Kgalalelo ya Botlhogopududu

ABO go tla bo go itumedisa thata jang ne go bua le banna le basadi ba ba ikanyegang ba bogologolo! Akanya fela o bua le banna ba ba tshwanang le Noa, Aberahame, Moshe, le Johane Mokolobetsi, mmogo le basadi ba ba tshwanang le Sara, Rahabe, Ruthe, le Dibora! A ga o kitla o kgatlhega thata go ba utlwa ba go tlotlela ka dipego tse di tlhomologileng tseo ba di boneng ka matlho tsa nako e e fetileng?

Le eleng gompieno, a o ka seke o itumelele go utlwa batho ba ba godileng ba ba neng ba ikanyega ba go tlotlela ka maitemogelo a ka moo bone mmogo le ba bangwe ba ileng ba boloka bothokgami jwa bone go Modimo kafa tlase ga diteko, tse di akareletsang go thibelwa, go itewa, le go tshwarwa ka ntlha ya go dira tshiamo? Tota go ntse jalo! Lorato lwa rona go Modimo le go ba tlotla ga rona go tla gola jaaka fa ba re bolelela ka moo ba ikutlwang ka gone segolo jang go anaanela ga bone go tswa pelong tlhokomelo e e lorato ya ga Jehofa.

Gareng ga batho ba Modimo, banna le basadi ba ba godileng ba ba ikanyegang ba ne ba ntse ba tlotliwa ka ntlha ya maitemogelo a bone, kitso, le botlhale. Totatota, taolo e e latelang e ile ya tsenngwa mo Molaong o Modimo a neng a o neile Baiseraele o o reng: “U nanogè u èmè ha pele ga eo o tlhōgō e pududu, u tlotlè sehatlhōgō sa mocohe, me u boihè Modimo oa gago: Ke nna Yehofa.” (Lefitiko 19:32) Lefoko la Sehebera le le rayang dingwaga kana dingwaga tsa bogodi le tswa mo lereong la ntlhantlha eleng “go nna pududu” mme gape le ntse le tlhalosiwa jaaka “tlhogopududu.” Ka jalo, Baiseraele ba ne ba tshwanelwa ke go ema e le go supa gore ba tlotla motho yo o godileng, ka go dira jalo go ne go bontsha gore ba boifa Modimo ka tshisimogo.

A mokgwa ono wa go bontsha tlotlo o teng le gompieno? Ka sekai, a batho ba basha ka bopelontle ba bulela batho ba ba godileng mejako? A batho ba basha kana bagolo ba ba santseng ba le basha ba sutela batho ba ba godileng go dirisa lefiti fa e tletse? Kana a batho ba basha ka gale ba neela batho ba ba godileng ditulo tsa bone mo beseng kana mo tereneng e e tletseng? Go palelwa ke go dira dilo tse di ntseng jalo go ile ga lemogwa le gareng ga Bakeresete.

Lefa go ntse jalo, gore Bakeresete ba itumedise Jehofa Modimo, ba tshwanetse go dumalana le tsela eo a lebang dilo ka yone le go tila go akanya, go bua, le go itshwara jaaka ‘baithati, ba ba sa utlweng batsadi ba bone, ba ba sa lebogeng, le ba ba sa rateng molemo.’ (2 Timotheo 3:1-5) Ke eng he se Lefoko la Modimo le se bolelang kaga bosha malebana le botlhogopududu?

Thata ya Bokau

Bibela e a dumalana gore bosha bo na le nonofo ebile bo na le mesola ya jone, ka go tlhalosa jaana: “Kgalalèlō ea makau ke thata ea aōna.” (Diane 20:29) Bogologolo mo Iseraele, Balefi ba ba sa leng basha ba ne ba dirisa maatla a bone mo tempeleng, gantsi ba a dirisetsa ditiro tse dintsi tse di boketenyana. Gompieno, tiro e ntsi ya mo difeketering, mo magaeng a Bethele, le mo diporojekeng tsa kago tsa Mokgatlho wa Watch Tower e dirwa ke makgarebe le makawana a a neetseng maatla a bone le bokgoni jwa bone go tsweledisa ditiro tsa Bogosi pele. (Mathaio 6:33) Ka jalo ba bona ditshiamelo tse di molemo mo tirelong ya Modimo.

