Go Itumelela Mmopi wa Rona yo Mogolo

“A Iseraela a [itumelele Modiri wa gagwe yo mogolo, NW]; a bana ba Siona ba ipelè mo kgosiñ ea bōnè.—PESALEMA 149:2.

1. Le mororo go ile ga goelediwa ga twe “kgololesego e setse e tlile,” totatota batho ba mo boemong bofe?

LEFATSHE la gompieno le tlhasetswe ke “botlhoko yoa pèlèga.” Ao ke mafoko a Jesu a neng a a dirisa mo boperofeting jo bo malebana le “bokhutlō yoa lehatshe,” motlha o o boitshegang o o simologileng ka ntwa ya ntlha ya lefatshe ka 1914. (Mathaio 24:3-8) Boradipolotiki ba le bantsi ga ba bone sepe fa e se letobo fela mo isagweng. Le mororo kwa Yuropa Botlhaba go ile ga goelediwa ga twe “kgololesego e setse e tlile,” mongwe yo o kileng a nna poresidente mo lefelong leo o ne a sobokanya boemo jwa koo jaana: “Go ntsifala thata ga batho le go gotela ga lefatshe, diphatlha tse di leng mo ozone le AIDS, matshosetsi a borukutlhi jo mo go jone go dirisiwang nuklea le sekgala se se ntseng se golela pele ka tsela e e gakgamatsang fa gare ga dinaga tse di humileng tsa bokone le tse di humanegileng tsa borwa, matshosetsi a gore go ka nna le leuba, go senyega ga lefelo leo dilo di kgonang go tshela mo go lone mmogo le ditswammung tsa polanete eno, go gola ga mokgatlho wa batho bao thelebishene e laolang matshelo a bone le matshosetsi a a ntseng a golela pele a gore go ka nna le dintwa mo mafelong mangwe—dilo tseno tsotlhe, fa di kopane le dikarolo tse dingwe gape tse dintsintsi, di tshosetsa batho ka kakaretso.” Ga go na motho ope yo o nang le thata ya go fedisa matshosetsi ano a masetlapelo a a ka se kang a tilwa.—Yeremia 10:23.

2. Ke mang yo o ka rarabololelang ruri mathata a gone jaanong a batho, mme o setse a tsere kgato efe?

² Lefa go ntse jalo, gone re ka itumelela gore Mmopi wa rona yo Mogolo a ka rarabololela dilo tseno ruri. Mo boperofeting jwa ga Jesu “bofelo jwa tsamaiso ya dilo” bo amanngwa le “go nna gone” ga gagwe a sa bonale. (Mathaio 24:3, 37-39, NW) Jehofa o ne a bopa “magodimo a masha” ka go tlhoma Jesu mo setulong sa gagwe sa bogosi jaaka Kgosi ya Bomesia, mme bosupi jwa boperofeti bo bontsha gore tiragalo eno ya botlhokwatlhokwa e diragetse kwa magodimong ka ngwaga wa 1914.a (2 Petere 3:13) Jesu jaaka mmusi yo o busang mmogo le Morena Mogodimodimo Jehofa, jaanong o tlhomilwe gore a atlhole merafe le go tlhaola batho ba ba pelonomi, ba seka dinku ba ba mo lefatsheng mo go ba ba tlhogoethata ba seka dipodi. “Dipodi” tse di boikepo di tshwaetswe ‘petso e e sa khutleng’ mme “dinku” di tshwaetswe botshelo jo bo sa khutleng mo lefatsheng kafa tlase ga Bogosi.—Mathaio 25:31-34, 46.

