Dipotso Tse Di Tswang go Babadi

Ke eng seo Mokeresete a ka se dirang fa a sa kgone go bona molekane yo o tshwanetseng wa lenyalo?

Lefa gone re le Bakeresete ba ba ineetseng ka pelo yotlhe, re santse re ka nna ra utlwisiwa botlhokwa ke go solofela sengwe se go sa tleng gore se diragale. Maikutlo a rona a tlhalosiwa sentle ke Diane 13:12, eo e reng: “Cholohèlō e e diegisiwañ e tle e ñodiise pelo.” Eno ke tsela eo Bakeresete bangwe ba ileng ba ikutlwa ka yone morago ga gore ba eletse go tsena mo lenyalong mme ba bo ba sa bone molekane yo o tshwanetseng. Go ntse jalo segolobogolo ka bao moaposetoloi Paulo a ileng a ba tlhalosa a re ke ba ba ‘babalelwang.’—1 Bakorintha 7:9.

Jehofa o ile a tsenya mo bathong keletso ya go bona tlotlo ya mmatota go tswa mo mothong wa bong bosele. Ke gone ka moo go sa gakgamatseng go bo maikutlo a a ntseng jalo a le magolo thata mo Bakeresete ba bangwe bao ba iseng ba tsene mo lenyalong. (Genesise 2:18) Maikutlo ano a a tlwaelegileng a ka nna magolo thata mo dingwaong tseo di gatelelang lenyalo thata (kana mo go reng motho a tsene mo lenyalong fa a le dingwaga tse di rileng) kgotsa fa Bakeresete ba ba iseng ba tsene mo lenyalong ba dikaganyeditswe ke balekane ba lenyalo bao ba itumetseng mo phuthegong ya bone. Lefa go ntse jalo, ga go molemo go itetla go tlhobaela ka lobaka lo loleele. Bakeresete ba ba ikanyegang ba ka kgona jang go dirisana le seemo seno ka katlego kwantle ga go tlhobaela bobe?

Go dira jalo ga se kgetsi e potlana, mme ebile ba bangwe ga ba tshwanela go tsaya selo seno jaaka o ka re ke selo se se sa reng sepe se se feteletsang kana bothatanyana jo eseng jwa sepe. Lefa go le jalo go ya bokgakaleng jo bo rileng tsela eo motho a ka e dirisang go kgona go atlega mo bothateng jono e ikaegile mo dikgatong tseo motho yo o iseng a nyale a ka di tsayang.

Tharabololo ya bothata jono re e bona mo molaomotheong ono o o dirang wa Bibela: “Go aba, go lesegō bogolo go go amogèla.” (Ditihō 20:35) Seno se ne sa buiwa ke Jesu Keresete monna yo o neng a sa nyala, yo eleruri a neng a itse seo a neng a se bua. Go direla ba bangwe dilo e se ka boikaelelo jwa bogagapa ke tsela e e molemo eo e ka thusang motho ope fela go fenya maikutlo ao a nnang teng ka ntlha ya tsholofelo e go sa tleng gore e diragale. Seno se bolelang malebana le Bakeresete bao ba iseng ba nyale kana ba nyalwe?

Direla lelapa la ga eno le batho ba bangwe mo phuthegong dilo tse di supang bopelonomi, mme o oketse seabe sa gago mo bodiheding. Kgakololo eno ga se fela tsela ya go bua fela o re, ‘Ipoloke o tshwaregile, mme o tla lebala gotlhe kaga go batla go tsena mo lenyalong.’ Nnyaa. Go tshwarega mo dilong tseno tsa Bokeresete tseo di nang le matswela, o ka fitlhela gore go dira gore o nne o ‘ritibetse mo pelong, o kgona go laola seo o se ratang’ mme o kgona go dirisa boemo jo o leng mo go jone gone jaanong ka tsela e e molemo.—1 Bakorintha 7:37.

Bangwe bao eleruri ba neng ba na le keletso ya go batla go tsena mo lenyalong ba ile ba letlelela keletso eno gore e fetoge sengwe seo ba akanyang ka sone ba sa kgaotse. Ba ile ba bo ba ya bokgakaleng jwa gore ba phasaletse mo dikuranteng fa ba batla balekane. Lefa go le jalo, abo go ka bo go le botoka jang ne fa ba ka bo ba baya tlhokomelo e e oketsegileng mo go anaaneleng mesola eo e nnang gone ka nako ya fa motho a ise a tsene mo lenyalong.— Tsweetswee bona ditlhogo tseno “Go Dira ka Botlalo mo Tirelong ya Modimo le Kwantle ga Lenyalo” le “Go Sa Nyala—Tsela E E Duelang ya Botshelo” mo go Tora ya Tebelo ya November 15, 1987, le “A Lenyalo Ke Lona Tsela Fela ya go Bona Boitumelo?” mo go Tora ya Tebelo ya May 15, 1992.

Rapela Jehofa gore a go thuse gore o tswelele pele a ntse o le motho yo o iseng a tsene mo lenyalong. (Bafilipi 4:6, 7, 13) Bakeresete ba le bantsi ba ba iseng ba tsene mo lenyalong ba ile ba fitlhela gore go dirisa nako e e oketsegileng go ithuta le go tlhatlhanya ka Lefoko la Modimo le go nna gone kwa dipokanong tsa Bokeresete le go nna le seabe mo go tsone, go ile ga leretse ‘moya wa bone tapologo,’ jaaka fa Jesu a ile a solofetsa ba ba mo salang morago. (Mathaio 11:28-30) Seno se ile sa ba thusa go kgona go gola semoyeng e le gore ba tle ba nne banna ba ba nyetseng kana basadi ba ba nyetsweng ba ba botoka fa go ka diragala gore ba bone mongwe yo o ba tshwanetseng.

O se ka wa lebala le ka motlha ope gore Jehofa o tlhaloganya seemo sa batho botlhe bao ba sa nyalang bao ba mo direlang. O a itse gore o ka nna wa tswa o sa itumelele seemo seo o leng mo go sone gone jaanong. Rara wa rona yo o lorato wa selegodimo gape o a itse gore ke eng seo se ka nnang molemo mo go rona go ya go ile, semoyeng le mo maikutlong. Ka tsela e e tshwanang le wena o ka tlhomamisega kaga seno: Ka go letela tharabololo go tswa mo go Jehofa ka bopelotelele le ka go dirisa melaometheo ya Lefoko la gagwe letsatsi le letsatsi mo botshelong jwa gago, o ka tlhomamisega gore o tla go naya dilo tsa botlhokwa tseo o di tlhokang ka tsela eo e tla go solegelang molemo go ya go ile.—Bapisa Pesalema 145:16.