Jehofa Ga A Nyatse Pelo E E Phatlogileng

“Ditlhabèlō tsa Modimo ke mōea o o phatlogileñ: pelo e e phatlogileñ, e e ñomogileñ, ga u ketla u e nyatsa, Modimo.”—PESALEMA 51:17.

1. Jehofa o leba jang baobamedi ba gagwe ba ba leofang mo go masisi mme ba bo ba ikwatlhaya?

JEHOFA a ka kgona go ‘ikhurumetsa ka leru, gore thapelo e se ka ya fitlha kwa go ene.’ (Dikhutsahalō 3:44) Mme lefa go le jalo o batla gore batho ba gagwe ba kgone go fitlha kwa go ene. Lefa mongwe wa baobamedi ba gagwe a ka leofa mo go masisi mme a ikwatlhaya, Rraarona wa selegodimo o gakologelwa molemo o motho yoo a o dirileng. Ke sone se moaposetoloi Paulo a neng a ka bolelela Bakeresete ka ene jaana: “Modimo ga o tshiamololō ea go re, o ka lebala tihō ea lona, le go rata leina ya ōna.”—Bahebera 6:10.

2, 3. Bagolwane ba Bakeresete ba tshwanetse go ela eng tlhoko fa ba dirisana le badumedi ka bone ba ba dirileng phoso?

² Bagolwane ba Bakeresete le bone ba tshwanetse go gakologelwa dingwaga tse badumedi ba bangwe ba di tsereng ba direla Modimo ka boikanyegi. Seno se akaretsa tirelo e e boitshepo e e dirilweng ke motho yo o ikwatlhayang yo o reletseng kana yo o dirileng boleo jo bo masisi. Badisa ba Bakeresete ba batla gore mongwe le mongwe yo o mo letsomaneng la Modimo a itekanele sentle semoyeng.—Bagalatia 6:1, 2.

³ Modiraphoso yo o ikwatlhayang o tlhoka boutlwelobotlhoko jwa ga Jehofa. Mme lefa go le jalo, go tlhokega go le gontsi. Seno se phepafaditswe ke mafoko a ga Dafide a a mo go Pesalema 51:10-19.

Pelo E E Itshekileng E A Tlhokega

4. Ke ka ntlha yang fa Dafide a ne a rapelela pelo e e itshekileng le moya o mosha?

⁴ Fa e le gore Mokeresete yo o ineetseng o mo seemong se se maswe sa semoya ka ntlha ya boleo, o ka tlhoka eng mo godimo ga go tlhomogelwa pelo le go itshwarelwa ke Jehofa? Ee, Dafide o ne a kopa jaana: “Modimo, bopa pelo e e itshekileñ mo go nna; u bo u shahatsè mōea o o siameñ mo teñ ga me.” (Pesalema 51:10) Go bonala gore Dafide o ne a dira kopo eno ka go lemoga gore pelo ya gagwe e santse e rata go dira boleo jo bo masisi. Re ka nna ra bo re sa dira boleo jo bo tshwanang le jo bo ileng jwa rareetsa Dafide mabapi le Bathesheba le Uria, mme lefa go le jalo re tlhoka thuso ya ga Jehofa gore re tile go ineela mo thaelong ya go itshwara ka tsela epe ya go dira boleo jo bo masisi. Mo godimo ga moo, rona ka namana re ka nna ra bo re tlhoka thuso ya Modimo go tlosa mo dipelong tsa rona mekgwa e e bosula e e tshwanang le bohula le kilo—tse e leng go tlola molao mo go tsamaelanang thata le bogodu le polao.—Bakolosa 3:5, 6; 1 Yohane 3:15.

5. (a) Go nna le pelo e e itshekileng go raya eng? (b) Dafide o ne a eletsa eng fa a ne a kopa moya o mosha?

