo e e kaelang seo e tla tswelela ka dingwangwaga. Go ntse go eme jalo, go bonala gore bakanoki ba bangwe ba ba oketsegileng ba tla kgona go tlhodumela setlhopha sotlhe sa Memeno ya Lewatle le le Suleng.

[Setshwantsho mo go tsebe 32]

Setshwantsho sa karolwana e e akgelang ka Habakuke, mongwe wa Memeno ya Lewatle le le Suleng