Seane se se sa tswang go nopolwa se feleletsa ka mafoko a a reng, “me bontlè yoa banna bagolo ke tlhōgō e pududu.” Fa maatla a bokau a kopane le dingwaga tsa maitemogelo le botlhale, di dira sengwe se se kwenneng.

Ka sekai: Motho mongwe yo o sa leng mosha yo o santseng a ithuta go betla o kopiwa go tlhomela dimati dingwe mme o batla gore a dire tiro eo ka matlhagatlhaga a bokau. Mmetli mongwe yo mogolwane yo o nang le maitemogelo go mo feta o lemoga gore le mororo mothusi a na le maatla, o kokotela sepekere makgetlo a le mmalwa pele ga se ka tsena sentle. Monna wa modiri yo mogolwane o akantsha lekawana gore le tshwarele hamore kwa bofelelong jwa mokgoti, go na le go o tshwarela gaufi le tlhogo ya yone ya tshipi. Seno se kgonisa motho yono yo mosha gore a kokotele dipekere ka maatla a magolwane, mme seo se mmolokela nako le thata.

Ka go tshwana, lekgarebe le le matlhagatlhaga le ka tswa le ithutile go tswa diphosong tsa lone le maitekong a lone gore matsela mangwe a a senyega fa o sa a tlhatswe go ya ka ditaelo. Lefa go ntse jalo, mosadi mongwe yo o nang le maitemogelo, o itse mosola wa go ipha nako o tlhopha diaparo le go tlhatswetsa tse dingwe kwa thoko. Gape o ile a ithuta gore a ka tila go sidila diaparo go go sa tlhokegeng ka go di mena sentle fa a sena go dintsha mo terateng mo motšhining o o omisang diaparo.

Go ithuta go tswa mo bathong ba ba nang le boitemogelo go ka dira botshelo gore bo nne motlhofo. Lefa go ntse jalo, go tla nako ya gore le eleng motho yo o neng a na le maitemogelo abo a sa tlhole a kgona go dira dilo dingwe tse a neng a kgona go di dira motlhofo dingwaga di le mmalwa tse di fetileng. Mokwadi mongwe o ne a tlhalosa jaana ka botswerere: “A bo go le molemo jang ne fa batho ba basha ba ka bo ba na le kitso mme batho ba ba godileng ba na le maatla.” Mme abo go le molemo jang ne fa batho ba ba godileng ba anaanela maatla a batho ba basha mme ka bopelotelele ba abelana le bone maitemogelo a ba nnileng le one dingwaga tse dintsi tse di fetileng—mme batho ba basha ka boikokobetso ba amogela dikgakololo tseno! Ka tsela e e ntseng jalo, ditlhopha tse pedi di solegelwa molemo.

Go Bona Kgalalelo

Dingwaga fela ga di a lekana. Lekawana Elihu o ne a bolela ka gore: “Ba batona ga se bōnè ba ba botlhale, leha e le bacohe ba ba tlhaloganyañ katlholō.” (Yobe 32:9; Moreri 4:13) Go re motho yo o godileng a tle a tlotliwe tota jaaka yo o tlhogopududu, go tlhokega gore a bo a ile a dira ka mo go oketsegileng mo botshelong jwa gagwe go na le go iketla fela a senya malatsi a gagwe ka go lebelela thelebishene, a ya go lebelela metshameko, kana ka tsela nngwe a ijesa menate. Le eleng mo dingwageng tsa bogodi, motho yo o godileng o santse a tlhoka go tswelela a ithuta.