3. Bakeresete ba boammaaruri ba na le lebaka lefe la gore ba itumele?

³ Masalela a Iseraele wa semoya a a mo lefatsheng, a jaanong a kopaneng le boidiidi jo bogolo jwa dinku tseno tse di utlwang, eleruri a ka itumelela Jehofa, Kgosi ya bosakhutleng, jaaka fa a diragatsa maikaelelo a gagwe a a molemo ka Bogosi jwa Morwawe. Ba ka kgona go bolela ba re: “Ke tla itumèla thata mo go Yehofa, mōea oa me o tla ipela mo Modimoñ oa me, ka o nkapesitse diaparō tsa polokō . . . Yaka lehatshe le tle le ntshe go kukunya ga yèōna, le yaka tshimo e tle e tlhabise diyalō tsa eōna; yalo Yehofa Modimo o tla tlhogisa tshiamō le pakō ha pele ga merahe eotlhe.” (Isaia 61:10, 11) Go “tlhogisa” gono go bontshiwa ke dimilione tse jaanong di kokoanngwang go tswa mo merafeng go tla di opelela Jehofa dipako.

‘Go Go Akofisa’

4, 5. (a) Go kokoanngwa ga batho ba Modimo go ne ga bolelelwa pele jang? (b) Go ne ga nna le koketsego efe e e tlhomologileng ka ngwaga wa tirelo wa 1992?

⁴ Go kokoanngwa go nna bofefo jaaka bofelo jwa tsamaiso ya ga Satane bo ntse bo atamela. Mmopi wa rona yo Mogolo o bolela jaana: “Batho ba gago le bōnè; ba tla nna tshiamō botlhe, . . . kala ea go tlhōñwa ga me, e le tihō ea diatla tsa me, gore ke tlè ke galalediwè. Eo monnye o tla tla a nna makgolo a le shomè, le eo mmōtlana a nna morahe o o thata: Nna Yehofa ke tla go akohisa mo motlheñ oa gōna.” (Isaia 60:21, 22) Go akofa gono go bonala sentle mo Pegong ya Tirelo ya Ngwaga wa 1992 ya Basupi ba ga Jehofa Lefatshe Lotlhe, eo e gatisitsweng mo ditsebeng 12 go ya go 15 tsa makasine ono.

⁵ Se se tlhomologileng mo pegong eno ke tlhora e ntšha ya baboledi ba Bogosi ba ba 4 472 787, e leng koketsego ya 193 967—ka jalo e feta ya ngogola ka 4,5 lekgolong. Tlhora ya 301 002 ya ba ba neng ba kolobediwa ka 1992 gape e bontsha gore bontsintsi jwa batho bo amogela boammaaruri jwa Bibela. Abo re itumela jang ne go bo mo ‘motlheng ono wa lefifi le letobo, go na le batho ba tšhaba e kgolo e e thata,’ bao ba anamisang bosupi ka Bogosi “go ea hèla kwa sekhutloñ sa lehatshe” jaaka lesogodi la tsie! (Yoele 2:2, 25; Ditihō 1:8) Go tswa kwa Alaska e e ratwang ke kapoko—koo sefofane sa Mokgatlho wa Watch Tower se ileng sa etela mafelo a a dikologilweng ke kapoko ka makgetlo a feta 50—go ya kwa dikakeng tse di omeletseng tsa Mali le Burkina Faso le ditlhaketlhake tse di gasagasameng tsa Micronesia, batlhanka ba ga Jehofa ba phatsima jaaka “lesedi ya merahe, gore [a tle a] nnè poloka . . . kwa sekhutloñ sa lehatshe.”—Isaia 49:6.

6, 7. Maemo a ne a fetoga jang ka tsela e e neng e sa solofelwa mo dingwageng tsa bosheng jaana, mme batlhanka ba ga Jehofa ba ile ba tsaya kgato efe ka gone?

⁶ Jehofa o ile a nna jaaka kago ya phemelo le kago e e nonofileng ka go sireletsa le go tlamela batho ba gagwe. Basupi ba ga Jehofa ba ile ba tshwanelwa ke gore ba itshokele kgatelelo e e setlhogo le go bogisiwa mo dikarolong tse dintsi tsa lefatshe. (Pesalema 37:39, 40; 61:3, 4) Mme lefa go ntse jalo bosheng jaana, go ile ga tlosiwa dithibelo le dikganelo jaaka ekete ka kgakgamatso, mo dinageng dingwe di ka nna 21, mo eleng gore jaanong batho ba Modimo ba ka bolela ka kgololesego gore Mmopi wa rona yo Mogolo o tlhomile Keresete jaaka Kgosi mo lefatsheng.—Pesalema 2:6-12.

