Latela Mokgwa O O Gaisang Segolobogolo wa Lorato
JEHOFA MODIMO o lorato. (1 Yohane 4:8) Morwawe, Jesu Keresete, o boletse gore re tshwanetse go rata Modimo le beng ka rona. (Mathaio 22:37-40) Aitsane, Modimo o laola lobopo lotlhe ka go dirisa yone nonofo eno! Ka jalo gore re tle re bone botshelo jo bo sa khutleng lefa e ka nna kwa kae re tshwanetse go latela mokgwa wa lorato.
Modimo o ne wa bontsha morafe wa Iseraela lorato mme lefa go ntse jalo kwa morago o ne a latlha phuthego eo gonne e ne e sa ikanyege. E ne ya re kwa morago a supa gore phuthego ya barutwa ba ga Jesu ke yone phuthego ya Gagwe e ntšha. Jang? Ka go ba supa ka tsela e e kgethegileng ka moya o o boitshepo o o neng o ba naya nonofo ya go bua ka diteme le go perofesa. Ka gone, ka Pentekosete ya 33 C.E., Bajuda ba le 3 000 le ba ba neng ba sokologetse mo kobamelong ya sejuda ba ne ba nna badumedi mme ba tlogela phuthego ya bogologolo gore ba tle ba tsene mo go e ntšha ya Modimo. (Ditihō 2:1-41) Ereka dineo tsa moya kwa morago di ne tsa newa ba bangwe ka baaposetoloi ba ga Jesu, dilo tse di ntseng jalo tse di neng tsa bonwa di ne tsa khutla fa ba ne ba swa. (Ditihō 8:5-18; 19:1-6) Ka nako eo dineo di ne di setse di supile gore Modimo o ne o thusa Iseraela wa semoya.—Bagalatia 6:16.
Dikgakgamatso tse di neng di dirwa ka dineo tsa moya di ne di le mosola. Lefa go ntse jalo, go bontsha lorato kana go akanyetsa ba bangwe ka bopelonomi go botlhokwa thata go na le go nna le dineo tsa moya. Moaposetoloi Paulo o ne a supa seno mo lokwalong lwa gagwe lwa ntlha lo a neng a lo kwalela Bakorintha (c. 55 C.E.). Mo go lone o ne a bua ka lorato jaaka “mokgwa moñwe o o gaisañ segolo bogolo.” (1 Bakorintha 12:31) Mokgwa oo o tlhalosiwa mo go 1 Bakorintha kgaolo 13.
Fa Re Sena Lorato Ga Re Sepe
Paulo o ne a bolela jaana: “Ha ke bua dipuō tsa batho le tsa baengele, me ha ke sena loratō, ke be ke etsa kgōtlhō e e gogomañ, kgotsa dimatla tsa tshipi tse di ōpañwañ hèla.” (1 Bakorintha 13:1) Fa lorato lo seo, ga go ne go thusa sepe go bua ka dipuo tsa batho tse di newang ke moya kana ka loleme lwa selegodimo lwa seengele. Paulo o ne a bona go le botoka go bua mafoko a matlhano a a ka agelelang go na le go bua mafoko a le dikete di le lesome ka puo e batho ba sa e tlhaloganyeng. (1 Bakorintha 14:19) Motho yo o senang lorato o ne a tla tshwana fela le “kgōtlhō e e gogomañ”—seletswa sa modumo o mogolo o o serang pelo—kana “dimatla tsa tshipi tse di ōpañwañ hèla,” ebile di sena molodi o o monate. Go bua ka diteme mme go sena lorato e ne e se tsela e e thethebatsang, e e agang semoyeng ya go galaletsa Modimo le e e thusang batho ba gagwe. Gompieno, re bua puo e batho ba ka e tlhaloganyang bonolo mo bodiheding jwa rona jwa Bokeresete.