Batho bangwe ba ikgantsha ka go dira dilo ka tsela eo ba batlang go di dira ka yone, kana o tla utlwa ba re: “Maitemogelo ke one a rutang botoka.” Lefa go ntse jalo, Lefoko la Modimo le re tlhagisa jaana: “Gore motho eo o botlhale a utlwè, a totahalè mo go ithuteñ; le gore motho oa tlhaloganyō a eè go chwara dikgakololō tse di itekanetseñ.” (Diane 1:5; bapisa 1 Bakorintha 10:11.) Ga se ka dinako tsotlhe maitemogelo e leng one a a rutang botoka, ka ntlha ya gore re ka ithuta go tswa mo diphosong tsa ba bangwe kwantle ga gore rona ka borona re boelele diphoso tse di tshwanang. Mo godimo ga moo, Mokeresete o tla batla go nna a ntse a itse gore, “tlhōgō e e pududu ke serwalō sa kgalalèlō, ha e bōnwa mo tseleñ ea tshiamō.” (Diane 16:31) Go ya ka tsela eo Jehofa a lebang dilo ka yone, ke selo se sentle fa motho a senya botshelo jwa gagwe a ikanyega mo tirelong ya gagwe mme go felela ka gore ba bangwe ba mo tlotle jaaka motlhomasekao se sentle. Eleruri, go ithuta ka Modimo le go bona boitemogelo mo “tseleñ ea tshiamō” go ka simolola fa motho a santse a le mmotlana mme go tshwanetse ya nna mokgwa wa goyagoile.—Baroma 11:33, 34.

Seno se ka tshwantshanngwa le maitemogelo a mosimanyana mongwe wa dingwaga di le supa wa kwa Sweden. O ne a botsa molebedi wa Sekolo sa Bodihedi sa Bolegodimo wa kwa phuthegong ya bone gore a go ne go ka kgonega gore a ikwadise mo sekolong. Molebedi yoo o ile a mmotsa ka gore: “Ke goreng fa o batla go ikwadisa?” Mosha yono o ne a mo araba ka gore: “Motho ga a ka ke a nna fela mo botshelong jwa gagwe jotlhe a sa dire sepe!” (Moreri 12:1) Abo e ne e le sekao se sentle jang ne mo bathong ba basha le ba ba godileng ka go tshwana!

Go Tlotla Botlhogopududu

Go na le mokgwa o o sa itumediseng o o mo bathong ba gompieno eleng wa go tseela kwa godimo batho ba ba nang le boitekanelo jwa mmele le go kgona go nna moatleletiki mme go tseelwa kwa tlase batho ba ba godileng. Mokeresete o tshwanetse go itshwara jang mabapi le botlhogopududu ba mo phuthegong?

Go na le gore re itlhokomolose Bakeresete ba ba godileng, re tshwanetse go ba akanyetsa le go senya nako le bone. Ka sekai, a o tsaya matsapa a go dumedisa batho ba ba godileng kwa dipokanong tsa beke le beke tsa Basupi ba ga Jehofa kwa Holong ya Bogosi? Ba anaanela tota fa ba dumedisiwa ke batho ba basha le ba bangwe. Mme abo batho ba ba godileng ba itumela thata jang ne fa ba le gone kwa dikokoanong tsa maitiso tsa badumedi kabone ba ditlhopha tsa dingwaga tse di farologaneng! Lefa gone banyalani ba basha ba ka tswa ba na le dikgatlhego tse di tshwanang le tsa banyalani ba bangwe ba dingwaga tsa bone, go tla nna le matswela fa ba ka akaretsa le batho ba ba godileng mo dikokoanong tse di ntseng jalo tsa boitumelo.—1 Bathesalonia 3:12; 5:15.

Abo go le botlhokwa jang ne go akanyetsa fa re bua le batho ba ba godileng! Fa mokaulengwe mongwe yo o godileng yo o neng a na le dingwaga di le 40 a le mo tirelong ya ga Jehofa a ne a bua le mogolwane mongwe kaga gore ene a ka kgona go dirisiwa mo phuthegong, monna yono yo mosha o ne a re: “O ka se ka wa thusa mo go kalo.” Abo e ne e le kakgelo e e senang botsalano jang ne! Mokaulengwe yono yo o godileng o ne a sa tlhole a na le maatla mo go kalo jaaka pele, go tsaya karolo ga gagwe mo bodiheding jwa tshimo go ne ka tsela nngwe go ile kwa tlase, mme gongwe gone jaanong o ne a sa tlhole a na le ditshiamelo dingwe tseo a neng a na le tsone tsa go laola dilo; mme lefa go ntse jalo, o ne a santse a na le mo gontsi mo a ka go dirang. O ne a na le botlhale jo a bo kokoantseng dingwaga di le dintsi tse di fetileng le maitemogelo mo tseleng ya tshiamo. Ereka batho bano ba ba godileng ba ile ba dira ka natla jaaka bareri ba Bogosi, ba ile ba itshokela dipogiso, ba rwala merwalo e e bokete ya maikarabelo a Bokeresete, le go katisa ba bangwe, batho ba Modimo jaanong ba ipelela phuthego e e maatla e e tshegediwang ke moya wa gagwe. Ka jalo, a ekete re ka bontsha batho bano ba ba godileng tlotlo jaaka bagakolodi ba ba botlhale, badisa ba ba lorato, le batho ba ba rutang ba ba nang le mosola.