⁷ A batho ba ga Jehofa ba dirisa kgololesego ya bone e ba sa tswang go e bona sentle? Ela tlhoko mo tšhateng kafa ba ileng ba oketsega ka teng kwa Bulgaria, Romania, le koo pele e neng e le Soviet Union kwa Yuropa Botlhaba le kafa ba ileng ba oketsega ka teng kwa Angola, Benin, le Mozambique mo Afrika. Le kwa Zaire tota, go na le kgolo e e boitshegang. Bakaulengwe ba rona ba ba golotsweng ba araba pitso eno ka dipelo tse di itumetseng: “A lo ko lo ntshetseñ Yehofa malebogō: gonne o molemō . . . , èna eo o dihañ dikgakgamaco a le esi: gonne boutlwèlō botlhoko yoa gagwè bo eme ka bosakhutleñ.” (Pesalema 136:1, 4) Malebogo ano a bontshiwa ka go direla ka tlhoafalo go kokoanyetsa ba bangwe ba seka dinku kafa letlhakoreng la Bogosi.

8. Batho ba basha ba ba bakang Jehofa ba ile ba tla jang ba ‘fofa jaaka leru’ kwa Yuropa Botlhaba? mo Afrika?

⁸ Mo pakeng e e fetileng ya selemo kwa Yuropa, dikopano tsa batho ba ga Jehofa tse di neng di tshwaretswe mo dinageng tseo pele e neng e le tsa Bokomonise di ile tsa nna le dipalo tse di gakgamatsang tsa bao ba neng ba le gone. Mme se se gakgamatsang go gaisa ke dipalo tsa bao ba kolobediwang, mo dinageng tseo. Fela jalo, kwa Togo, mo Afrika, thibelo e ne ya tlosiwa ka December 10, 1991. E ne ya re kgwedi e e latelang ga tshwarwa kopano e kgolo. Fa go bapisiwa le palokakaretso ya kgwedi le kgwedi ya baboledi ba tshimo eo ba ba 6 443, go ile ga tla batho ba le 25 467, kwa kopanong eno, mme ga kolobediwa ba le 556—8,6 lekgolong ya palo ya baboledi. Jaaka Isaia 60:8 e tshwantsha, batho ba basha ba ba bakang Jehofa ba tla ba ‘fofa fela jaaka leru, le jaaka maeba a fofela mo marobeng a one’ mo diphuthegong tsa batho ba ga Jehofa.

9. Ke dilo dife tse di baakanyeditsweng gore Bakeresete ba ba mo dinageng tse di sa tswang go ba neela kgololesego ba kgone ‘go ja le go kgora’?

⁹ Tlala ya dijo tsa semoya kwa Yuropa Botlhaba le mo Afrika le yone e a kgotsofadiwa. Difeketeri tsa Mokgatlho wa Watch Tower kwa Jeremane, Italy, le Afrika Borwa di ile tsa romela diteraka di le dintsintsi ka go latelana di tletse dikgatiso tsa dipuo di le mmalwa, kwa dinageng tse di mo leubeng la dijo tsa semoya. Mo nakong e e fetileng, Basupi ba le bantsi ba ne ba tshwanelwa ke gore ba adimane makasine o o onetseng tota, mme lefa go ntse jalo jaanong ba amogela letlotlo la dijo tsa semoya. Ba itumelela go nna le seabe mo go diragadiweng ga boperofeti jono: “Me lo tla yèla mo letlotloñ lo kgora, me lo tla baka leina ya ga Yehofa Modimo oa lona, eo o lo dihetseñ ka kgakgamaco.”—Yoele 2:26.

Go Tlhokomela Go Ata Go Go Tswelelang

10. Ka ntlha ya palo e kgolo ya bao ba neng ba le gone kwa Segopotsong, botlhe ba ba kgatlhegang ba lalediwa gore ba dire eng?

