Baebele—Buka E E Diretsweng Gore Batho Ba E Tlhaloganye

BATHO ba bangwe ba dumela gore Baebele ke Lefoko la Modimo le le phepafetseng le le tshwanetseng go latelwa jaaka le ntse. Fa ba bangwe ba dumela gore “molaetsa wa Baebele ga o a tlhomama.” Go bolela jalo komiti ya maloko a le 12 ya tumelo le thutobomodimo ya tumelo e kgolo thata ya Seporotesetante ya Canada. Moruti Clifford Elliott, wa United Church, o ikutlwa gore mo bathong ba bangwe “Baebele e thata go tlhaloganngwa, ga e amane le batho e bile ga e na mosola.”

Dikgopolo tse di ntseng jalo di tsosa dipotso tse di tshwanelang tse di tlhokang go arabiwa. Dingwe tsa dipotso tseno tse di botlhokwa ke tse di reng, Ke ka ntlha yang fa Baebele e ne ya kwalwa? A e tlhakanya tlhogo thata e bile e raraane mo motho a ka sekang a e tlhaloganya? A motho fela yo o tlwaelegileng o ka e tlhaloganya? Ke thuso efe e motho a e tlhokang gore a kgone go tlhaloganya se se bolelwang ke Dikwalo? Mme ke ka ntlha yang fa kitso e e tlhomameng ya Baebele e le botlhokwa jaana mo metlheng eno e e tlhakatlhakaneng?

Ke Ka Ntlha Yang fa Baebele E Ne Ya Kwalwa?

Batho ga ba a bolo go tshwanelwa ke gore ba ithute Lefoko la Modimo gore ba tle ba amogelwe ke Modimo Mogodimodimo, Jehofa. Dikgosi, baperesiti, batsadi, banna, basadi, le bana—bahumi le bahumanegi ka tsela e e tshwanang—ba ne ba kaelwa gore ba tseye nako mo dikgannyeng tsa letsatsi le letsatsi tsa botshelo gore ba sekaseke Lefoko le le kwadilweng la Modimo ka tsela e e masisi le ka thapelo.—Duteronome 6:6, 7; 17:18-20; 31:9-12; Nehemia 8:8; Pesalema 1:1, 2; 119:7-11, 72, 98-100, 104, 142; Diane 3:13-18.

Ka sekai, Joshua o ne a kaelwa jaana: “Tlhomamisa gore buka ya Molao o e bala ka metlha mo kobamelong ya gago. O e ithute motshegare le bosigo, mme o tlhomamise gore o ikobela sengwe le sengwe se se kwadilweng mo go yone. Go tswa foo o tla segofala o bo o atlega.” (Jošua 1:8, Today’s English Version) Go ithuta ka kelotlhoko jalo le go dirisa Molao wa Modimo go ne go tla felela ka gore a atlege le go itumela. Jehofa o ne a ikaeletse gore “batho botlhe” ba se ka ba tlhaloganya Lefoko la Modimo fela, e bong Baebele, mme gape ba le ikobele, ba ntse ba lebeletse gore ba tla amogela mpho ya botshelo.—1 Timotheo 2:3, 4; Johane 17:3.

A E Raraane mo Motho A Ka Sekang A E Tlhaloganya?

Pele ga Jesu a tlhatlogela kwa legodimong, o ne a phepafatsa sentle gore o batla thulaganyo e kgolo ya go ithuta Baebele gore e tswelele pele mo lefatsheng ka bophara. (Ditiro 1:8) O ne a itse gore Baebele e ne e diretswe gore batho ba e tlhaloganye. O ne a ntsha taolo eno e e tlhamaletseng fa a se na go tlhalosa gore Jehofa o ne a mo neetse taolo yotlhe kwa legodimong le mo lefatsheng: “Ke gone tsamayang, lo dire merafe yotlhe barutwa [kana, baithuti], lo ba kolobetse mo ineng la Rara, le la Morwa, le la mowa o o boitshepo. Lo ba rute go tlhokomela dilo tsotlhe tse ke di lo laoletseng.”—Mathaio 28:19, 20.

