A O Tshwana le Nngwe ya Tseno?
‘GO BOTOKA go nna tau mo letsatsing le le lengwe go na le go nna konyana mo dingwageng di le lekgolo.’ Go dumelwa gore mafoko ano ke a ga Benito Mussolini, yo a kileng a nna mmusaesi wa Italy.
Jaaka Mussolini batho ba le bantsi ba ka gana go tshwantshiwa le dikonyana le dinku. Lefa go ntse jalo, Moiseraele wa bogologolo Dafide yo e neng e le mopesalema ebile e le kgosi o ile a bolela jaana: “Yehofa ke modisa oa me; . . . o nkgōgèla kaha metsiñ a a didimetseñ.” (Pesalema 23:1, 2) Ee, Jehofa Modimo ke Modisa yo Mogolo yo o neneketsang batho ba gagwe jaaka ekete ke dinku tse di bokgwabo.
Batho ba Modimo go buiwa ka bone ka tsela ya tshwantshetso go twe ke dinku mo go Pesalema 95:7, koo re balang jaana gone: “Gonne [Jehofa] ke èna Modimo oa rona, me rona re batho ba bohulō yoa ōna, le dinku tsa seatla sa ōna.” Bangwe ba ka tswa ba ne ba lebeletse gore mopesalema a ka bo a ile a bua kaga “dinku tsa bohulo jwa one” le “batho ba seatla sa one.” Lefa go le jalo fano dilo di beilwe ka tsela e e farologaneng, mme ebile batho ba ga Jehofa ka bobone go bolelwa gore ke dinku. Ba ipelela melemo ya bohulo jwa Modimo ebile ba gogwa ke seatla sa gagwe se se lorato.
Morwa wa ga Jehofa, Jesu Keresete, ke Modisa yo o Molemo. O ile a bua ka batho gantsi a ba bitsa dinku. Ka sekai, Jesu o ile a bua ka “lecomanyane” le “dinku di sele” tsa gagwe. (Luke 12:32; Yohane 10:14-16) Malebana le barutwa ba gagwe ba ba boikokobetso ba sekadinku, Jesu o ile a re: “Dinku tsa me di utlwa lencwe ya me, me kea di itse, me di ntshale moragō: Me ke di naea botshelō yo bo sa khutleñ; me ga di ketla di nyèlèla gopè, e bile ga go opè eo o tla di phamolañ mo seatleñ sa me.” (Yohane 10:27, 28) Kafa tlase ga bolaodi jwa mmusi yo o ratang go direla babusiwa ba gagwe molemo, babusiwa ba solegelwa molemo ke puso ya gagwe, go bo a ba rata, kaelo ya gagwe, le tshireletso ya gagwe.—Tshenolō 1:16, 20; 2:1.
Ga go na ope yo o ka phamolang batho bao eleruri eleng ba sekadinku mo letsogong la ga Jesu le le sireletsang. Gompieno, o kgaoganya batho e ka tswa e le jaaka “dipodi” tseo di se kitlang di amogelwa kana jaaka “dinku” tse di tla ipelelang botshelo jo bo sa khutleng kafa tlase ga puso ya Bogosi jwa Modimo jwa selegodimo. (Mathaio 25:31-46) A o tla itshupa o le mongwe wa dinku tseo tse di segofaditsweng?
[Motswedi wa Setshwantsho mo go tsebe 32]
Garo Nalbandian