¹⁰ Se se gakgamatsang eleruri ke palo ya ba ba neng ba le gone kwa Segopotsong sa loso lwa ga Jesu mo lefatsheng lotlhe, 11 431 171, koketsego ya 781 013, kana 7,3 lekgolong go feta ngwaga o o fetileng. Lo a amogelwa, lona lotlhe ba lo tlileng bosheng! Abo go ne go ka nna molemo jang ne fa batho bano botlhe ba ba sa tswang go kgatlhega ba ne ba ka ipelela molemo wa go nna le thuto ya legae ya Bibela le mongwe wa Basupi ba ga Jehofa! (Bona Isaia 48:17.) Pego ya Ngwaga wa Tirelo e bontsha gore ba le 4 276 127 mo go bano ba tshwarelwa thuto kgwedi le kgwedi, koketsego e ntle ya 8,4 lekgolong. Lefa go ntse jalo, ba ba oketsegileng thata go feta foo ba ne ba ka sola tirelo eno molemo. Basupi ba ga Jehofa ba itumelela go etela ba ba kgatlhegang ka metlha le go ba tshwarela dithuto tsa mahala tsa Bibela mo gae, ka jalo ba ba thusa gore ba tshwarelele mo tseleng e e isang botshelong jo bo sa khutleng. (Yohane 3:16, 36) Ke ka ntlha yang fa o sa kope gore o rutwe ka tsela e e ntseng jalo? Mme gakologelwa, nako nngwe le nngwe e o ka tlang ka yone o tla amogelwa ka lorato kwa Holong ya Bogosi!—Pesalema 122:1; Baroma 15:7.

11, 12. (a) Ke mathata afe a go thulanwang le one mo dinageng dingwe? (b) Go nna le “tekatekanō” efe fa gare ga dinaga tse di humileng le tse di humanegileng?

¹¹ Diphuthego tse di nang le Diholo tse dintle tsa Bogosi di segofaditswe tota. Ga go a nna jalo mo dinageng tse kwa go tsone Basupi ba ba ikanyegang ba ileng ba itshoka dingwaga tse dintsi ba thibetswe, ba kopana ka ditlhopha tse di potlana mo sephiring. Mo mafelong a a ntseng jalo a le mmalwa, jaanong ba gololesegile mme lefa go ntse jalo ba na le Diholo tsa Bogosi di se kae fela. Ka sekai, kwa nageng nngwe mo Afrika, e e nang le diphuthego di le 93, di na le Diholo tsa Bogosi di le tharo fela. Ka jalo gantsi dipokano di tshwarelwa mo mabaleng a magolo a a senang sepe. Phuthego ya batho ba le 150 e ka nna le batho ba ba tlang dipokanong tseno ka metlha ba le 450.

¹² Kwa Yuropa Botlhaba gantsi go bokete go reka kago kana go aga, mme lefa go ntse jalo go na le kgatelopele e e dirwang. Go ne go rulagantswe gore go kgakolwe kago e ntle e ntšha ya lekala kwa Poland ka November 28, 1992. Meneelo e e ntshiwang ka bopelotshweu mo tirong ya lefatshe lotlhe ya Basupi ba ga Jehofa e dirisiwa go thusa go aga diholo le dikago tse dingwe. Ka jalo, go nna le “tekatekanō” ka gonne bopelotshweu jwa bakaulengwe ba ba ntshang meneelo go tswa mo ‘botlalong’ jwa bone jwa dilo tse di bonalang bo thusa gore go fitlhelelwe dilo tsa semoya tse di tlhokwang ke diphuthego tse di mo dinageng tse di sa kgoneng.—2 Bakorintha 8:13, 14.

Diura Di Le Dimilione Di Le Sekete!

