Mobishopomogolo Ga A Kgone!

MO NGWAGENG e e fetileng, lekgotlana le le laolang (lekgotla la bodumedi la bakadinale) le ne la rulaganngwa go tla go tlotla ka dintlha dingwe tseo di amang Kereke ya Katoliki thata. Nngwe ya tsone, go ya ka pampiri ya dikgang Il Sabato, ke “bopelokgale jwa makoko.” Lefa go ntse jalo, pampiri eo ya dikgang e ne ya bolela jaana: “Bakadinale ga ba a tshwanela go nna le bothata go dumalana mo ntlheng eno. Botlhe ba dumela gore go tlhokega gore kgang ya mekgatlho e mesha e tshwanetse go sekasekiwa ka kelotlhoko le gore e tlhoka go thibelwa, mme fa go kgonega go thibelwe le go anama ga yone.”

Lefa go ntse jalo, go bonala gore “bopelokgale jwa makoko” ga se bothata jwa kwa Italy fela. Il Sabato e bega jaana: “Fa a ne a etetse Vatican bosheng jaana, Mobishopomogolo Kirill wa kwa Smolensk [mongwe wa metsemegolo ya bogologolo ya kwa Russia] . . . o ne a kopa mopapa gore a mo thuse gore a ka kgona jang go lepalepana le go oketsega go gogolo ga Basupi ba ga Jehofa le ditlhopha tse di tshwanang kwa Soviet Union.”

Baeteledipele ba ditumelo tsa semorafe ba ne ba ngongorega ka tsela e e tshwanang mo lekgolong la ntlha la dingwaga ka nako ya fa batho ba ba neng ba ngaparetse Bokeresete ba ne ba bo anamisa ka bopelokgale tota. Ka nako nngwe Bajuda ba ne ba ngongorega mo babusing ba motse ba galefile ba re: “Batho ba, ba ba tshelepantseñ lehatshe, le mono ba tsile”! (Ditihō 17:6) Bogologolo ka nako eo, baeteledipele ba bodumedi ba ne ba leka ka natla tota go thibela gore Bokeresete bo se ka jwa anama, mme lefa go ntse jalo ba ne ba palelwa. Gompieno le gone, maiteko ape fela a ba a dirang go thibela gore dithuto tsa Bokeresete jwa boammaaruri di se ka tsa anama a tlile go palelwa. Modimo o solofetsa jaana ka boene: “Ga go na sebolaō sepè se se thudilweñ kaga gago se se tla segōhalañ; le loleme loñwe le loñwe lo lo tla gu cogèlañ mo tshekoñ, u tla lo sekisa. Selō se, ke boshwa yoa batlhanka ba ga Yehofa, le tshiamō ea bōnè e e cwañ mo go nna, go bua Yehofa.”—Isaia 54:17.