‘Go Tsholelediwa go ya go Kgatlhantsha Morena’—Jang?
NAKO e e ntseng e ngotlega ya go khutla ga tsamaiso ya jaanong e e bosula e ntse e tswelela pele kwantle ga go boela morago. Fa go ntse go feta ura nngwe le nngwe, motsotso mongwe le mongwe, motsotswana mongwe le mongwe, re ya re lebile ditiragalo tse di tshosang tseo di sa leng di bolelelwa pele bogologolo. A go gapiwa ke nngwe ya ditiragalo tseno? Fa e le gore ke yone e tla diragala leng mme jang?
Lefoko “go gapiwa” ga le tlhagelele gope mo Bibeleng. Mme lefa go ntse jalo, bao ba dumelang mo go yone ba dirisa mafoko a ga moaposetoloi Paulo a a mo go 1 Bathesalonia 4:17 jaaka motheo wa tumelo ya bone. A re tlhatlhobeng lekwalo leno mo temaneng ya yone. Paulo o ne a kwala jaana:
“Ga re rate loa tlhōka go itse, ba ga echo, kaga ba ba rōbalañ; gore lo se hutsahale, yaka ba bañwe ba ba senañ cholohèlō. Gonne ha re dumèla gore Yesu o na a shule me a ba a coga, hèla yalo ba ba shwetseñ mo go Yesu, Modimo o tla ba lere naè. Gonne se, re se bua le lona ka lehoko ya Morèna, go re, rona ba re tla boñ re tshedile, ba e tla reñ mo go tleñ ga Morèna re hitlhèlwa re setse, ga re ketla re ètèlèla ba ba shuleñ pele. Gonne Morèna ka esi o tla hologa kwa legodimoñ ka loshalaba, le ka lencwe ya moengele eo mogolo, le ka go galaotèga ga lonaka loa Modimo: me bashwi ba ba shwetseñ mo go Keresete ba tla coga pele: Hoñ, rona ba re tla boñ re tshedile re tlogecwe, re tla cholediwa mmōgō nabō mo maruñ, re ea go kgatlhantsha Morèna mo loapiñ; me yalo re tla nnèla rure le Morèna. Ke gōna, gomotsanyañ ka mahoko a.”—1 Bathesalonia 4:13-18.
Phuthego ya kwa Thesalonia e ne e le gone fela e neng e thaiwa fa Paulo a ne a kwalela Bakeresete koo lokwalo lwa gagwe lwa ntlha mo e ka nnang 50 C.E. Maloko a phuthego a ne a tlhobaeditswe ke gore bangwe mo go bone ba ne ba ‘robetse.’ Lefa go ntse jalo, seo Paulo a neng a se kwala se ne sa gomotsa Bathesalonia ka tsholofelo ya tsogo.
“Go Nna Gone” ga ga Keresete
Fa a ne a tlhomamisa gore Bakeresete ba ba ikanyegang bao ba neng ba sule ka nako eo ba ne ba tla tsosiwa, Paulo o ne a re gape: “Rona ba re tla boñ re tshedile, ba e tla reñ mo go [nneng gone, NW] ga Morèna re hitlhèlwa re setse, ga re ketla re ètèlèla ba ba shuleñ pele.” (Temana 15) Eleruri, seo re ka se tlhokomelang, ke seo moaposetoloi a neng a se lebisitse mabapi le go “nna gone” ga Morèna. Fano temana ya puo ya ntlha go ranolwa e dirisa lefoko la Segerika pa·rou·siʹan, leo totatota le rayang “go bapa.”
Fa tlhogo ya Naga e sele e etela naga nngwe, gantsi go itsisiwe matlha a a tlileng go nna gone ka one. Seno se dumalana sentle le kgang ya go nna gone ga Morena Jesu Keresete. Tora ya Tebelo kwantle ga go fetoga e ile ya neela baithuti ba ba dipelo di ikanyegang ba boperofeti jwa Bibela bosupi jwa gore go nna gone ga ga Jesu a le mo maatleng a Bogosi jwa selegodimo go simolotse ka 1914. Fa e sale ka ngwaga oo ditiragalo di ile tsa supa gore Jesu o setse a le gone ka mo go sa bonaleng. (Mathaio 24:3-14) Ka tsela e e ntseng jalo, fa Paulo a ne a re Bakeresete bangwe ba ba tshelang mo nakong ya go nna gone ga Morena ba tla ‘tsholelediwa mo marung ba ya go kgatlhantsha Morena mo loaping,’ o ne a raya gore bafalodi bao ba ne ba tla ya go kgatlhantsha Keresete, eseng mo atemosefereng e e apesitseng lefatshe, mme eleng mo lefelong la selegodimo le le sa bonaleng koo Jesu a dutseng gone kafa letsogong le letona la Modimo. (Bahebera 1:1-3) Mme bone bao ke bomang?