13. Go ne ga senngwa diura tse kae mo tirong ya go rera le go ruta ka 1992, mme palo eno e bontsha maiteko a bomang?

¹³ O ne o ka dira eng ka diura di le dimilione di le sekete? Botlhe ba ba bonang botshelo jo bo sa khutleng ba tla kgona go dirisa diura tse kalo, le go feta, ba direla Jehofa ka tsela e e nang le matswela ebile e kgotsofatsa. Mme lefa go ntse jalo a ko o akanye o tsaya diura tseo tsotlhe o di tsenya mo ngwageng o le mongwe fela! Ke sone se batho ba ga Jehofa ba kgonneng go se dira ka 1992. Fa re kopanya dipego tsa mongwe le mongwe wa baboledi ba Bogosi, re fitlhelela tlhora e ntšha ya diura di le 1 024 910 434 tse di dirisitsweng ka mokgwa o o molemo go gaisa o diura di ka dirisiwang ka one—ba baka Mmopi wa rona yo Mogolo, ba “ruta mo ponoñ, le ka go . . . tsamaea le matlo.” (Ditihō 20:20) Ka kakaretso, go ne go bega Basupi ba le 4 289 737 kgwedi le kgwedi. Ba tswa mo maemong a a farologaneng mo setšhabeng. Bangwe ba na le nako e potlana fela eo ba ka e dirisang mo tirong ya Bogosi. Bano ba akaretsa ditlhogo tsa malapa, tseo di tshwanetseng go tlamela ba malapa a tsone; batsofe; le ba bangwe ba bantsi ba ba nang le mathata a botsogo; mmogo le bana ba ba santseng ba tsena sekolo. Lefa go ntse jalo, pego eo e begilweng ke mongwe le mongwe ke sesupo se se tseelwang kwa godimo sa gore ba rata Jehofa.—Bapisa Luke 21:2-4.

14. Basha ba ‘gakologelwa Mmopi wa bone yo mogolo’ jang?

¹⁴ Kokomane ya basha e a oketsega mo tirelong ya ga Jehofa, mme go a itumedisa gore bontsi jwa bano ba diragatsa mafoko ano a ga Solomone a a mo go Moreri 12:1: “U bo u gakologèlwè Mmopi oa gago mo metlheñ ea bokau yoa gago.” Ba dira tiro ya bone ya sekolo ka natla, ebile ba thapisiwa mo dilong tsa semoya ke batsadi ba ba ineetseng. Go ile ga itumedisa thata go bona palo e kgolo ya basha ba dingwaga tsa bolesome ba ema ka dinao kwa dikopanong dingwe tsa bosheng, ba ya go kolobediwa. Gape go a itumedisa go itse gore ba le bantsi ba tlile go bula tsela fa ba fetsa sekolo mme ba ipaakanyetsa seo ka go ithuta tiro nngwe ya diatla. Ka go dira jalo, ba tla kgona gore ba itlamele, jaaka moaposetoloi Paulo a ne a dira gangwe le gape ka go dira ditente.—Ditihō 18:1-4.

15, 16. Babulatsela le batlhanka ba bangwe ba nako e e tletseng ba ile ba tsenya letsogo jang gore tiro ya Bogosi e gatele pele, mme bangwe ba bone ba ile ba nna le masego afe?

¹⁵ Abo babulatsela le batlhanka ba bangwe ba nako e e tletseng ba na le seabe se segolo jang ne mo go direng gore tiro ya Bogosi e atlege! Palo ya babulatsela e ne ya oketsega ya fitlha go tlhora ya 931 521 mo ngwageng o o sa tswang go feta. Jaaka fa bano ba ntse ba rera letsatsi le letsatsi ka ntlo le ntlo ebile ba tshwara dithuto tsa Bibela mo magaeng a batho, ba kgona go tlhalosa Dikwalo ka tsela e e molemo thata. Mo godimo ga moo, ba le bantsi ba ile ba tshwanelega gore ba ka nna gone kwa Sekolong sa Tirelo ya Bobulatsela sa dibeke tse pedi, seo se ba thusang go tlhagolela gore ba kgone go dira tiro ya Modimo ka selekanyo se segolo ba bo ba e itumelele ka tsela e e tshwanang.

