Jaaka Maeba a Fofela Kwa Marobeng a One

GONGWE maeba ke dingwe tsa dinonyane tsa ntlha tse di neng tsa ruiwa ke batho. Baegepeto ba ne ba aga maroba gaufi le matlo a bone diketekete tse di fetileng tsa dingwaga ka boikaelelo jwa go bona dijo ngwaga otlhe. Nama ya dinonyane tseno e ne e ratiwa thata, mme mantle a tsone a ne a dirisiwa jaaka motshotelo. Mo Metlheng ya Bogare, maroba e ne e le selo se se elediwang thata mo e leng gore mo dinageng tse dingwe batho ba maemo a a kwa godimo kana ba ba nang le maemo mo bodumeding ke bone fela ba ba neng ba letliwa go nna nao.

Le mororo dikgogo jaanong e le tsone di jewang jaaka nama mo boemong jwa maeba, go santse go ka bonwa maroba a bogologolo. Maroba a a tshwantshitsweng fano ke a a bonwang kwa Egepeto.

Fa di boa di le dintsintsi jalo maitseboa, dinonyane tseno di fologela mo lerobeng di ipopile jaaka lone leru tota. Moperofeti wa Mohebera Isaia o ne a a umaka fa a ne a botsa jaana: “Ke bomañ ba, ba ba hohañ yaka leru, le yaka maeba a ea marobeñ a aōna?” Thanolo nngwe e bolela jaana: “Ke bomang bano ba ba tsamayang jaaka maru, ebile ba fofa jaaka maeba a ya kwa marobeng a one?”—Isaia 60:8; The New English Bible.

Gompieno karabo ya seno e bonwa mo makgolokgolong a diketekete tsa batho ba ba boifang Modimo ba ba oologelang mo phuthegong ya ga Jehofa. Ba ithuta go solofela mo Modimong fa ba le kwa Diholong tsa Bogosi tsa Basupi ba ga Jehofa. (Isaia 60:9) Fa ba le mo gare ga batho ba Modimo ba lemoga gore dilo tse di botlhokwa tsa semoya, tumelo e e tlhaga, le botsalano jo bo siameng bo ba naya kagiso le polokesego e e tshwanang le e e bonwang ke leeba fa le le mo lerobeng la lone.

[Motswedi wa Setshwantsho mo go tsebe 32]

Pictorial Archive (Near Eastern History) Est.