Gape go na le lebaka le lengwe le le utlwalang la go akanyetsa ka masisi dikgakololo tse di neelwang ke batho ba ba godileng. Ka sekai, mokaulengwe mongwe yo o nang le maitemogelo o ne a akantsha gore mojako wa Holo nngwe ya Bogosi o se ka wa tsenngwa kafa letlhakoreng la bophirima la kago. Bakaulengwe ba babotlana bao ba neng ba amegile ka se ba neng ba akanya gore se sentle, ba ne ba se ka ba latela kakantsho ya gagwe. Lefa go ntse jalo, morago ga dingwaga di le mmalwa, go ne ga tshwanelwa ke gore mojako o fudusiwe gape ka ntlha ya gore o ne o sentswe ke diphefo le dipula tse di sa feleng tse di neng di tswa kwa bophirima. Maitemogelo a go dira dilo ka botlhale a ne a feta mabaka a dilo tse di dirang gore go nne gontle. Fa batho ba basha ba tlotla batho ba ba godileng ka go reetsa dikgakololo tsa bone le go dira dilo ka botlhale, seno se ka boloka nako le madi. Lefa gone kgakololo ya motho yo o godileng e sa latelwe, a ka nna a itsisiwe ka tlotlo gore kgakololo ya gagwe e ne e akanyediwa, mme lefa go ntse jalo mabaka a mangwe a ile a dira gore go dirwe tshwetso e sele.—Bapisa Diane 1:8.

Leba kwa Pele, Eseng kwa Morago

Batho bangwe ba ba godileng ba na le mogopolo ono: “Ga go na nako epe e e tshwanang le ya bogologolo fa nna le wena re ne re le basha.” Lefa go ntse jalo, go na le gore ba akanye thata ka dinako tse di fetileng, batho bano ba ba godileng ba ka nna ba kgothadiwa go lebelela kwa pele kwa letsatsing la fa ba tla bo ba amogela moputso wa bone wa selegodimo kana fa ba boela mo matlhagatlhageng a bone a bosha kafa tlase ga puso ya Bogosi jwa Modimo. Gone jaanong, ba tlhoka gore ba lemoge gore ga ba tlhole ba kgona go dira dilo jaaka pele ka ntlha ya bogodi. Go lemoga seo mmogo le moya wa go rumaruma di botlhokwa fela thata fa ka tsela nngwe motho yo o godileng a ka lebalwa mo ditshiamelong dingwe tsa tirelo.

Ka sekai, mokaulengwe mongwe yo o godileng a ka tswa a ne a kile a dirisiwa kgapetsakgapetsa mo dithulaganyong tsa kopano ya kgaolo mo dingwageng tse di fetileng. Mme gone jaanong go na le bagolwane ba le bantsi ba ba nang le bokgoni mme ebile go na le ba le bantsi ba ba ka tlhophiwang ba ba nang le bokgoni jwa go ruta. Lefa gone ka tsela nngwe ba sa ntse ba le babotlana, bangwe ba bagolwane bano ba ile ba itshupa ba le matlhagatlhaga gape ba na le bokgoni, ba kgona go ruta sentle le go neela dikgakololo tse di molemo, ebile ba kgona go kgothatsa ba bangwe. (1 Bathesalonia 5:12, 13; 1 Timotheo 5:17) Ka tsela e e ntseng jalo, mokaulengwe yo o godileng fa a bona a sa tlhagelele mo thulaganyong ya kopano a ka nna a ikutlwa gore go lebetswe ka ene mme a ka nna a ikutlwa a sa itumelela gore ditshiamelo di newa bagolwane ba ba sa leng babotlana. Lefa go le jalo, go sula pelo go go ntseng jalo ka ntlha ya go sa itekanelang ga batho go ka nna ga fenngwa. Ebile tota, batho botlhe mo phuthegong ba ka nna ba thusa ka go dira gore batho bano ba ba godileng ba itse gore ba a tlhokega, gore ba a ratiwa ka ntlha ya boikanyegi jwa bone, le go re dikakantsho tsa bone di tsewa di le botlhokwa.