Moaposetoloi o ne a tswelela ka go bolela jaana: “Ha ke na le nèō ea go ranola, me ke bile ke itse masaitseweñ aotlhe le kicō eotlhe; ha ke na le tumèlō eotlhe, e le e e lekanyeñ go hudusa dithaba, me ha ke sena loratō, ke be ke se sepè hèla.” (1 Bakorintha 13:2) Go perofesa ka go dira dikgakgamatso, go tlhaloganya masaitseweng ka tsela e e kgethegileng, le go nna le kitso e o e senolelwang ke moya go ne go ka nna ga solegela ba bangwe molemo mme e seng ba ba nang le dineo tseo fa e le gore ba ba nang le le dineo bao ba ne ba sena lorato. Paulo o ne a dirisa tsela e e kgethegileng e a neng a tlhaloganya masaitseweng a a boitshepo ka yone go thusa ba bangwe, mme neo ya go nna le kitso e a neng a na nayo e ne ya mo dira gore a kgone go bolelela pele gore batho ba ba neng ba le mo sekepeng se se neng se thubegile ba ne ba tla falola. (Ditihō 27:20-44; 1 Bakorintha 4:1, 2) Lefa go ntse jalo, lefa a na le ‘kitso yotlhe le tumelo yotlhe,’ fa a ne a sena lorato, o ne a tla bo a se sepe fa pele ga matlho a ga Jehofa.
Gompieno, moya wa ga Jehofa o dira gore Basupi ba gagwe ba kgone go tlhaloganya dipolelelopele tsa Bibela le masaitseweng a a boitshepo mme o a ba kaela fa ba ntse ba abela ba bangwe kitso eno. (Yoele 2:28, 29) Moya ono gape o re naya tumelo e e tlhokegang gore re fenye dikgoreletsi tse di bogolo jwa dithaba. (Mathaio 17:20) Ereka moya e le one o dirang dilo tseno, go phoso gore re batle go tlotlomadiwa ka ntlha ya tsone. Re tla bo re se sepe tota fa re sa dire dilo gore go tlotlomadiwe Modimo le fa re sa bontshe gore re a mo rata ebile re rata batho ba bangwe.—Bagalatia 5:6.
Ga go Thuse Sepe go Intsha Setlhabelo mme O Sena Lorato
Paulo o ne a bolela jaana: “Ha ke ntsha dilō cotlhe tsa me ke otla bahumanegi ka cōna, me ha ke ntshetsa mmele oa me go hisiwa, me ha ke sena loratō, ga go nthuse sepè.” (1 Bakorintha 13:3) Fa Paulo a ne a sena lorato, go ne go se kitla go mo thusa sepe lefa a ne a ka ntsha dilo tsotlhe tse a nang le tsone go fepa ba bangwe. Modimo o a re duela fa re aba ka gonne re tlhotlhelediwa ke lorato, ga a lebelele boleng jwa se re se abang kana gore re aba fela re batla go tlotlomadiwa, jaaka Ananiase le Safira ba ba neng ba aka. (Ditihō 5:1-11) Paulo o ne a tlhoma sekao se se molemo ka go ineela ka lorato mo go direng tiro ya go thusa badumedi ba ka Judea.—1 Bakorintha 16:1-4; 2 Bakorintha 8:1-24; 9:7.
Le eleng lefa o ka swela tumelo ka ntlha ya boammaaruri, seo ga se sepe mo Modimong fa o sena lorato. (Diane 25:27) Jesu o ne a bua ka setlhabelo sa gagwe mme o ne a sa ipelafatse ka sone. Go na le gore a ipelafatse o ne a direla ba bangwe ka lorato. (Mareko 10:45; Baefesia 5:2; Bahebera 10:5-10) Bomorwarraagwe ba semoya ba ‘ntsha mebele ya bone setlhabelo se se tshedileng’ mo tirong ya Modimo mme e seng go nna baswelatumelo ba ba batlang go itlotlomatsa mme ba dira ka boikokobetso ka ditsela tse di tlotlomatsang Jehofa le tse di bontshang gore ba a mo rata.—Baroma 12:1, 2.
Ditsela Tse Dingwe Tse Lo Tla Re Dirang Gore Re Tseye Kgato ka Tsone
Paulo o ne a kwala jaana: “Loratō lo ichōka ka bopelotelele, lo pelonomi.” (1 Bakorintha 13:4a) Go bontsha ga Modimo bopelotelele fa esale Adame a leofa, go ne ga dira gore ba bantsi ba ikwatlhae mme ba bolokege. (2 Petere 3:9, 15) Fa re na le lorato, re tla ruta ba bangwe boammaaruri re sa fele pelo, Re tla tila go galefa mme re tla akanyetsa ba bangwe le go ba itshwarela. (Mathaio 18:21, 22) Lorato gape lo pelonomi, mme re atamalana le Modimo ka ntlha ya gore o pelonomi. Loungo lwa moya wa gagwe eleng bopelonomi lo re dira gore re se ka ra batla dilo tse ba bangwe ba ka se di kgoneng go feta tse ene a di batlang mo go rona. (Baefesia 4:32) Lorato ebile lo re dira gore re nne pelonomi le mo bathong ba ba sa lebogeng.—Luke 6:35.
