Batho ba ba Bonang Boammaaruri ba Tla Itumela
MONNA mongwe wa kwa Finland o ne a fitlhela buka ya The Divine Plan of the Ages mo phaposing e e kwa godimo ya ntlo ya gagwe. O ne a simolola go e bala gone fela foo, mme go ise go ye kae o ne a ipolelela a re, ‘Jo ke jone boammaaruri; jo ke jone boammaaruri.’ Fa a tswa kwa phaposing eo e e kwa godimo, o ne a bolelela mosadi wa gagwe jaana, “Ke bone bodumedi jwa boammaaruri.”
Boitemogelo jono jwa kafa monna yono a boneng boammaaruri ka gone ga bo a tlwaelega, mme Basupi ba ga Jehofa ba le bantsi le bone ba ka tlhalosa gore ba ile ba itshwara jalo. Botlhe ba ka go bolelela kafa go bona boammaaruri go itumedisang ka teng. Maitemogelo a a latelang a gatelela seno.
Dithuto Tsa Boammaaruri Tsa Baebele di Lere Boitumelo
Margarita Königer o goletse kwa Munich, kwa Jeremane, ka Ntwa ya Lefatshe II. Go ne go tlwaelegile go bona matlo a thuntshitswe ka dibomo e bile a tuka molelo. Kgaitsadie o ne a swela mo ntweng. Fa a le kwa tirelong ya kereke ya Katoliki, o ne a utlwa go rapelelwa masole a Jeremane le moeteledipele, Hitler. Morago ga ntwa, o ne a amogela basari ya gore a ye kholetšheng kwa United States a le mongwe wa baithuti ba dinaga tse di neng di fapaantse baithuti ba tsone gore ba ithute kwa dinageng tse dingwe. O ne a fitlhela gore batho ba ne ba le botsalano mo go ene, ka jalo o ne a ipotsa gore ke eng se go neng go lebega se tlhotlheletsa batho, ba ka tlholego ba neng ba eletsa go tshela ka kagiso, gore ba se ka ba tshephana mme ba ilane ka nako ya ntwa. Morago kwa Munich, o ne a kopana le Basupi ba ga Jehofa, mme ka go ithuta Baebele le bone, o ne a bona dikarabo tsa dipotso tsa gagwe. O bolela jaana: “Ke ne ka bontshiwa go tswa mo Baebeleng gore maatla a a boikepo a semoya a na le seabe . . . Baebele e a bitsa ‘babusi ba lefatshe,’ gape, tota, e bolela gore Satane ke ‘motsietsi wa lefatshe lotlhe.’ . . . Fa o leba ditiro tse di boikepo, tsa bodiabolo tse di dirwang ke ditšhaba le merafe, a bo karabo eno e utlwala e bile e kgotsofatsa jang ne!”—Baefeso 6:12; Tshenolo 12:9.
Margarita o tswelela pele jaana: “Go ne ga intumedisa thata go ithuta ka dilo tse Modimo a di baakantseng gore a rarabolole mathata a lefatshe. Nnyaa, ga a ne a dirisa dikakanyo dipe tsa batho kana taolo ya bone, jaaka barutisi ba lefatshe ba akantsha. Go na le moo, Baebele e bontsha gore puso e ntšha ya selegodimo e tla laola ditiragalo tsa mo lefatsheng. . . . Jesu Keresete o ne a ruta balatedi ba gagwe gore ba rapele ba re: ‘Bogosi jwa gago a bo tle.’ . . . Ke ne ka simolola go bona gore bogosi jono ke puso ya mmatota le gore ke jone fela bo tla kgonang go tlisa kagiso ya mmatota ya lefatshe lotlhe.” Margarita o diretse jaaka morongwa kwa dinageng di ka nna tlhano tsa Afrika ka dingwaga tse di batlileng di tshwara 30—mme dingwaga tse 19 tse di fetileng o ne a di senya a bolela boammaaruri jwa bogosi mo bathong ba ba ikokobeditseng ba kwa Ouagadougou, Burkina Faso.