Ee gone, batho ba ba godileng ba tlhoka go gakologelwa gore baobamedi kabone ba tshwanetse go tlotliwa fela jaaka le bone ba ne ba ka rata go tlotliwa. (Mathaio 7:12; Baroma 12:10) Go na le go ikutlwa gore ba tlogedisiwa maikarabelo ka ntlha ya bogodi le go nna le bothata jwa go leba dilo ka tsela e e sa siamang, batho bano ba ba godileng ba tshwanetse go itumela go bo ba ile ba nna dingwaga di le dintsi ba ikanyega mo tirelong. Ebile tota, rotlhe re tshwanetse go ikutlwa re le motlotlo ka ntlha ya masego a ga Jehofa, gore go na le palo e e oketsegang ya balebedi ba ba tshwanelegang go ka rwala morwalo wa tiro le go tsaya maikarabelo a phuthego jaaka boidiidi jwa “dinku di sele” bo ntse bo thologela mo phuthegong ya Bokeresete.—Yohane 10:16; Isaia 60:8, 22; 2 Timotheo 2:2.

Ka ntlha ya ditlhabi, botsogo jo bo fokolang, kana mabaka a mangwe, botlhogopududu ka dinako tse dingwe ba amega motlhofo fela. Seno se tlhoka gore maloko a mangwe a lelapa le a phuthego a ba akanyetse le go ba utlwela botlhoko. Seno gape se tlhoka gore batho ba ba godileng ba dire ka natla go nna le mogopolo o o siameng, le go nna le mogopolo wa bosha. Fa mokaulengwe mongwe yo mmotlana mo lelokong lengwe le le godileng le a neng a nna nalo mo kamoreng la Setlhopha Se Se Laolang sa Basupi ba ga Jehofa a ne a tlogela Bethele dingwaga tse di fetileng, mokaulengwe yono yo o godileng o ne a mo raya a re a akantshe gore a tlisediwe mongwe yo o tshwanelang mme a re go ne go ka nna botoka gore a tlisediwe mokaulengwe yo mosha, yo o nonofileng yo o ka kgonang go mo thusa gore a nne a le mosha le matlhagatlhaga. Mokaulengwe yono wa motlodiwa yo o godileng o ne a sa ikaelela go tlogela go dira kana go iketla fela, ka ntlha ya gore go ne go santse go na le tiro e e neng e tshwanetse go dirwa. Abo e ne e le sekao se se molemo jang ne sa go lebelela kwa pele le go nna le go leba dilo ka tsela e e siameng!

Kwantle ga pelaelo, “kgalalèlō ea makau ke thata ea aōna, me bontlè yoa banna bagolo ke tlhōgō e pududu.” Abo go itumedisa thata jang ne fa batho ba basha ba dirisa maatla a bone le batho ba ba godileng ba dirisa botlhale jwa bone mo go lateleng tsela ya tshiamo! Bakeresete ba ba godileng le ba basha ka go tshwana ba bona boitumelo jaaka fa ba kopana mmogo mo go tlotlomatseng kobamelo ya boammaaruri ya ga Jehofa Modimo, eleng ‘Yo Mogologolo.’—Daniele 7:13.

[Setshwantsho mo go tsebe 28]

Bakeresete ba ba tlhogopududu ba na le mo gontsi mo ba ka go dirang go solegela ba bangwe molemo