Barutwa ba ba sa tswang go kopanela ba ne ba tshwanetse go rutiwa kaga Jehofa, Morwawe, le ka tsela e moya o o boitshepo o dirang ka gone, pele ba kolobediwa. Mo godimo ga moo, ba ne ba tshwanetse go rutiwa go ya ka molao wa tsamaiso ya dilo ya Bokeresete. (1 Bakorinthe 9:21; Bagalatia 6:2) Gore batho ba ba tshwanelegang ba fitlhelele phelelo eno ba ne ba tlhoka go dumela pele gore Baebele e ne e tswa kwa go Jehofa mme sa bobedi gore e ne e diretswe gore batho ba e tlhaloganye.—Mathaio 10:11-13.

Ke eng se o se tlhokang gore o tlhaloganye Baebele? Morwa Modimo o ne a dira boiteko jo bo kgethegileng gore a tlhalose Dikwalo. O ne a itse gore Dikwalo Tse Di Boitshepo di boammaaruri le gore di tlhalosa thato ya ga Jehofa. (Johane 17:17) Jesu Keresete o ne a bolela jaana malebana le tiro eo a neng a e abetswe: “Ke tsaletswe e bile ke tletse boikaelelo jone jo mo lefatsheng, gore ke bue ka ga boammaaruri. Mongwe le mongwe yo o leng wa boammaaruri o a ntheetsa.” (Johane 18:37, TEV; Luke 4:43) Jesu o ne a se ka a ikgogona go ruta batho ba ba dipelo le megopolo e e tlhaloganyang. Mo go Luke 24:45, re bolelelwa jaana: “Foo [Keresete Jesu] a rarabolola tlhaloganyo ya bone gore ba tlhaloganye dikwalo.”

Mo bodiheding jwa ga Jesu o ne a nopola fela go tswa mo Lefokong le le kwadilweng, a tlhalosa e bile a bolela ka dikwalo tse di mo “molaong wa ga Moše, le mo baperofeting, le mo dipesalemeng.” (Luke 24:27, 44) Batho ba ba neng ba utlwa a tlhalosa Dikwalo ba ne ba tlhotlhelediwa thata ke tsela e a neng a phepafatsa dilo ka yone gore ba tlhaloganye, mmogo le tsela ya gagwe ya go kgona go ruta. (Mathaio 7:28, 29; Mareko 1:22; Luke 4:32; 24:32) O ne a bona Dikwalo e le buka e e motlhofo go tlhaloganngwa.

Baebele le Balatedi ba ga Jesu

Moaposetoloi Paulo, moetsi wa ga Jesu Keresete, o ne a bona go tlhokega gore a rute ba bangwe ka se Dikwalo di se tshotseng. Le ene o ne a itse gore di ne di diretswe gore batho ba di tlhaloganye. Ke gone ka moo a neng a ruta phatlalatsa le go tlhalosa Dikwalo a sa belaele sepe mo magaeng a batho ba ba neng ba batla go di tlhaloganya. Paulo o ne a itsise boemo jwa gagwe fa a ne a bolela jaana: “Lo a itse gore ga ke a ka ka ikgogona mo go sepe se se neng se ka lo thusa fa ke ne ke rera le go ruta phatlalatsa le mo matlong a lona.” (Ditiro 20:20, TEV) Ka nako ya fa a ne a buisana le batho o ne a ba araba ka Dikwalo, a ba tlhalosetsa le go supela dintlha tsa gagwe ka go lebisa kwa go tsone. (Ditiro 17:2, 3) O ne a itumelela go thusa ba bangwe gore ba tlhaloganye se Dikwalo di se bolelang.

A o eletsa go tlhaloganya dilo tse Jesu le barutwa ba gagwe ba neng ba di ruta? (1 Petere 2:2) Baagi ba kwa Berea wa bogologolo ba ne ba na le keletso e e ntseng jalo, mme ba ne ba tlhagafalela go dumela se moaposetoloi Paulo a neng a se ba ruta kaga Keresete. Ka jalo ba ne ba kgothadiwa go ithuta Dikwalo ka malatsi otlhe mme ka gone ba tlhomamisa gore mafoko a a molemo a ba a utlwileng eleruri a ne a le boammaaruri. E re ka megopolo ya bone e ne e tlhaloganya, “ba le bantsi ba bone [ba ne] ba dumela.”—Ditiro 17:11, 12.