⁵ Jehofa o batla gore batlhanka ba gagwe ba nne le “pelo e e itshekileng,” ke gore, go nna le moya le maikaelelo a a itshekileng. Ka go lemoga gore o ne a sa bontsha go itsheka goo, Dafide o ne a rapela gore Modimo o phepafatse pelo ya gagwe o bo o e dumelanye le melao ya bomodimo. Mopesalema gape o ne a batla moya o mosha o o itekanetseng, kana tshekamelo e ntsha ya mogopolo. O ne a tlhoka moya o o neng o tla mo thusa gore a ganane le thaelo mme a ngaparele ka nitamo mo melaong le melaometheong ya ga Jehofa.

Moya O O Boitshepo O A Tlhokega

6. Ke ka ntlha yang fa Dafide a ne a kopa gore Jehofa a se ka a tlosa moya o o boitshepo mo go ene?

⁶ Fa re itlhobogile ka ntlha ya diphoso tsa rona kana melato ya rona, re ka nna ra ikutlwa ekete Modimo o tla tloga o re kgaphela kwa thoko le go tlosa moya wa gagwe o o boitshepo, kana maatla a gagwe a a dirang mo go rona. Dafide o ne a ikutlwa fela jalo, ka jaana a ile a kopa Jehofa jaana: “U se ka ua ntatlha ua ntlosa ha pele ga gago; le mōea ao gago o o boitshèpō u se o tlose mo go nna.” (Pesalema 51:11) Dafide yo o ikwatlhayang ebile a le boikobo o ne a ikutlwa gore maleo a gagwe a mo dirile gore a se ka a tshwanelwa ke go direla Jehofa. Go tlosiwa fa pele ga sefatlhego sa Modimo go ne go tla raya gore ga o mo amogele, ga o kake wa mo gomotsa, le go mo naya masego. Go re Dafide a tle a kgone go boela mo seemong sa gagwe sa semoya, o ne a tlhoka moya wa ga Jehofa o o boitshepo. Mme fa a na le moya o o boitshepo, kgosi e ne e ka rapelela kaelo ya Modimo gore e tle e kgone go itumedisa Jehofa, e tile boleo, le go kgona go busa ka botlhale. Ka ntlha ya go lemoga gore o ne a leofetse Moabi wa moya o o boitshepo, go ne go tshwanela gore Dafide a rapele Jehofa gore a se ka a o tlosa mo go ene.

7. Ke ka ntlha yang fa re tshwanetse go rapelela moya o o boitshepo le go tila go o hutsafatsa?

⁷ Go tweng ka rona? Re tshwanetse go rapelela moya o o boitshepo mme re bo re itise gore re se ka ra o hutsafatsa ka go palelwa ke go sala kaelo ya one morago. (Luke 11:13; Baefesia 4:30) Eseng jalo, re ka latlhegelwa ke moya o o boitshepo mme re bo re retelelwa ke go bontsha maungo a one a a abiwang ke Modimo eleng lorato, kagiso, bopelotelele, bopelonomi, molemo, tumelo, bonolo, le boikgapo. Kwantle ga pelaelo fa re tswelela re mo leofela re sa ikwatlhaye foo gone Jehofa Modimo o tla tlosa moya wa gagwe o o boitshepo.

Go Kgana ka Boipelo jwa go Bona Poloko

8. Fa re leofa mme re batla go nna le boipelo jwa poloko, re tshwanetse ra nna le eng?

⁸ Moleofi yo o ikwatlhayang yo o boelang mo seemong sa gagwe sa semoya o ka boa gape a ipela ka ntlha ya thulaganyo ya ga Jehofa ya poloko. Ka ntlha ya go eletsa seno thata, Dafide o ne a kopa Modimo jaana: “Nthebolèla boitumèlō yoa poloka ea gago; me u ntshegetsè ka mōea o o phuthonogileñ.” (Pesalema 51:12) Abo go ne go ipedisa jang ne go kgana ka boipelo ka ntlha ya tsholofelo ya go bolokwa ke Jehofa Modimo! (Pesalema 3:8) Morago ga go leofela Modimo, Dafide o ne a batla go boelwa ke boipelo jwa poloko ya Gagwe. Mo motlheng o o ileng wa latela kwa morago, Jehofa o ne a rulaganya poloko ka setlhabelo sa thekololo sa ga Morwawe, Jesu Keresete. Mme rona jaaka batlhanka ba ba ineetseng ba Modimo fa re leofa mo go masisi mme re eletsa go boelwa ke boipelo jwa poloko, re tlhoka go nna le boikutlo jwa go ikwatlhaya gore re tile go leofa ka tsela e re tla felelang re leofetse moya o o boitshepo.—Mathaio 12:31, 32; Bahebera 6:4-6.

