O Duetswe ka “Serwalō sa Botshelō”

MOAPOSETOLOI Johane o ne a bolelelwa gore a kwalele moengele wa phuthego ya Semerena jaana: “U nnè boikañō hèla le go ea kwa loshuñ, me ke tla gu naea serwalō sa botshelō.” (Tshenolō 2:8, 10) Ka gone, re itsise ka kutlobotlhoko le ka boitumelo gore Frederick William Franz, poresidente wa Watch Tower Bible and Tract Society of Pennsylvania le wa Watchtower Bible and Tract Society of New York, Inc., mmogo le leloko la makgotla a mangwe a puso ya bomodimo, o ne a wetsa botshelo jwa gagwe jwa mo lefatsheng ka December 22, 1992.

Ke kitsiso e e utlwisang botlhoko ka gore e bolela kaga bokhutlo jwa ditiro tsa mo lefatsheng tsa motlhanka yo o rategang thata le yo o ikanyegang fela thata wa ga Jehofa. Lefa go ntse jalo, kitsiso eno ke e e itumedisang gonne mafoko ano a a mo go Tshenolō 14:13 a a dira jaanong mo go Mokaulengwe wa rona yo o rategang Franz: “Go segō bashwi ba ba shwèlañ mo Moreneñ, go simolola hano le go ea pele: E, go bua Mōea, gore ba bōnè tapologō mo letsapeñ ya bōnè; gonne ditihō tsa bōnè di ba setse moragō.” Mokaulengwe Franz o ne a le bori ebile a ikokobeditse, e le modihedi yo o dirang ka natla le yo o dirang fela thata yoo Jehofa Modimo a neng a mo dirisa ka tsela e kgolo tota jaaka leloko la “motlhanka eo o boikañō le eo o botlhale” go thusa mo go abeleng “ba ntlo ea gagwè” le ditsala tsa bone dijo tsa semoya.—Mathaio 24:45-47.

Mokaulengwe Franz o ne a tsholwa ka September 12, 1893, kwa Covington, kwa Kentucky. O ne a utlwa kaga boammaaruri ka mogolowe wa monna. Ka nako eo o ne a le kwa Yunibesithing ya Cincinnati, a ithutela go nna moruti wa Presbyterian. Go na le moo o ne a tlogela Kereke ya Presbyterian mme a kopanela le Baithuti ba Bibela, jaaka Basupi ba ga Jehofa ba ne ba bidiwa ka nako eo. O ne a kolobediwa ka November 30, 1913, mme mo ngwageng o o latelang o ne a tlogela yunibesithi mme a dira tiro ya go rekisa dibuka (bobulatsela). Ka June 1, 1920 o ne a nna leloko la lelapa la Bethele kwa Brooklyn. Go ise go e kae, o ne a abelwa go tlhokomela tiro ya barekisi ba dibuka mme ka 1926 o ne a dira mo lephateng la go rulaganya dikgatiso, koo a neng a dira ka matsetseleko tota. Ka 1945, o ne a nna motlatsaporesidente wa Mokgatlho wa Watch Tower le makgotla a mangwe a yone. Ka nako ya fa, Nathan H. Knorr, poresidente wa nako eo a ne a tlhokafala ka 1977, o ne a nna poresidente wa Mokgatlho wa Watch Tower. Seo ke se a neng a se dira go fitlha a swa. Mo botshelong jwa gagwe, Mokaulengwe Franz o ne a bona palo ya Basupi ba ga Jehofa e oketsega go tloga go ba le dikete di sekae fela go ya go ba le dimilione di le nne le sephatlo. O ne a bona ditshiamelo tse dintsi tsa tirelo, go akaretsa le go naya dipuo kwa dikopanong tsa meraferafe le go etela makala le magae a barongwa mo dikarolong tse dintsi tsa lefatshe. Hisitori ya botshelo jwa gagwe e ne ya tlhaga mo tokololong ya Tora ya Tebelo ya May 1, 1987.

Go ne ga tshwarwa tirelo ya segopotso kwa Holong ya Bogosi kwa Bethele ya Brooklyn ka Mantaga maitsiboa ka December 28, 1992. Mokaulengwe Albert D. Schroeder wa Setlhopha Se Se Laolang o ne a naya puo e e gomotsang le e e agang tota. Malapa a Bethele a a kwa Watchtower Farms, Patterson, Mountain Farm, Kingdom Farm, mmogo le lelapa la Bethele le le kwa lekaleng la kwa Canada a ne a golagantswe ka thelefouno.

Ga go ope yo o tla se kang a tlhoafalela Mokaulengwe Franz segolobogolo ba ba neng ba dira thata le ene. E ne e le motho yo o tlhaloganyang ba bangwe thata, a kgothatsa, ebile a le pelotelele le mongwe le mongwe yo a neng a dira le ene le bao a neng a tsamaya le bone fa a eta. Eleruri, badumedi ba bangwe ba ne ba dirisana le ene ka tsela eno e e tlhalosiwang mo go Bahebera 13:7: “Gopolañ ba ba kileñ ba lo laola, ba lo bolèlèla lehoko ya Modimo; me lo re lo akanya bohèlèlō yoa botshelō yoa bōnè, lo tlo lo etsè tumèlō ea bōnè.”

Ka December 30, 1992, Mokaulengwe Milton G. Henschel o ne a tlhophiwa go nna poresidente wa botlhano wa Mokgatlho fa morago ga Mokaulengwe Franz.

[Ditshwantsho mo go tsebes 31, 32]

Frederick W. Franz ka 1913

Kwa feketoring ya Mokgatlho e e kwa Myrtle Avenue ka 1920

A na le Nathan H. Knorr kwa Yankee Stadium ka 1953