Pego Ya Baboledi Ba Bogosi

Batho ba Modimo ba Italetsa ka Pelo e e Thamileng

LEINA la gagwe e ne e le Josefe, mme o ne a tsaletswe kwa setlhaketlhakeng sa Kupero. E ne e le mongwe wa Bakeresete ba lekgolo la ntlha la dingwaga ba ba neng ba rekisa masimo le matlo a bone gore ba ntshe meneelo ya madi go thusa Bokeresete gore bo tswelele pele. O ne a bidiwa Barenabase, e leng leina le le kayang “Morwa Kgomotso” ka ntlha ya bopelontle jwa gagwe le bopelotshweu.—Ditiro 4:34-37.

Baobamedi ba ga Jehofa ba boammaaruri ga ba a bolo go itsege ka go kgatlhegela ba bangwe thata jalo go tswa mo pelong. Basupi ba ga Jehofa ba ntse fela jalo gompieno, jaaka go bontshitswe ke boitemogelo jo bo latelang go tswa kwa Solomon Islands.

Setlhopha sa Basupi ba feta 60 ba tswa kwa Australia le kwa New Zealand ba ne ba tsaya mosepele ba ya kwa Honiara, motsemogolo wa Solomon Islands kwa Guadalcanal. Ba ne ba tlile go thusa go aga Holo ya Dikopano ya dikokoano tse dikgolo tsa Bokeresete. Go ne ga ba tsaya dibeke di ka nna pedi fela gore ba age holo e go kgonang go nna batho ba ka nna 1 200 mo go yone!

Mo e ka nnang ka yone nako eo, balaodi ba torotswana ya Munda, mo setlhaketlhakeng sa New Georgia, ba ne ba fa Basupi ba ga Jehofa setsha mo gare fela ga toropo. Ba ne ba batla go aga Holo ya Bogosi, lefelo la kobamelo. Mme ba ne ba e tlhoka tota. Ba ne ba ntse ba kopanela mo phaposing ya bonno ya ntlo e nnye ya matlhare, mme ba ne ba sena madi a go aga Holo ya Bogosi.a Bontsi jwa maloko a phuthego eno e ne e le batsofe le batho ba ba bokoa le bana, mme go ne go sena ope yo o nang le kitso ka go aga.

Mo e ka nnang sekgala sa dikilometara di le 380 go tloga foo, mo setlhaketlhakeng sa Guadalcanal, Basupi ba motse wa Honiara ba ne ba italetsa ka pelo e e thamileng. (Pesalema 110:3) Ba ne ba akanya jaana: “Fa e le gore bakaulengwe ba rona kwa dinageng tse dingwe ba ne ba iketleeditse go re agela Holo ya Dikopano mo dibekeng tse pedi, he ruri re ka thusa bakaulengwe ba rona kwa Munda mme ra ba agela Holo ya Bogosi mo dibekeng tse pedi.”

Go ne ga direga fela jalo. Letsatsi lengwe kwa Munda go ne ga goroga mokoro o tletse Basupi ba baithaopi ba ba itumetseng e bile ba tlhagafetse. Banna le basadi, bagolo le basha, botlhe ba ne ba tshwarega ka go pagolola dithoto tsa bone ba bo ba ipaakanyetsa go simolola go aga ka dikgong, semente, disenke tse di rulelang, le dilwana tse dingwe tse di neng di gorogile pele ga bone kwa Munda.

Fela fa tiro e sena go simologa, metsi a toropo a ne a kgala ka ntlha ya pula ya matlakadibe. Lefa go ntse jalo, jono ga e a ka ya nna bothata jo bo ka se kang jwa rarabololwa. Basupi ba ne ba epa sediba se se neng sa ba fa metsi a ba neng ba a tlhoka go dira tiro yotlhe ya go aga. Jaanong dijo tsa badiri botlhe tsone? Seo le sone e ne e se bothata. Baithaopi ba ba tswang kwa Honiara ba ne ba rometswe koo ba filwe dijo tse di lekaneng ke diphuthego tsa Honiara. Ba ne ba bile ba itletse baapei!

Baagisani ba ne ba lebelela tiro eno e tswelela pele ba sa dumele matlho a bone. Mongwe wa bone o ne a re: “Gantsi dikago tse dikgolo ga di fediwe ka malatsi fela kwano. Di tsaya dingwaga.” Moagisani yo mongwe, moeteledipele wa bodumedi, o ne a bolela gore kereke ya gagwe e ntse e agiwa dingwaga tse 20 tse di fetileng le gore e ntse ga e ise e fele. Go fapaana le seo, Holo ya Bogosi e ntšha ya Basupi ba ga Jehofa ya kwa Munda e ne ya wediwa ka malatsi a le lesome fela!

[Ntlha e e kwa tlase]

[Dimmapa mo go tsebe 24]

(For fully formatted text, see publication)

South Pacific Ocean

SOLOMON ISLANDS

Munda

GUADALCANAL

Honiara

[Mmapa]

AUSTRALIA

NEW ZEALAND