9. Dafide o ne a batla eng fa a ne a kopa Modimo gore o mo tshegetse “ka mōea o o phuthonogileñ”?

⁹ Dafide o ne a kopa gore Jehofa a mo tshegetse “ka mōea o o phuthonogileñ.” Go bonala gore, seno ga se reye go phuthologa ga Modimo go thusa kana ga moya wa gagwe o o boitshepo, mme go na le moo go bua ka seo se laolang mogopolo wa ga Dafide. Dafide o ne a batla gore Modimo o mo thuse ka go mo tsenya moya wa go rata go dira se se molemo le gore a se ka a wela mo boleong gape. Ka metlha Jehofa Modimo o tshegetsa batlhanka ba gagwe mme o tsosa ba ba imelwang ke diteko tse di farologaneng. (Pesalema 145:14) Abo go gomotsa jang ne go lemoga seno, bogolo jang fa re ikwatlhaya mme ebile re eletsa ekete re ka boa gape ra direla Jehofa ka boikanyegi!

O Ruta Batlodi Eng?

10, 11. (a) Dafide o ne a ka ruta batlodi ba Baiseraele eng? (b) Dafide o ne a ka ruta baleofi morago ga gore ene a dire eng?

¹⁰ Fa Modimo o ne o ka mo letla, Dafide o ne a batla go dira sengwe se se neng se tla bontsha kafa a lebogelang boutlwelobotlhoko jwa ga Jehofa ka teng mme o ne a tla thusa ba bangwe. Ka mafoko a thapelo a a lebisitse kwa go Jehofa, kgosi eo e e ikwatlhayang e ne ya re: “Hoñ ke tla ruta batlodi ditsela tsa gago; le baleohi ba tla shokologèla kwa go wèna.” (Pesalema 51:13) Dafide wa moleofi o ne a ka ruta jang batlodi ka Molao wa Modimo? Ke eng se a neng a ka se ba bolelela? Mme moo go ne go ka nna le molemo ofe?

¹¹ Ka go bontsha Baiseraele ba batlodi ditsela tsa ga Jehofa ka tsholofelo ya go ba sokolola mo tseleng e e boikepo, Dafide o ne a ka bontsha kafa boleo bo leng bosula ka teng, gore go ikwatlhaya go raya eng, le tsela ya go bona boutlwelobotlhoko jwa Modimo. Ka ntlha ya go bo a utlwile botlhoko jwa go sa amogelwe ke Jehofa le jwa segakolodi se se molato, kwantle ga pelaelo Dafide o ne a tla nna morutisi yo o pelotlhomogi wa baleofi ba ba phatlogileng dipelo, ba ba ikwatlhayang. Ee gone o ne a ka dirisa sekai sa gagwe go ruta ba bangwe morago ga gore ene ka boene a amogele melao ya ga Jehofa ebile a Mo itshwaretse, ereka ba ba ganang go ineela mo dilong tse Modimo o di batlang ba sena tshwanelo ya go ‘bolela ka melao ya Modimo.’—Pesalema 50:16, 17.

