Basupi ba ga Jehofa go Dikologa Lefatshe—Sweden
SWEDEN e kafa ntlheng ya botlhaba jwa ditlhaketlhake tsa Scandinavia mme e akaretsa karolo e kgolo ya Arctic Circle. Sweden ke lefelo le le itsegeng thata mo lefatsheng lotlhe ka dikgwa tsa lone tse dintle tse di goletseng kwa godimo tse di talafetseng ruri mmogo le matšha a lone le dithaba tsa lone, mme ke nngwe ya dinaga tse di senang batho ba bantsi thata kwa Yuropa. Lefa go ntse jalo, Basupi ba ga Jehofa ba ile ba atlega go bona batho ba ba ratang boammaaruri fa e sa le ka dingwaga tsa moragonyana tsa bo1800. Akanya ka sekai sengwe sa bosheng.
Mosadi mongwe o ne a ithuta Baebele le Basupi, mme monna wa gagwe o ne a sa rate seno. Monna yono o ne a raya mosadi wa gagwe a re a tlogele go ithuta, mme o ne a tlogela. O ne a dira kwa bobolokelong jwa dilwana tsa bobedisetso. Ka letsatsi lengwe mokgweetsi wa teraka o ne a tla kwa bobolokelong le setlogolo sa gagwe sa dingwaga di le lesome. Rremogolo o ne a kopa monna yono gore a mo tlhokomelele mosimane fa ene a ntse a pega dilo mo terakeng ya gagwe. Monna yono o ne a botsa mosimane gore o amogetse dimpho dife ka letsatsi la matsalo a gagwe, e le fela go simolola motlotlo. Monna yono o ne a gakgamala fa mosimane a ne a mmolelela gore ba lelapa la gaabo ga ba keteke malatsi a botsalo ka gore ke Basupi ba ga Jehofa. Mosimane o bile a mmolelela gore o fiwa dimpho ka dinako tse dingwe tsa ngwaga mme ga go na sepe se a se tlhaelang ka gore o na le lelapa le le amegang le le lorato. O ne a oketsa ka gore ga go na dimpho dipe tse di ka tshwanang le lone.
Mosimane o ne a boa a tla le rremogoloagwe ka makgetlho a le mmalwa. Ka lekgetlho lengwe le lengwe monna yono o ne a botsa mosimane dipotso tse dintsi, mme o ne a kgatlhwa thata ke tsela e mosimane yono a neng a mo fa dikarabo tse di opang kgomo lonaka ka yone, dikarabo tse di boammaaruri tse di tlhamaletseng mme e bile a sa etsaetsege. Gape o ne a kgatlhwa ke tsela e mosimane yono a neng a anaanela dilo tse di nang le mosola tota ka teng. Bosigo bongwe fa monna yono a sena go lebelela thulaganyo ya thelebishene e e neng e supa maemo a a utlwisang botlhoko a lefatshe, o ne a lemoga gore o tshwanetse gore a tlhatlhobe dilo tsa semoya thata. O ne a founela Mosupi yo o neng a ithuta le mosadi wa gagwe mme a mo kopa gore a boe. Go ise go ye kae monna yono le ene o ne a ithuta Baebele le Mosupi mongwe mme o ne a gatela pele ka bonako. O ne a kolobediwa ka April 10, 1994. Mosadi wa gagwe le ene o setse a kolobeditswe jaanong.
Koketsego e Dira Gore go Tlhokege Gore go Agiwe
Sweden ke legae la batshabi ba le bantsi ba ba tswang kwa dinageng di sele, mme Basupi ba kwa Sweden ba ile ba nna le matswela a a molemo mo tirong ya go rera. Ka kakaretso fela tiro eno e ile ya atlega thata mo e leng gore go ne ga tlhokega Diholo tsa Bogosi tse disha ka ntlha ya koketsego e e nnileng teng. Go tloga ka 1986 go ya go 1993, go ne ga agiwa Diholo tsa Bogosi di le 37 ka mokgwa wa go aga ka bonako, fa ka nako e e tshwanang go ne ga okediwa le go ntšhafatsa diholo di le 8. Ka 1994 fela, go ne ga agiwa Diholo tsa Bogosi tse di oketsegileng di le supa, mme ga tsosolosiwa di le tharo.
Gone jaanong, go na le diphuthego di le 65 tse di letileng gore di tle go thusiwa go aga Holo e ntšha ya Bogosi kana gore di thusiwe go oketsa kana go ntšhafatsa e di nang le yone gone jaanong. Baithaopi ba ba ka nnang 2 500 ba thusa mo ditirong tse di ntseng jalo tsa go aga, mme diphuthego di anaanela thuso ya bone e e lorato thata.
Ka dinako tse dingwe karolo e e kwa ntlheng ya bokone ya Sweden, e e elang ka kwa ga Arctic Circle, e bidiwa naga ya letsatsi la bosigogare. Go ntse jalo ka gore ka karolo e nngwe ya selemo letsatsi ga le ke le phirima koo. Lefa go ntse jalo, go ralala Sweden yotlhe, lesedi la boammaaruri le lone le ntse le tswelela le phatsima thata. Ka tshegofatso ya ga Jehofa, lesedi leo la semoya le ka motlha ga le ka ke la nna letobo, go na le moo le tla nna le phatsimela pele.
[Lebokoso mo go tsebe 8]
PEGO YA NAGA
Ngwaga wa Tirelo wa 1994
TLHORA YA PALO YA BA BA NEELANG BOSUPI: 24 246
KABALANO: Mosupi a le 1 mo bathong ba le 362
PALO YA BA BA NENG BA LE TENG KWA SEGOPOTSONG: 40 372
PALOGARE YA BABOLEDI BA E LENG BABULATSELA: 2 509
PALOGARE YA DITHUTO TSA BAEBELE: 11 306
PALO YA BA BA KOLOBEDITSWENG: 850
PALO YA DIPHUTHEGO: 358
OFISI YA LEKALA: ARBOGA
[Setshwantsho mo go tsebe 9]
Ofisi ya lekala le Legae la Bethele kwa Arboga
[Setshwantsho mo go tsebe 9]
Basupi ba pele ba kwa Hjo ba ne ba dirisa besenyana eno go dira tshimo ya bogolo jwa disekwere kilometara di le 5 000