Margarita ga se ene fela a nnileng le boitemogelo joo. Batho ba le bantsi ba ile ba tsaya kgato ka bonako fela jalo fa ba lemoga gore baruti ba Labokeresete mo matlhakoreng oomabedi a a lwang ba rapela Modimo gore ba fenye. Batho ba ba dipelo di ikanyegang ba bona tlhaloso ya Baebele e utlwala ya gore Modimo ga o amane ka gope le dintwa tsa motho mme di nna teng ka ntlha ya go bo “lefatshe lotlhe le namaletse fa tlase ga yo o bosula.” Batho bano ba ba batlang boammaaruri ba ithuta gore Bakeresete ba boammaaruri ba tshwanetse gore ‘ba se nne ba lefatshe’ mme ba tshwanetse go nna ba sa tseye letlhakore mo dikgannyeng tsa lone. Batho bano ba ba sa tswang go kgatlhega fa ba lemoga gore Basupi ba ga Jehofa ba ile ba itshwara jalo, ba simolola go tlhomamisa gore ba bone boammaaruri. Batho bano ba nna le tsholofelo le boitumelo jo bo oketsegileng fa ba ntse ba nna le kitso e e oketsegileng malebana le lebaka la go bo Modimo o letleletse boikepo le kafa a tla tlisang maemo a kagiso le tshiamo ka teng mo lefatsheng mo bogautshwaneng a dirisa Bogosi jwa gagwe.—1 Johane 5:19; Johane 17:16; Mathaio 6:9, 10.
Melaometheo ya Boammaaruri ya Baebele e Lere Boitumelo
Daniel Rosero wa kwa Ecuador o ne a akanya gore botshelo ga bo na bokao, ka jalo o ne a simolola go nwa bojalwa. Kereke e a neng a e tsena e ne ya mo ruta gore selo se le sengwe fela se a neng a ka se solofela e ne e le go swa le go fisiwa ka molelo wa dihele. O ne a araba jaana, “Gakere ke tlile go fisiwa, mma ke nwe!” O ne a na le lelapa la batho ba le robedi ba a neng a sa ba tlamele, e bile o ne a lwetse ruri le mosadi wa gagwe, Delia. Phetogo e kgolo e diragetse ka Sontaga mongwe mo mosong fa ba ne ba etelwa ke Basupi ba ga Jehofa ba bo ba simolola go ithuta Baebele. Daniel o ne a lemoga gore o bone boammaaruri ka lekgetlho la ntlha fela fa a ne a ile kwa kopanong ya potologo ya Basupi ba ga Jehofa. O bolela jaana: “Tsela e dilo di neng di rulagane ka yone e ne ya njesa kgakge. Batho ba ne ba kgona go dirisana sentle mmogo, ba le bantsi. O ne o kgona go utlwa lorato mo boidiiding jwa batho. Go ne go sena ope yo o gogang motsoko. Go sena puo e e leswe. . . . Ke gakologelwa ke akanya jaana, ‘Jo ke jone boammaaruri!’ Ga ke a ka ka tlhotlhelediwa ke go tshaba loso kana go tshaba bokhutlo jwa lefatshe. Ke tlhotlheleditswe ke bophepa jwa phuthego.”
Lelapa lotlhe la ga Rosero le ne la fetoga Basupi ba ga Jehofa. Fa ba ntse ba dirisa melaometheo ya Baebele botshelo jwa bone jwa lelapa le boemo jwa bone jwa ikonomi bo ne jwa tokafala. Delia Rosero a re: “Tota dilo tse tsotlhe di ntiragaletse ka ntlha ya boammaaruri jwa Baebele. Ke mang yo o itseng gore bongwanake ba ka bo ba le kae fa e ne e se ka Lefoko la Modimo? Ba kolobeditswe botlhe ka bosupa jwa bone e bile ba ritibetse. Boammaaruri bo ntliseditse botshelo jo bosha gotlhelele, boitumelo jo bosha.”
