Ba Ne Ba Itse Leina la Modimo
KAROLWANA ya ntlha ya buka eo go itsegeng e ne ya kwalwa ya ba ya phasaladiwa mo dikoloneng tsa Amerika tsa Engelane e ne e le Bay Psalm Book. Kgatiso ya yone ya ntlhantlha e ne ya gatisiwa ke Stephen Daye kwa Massachusetts Bay Colony ka ngwaga wa 1640. Buka eno e ne e na le buka ya Bibela ya Dipesalema, eo e neng e ranotswe go tswa mo Sehebereng go ya mo puong ya Seesemane eo e neng e buiwa le go kwalwa ka nako eo.
Selo se se tlhomologileng kaga Bay Psalm Book eno e ne e le tsela eo e neng e dirisa leina la Modimo ka yone mo ditemeng dingwe tsa yone. Ka ntlha ya moo, mongwe le mongwe yo o neng a bala kgatiso eo morago koo mo e ka nnang dingwaga tse 350 tse di fetileng o ne a ka kgona go itse leina la Mmopi wa rona. Ka sekai, mo kgatisong eo, Pesalema 83:17, 18 e balega jaana: “A ba tlhakane ditlhogo ba gakgamale ka bosakhutleng, ba tsenwe ke tsebetsebe e kgolo: ee, a ba tlhajwe ke ditlhong, mme ba nyelelele ruri. Gore batho ba ke ba itse; gore wena yo leina la gago o le esi fela e leng IEHOFA, o mogodimodimo o okametse lefatshe lotlhe.”
Ke boammaaruri gore, Modimo yo o godimodimo o batla se se fetang fela go itse gore leina la gagwe ke Jehofa (Iehofa). Mo go Bay Psalm Book eno, Pesalema 1:1, 2 e a re “monna yo o sego” ga a tsamaye mo kgakololong ya yo o seeleele, “go na le moo, o itumelela molao wa ga Iehofa thata.” New England Psalms e e kwadilweng sesha ya 1648 e a re: “Ene yo o itumelelang molao wa ga Jehofa thata.”
New World Translation of the Holy Scriptures ya lekgolo leno la bo 20 la dingwaga e balega jaana: “Go sego monna yo o sa tsamayeng mo kgakololong ya baikepi, lefa e le go ema mo tseleng ya baleofi, lefa e le go dula mo setulong sa basotli. Mme go itumela ga gagwe go mo molaong wa ga Jehofa, mme o akanya ka one motshegare le bosigo.”
E le gore motho a ke a itumele eleruri, o tshwanetse a gana kgakololo ya baikepi. Ga a tshwanela go latela kgakololo ya baleofi ebile ga a ka ke a itsalanya le basotli ba ba boikepo. Gareng ga tse dingwe, o tshwanetse a tila botsalano le bao dikgakololo le boitshwaro tsa bona di ka mo raelang go dira boitsholo jo bo sa siamang jwa tlhakanelodikobo, go dirisa diokobatsi ka tsela e e sa siamang, le dilo tse dingwe tse di thulanang le molao wa Modimo. Ee, boitumelo jwa boammaaruri bo ikaegile ka go ithuta ka ga Modimo wa boammaaruri, yo leina la gagwe e leng Jehofa, le go dirisa molao wa gagwe jaaka fa o senolwa mo Bibeleng.