¹⁶ Mongwe le mongwe wa babulatsela bano ba ba ikanyegang o ka dumalana le mafoko a a mo go Isaia 50:4: “Morèna Modimo o nneile loleme loa ba ba rutegileñ, gore ke tlè ke itse go kamatlèla ka puō èna eo o lapileñ.” Go na le batho ba le bantsi gompieno ba ba lapisitsweng ke lefatshe le le bosula le le ba dikologileng mme lefa go ntse jalo ba lapolosiwa ke mafoko a a buiwang ke babulatsela ba rona ba ba ikanyegang.—Bapisa Diane 15:23; Esekiele 9:4.

Thulaganyo E Kgolo ya go Aga

17. Mo godimo ga go aga ga semoya, go ile ga bonwa tiro efe ya go aga ga senama mo dingwageng tsa bosheng jaana?

¹⁷ Go gatela pele semoyeng ga Basupi ba ga Jehofa mo lefatsheng ka bophara gape go tlhoka gore go okediwe dilo tse di bonalang. Go ne ga tlhokega gore go atolosiwe mafelo a go gatisa, diofisi, le magae a Bethele le gore go agiwe Diholo tsa Bogosi le Diholo tsa Dikopano. Ka jalo go tlhokega gore Basupi ba ga Jehofa e nne baagi ruri. Go ne ga agiwa ka tsela e e ntseng jalo mo motlheng wa ga Kgosi Solomone. Solomone o ne a aga tempele e go neng go tla obamelwa Jehofa mo go yone ka “sekaō [seo a neng a se neetswe ka tlhotlheletso, NW],” Jehofa a ne a se neetse rraagwe ebong Kgosi Dafide. (1 Ditihalō 28:11, 12) Ka jalo, Solomone ga a ka a agelela bareetsi ba gagwe ka mafoko a a monate thata a a buiwang ka botlhale fela mme gape o ne a kaela tiro ya go aga e e neng e dirwa ka matsetseleko go feta tiro epe e e kileng ya dirwa mo lefatsheng.—1 Dikgosi 6:1; 9:15, 17-19.

18, 19. (a) Phuthego ya ga Jehofa e aga dikago dife tse di tswelelang pele ka bofefo? (b) Moya wa ga Jehofa o ile wa bonala jang fa go agiwa senameng mmogo le semoyeng?

¹⁸ Gompieno, Basupi ba ga Jehofa ga ba age ka dipolane tse di tlhotlheleditsweng ke Modimo, mme gone ba na le moya wa Modimo. Jaaka mo metlheng ya Iseraele, o ba tlhotlheletsa gore ba age ka tsela e e jesang batho ba lefatshe kgakge. (Sekaria 4:6) Lobaka lo khutshwafetse. Go tlhokega Diholo tsa Bogosi le dikago tse dingwe kwa ntle ga tiego epe. Mo dinageng dingwe Diholo tsa Bogosi tse di agiwang ka bofefo di tlwaelegile tota. Ka sekai, Canada e bega gore go agilwe diholo di le 306 mo dingwageng tse 10 tse di fetileng, mme nngwe le nngwe ya tsone e tsere lobaka lo lo kafa tlase ga malatsi a le mabedi go agiwa. Ka ntlha ya go gola ka bofefo ga tiro ya ga Jehofa lefatshe ka bophara, gone jaanong dikago tse disha tsa makala kana tse di oketsang makala di ka nna 43 di a agiwa kana go rulaganngwa gore di agiwe. Mo godimo ga moo, kago e e nang le matlhatlaganyane a le 30 ya bonno e tloga e wediwa kwa Brooklyn, mme e tla kgona go tshola baithaopi ba Bethele ba ka nna sekete. E ntse e le kwa New York State, kwa Patterson, go agiwa ga lefelo la thuto ya Bibela, tiro e kgolo ya go aga e e gaisang tsotlhe tse Mokgatlho wa Watch Tower o kileng wa di dira, e gatela pele fela thata go feta kafa go neng go rulagantswe ka gone.