Gore motho a tlhaloganye Baebele, o tshwanetse a ikutlwa ka tsela e e siameng, a rata go ithuta ka bopeloephepa, e bile a ‘amega ka dilo tse a di tlhokang semoyeng.’ (Mathaio 5:3) Fa Jesu a ne a bodiwa jaana: “Ana o buelang nabo ka ditshwantsho?” o ne a araba jaana: “Lona lo neilwe go itse masaitsiweng a bogosi jwa legodimo; mme bone ga ba a go newa.” Go ne ga bolelelwa pele gore o ne a tla ‘tumolola molomo wa gagwe ka ditshwantsho a bo a anamisa dilo tse di sa leng di lojwa.’ (Mathaio 13:10, 11, 35) Ka jalo Jesu o ne a bua a dirisa ditshwantsho gore a farologanye motho yo o sa reetseng ka kelotlhoko e le yo o batlang go utlwa fela a mo farologanya le yo o botsang ka bopeloephepa. Barutwa ba ga Jesu ba ne ba nna peloephepa mo lekgetlhong lengwe fa ba ne ba tsamaya le ene go tsena mo ntlong nngwe mme ba bolela jaana: “Re phuthololele setshwantsho sa mohoka mo tshimong.”—Mathaio 13:36.

Ga go na pelaelo gore re tlhoka go thusiwa fa re batla go tlhaloganya Baebele. Moruti mongwe e bong Hal Llewellyn, yo e leng mokwaledi wa United Church wa thutobomodimo, tumelo, le go kopanngwa ga dikereke, o ne a bolela jaana: “Ke selo sa botlhokwa thata go phepafatsa se Baebele e se bolelang ka rona le kafa e balwang ka teng le tsela e e tlhalosiwang ka yone.” Mme lefa e sa lemogiwe ke batho botlhe, ntlha ke gore re ka se tlhaloganye Baebele ka borona fela. Re tlhoka thuso.

Ke Thuso Efe E E Leng Teng?

Mo Baebeleng go na le dipolelo tse di akabatsang, dipotso tse di gakgamatsang, le dipolelo tse di botlhokwa tse di tlhokang go rarabololwa. Di ka nna tsa bo di ne tsa se ka tsa tlhalosiwa ka boomo, gore go tle go nne le papiso e e mosola e e neng e sa direlwa gore e tlhaloganngwe ka nako ya fa di ne di kwalwa. Mme lefa go ntse jalo di ne di akaretsa maikaelelo a ga Jehofa. Ka sekai, Tshenolo 13:18 e bolela gore “palo ya sebatana” ke ‘makgolo a marataro le masome a marataro thataro.’ Lefa temana eno e bolela gore “botlhale ke jo,” ga e tlhalose gore palo eo e bolelang. Lefa go ntse jalo, Jehofa o ne a letla gore batlhanka ba gagwe ba ba ikanyegang ba tlhaloganye se e se bolelang gompieno, a dirisa phuthego ya gagwe. (Bona lebokoso le le reng, “Mosele O O Re Thusang go Tlhaloganya Baebele.”) Le wena o ka kgona go tlhaloganya seno fa o thusiwa ke batho ba ba itseng go “bua lefoko la boammaaruri ka tshiamo.”—2 Timotheo 2:2, 15, 23-25; 4:2-5; Diane 2:1-5.

Ka dinako tse dingwe Jesu o ne a dirisa ditshwantsho go bontsha go amogela molaetsa wa Bogosi kana go o gana. O ne a supa gore ba bangwe ba ne ba ka se ka ba tswelela pele ka ntlha ya go kgobega marapo fa ba ganediwa ke ditsala le ba losika. Ba bangwe ba ne ba tla letla “patiko kgotsa pogiso” gore e senye tsela ya bone ya go anaanela molaetsa wa Bogosi. Lefa go ntse jalo ba bangwe ba ne ba tla letla dikgang tsa botshelo jwa letsatsi le letsatsi, “go bapalwa ke lefatshe le tsietso ya mahumo,” gore di hupetse lorato lo ba ka tswang ba na le lone lwa mafoko a a molemo. Mo letlhakoreng le lengwe, go na le batho ba ba reetsang ka boitumelo le ba ba eletsang go utlwa lefoko le le tlhwatlhwakgolo le go le tlhaloganya. Ke ba ba “fegelwang, le ba ba sonelelwang dilo tsotlhe tse di makgapha tse di dirwang” mo go Labokeresete, go twe di dirwa mo leineng la ga Jesu Keresete. Batho ba ba ntseng jalo ba rata go rutwa tsela ya ga Jehofa mme ka gone ba tlhaloganye se ba se balang mo Baebeleng.—Mathaio 13:3-9, 18-23; Esekiele 9:4; Isaia 2:2-4.