“Iseraela oa Modimo”
Dikwalo di bua thata kaga Baiseraele ba senama mme gape di bua ka “Iseraela oa Modimo” wa semoya. Badumedi ba Bajuda le ba Baditšhaba ba ne ba tshwanetse go bopa palo eo ya setlhopha se se tloditsweng ka moya wa Modimo, kana maatla a a dirang. (Bagalatia 6:16; Baroma 11:25, 26; 1 Yohane 2:20, 27) Buka ya Tshenolō e bontsha gore palo ya Iseraele wa semoya fa e feletse ke 144 000, bano botlhe ba tlhalosiwa ba na le Kwana, eleng Jesu Keresete, mo Thabeng ya Sione ya selegodimo. Ba tla nna dikgosi le baperesiti mmogo le Keresete kwa legodimong. (Tshenolō 7:1-8; 14:1-4; 20:6) Go tla akaretsa le bangwe ba ba neng ba kopanela le diphuthego tsa kwa Thesalonia le go sele fela, go sa kgathalesege lotso la bone kana bomorafe.—Ditihō 10:34, 35.
Pele ga ope fela wa maloko a a ikanyegang a Iseraela wa semoya a ka amogela moputso wa selegodimo, o tla tshwanelwa ke gore a itemogelele sengwe. Fela jaaka Jesu a ile a swa mo koteng ya tlhokofatso pele ga a ka tsosediwa mo botshelong jwa selegodimo, ka go tshwana Bakeresete ba ba solofetseng go ya go tshela kwa legodimong ba tshwanetse go swa pele ga ba ka amogela moputso wa bone. (1 Bakorintha 15:35, 36) Seno se tla nna jalo mo malokong a Iseraele wa semoya a a neng a tshela mo lekgolong la ntlha la dingwaga C.E. le mo go ba ba ntseng jalo bao ba tshelang gompieno.
Morago ga fa Paulo a sena go tlhalosa kaga “go nna gone ga Morena,” o ne a tlhalosa kaga nako eo Baiseraela ba semoya ba ba ikanyegang bao ba neng ba sule ba neng ba tla amogela moputso wa selegodimo. O ne a kwala jaana: “Morèna ka esi o tla hologa kwa legodimoñ ka loshalaba, le ka lencwe ya moengele eo mogolo, le ka go galaotèga ga lonaka loa Modimo: me bashwi ba ba shwetseñ mo go Keresete ba tla coga pele.” (Temana 16) Ka tsela e e ntseng jalo, e ne e tla re fa go nna gone ga ga Jesu jaaka Kgosi go setse go simologile, re bo re ka solofela gore tsogo ya selegodimo e setse e simologile, go simolola ka bao ba Iseraele wa semoya bao ba setseng ba sule jaaka babolokabothokgami. (1 Bakorintha 15:23) Gone jaanong ba dira mmogo le Jesu kwa legodimong. Mme go tweng ka setlhophanyana fela sa Bakeresete ba ba tloditsweng bao ba santseng ba tshela mo lefatsheng? A ba emetse go gapiwa?
“Go Cholediwa”—Jang?
Morago ga fa Paulo a sena go lebisa go Bakeresete ba ba tloditsweng bao ba suleng, o ne a oketsa ka go re: “Hoñ, rona ba re tla boñ re tshedile re tlogecwe, re tla cholediwa mmōgō nabō mo maruñ, re ea go kgatlhantsha Morèna mo loapiñ; me yalo re tla nnèla rure le Morèna.” (Temana 17) ‘Bao ba tla bong ba tshedile’ e tla nna bao ba tshelang ka nako ya go nna gone ga ga Keresete. Ba tla “cholediwa” go ya go kgatlhantsha Morena eleng Jesu. Go tshwana fela le Bakeresete ba pele jaaka batho ba ba ikanyegang, go tlhokega gore ba swe pele gore ba tle ba kgone go kopana le Keresete kwa legodimong.—Baroma 8:17, 35-39.
Fa Paulo a ne a kwalela Bakeresete kwa Korintha, o ne a bolela jaana: “Ba ga echo, ke bua lehoko ye, ka re, nama le madi ke dilō tse di sa kakeñ tsa rua bogosi yoa Modimo; le gōna go bōla ga go kake ga rua bosaboleñ. Bōnañ, ke lo bolèlèla bosaitsiweñ: Ga re ketla re rōbala rotlhe, me re tla hetolwa rotlhe hèla. Ka gañwe hèla, ka ponyō ea leitlho, ka lobaka loa lonaka loa bohèlō: gonne lonaka lo tla gèlèbètèga, me bashwi ba tla cosiwa ka mo go sa boleñ, me rona re tla hetolwa.” (1 Bakorintha 15:50-52) Ka lone lebaka leo, mongwe le mongwe wa masalela a Iseraele wa semoya yo o swang ka boikanyegi ka nako ya go nna gone ga ga Keresete, ka bonako fela o amogela moputso wa gagwe wa selegodimo. “Ka ponyō ya leitlho,” o tsosiwa jaaka sebopiwa sa semoya mme o “cholediwa” go ya go kopana le Jesu le go busa mmogo le ene mo Bogosing jwa magodimo. Mme go tweng ka ba bangwe botlhe bao ba obamelang Jehofa? Jaaka fa bofelo jwa tsamaiso eno e e boikepo bo ntse bo atamela, a le bone ka go tshwana ba tla tsholediwa kwa legodimong?