12. Dafide o ne a solegelwa molemo jang ke go itse gore Modimo o ne o mo golotse mo molatong wa madi?

¹² Dafide o ne a bua jaana ka tsela e nngwe, a boeletsa maikaelelo a gagwe: “Nkgolola mo molatuñ oa go cholola madi, Modimo, wèna Modimo oa polokō ea me; me loleme loa me lo tla ōpèlèla godimo kaga tshiamō ea gago.” (Pesalema 51:14) Go tsholola madi go ne go atlholelwa loso. (Genesise 9:5, 6) Ka jalo go itse gore Modimo wa poloka ya gagwe o ne o mo golotse mo molatong wa madi mabapi le Uria go ne go tla dira gore pelo ya ga Dafide le mogopolo di nne mo kagisong. Mme he loleme lwa gagwe lo ne jaanong lo ka opela ka boipelo ka tshiamo ya Modimo, e seng ka ya gagwe ka boene. (Moreri 7:20; Baroma 3:10) Dafide o ne a ka se ka a kgona go dirolola boitsholo jwa gagwe jo bo sa siamang jwa tlhakanelodikobo kana a tsosa Uria mo lebitleng, fela jaaka go ntse le gompieno gore motho a ka se ka a busetsa bokgarebana jwa motho yo a mo hepisitseng kana a tsosa motho yo a mmolaileng. A ga re a tshwanela go akanya ka seo fa re raelesega? Mme ebile abo re tshwanetse go leboga thatathata jang ne boutlwelobotlhoko jwa tshiamo jo Jehofa a re bo bontshitseng! Tota ebile, go leboga ga rona go tshwanetse ga re dira gore re kaele ba bangwe kwa Motsweding o mogolo ono wa tshiamo le boitshwarelo.

13. Ke mo maemong afe a moleofi a ka bulang dipounama tsa gagwe ka tshwanelo go galaletsa Jehofa?

¹³ Ga go na moleofi yo o nang le tshwanelo ya go bula dipounama tsa gagwe go galaletsa Jehofa kwantle ga fa Modimo o o bula ka boutlwelobotlhoko, jaaka go ne go ka tualo, gore a bue boammaaruri jwa Gagwe. Ke sone se Dafide a ileng a opela jaana: “Yehofa, bula dipounama tsa me; me molomo oa me o tla bolèla pakō ea gago.” (Pesalema 51:15) Mme jaanong ka segakolodi sa gagwe se imologile ka ntlha ya go itshwarelwa ke Modimo, Dafide o ne a tla tlhotlheletsega go ruta batlodi ditsela tsa ga Jehofa, mme o ne a ka Mo tlotlomatsa ka tshosologo. Botlhe ba ba ileng ba itshwarelwa maleo a bone jaaka Dafide ba tshwanetse go leboga boutlwelobotlhoko jwa ga Jehofa jo bo sa ba tshwanelang jo a bo ba diretseng, mme ba tshwanetse go dirisa sebaka sengwe le sengwe go itsise ka boammaaruri jwa Modimo le go ‘bolela pako ya gagwe.’—Pesalema 43:3.

Ditlhabelo Tse Di Amogelwang Ke Modimo

14. (a) Go ya ka kgolagano ya Molao ke ditlhabelo dife tse di neng di tlhokega? (b) Ke ka ntlha yang fa go tla bo go le phoso go akanya gore re ka duelela go tswelela re dira molato ka go dira dilo dingwe tse di molemo?

¹⁴ Dafide o ne a kgonne go nna le temogo e e ileng ya mo dira gore a bue jaana: “Gonne [Jehofa] ga u natehelwe ke setlhabèlō; nkabo ke se ntsha: ga u na kgatlhègō mo chupeloñ e e hisiwañ.” (Pesalema 51:16) Kgolagano ya Molao e batla gore go direlwe Modimo ditlhabelo tsa diphologolo. Mme lefa go le jalo maleo a ga Dafide a boaka le polao, a a neng a atlholelwa ka loso, a ne a ka se ka a phimolwa ka ditlhabelo tseo. Eseng jalo, o ka bo a se ka a thibelwa ke sepe go ntshetsa Jehofa ditlhabelo tsa diphologolo. Fa motho a sa ikwatlhaye ka pelo yotlhe, ditlhabelo ga di na mosola ope. Ka jalo e tla bo e le phoso go akanya gore re ka duelela go tswelela re dira phoso ka go dira dilo dingwe tse di molemo.