Fa e le bao ba batlang go itse ka maikaelelo a ga Jehofa motho ka namana, Jehofa o ka tlhokomela gore ba neelwa thuso e e tlhokegang. Fa re tshwantsha fela, Baebele e bega gore moya wa ga Jehofa o ne wa kaela Filipo wa moefangele gore a thuse monna wa Moethiopia yo o neng a bala buka ya Baebele ya ga Isaia fa a le mo loetong lwa gagwe go ya Jerusalema. Fa a boela gae, o ne a e bala a le mo kareng ya gagwe. Filipo ka go utlwa kaelo ya moya o o boitshepo wa ga Jehofa, o ne a tabogela kara eno mme a botsa jaana: “A o tlhaloganya se o se balang?” Monna yono o ne a ikokobeditse thata e bile a ikanyega mo a neng a ka dumela gore tota o tlhoka thuso. Filipo o ne a ruta motho yono ka boitumelo yo o neng a nyorilwe semoyeng e bile a rata go ithuta. Go mo ruta go ne ga mo thusa gore a tlhaloganye Dikwalo. O ne a ithuta se jaanong a neng a tshwanetse go se dira gore a ipelele go nna le botsalano jo bo amogelwang ke Jehofa gore a tle a bone botshelo jo bo sa khutleng. O ne a nna motlhanka wa ga Jehofa yo o itumetseng le yo o kolobeditsweng, yo o neng a tshela botshelo jo bo neng bo itumedisa Modimo.—Ditiro 8:26-39.

O ka nna wa bo o na le Baebele mo legaeng la gago, le gone o ka tswa o e badile ka makgetlho a le mantsi. Gongwe o ka tswa o nnile le bothata jo bo tshwanang le jo Moethiopia yo o peloephepa le yo o boikokobetso a neng a na le jone. O ne a sa tlhaloganye se a neng a se bala. O ne a tlhoka go thusiwa mme o ne a se ka a okaoka go amogela thuso e Jehofa Modimo a neng a itumelela go mo e naya. Fela jaaka Filipo, Basupi ba ga Jehofa ba itumelela go go thusa go tlhaloganya dilo kaga Modimo tse di kwadilweng mo Lefokong la gagwe, e leng Baebele. Ba a itse gore Jehofa o re neetse Baebele mme o ne a raya gore e ne e tshwanetse gore batho ba e tlhaloganye.—1 Bakorinthe 2:10; Baefeso 3:18; 2 Petere 3:16.

Ke Ka Ntlha Yang Fa Baebele E Le Botlhokwa?

Re tshela mo nakong e e potlakileng thata ya hisitori ya motho. Baebele e e bitsa gore ke “bokhutlo jwa tsamaiso eno ya dilo.” (Mathaio 24:3, NW) Ditiragalo di le dintsi tse di diragalang e le go diragatsa boperofeti jwa Baebele fa e sa le ka ngwaga wa 1914 di bontsha gore go ise go ye kae jaanong, Bogosi jwa Modimo jwa selegodimo bo tla ‘thubaganya bo nyeletsa magosi otlhe a mangwe.’—Daniele 2:44.

A o ko o ipalele se se neng sa bolelelwa pele mo Baebeleng mo go Mathaio kgaolo 24, Mareko kgaolo 13, le Luke kgaolo 21. O tla lemoga gore ditiragalo tse di tlhalositsweng di ama lefatshe lotlhe. Di akaretsa dintwa tsa lefatshe—tse di farologaneng le dintwa tse dingwe tsotlhe. Fa e sa le ka Ntwa ya Lefatshe I, re ile ra bona go tlhaela ga dijo, dithoromo tsa lefatshe, le motlha wa tlolomolao e e sa tlwaelegang tse di neng tsa bolelelwa pele. Mme jaanong jaana go lebega ditšhaba di tla tloga di bolela sengwe se se tla supang kwantle ga pelaelo gore tshenyego ya lefatshe e gaufi. Moaposetoloi Paulo o ne a kwala jaana malebana le seno: “Letsatsi la Morena le tlaa tla fela jaaka legodu bosigo. E tle e re ba ntse ba re: ‘Kagiso le thagamo,’ foo tshenyego ya tshoganetso e ba wele, . . . mme ga ba ketla ba falola gope.” (1 Bathesalonika 5:2, 3) Ke bomang ba ba ka sekang ba falola? Paulo o tlhalosa jaana: “Ba ba sa itseng Modimo, le . . . ba ba sa ineeleng go utlwa Mafoko a a Molemo a Morena wa rona Jesu.” (2 Bathesalonika 1:7-9) Karolo ya sesupo se se dikarolo dintsi e ne e tshwanetse gore e diragadiwe ke batho ba ba ikobelang taolo e e neetsweng mo go Mathaio 24:14 ya go rera “Mafoko a a Molemo a, a bogosi, . . . mo lefatsheng lotlhe.”