Paulo o ne a oketsa jaana: “Loratō ga lo pelotshètlha; loratō ga lo ko lo ikgantsha, ga lo mabela.” (1 Bakorintha 13:4b) Bopelotshetlha ke nngwe ya ditiro tsa nama tse di tla dirang gore motho a se ka a tsena mo Bogosing jwa Modimo. (Bagalatia 5:19-21) Lorato lo re dira gore re se ka ra nna lefufa ka dithoto tsa ba bangwe kana fa ba atlega. Fa mongwe a amogela tshiamelo nngwe ya tirelo e re neng re e eletsa, lorato lo tla re dira gore re itumele le ene, re mo tshegetse, re bo re leboge Modimo go bo a kgona go dirisiwa gore phuthego e solegelwe molemo.
Ereka ‘lorato lo sa ikgantshe,’ ga le re tlhotlheletse gore re nne mabela ka seo Modimo o re letlang gore re se dire mo tirelong ya gagwe. Bangwe ba Bakorintha ba ne ba nna mabela jaaka ekete dineo tsa moya di ne di tswa mo go bone, mme tsone di ne di tswa kwa Modimong, fela jaaka ditshiamelo tsa phuthego ya gagwe ya motlha wa segompieno. Go na le gore re nne mabela ka maemo a rona mo phuthegong ya Modimo, hee, a re itlhokomeleng gore re se ka ra wa. (1 Bakorintha 1:31; 4:7; 10:12) Lorato “ga lo mabela,” mme tlhaloganyo ya motho yo o senang lorato e ka tlala ka go ikgogomosa. Batho ba ba lorato ga ba ikutlwe gore ba kwa godimo ga ba bangwe.—1 Bakorintha 4:18, 19; Bagalatia 6:3.
Ga Lo Ko Lo Dira Kafa go Sa Tshwanelang, Ga Lo Ipatlele, Ga Lo Gakale
Lorato “ga lo ko lo diha kaha go sa chwanèlañ, ga lo ko lo ipatlèla, ga lo ko gakatsèga.” (1 Bakorintha 13:5a) Le tlhagolela maitseo a mantle, boitshwaro jwa bomodimo, go tlotla balaodi, le go itshwara sentle kwa dipokanong tsa Bokeresete. (Baefesia 5:3-5; 1 Bakorintha 11:17-34; 14:40; bapisa le Yude 4, 8-10.) Ereka lorato lo dira gore mongwe le mongwe a ikutlwe gore o a tlhokega, fela jaaka dikarolo tsotlhe tsa mmele wa motho, phuthego e e nang le lorato ke lefelo la kagiso le la botshabelo. (1 Bakorintha 12:22-25) Go na le gore ‘lo ipatlele fela tse e leng tsa lone,’ lorato lo dira gore re ithontshe dilo dingwe tse di re tshwanetseng ka dinako dingwe mme re bontshe ba bangwe gore re a ba kgatlhegela le gore re kgatlhegela go ba bona ba itumetse. (Bafilipi 2:1-4) Lorato le re dira gore ‘re nne dilo tsotlhe mo bathong botlhe, gore re tle re boloke ba bangwe’ ka bodihedi jwa rona.—1 Bakorintha 9:22, 23.
Lorato “ga lo ko lo gakatsèga.” Go phatloga ka bogale ke nngwe ya ditiro tsa nama ya rona e e tletseng boleo, mme lorato lo re dira gore re nne “bonya go tlala bogale.” (Yakobe 1:19; Bagalatia 5:19, 20) Lefa ebile ka dinako dingwe re na le lebaka la go galefa, lorato ga lo re letle gore re nne re ntse re galefile, ka go dira jalo re naya Diabolo sebaka. (Baefesia 4:26, 27) Bagolwane segolobogolo ba tshwanetse go tila go galefa fa badumedi ka bone ba palelwa ke go dira kafa ba akantshang ka teng.