15. Boikutlo jwa motho yo o ineetseng yo o phatlogileng moya ke bofe?

¹⁵ Dafide o ne a tlatsa jaana: “Ditlhabèlō tsa Modimo ke mōea o o phatlogileñ: pelo e e phatlogileñ, e e ñomogileñ, ga u ketla u e nyatsa, Modimo.” (Pesalema 51:17) Mo moleofing yo o ikwatlhayang, “ditlhabèlō [tse di amogelwang] tsa Modimo ke mōea o o phatlogileñ.” Motho yo o ntseng jalo ga a manganga. Pelo ya motho yo o ineetseng yo o phatlogileng mo moweng e hutsafetse fela thata ka ntlha ya boleo jwa gagwe, mme o a ikokobetsa ka go lemoga gore Modimo ga o mo amogele, mme ebile o ikemiseditse go dira sengwe le sengwe gore a boe a amogelwe ke Modimo gape. Ga go na sepe se se nang le mosola se re ka se neelang Modimo go fitlha re ikwatlhaela maleo a rona mme re bo re mo direla ka pelo yotlhe ya rona ka poifomodimo e e tletseng.—Nahume 1:2.

16. Modimo o leba jang motho yo o phatlotsweng pelo ke boleo jwa gagwe?

¹⁶ Modimo ga o gane ditlhabelo tse di etsang pelo e e phatlogileng kana e e hutsafetseng. Ka jalo, go sa kgathalesege mathata a re kopanang nao jaaka batho ba gagwe, a re se itlhobogeng. Fa e le gore golo gongwe re ile ra kgopiwa mo tseleng ya botshelo ka tsela nngwe e e ileng ya dira gore dipelo tsa rona di lope boutlwelobotlhoko jwa Modimo, tsholofelo e teng. Lefa re ka tswa re leofile mo go masisi, fa re ikwatlhaya Jehofa ga a kitla a nyatsa pelo ya rona e e phatlogileng. O tla re itshwarela ka setlhabelo sa thekololo sa ga Keresete mme o tla re busetsa mo seemong sa go amogelwa ke Ene gape. (Isaia 57:15; Bahebera 4:16; 1 Yohane 2:1) Lefa go le jalo, fela jaaka go ne go ntse ka Dafide, re tshwanetse go rapelela go boa re amogelwa gape ke Modimo e seng go falotswa mo kotlhaong kana go falola go tlhamaladiwa mo re go tlhokang. Modimo o ne wa itshwarela Dafide, mme gape o ne wa mo otlhaya.—2 Samuele 12:11-14.

Go Tshwenyega ka Kobamelo E E Itshekileng

17. Mo godimo ga go kopa maitshwarelo mo Modimong, baleofi ba tshwanetse go dira eng?

¹⁷ Kwa ntle ga pelaelo, fa re leofile mo go masisi seno se ka re tshwenya thata mo mogopolong, mme pelo e e boikokobetso e tla re dira gore re kope maitshwarelo mo Modimong. Lefa go le jalo, a re rapeleleng le ba bangwe gape. Le mororo Dafide a ne a emetse ka tlhagafalo nako ya fa a tla bo a obamela Modimo gape ka tsela e o e amogelang, mo pesalemeng ya gagwe o ne a sa iteba a le nosi fela a itlhokomolositse ba bangwe. E akaretsa go kopa seno mo go Jehofa: “Dihèla Siona molemō kaha nateheloñ ea gago; aga dithakō tsa Yerusalema.”—Pesalema 51:18.