Dimilionemilione tsa Basupi ba ga Jehofa di diragatsa taolo eno mo dinageng le mo ditlhaketlhakeng tsa lewatle di le 231. Ba etela magae a batho ba bo ba ba kopa ka namana gore ba ithute kaga puso ya Bogosi jwa ga Jehofa. Ba bontsha ka bopelonomi tsela e mongwe le mongwe a tshwanetseng go itshwara ka yone gore a tle a nne mongwe wa bafalodi ba tsamaiso eno ya dilo le gore a tshele mo lefatsheng la paradaise koo go tla bong go se na bohutsana, go fegelwa, botlhoko, kana loso.—Tshenolo 21:3, 4.

Nako ya gore lefatshe leno le le boikepo le ye bokhutlong e ntse e fela ka bonako tota, mme go botlhokwa thata gore botlhe ba ba batlang go falola bokhutlo jono jwa lefatshe ba ithute se se tlhokegang gore motho a ‘ikobele mafoko a a molemo’ mme ka gone a falole tshenyego. Mo nakong e e tlang fa Basupi ba ga Jehofa ba etela kwa legaeng la gago, ke ka ntlha yang o sa amogele taletso eno ya go ithuta Baebele mo bekeng nngwe le nngwe? Se se botoka le go gaisa, ke ka ntlha yang o sa ba kope gore ba ithute Baebele le wena ka gonne o batla go e tlhaloganya?

[Lebokoso mo go tsebe 8]

MOSELE O O RE THUSANG GO TLHALOGANYA BAEBELE

JESU o ne a re tlhomamisetsa gore fa a se na go swa a bo a tsoga, o ne a tla tlhoma “motlhanka yo o boikanngo le yo o botlhale” yo o neng a tla direla jaaka mosele wa gagwe wa puisano. (Mathaio 24:45-47) Moaposetoloi Paulo o ne a bolelela Bakeresete ba Efeso gore mosele ono ke ofe fa a ne a kwala gore “e le gore, jaanong botlhaletlhale jo bontsi jwa Modimo bo tle bo itsisiwe . . . ka phuthego. Ke ka fa boikaelelong jwa metlha e e se nang tshimologo, jo o bo ikaeletseng mo go Keresete Jesu Morena wa rona.” (Baefeso 3:10, 11) Phuthego ya Bakeresete ba ba tloditsweng, e e neng ya tsholwa ka Pentekosete ya 33 C.E., ke yone e e neng e neetswe “dilo tse di senotsweng.” (Duteronome 29:29) Bakeresete ba ba tloditsweng ba direla jaaka setlhopha sa motlhanka yo o boikanngo le yo o botlhale. (Luke 12:42-44) Kabelo ya bone e e tlhomilweng e e tswang kwa Modimong ke go dira gore batho ba tlhaloganye dilo tsa semoya tsa “dilo tse di senotsweng.”

Fela jaaka boperofeti jwa Baebele bo ne jwa supa go sa le pele go tla ga ga Mesia, gape bo re kaela gore re ye go setlhopha se se momaganeng sa Basupi ba Bakeresete ba ba tloditsweng ba jaanong ba direlang jaaka motlhanka yo o boikanngo le yo o botlhale.a Se re thusa go tlhaloganya Lefoko la Modimo. Batho botlhe ba ba batlang go tlhaloganya Baebele ba tshwanetse go lemoga gore “botlhaletlhale jo bontsi jwa Modimo” bo ka itsiwe fela ka go dirisa mosele wa ga Jehofa wa puisano, e leng motlhanka yo o boikanngo le yo o botlhale.—Johane 6:68.

[Ntlha e e kwa tlase]