Paulo o ne a bolela gape jaana kaga lorato: “Ga lo ko lo koega melato.” (1 Bakorintha 13:5b, “NW”) Lorato ga lo boloke lenaane la diphoso jaaka fa melato e kwalwa ka bongwe mo bukeng ya melato. Le bona badumedi ba bangwe ba siame fela mme ga le ipusolosetse mo diphosong tsa mmatota kana tse go akanngwang gore ke diphoso. (Diane 20:22; 24:29; 25:21, 22) Lorato lo re thusa go ‘latela dilo tse di dihanang le kagiso.’ (Baroma 14:19) Paulo le Barenabase ba ne ba seka ba utlwanela sengwe ka nako nngwe mme mongwe le mongwe a ya go direla Modimo go sele, mme lorato lo ne lwa ba kopanya mme lwa ba dira gore ba se ka ba nna ba kgopisegile.—Lefitikō 19:17, 18; Ditihō 15:36-41.
Go Sekamela mo go Nneng Tshiamo le Boammaaruri
Paulo o ne a tswelela ka go bua jaana kaga lorato: “Ga lo itumelele tshiamololō, me lo itumèlèla boamarure.” (1 Bakorintha 13:6) Ba bangwe ba itumela thata fa ba dira tshiamololo mo ebileng ‘ba sa robale, ba ise ba dire bosenyi pele.’ (Diane 4:16) Mo phuthegong ya Modimo ga re gaisane kana gone go itumela fa mongwe a wetse mo boleong. (Diane 17:5; 24:17, 18) Fa phuthego ya Korintha e ka bo e ne e rata Modimo ebile e rata tshiamo, e ka bo e se kile ya itlhokomolosa boitshwaro jo bo maswe jo bo neng bo le teng. (1 Bakorintha 5:1-13) Gareng ga dilo tse dingwe, lorato lwa rona lwa go dira tshiamo lo tla re thibela go itumelele metshameko e e sa siamang mo thelebisheneng, mo dibaesekopong, kana mo diterameng tse di tshamekiwang mo seraleng.
Lorato “lo itumèlèla boamarure.” Fano go supiwa pharologano fa gare ga lorato le tshiamololo. Go phepafetse gore seno se kaya gore le re dira gore re itumelele tsela eo tshiamo le boammaaruri di tlhotlheletsang batho ka yone. Re bona boitumelo mo dilong tse di agelelang batho le tse di dirang gore boammaaruri le tshiamo di tswelele pele. Lorato lo re thibela mo go bueng maaka, le re dira gore re itumele fa re bona bothokgami ba supiwa ba sena molato, mme le dira gore re itumele fa boammaaruri jwa Modimo bo fenya.—Pesalema 45:4.
Mokgwa O Lorato Lo Kgona go Dirisanang le Dilo ka One
Paulo o ne a kwala jaana fa a tswelela a tlhalosa kaga lorato: “Lo ichōkela dilō cotlhe, lo dumèla dilō cotlhe, lo sholohèla dilō cotlhe, lo iphapaanya le dilō cotlhe.” (1 Bakorintha 13:7) Mo go ‘itshokeleng dilo tsotlhe,’ lorato lo thibela bogale fela jaaka marulelo a a siameng a kgona go thibela pula. Fa mongwe a re kgopisa mme e bo e re kwa morago a kopa gore re mo itshwarele, lorato lo re dira gore re itshokele go utlwisiwa botlhoko, re itshwarele motho yo o re kgopisitseng go na le gore re tsamaye re seba ka dikgang tseo. Ka go bontsha lorato, re leka ‘go gapa wa ga rona.’—Mathaio 18:15-17; Bakolosa 3:13.