18. Ke ka ntlha yang fa Dafide wa moikwatlhai a ne a rapelela Siona?

¹⁸ Ee, Dafide o ne a eme a na le tsholofelo ya go boa a amogelwa ke Modimo gape. Lefa go le jalo, se sengwe ke thapelo ya mopesalema yo o boikobo e e reng ‘ka natefelo ya Modimo o ne o tla direla Siona molemo,’ motsemogolo wa Iseraele, Jerusalema, koo Dafide a neng a solofetse go aga tempele ya Modimo teng. Maleo a ga Dafide a a maswe thata a ne a tsentse morafe otlhe mo kotsing, ka jaana batho botlhe ba ne ba ka nna ba boga ka ntlha ya go dira molato ga kgosi. (Bapisa 2 Samuele, kgaolo 24.) Totatota, maleo a gagwe a ne a koafaditse “dithakō tsa Yerusalema,” mo eleng gore di ne di tlhoka go agiwa sesha.

19. Fa re leofile mme re itshwaretswe, ke eng se se tla bong se tshwanetse gore re se rapelele?

¹⁹ Fa e le gore re ne re leofile mo go masisi mme jaanong Modimo o re itshwaretse, go tla bo go tshwanetse gore re rapelele gore a baakanye ka tsela nngwe tshenyo epe fela e boitshwaro jwa rona bo e dirileng. Re ka nna ra bo re dirile gore leina la gagwe le tlhapadiwe, re nyenyefaditse phuthego, kana re ka nna ra bo re hutsafaditse maloko a lelapa la rona. Rraarona wa selegodimo yo o lorato a ka kgona go tlosa kgobo epe e leina la gagwe le ka tswang le kgobilwe ka yone, a ka kgona go aga phuthego ka moya wa gagwe o o boitshepo, mme gape a ka kgona go gomotsa dipelo tsa baratiwa ba rona ba ba mo ratang ebile ba mo direla. Mme legale, go sa kgathalesege gore a boleo bongwe bo dirilwe kana nnyaa, go nna phepa ga leina la ga Jehofa le boitekanelo jwa batho ba gagwe go tshwanetse go nna go re tshwentse ka metlha.—Mathaio 6:9.

20. Ke mo maemong afe ao Jehofa a neng a ka itumelela ditlhabelo le ditshupelo tsa Iseraele?

²⁰ Fa Jehofa a sena go aga dithako tsa Siona, ke eng se se neng se tla latela? Dafide o ne a opela jaana: “Ke gōna [Jehofa] u tla natehèlwañ ke ditlhabèlō tsa tshiamō, le ke chupèlō e e hisiwañ, le chupèlō e e hisiwañ e le mmōgō: ke gōna ba tla isañ dikgomo ditlhabèlō mo sebeshoñ sa gago.” (Pesalema 51:19) Dafide o ne a eletsa thata gore ene le morafe ba amogelwe ke Jehofa gore ba tle ba Mo obamele ka tsela e a e amogelang. Ke gone he Modimo o ka itumelelang ditlhabelo tsa bone le ditshupelo tse di fisiwang. Seno se ne se tla nna jalo ka gore tseno e ne e tla bo e le ditlhabelo tsa tshiamo tse di isiwang ke batho ba ba ineetseng, ba ba tlhoafetseng, le ba ba ikwatlhaileng ba ba amogelwang ke Modimo. Ka ntlha ya go lebogela boutlwelobotlhoko jwa ga Jehofa, ba ne ba tla tshubela dipoo mo sebesong sa gagwe—ditlhabelo tse di gaisang tsotlhe le tse di tlhwatlhwakgolo go di gaisa. Mo motlheng ono re tlotla Jehofa ka go mo neela se se di gaisang sa dilo tse re nang natso. Mme ditlhabelo tsa rona di akaretsa “dipoana tsa dipounama tsa rona,” ditlhabelo tsa pako tse di yang kwa Modimong wa rona o o boutlwelobotlhoko, Jehofa.—Hosea 14:2, NW; Bahebera 13:15.

Jehofa O Utlwa Selelo sa Rona

21, 22. Pesalema 51 e tshwere dithuto dife tse di re solegelang molemo?