Go Falola—Mme Eseng ka Tsela ya go Gapiwa
Ereka jaana go nna gone ga ga Jesu jaaka kgosi go simologile ka 1914, jaanong re tseneletse thata mo “motlheñ oa bokhutlō” wa lefatshe leno. (Daniele 12:4) Paulo o ne a tlhagisa jaana: “Kaga metlha le dipaka, ba ga echo, ga go batlwe gore lo ka kwalèlwa señwe. Gonne le lona ka losi lo itse sentlè ha letsatsi ya Morèna le tla hèla yaka legodu bosigo. E tle e re ba nntse ba re, Kagishō le thagamō, hoñ tshenyègō ea choganeco e ba wèle, yaka pèlèga e tle e tlèle mosadi eo o moimana; me ga ba ketla ba halola gopè.” (1 Bathesalonia 5:1-3) Mme lefa go ntse jalo, Bakeresete bao ba ntshitseng matlho dinameng ba tla falola. Mme jang?
Go goeletsa ka gore “kagishō le thagamō!” ke sengwe se se supang nako e Jesu a neng a e bitsa “sepitla se segolo” gore e setse e atametse. Buka ya Tshenolō fa e tlhalosa “boidiidi yo bogolo” jwa bao ba ikanyegang bao ba nang le tsholofelo ya go tshela go ya go ile mo paradaiseng ya selefatshe e bolela jaana: “Ba, ke ba ba cwañ mo pitlaganoñ e kgolo, me ba tlhacwitse dikobō tsa bōnè, ba di shweuhaditse mo madiñ a ga Kwana.” (Tshenolō 7:9, 14; Luke 23:43) Nnyaa, bone ga ba a lebelela go gapiwa. Go na le moo, ba na le tsholofelo ya go falolela gone mono lefatsheng. Gore ba ipaakanyetse seno, ba tshwanetse go nna ba ntse ba thantse semoyeng. O ka dira seno jang mme wa falola fa tsamaiso eno e fedisiwa?
O tlhoka gore ‘o nne boitekanelo, o apare letlatla la sehuba la tumelo le lorato, mme tsholofelo ya poloko e nne yone tlhoro ya phemelo.’ (1 Bathesalonia 5:6-8) Jaanong eno ke nako ya gore o tlhokomele tota lefoko la Modimo la boperofeti, eleng Bibela. Jaaka fa tsamaiso eno e ntse e ya bokhutlong, tsaya tsia kgakololo ya ga Paulo e e reng: “Lo se ka loa nyatsa dithutō; Lekañ dilō cotlhe; shōna se se molemō lo se chwarè thata.” (1 Bathesalonia 5:20, 21) Ke gone ka moo, Basupi ba ga Jehofa ba go amogelang kwa Diholong tsa bone tsa Bogosi, koo o tla kopanelang le bone mo go ithuteng boperofeti jwa Bibela le dilo tse dingwe tsa Lefoko la Modimo le le tlhotlheleditsweng.
Fa o ntse o gola mo kitsong e e tlhomameng le mo tumelong, o tla lemoga ka moo Jehofa Modimo a diragatsang ka bofefo maikaelelo a gagwe a go golola setho mo babeng ba gagwe le go busetsa lefatshe mo paradaiseng. Ka go bontsha tumelo, o ka nna gape wa nna gareng ga bafalodi ba sepitla se segolo, bao ba tla nnang le tshono ya go amogela dimilionemilione tseo di tla bong di tsoseditswe mo botshelong mo lefatsheng. Abo e tla nna boitumelo jang ne go tshela kafa tlase ga Bogosi jwa Modimo joo go tla bong go busa Jesu Keresete mmogo le bao ba tla busang le ene, bao ba tla bong ba ‘tsholeleditswe mo marung go ya go kgatlhantsha Morena’ ka go tsosediwa botshelong kwa lefelong la selegodimo!
Mme jaanong mabapi le batho ba ba kutlo ka kakaretso ke tsholofelo efe ya boammaaruri ya Dikwalo eo ba nang le yone? Ga se go gapiwa. Go na le moo, ke go tshela goyagoile mo lefatsheng kafa tlase ga puso ya Bogosi jwa Modimo.
[Setshwantsho mo go tsebe 7]
Bao ba tla bong ba falotse sepitla se segolo ba tla amogela bao ba tsoseditsweng botshelong mo lefatsheng la paradaise kafa tlase ga puso ya ga Jesu mmogo le bao ba tla bong ba ‘tsholeleditswe’ kwa legodimong