Lorato “lo dumèla dilō cotlhe” tse di tswang mo Lefokong la Modimo mme lo dira gore re anaanele dijo tsa semoya tse di abiwang ke “motlhanka eo o boikañō le eo o botlhale.” (Mathaio 24:45-47) Lefa gone re sa tsiediwe bonolo, lorato lo re thusa gore re se ka ra nna le pelo e e tletseng dipelaelo gape le dira gore re se ka ra akanyetsa badumedi ba bangwe bosula. (Moreri 7:21, 22) Lorato gape “lo sholohèla dilō cotlhe” tse di kwadilweng mo Dikwalong, jaaka dilo tsa boammaaruri tse di mabapi le Bogosi jwa Modimo. Ereka re tlhotlhelediwa ke lorato, re solofela ebile re rapela gore dilo di tla tsamaya sentle fa re le mo maemong a a re lekang. Lorato gape lo re tlhotlheletsa go bolelela ba bangwe kaga lebaka la go bo re na le tsholofelo. (1 Petere 3:15) Mo godimo ga moo, lorato lo “iphapaanya le dilō cotlhe,” go akaretsa le fa re leofelwa ke ba bangwe. (Diane 10:12) Tsela e re ratang Modimo ka yone e re thusa gape gore re itshokele pogiso le diteko tse dingwe.
Paulo o ne a oketsa jaana: “Loratō ga lo ko lo tlhaèla gopè.” (1 Bakorintha 13:8a) Fela jaaka Jehofa a se ka a tlhaela, lorato le lone ga lo kake lwa tlhaela. Ereka Modimo wa rona yo o nntseng ruri ka bosakhutleng e le sekao sa mmatota sa lorato, nonofo eno e tla nnela ruri. (1 Timotheo 1:17; 1 Yohane 4:16) Lobopo lo tla nna lo ntse lo laolwa ka lorato. Ka jalo a re rapeleng Modimo gore o re thuse go fenya mekgwa ya go sa akanyetse ba bangwe mme re bontshe loungo lono lwa moya lo lo sa tlhaeleng.—Luke 11:13.
Dilo Tse Di Tlileng go Feta
Paulo o ne a kwala jaana fa a ne a bua a lebisitse mo dilong tse di tla tlang: “Me leha go na le diperofeshō di tla khutlisiwa; le ha go le dipuō, di tla hèla; leha go le kicō, e tla khutlisiwa.” (1 Bakorintha 13:8b) ‘Dineo tsa go perofesa’ di ne di dira gore batho ba ba neng ba na le tsone ba perofese dilo tse disha. Lefa gone dineo tsa mofuta oo di ne tsa khutla fa phuthego ya Bokeresete e sena go tlhongwa jaaka phuthego ya Modimo, maatla a gagwe a go perofesa ga a kitla a feta le ka motlha, ebile Lefoko la gagwe le na le boperofeti jotlhe jo jaanong re bo tlhokang. Go kgona go bua ka diteme ka tlhotlheletso ya moya le gone go ne ga khutla, le go nna le kitso e e kgethegileng go ne ga “khutlisiwa” jaaka go ne go boleletswe pele. Lefoko la ga Jehofa le le feletseng le re naya se re se tlhokang gore re tle re bolokege. (Baroma 10:8-10) Mo godimo ga moo, batho ba Modimo ba tletse ka moya wa gagwe mme ba ungwa maungo a one.
Paulo o ne a tswelela jaana: “Gonne re itse ka bontlha ñwe, re perofesa ka bontlha ñwe: Me e tla re se se itekanetseñ se tsile, se se emeñ ka bontlha ñwe se tla khutlisiwa.” (1 Bakorintha 13:9, 10) Dineo tsa kitso le tsa go perofesa di ne di sa felela. Go bonala sentle gore boperofeti jo bo ntseng jalo bo ne bo sa tlhalose ka botlalo le moperofeti mongwe le mongwe o ne a sa bolele tshedimosetso e e tletseng ka isagwe, a tlhoka kitso e e feletseng ka seo a neng a se bolelela pele. Lefa go ntse jalo, gone jaanong, go tlhaloganngwa ga boperofeti go ntse go ya go felela ka bonya ka bonya. Ka sekai, dintlha tse di diragatsang boperofeti jwa Bibela di tlhomamisa gore Jesu o ne a amogela taolo ya go busa batho ka 1914. Fa esale go tloga ka nako eo, re ntse re tshela mo ‘metlheng ya bokhutlo’ mme re itumelela kgolo e e ntseng e tswelela pele ya go itse dilo tsa semoya le go tlhaloganya boperofeti jwa Bibela. (Daniele 12:4) Ka bone, re atamela kwa go nneng le kitso e e itekanetseng le “se se itekanetseñ” se tshwanetse sa bo se atametse.