Lelapa la ga Rosero ga se lone fela le diragaletsweng ke seo. Batho ba le bantsi mo motlheng wa rona ba tshwenngwa ke mathata. Lebaka le lengwe ke gore ka kakaretso melao ya boitsholo e e mo Baebeleng ga e tlhole e tlotlwa, jaaka e ne e tlotlwa ke dikokomane tsa bogologolo. Madumedi a le mantsi a ile a dira kafa tlwaelong eno, fa gongwe ba re ke gone jaaka ba tlodisa dilo tse dingwe matlho kana ba akanya gore maitsholo a bogologolo a mantle a siilwe ke nako ka gore dinako di a fetoga. Ka jalo, fela jaaka ba bangwe, boorra Rosero ba ne ba tlogelwa ba pholetha ba sa kaelwe ke Baebele. Lefa go ntse jalo, fa batho ba ba ikokobeditseng jalo ba simolola go bona kafa Modimo o lebang maitsholo le botshelo jwa lelapa ka gone, kwantle ga go diega ba dirisa se ba se ithutang. Fa re bala maitemogelo a bone re kgona go bona kafa go dira jalo go nang le diphelelo tse di molemo ka teng.
Boitumelo bo Tshwanetse go Tlhagolelwa
Lefa go ntse jalo, seno ga se kaye gore Mokeresete o nna a le mo boitumelong ka dinako tsotlhe. Go phepafetse gore mathata a batho ka kakaretso ba lebanang le one, a a jaaka go tlhoka ditiro, bolwetsi le loso, a ama le Bakeresete. Bakeresete gape ba tshwanetse go nna ba lwantsha go sa itekanela ga bone le makoa a bone. Pego ya Baebele e bolela gore Lote o ne “a le mo pitlaganong e e botlhoko ka go tshela ga baikepi . . . mo bopepeng” kwa motseng wa Sotoma. Bakeresete ba ba ikanyegang le bone ba ka se ka ba tila go nna le maikutlo a a ntseng jalo fa ba bona maemo a a boikepo a tswelela pele.—2 Petere 2:7, 8.
Lefa go ntse jalo, batho ba ba boneng boammaaruri ba thusegile. Ka sekai, motho yo o dumelang fa a lelela mongwe yo o tlhokafetseng ga a tlhoke gore a “hutsafale, jaaka ba bangwe ba ba se nang tsholofelo.” Ga a ketla a hutsafala go feta selekanyo. Go ntse jalo le ka mathata a mangwe. Motho yo o boneng boammaaruri o itse gore mathata a gone jaanong ke a nakwana fela. Tsholofelo e dira gore go nne motlhofo go itshoka fa go na le mathata. Go tshela ka tsela e e lekalekaneng le gone go a thusa.—1 Bathesalonika 4:13.
Paulo o ne a kgothatsa Bakeresete jaana: “Itumeleng mo Moreneng ka metlha yotlhe; ke tlaa ba ke re: Itumeleng.” (Bafilipi 4:4) Seno se bontsha gore lefa mongwe le mongwe wa rona a ka bona boitumelo, gape go ka kgonega gore motho a se ka a nna le jone. Go tlhobaela ka dilo tsa tsamaiso eno e kgologolo ya dilo go ka nna sekgoreletsi. Mo godimo ga moo, Baebele e re bolelela gore re tlhoka go tlhagolela boitumelo, lengwe la maungo a moya wa Modimo. (Bagalatia 5:22) Fa o tswelela pele o bapala kitso ya boammaaruri e bile o ikgakolola ka dikhumo tsa semoya tse e di lerileng e bile e santse e tla di lere, boitumelo jwa gago ga bo ne bo fela. Bo tla nonofa fa re ntse re atamela nako e ka yone Modimo o tla ‘phimolang dikeledi tsotlhe’ mo matlhong a batho ba Modimo e bile e le ka nako e go se ketlang go tlhola go le “bohutsana, le fa e le selelo, le fa e le botlhoko.”—Tshenolo 21:4.
[Ditshwantsho mo go tsebe 8]
Batho ba le bantsi ba kgatlhiwa ke boitumelo le thulaganyo e e molemo kwa dikopanong tsa Basupi ba ga Jehofa