¹⁹ Ditiro tseno tsa go aga di gatela pele ka botswerere le boleng bo gakgamatsang le tsone dikhampane tse di itseng tsa kago tsa lefatshe tota. Ka ntlha yang? Ke ka ntlha ya selekanyo se segolo seo Basupi ba ba ineetseng ba ga Jehofa ba tsenyang letsogo ka sone. Moya wa gagwe o ba tlhotlheletsa gore ba tshegetse eseng ka dilo tse di bonalang fela mme gape le ka go dirisa nako ya bone le maikatlapelo a bone ka pelo yotlhe. Mafelo a go agiwang mo go one a tletse badiri ba ba thapisitsweng sentle, ba ba ineetseng mo tirong. Ga go na go ngala tiro, ebile ga go na go senya nako mo tirong. Moya wa ga Jehofa ke one o re tlhotlheletsang, fela jaaka o ile wa tlhotlheletsa baagi ba motlaagana mo motlheng wa ga Moshe le bao ba neng ba aga tempele mo motlheng wa ga Solomone. Nonofo e e tlhomologileng e e batliwang mo badiring bano ke bomoya.—Bapisa Ekesodo 35:30-35; 36:1-3; 39:42, 43; 1 Dikgosi 6:11-14.

20. (a) Mafoko a a molemo a santse a tla rerwa ka selekanyo se se kana kang? (b) Batho ba ga Jehofa ba emetswe ke tebelelo efe e e itumedisang?

²⁰ Solomone o ne a tswelela ka thulaganyo ya gagwe ya go aga fa a sena go wetsa tempele. (2 Ditihalō 8:1-6) Se re sa se itseng ke gore go neela bosupi ga motlha wa segompieno go santse go tla gola ka selekanyo se se kana kang—ka nako e e tshwanang go dira gore go tlhokege gore go agiwe diholo tsa bogosi le dikago tse dingwe. Lefa go ntse jalo, gone re itse gore fa mafoko a a molemo a a Bogosi a sena go rerwa ka selekanyo se Jehofa a se laotseng, ke gone bokhutlo eleng “sepitla se segolo,” bo tla tlang. (Mathaio 24:14, 21) Mo lefatsheng le le tla bong le sa tlhole le senngwa ke batho ba ba bogagapa, thulaganyo ya ga Jehofa ya “magodimo a masha, le lehatshe ye lesha” e tla tlisa masego a magolo fela thata mo bathong. Ka jalo a re ‘itumeleleng se Modimo a se tlholang,’ re neele Mmopi wa rona yo Mogolo pako yotlhe!—Isaia 65:17-19, 21, 25.

[Ntlha e e kwa tlase]

A O Ka Tlhalosa?

◻ Ke mabaka afe ao a ka dirang gore re itumelele Mmopi wa rona yo Mogolo?

◻ Ka ngwaga wa tirelo wa 1992 go ne ga begiwa dikoketsego dife?

◻ Go ile ga begiwa masego afe a magolo kwa dinageng tseo bosupi bo neng bo thibetswe kwa go tsone pele?

◻ Basha le babulatsela ba ile ba tsenya letsogo jang gore go nne le koketsego mo phuthegong ya ga Jehofa?

◻ Batho ba ga Jehofa ba ntse ba tshwaregile jang mo ditirong tsa go aga ka tsela e e bonalang le ka tsela ya

semoya?

[Lebokoso mo go tsebe 17]

Mo ngwageng o o fetileng go ne ga senngwa diura di feta dimilione tse di sekete mo tirong ya go rera le go ruta

[Tšhate mo go tsebe 12-15]

PEGO YA BASUPI BA GA JEHOFA LEFATSHE KA BOPHARA YA NGWAGA WA TIRELO WA 1992

(See bound volume)

[Setshwantsho mo go tsebe 10]

Batho ba ba diketekete di le makgolokgolo ba ba neng ba ya go kolobediwa ngogola ba bontsha gore Jehofa o segofatsa tiro ya go rera le go ruta

[Setshwantsho mo go tsebe 16]

Batho ba basha ba le bantsintsi ba ‘gakologelwa Mmopi wa bone yo Mogolo’