²¹ Thapelo e e tswang pelong ya ga Dafide e e kwadilweng mo go Pesalema 51 e re bontsha gore re tshwanetse go ikwatlhwaya ka boammaaruri fa re dirile boleo. Pesalema eno gape e na le thuto e e lebaneng go re solegela molemo. Ka sekai, fa re leofa mme re ikwatlhaya, re ka solofela gore Modimo o re utlwele botlhoko. Mme lefa go le jalo, a re tshwenyegeng ka kgobo epe fela e re ka nnang ra bo re e diretse leina la ga Jehofa. (Ditemana 1-4) Fela jaaka Dafide, le rona re ka kopa Rraarona wa selegodimo gore a re itshwarele ka ntlha ya go bo re tsholetswe mo boleong. (Temana 5) Re tshwanetse go bua boammaaruri, mme ebile gape re tshwanetse go batla botlhale jo bo tswang kwa Modimong. (Temana 6) Fa re leofile, re tshwanetse go kopa gore Jehofa a re phepafatse, a re fe pelo e e itshekileng, le go re fa moya wa go nitama.—Ditemana 7-10.

²² Re bona gape go tswa mo Pesalemeng ya 51 gore ga re a tshwanela go itetla go ganelela mo boleong. Fa re ne re ka dira jalo, Jehofa o ne a tla tlosa moya wa gagwe o o boitshepo kana maatla a gagwe a a dirang, mo go rona. Mme, fa re na le moya wa Modimo, re ka kgona go ruta ba bangwe ditsela tsa gagwe ka katlego. (Ditemana 11-13) Fa re fosa mme re bo re ikwatlhaya, Jehofa o tla re letla go tswelela re mo galaletsa ka gore ga a ke a nyatsa pelo e e phatlogileng le e e hutsafetseng. (Ditemana 14-17) Pesalema eno gape e re bontsha gore dithapelo tsa rona ga di a tshwanela go bua ka rona fela re le nosi. Go na le moo, re tshwanetse go rapelela botsogo jo bo molemo jwa semoya jwa botlhe ba ba kopanelang mo kobamelong e e itshekileng ya ga Jehofa.—Ditemana 18, 19.

23. Ke ka ntlha yang fa Pesalema 51 e tshwanetse go re kgothatsa gore re nne pelokgale le go nna le tsholofelo?

²³ Pesalema eno ya ga Dafide e e amang maikutlo e tshwanetse go re kgothatsa gore re nne pelokgale le go nna le tsholofelo. E re thusa go lemoga gore ga go tlhokege gore re akanye gore ga go na tsholofelo le fa re ka kgopiwa ra wela mo boleong. Ka ntlha yang? Ka ntlha ya gore fa re ikwatlhaya, boutlwelobotlhoko jwa ga Jehofa bo ka dira gore re se ka ra itlhoboga. Fa re ikokobetsa mme re ineela ka botlalo mo go Rraarona wa selegodimo yo o lorato, o utlwa selelo sa rona sa go kopa boutlwelobotlhoko. Mme abo go gomotsa jang ne go itse gore Jehofa ga a nyatse pelo e e phatlogileng!

O Ne O Ka Araba Jang?

◻ Ke ka ntlha yang fa Bakeresete ba tlhoka pelo e e itshekileng le moya o o boitshepo wa Modimo?

◻ Ke eng se motho yo o ikwatlhaileng a ka se rutang ba ba tlolang molao wa ga Jehofa?

◻ Jehofa o leba jang pelo e e phatlogileng le e e hutsafetseng?

◻ Ke dithuto dife tse di fitlhelwang mo go Pesalema 51?

[Setshwantsho mo go tsebe 15]

A o rapelela moya o o boitshepo o bo o tila gore o se ka wa o hutsafatsa?

[Setshwantsho mo go tsebe 17]

Bontsha gore o lebogela bopelonomi jo bo sa re tshwanelang jwa ga Jehofa ka go itsise boammaaruri jwa gagwe