Nonofo E E Di Fetang Tsotlhe E Sala E ntse E Le Teng
Paulo o ne a kwala jaana fa a ne a bua ka mokgwa o phuthego e neng e gatela pele ka teng: “E rile ke le ñwanyana, ka bua yaka ñwanyana, ka ikutlwa yaka ñwanyana, ka akanya yaka ñwanyana: me yanoñ ka ke le monna, ke latlhile dilō tsa bonyana.” (1 Bakorintha 13:11) Ereka tsela e ngwana a dirang dilo ka yone e ikaegile ka kitso e nnye e a nang nayo le tsela e a golang ka yone, o ka nna wa mo isa kwa pele le kwa morago, jaaka ekete o akgaakgiwa mo bolaong jo bo diretsweng bana. Mme lefa go ntse jalo, monna ene mmele wa gagwe o godile, o na le kitso e kgolwanyane, mme ga se gantsi a akgaakgiwang bonolo. O tlogetse go tlhola a akanya jaaka ngwana, a itshwara jaaka ngwana, ebile o tlogetse mekgwa ya bongwana. Ka mo go tshwanang, fa phuthego ya Modimo ya selefatshe e sena go gola e tswa mo bongwaneng jwa yone, O ne a bona go se botlhokwa gore e nne le dineo tsa moya tsa go perofesa, go bua ka diteme, le go nna le kitso. Le mororo maloko a phuthego ya segompieno, e gone jaanong e setseng e le mo dingwageng tsa botsofe, le bone ba bona go se botlhokwa go nna le dineo tseo, ba itumelela go direla Modimo ba kaelwa ke moya wa gagwe.
Paulo o ne a oketsa jaana: “Gonne gompiyeno re bōna mo seiponiñ, go le lehichwana: me e tla re mo lobakeng louō re tla bōna go lebanywe dihatlhōgō; gompiyeno ke itse ka bontlha ñwe; me e tla re mo lobakeñ louō, ke tla itse hèla yaka le nna ke itsilwe.” (1 Bakorintha 13:12) Ka nako ya fa phuthego e ne e santse e simologa, e ne e ise e nne nako ya gore Modimo o senole dilo dingwe. Ka gone, di ne di sa bonale sentle, go ne go ntse jaaka ekete Bakeresete ba ne ba lebile mo seiponing sa tshipi se se sa kgoneng go bontsha sentle. (Ditihō 1:6, 7) Mme lefa go ntse jalo re setse re le ka kwa ga go bona ka pono e e letobo. Go diragadiwa ga boperofeti le dilo tse di tshwantshediwang ke tse dingwe di bonala sentle, gonne eno ke nako ya gore Modimo o senole dilo. (Pesalema 97:11; Daniele 2:28) Le mororo Paulo ka boene a ne a itse Modimo, o ne a tlile go itse thata kaga Jehofa le go nna le bokopano jo bo atamalaneng thata le Ene fa moaposetoloi yono a tla bo a tsosediwa botshelong jwa selegodimo, ka jalo a amogela tuelo e e tletseng ya tiro ya gagwe jaaka Mokeresete.
Paulo o ne a kwala jaana fa a ne a konela molaetsa wa gagwe o mokhutshwane kaga lorato: “Me yana go sala tumèlō, le cholohèlō, le loratō, boraro yo; me se segolo mo boraruñ yo ke loratō.” (1 Bakorintha 13:13) Lefa gone dineo tsa moya tsa go dira dikgakgamatso di seyo, jaanong phuthego e na le kitso e e feletseng le go feta le lebaka la go nna le tumelo, tsholofelo le lorato tse di nonofileng. E na le tumelo ya gore sengwe le sengwe se Modimo o se solofeditseng se tshwana fela jaaka ekete se diragaditswe. (Bahebera 11:1) Dilo tsa botlhokwa tse re di dumelang di tla khutla fela fa dilo tse di boleletsweng pele mo Lefokong la Modimo di diragala. Dilo tse di dirang gore re nne le tsholofelo di tla khutla fela fa re bona dilo tse di solofetsweng di diragala. Mme lefa go ntse jalo lorato lone lo tla nnela ruri. Ka gone, a Basupi botlhe ba ga Jehofa ba tswelele ka go latela mokgwa o o siameng segolobogolo wa lorato.