Kgato ya go Boela kwa Morago
‘ONE a bua le bone ka ditshwantsho.’ Ao ke mafoko a Bibela e a bolelang pele e bolela ditshwantsho tse tharo tsa ga Jesu tse di tlhomologileng kaga kutlwelobotlhoko—nku e e latlhegileng, ledi le le latlhegileng, le morwa sesinyi.—Luke 15:3-32.
Ditlhogo tse pedi mo go Tora ya Tebelo ya April 15, 1991, di ne tsa sekaseka ditshwantsho tseo mme tsa thusa babadi ba bantsi go bona kafa go ka utlwelwang ba bangwe botlhoko ka teng gompieno. Go ne go tlhokomedisiwa thata badisa ba semoya gore ba tseye kgato pele go ikgolaganya le batho ba ba neng ba kgaotswe mme lefa go ntse jalo ba ka nna ba tsaya kgato fa ba ka ba etela ka bopelonomi. Ditlhogo tseno mmogo le thulaganyo eno e ntšha di ne tsa nna le matswela afe?
Ka bonako fela fa makasine ono o sena go phasaladiwa, monna mongwe kwa Washington, kwa U.S.A. o ne a kwala jaana: “Ke amogetse bosupi jwa gore Jehofa o tletse boutlwelobotlhoko jo bo lorato mo posong ya me gompieno. Ke ntse fano matlho a me a geletse dikeledi ebile pelo ya me e tletse boitumelo ka dilo tse re di newang le diphetogo tse di leriwang ke Mogodimodimo. Ke Modimo yo ka boammaaruri a leng tshiamo fela a ka thusang batho ba sekadinku ba ba latlhegileng. . . . Ee, ke kgaotswe, mme lefa go ntse jalo ke ipaakanyetsa go busediwa gape.” O ne a busediwa ka October.
Mme lefa go ntse jalo go tweng ka maeto a a neng a dirwa ke bagolwane ba babedi ba phuthego? Mosadi mongwe yo o nyetsweng wa Mokeresete o ne a kwala jaana: “Ga ke kgone go tlhalosa kafa ke ikutlwang ka teng ka mafoko. Monna wa me o sale a kgaotswe ka dingwaga di le 13. Bagolwane ba ne ba mo etela jaaka go ne go akantshiwa mo setlhogong seo. Maabane maitseboa o letse a ile kwa go nngwe ya dipokano e le la ntlha mo dingwageng tse dintsi. Jaanong o leka go fetola botshelo jwa gagwe le go boela morago.”
Balebedi ba ba etang ba bona matswela a seno fa ba ntse ba etela phuthego e nngwe morago ga e nngwe. Molebedi mongwe wa potologo o ne a kwala jaana bosheng:
“Fa Tora ya Tebelo ya April 15, 1991 e ne e gololwa, ba le bantsi ba ne ba ipotsa gore bao ba tla etelwang ke bagolwane ba tla tsaya kgato efe. Karabo jaanong e a bonala.
“Mo potologong ya rona, diphuthego tse nne tsa bofelo tse ke neng ka di etela di ile tsa bona go boa batho ba le robong ba boela mo Diholong tsa Bogosi. Le mororo go buseditswe fela a le mongwe, ba bangwe ba le robedi ba gatela pele sentle. Bagolwane le diphuthego ba itumelela go bona maungo a tiro ya bone le botlhale jwa go dirisa dikaelo tsa bolegodimo.
“Re itumelela thulaganyo e e molemo eno le e e supang bopelotlhomogi. Go ntse fela jaaka kgaitsadi mongwe yo a neng a busediwa a ne a akgela, ‘Nna ka bonna ke ne ke se pelokgale gore nka boa, ereka ke ne ke ikutlwa gore Jehofa o nteba ke le molato. Mme lefa go ntse jalo ka nako ya fa bagolwane ba ne ba nketela, seo e ne e le kgothatso e ke neng ke e tlhoka ya gore ke boele morago.’ Matlhagatlhaga a gagwe a ile a kgothatsa phuthego thata.”
Le eleng lefa ba le bantsi bao ba etelwang ba sa tseye kgato, go na le molemo o o fitlhelelwang ka kgato eno e e supang bopelotlhomogi. Ka gone, go tloga ka September bagolwane ba phuthego nngwe le nngwe ba tla bo ba boeletsa gape maina a bao ba leng mo tshimong ya bone bao ba kgaotsweng mme ba baakanyetsa go etela botlhe bao ba akanyang gore ba ka tsaya kgato fa ba supediwa bopelotlhomogi.