Go Gololwa ga Bana ba ba Duleng Ditlhabelo

JONO ke bokebekwa bongwe jo bo makgapha tota jo bo kileng jwa dirwa ke motho—jwa ngwaokobamelo ya go ntsha bana ditlhabelo. Batho bangwe ga ba dumele gore mokgwa o o ntseng jalo o o bosula o ne o ka diragala. Mme tlwaelo eno ya kobamelo ya Bafinekia e tlhomamisitswe ka dilo di le dintsi tse di ribolotsweng tsa boithutamarope.

Bana ba malapa a a tlotlegang thata ba ne ba latlhelwa mo molelong e le go ntshetsa medimo e e jaaka Tanit le Baal-Hammon ditlhabelo. Kwa Carthage batswasetlhabelo ba babotlana ba ne ba fisiwa e le go ntshetsa sefikantswe se se neng se dirilwe ka boronse sa ga Kronos setlhabelo. Diodorus Siculus, raditiragalo mongwe wa mo lekgolong la ntlha la dingwaga B.C.E., o bolela gore ba masika ba ngwana yoo ba ne ba sa letlelelwe go lela. Gongwe go ne go dumelwa gore go lela selelo sa tlalelo go ne go tla fokotsa botlhokwa jwa setlhabelo seo.

Ngwaokobamelo e e tshwanang le eo e ne ya dirwa ka lobakanyana gaufi le kwa Jerusalema kwa Tofethe wa bogologolo. Baobamedi ba ne ba bina e bile ba leletsa meropana kwa godimo gore selelo sa ngwana se se ka sa utlwala fa a latlhelwa mo boikepisong jwa molelo jwa ga Moleke.—Jeremia 7:31.

Jehofa o galefela thata batho ba ba setlhogo ba ba sa batleng go amega ka botlhoko jo batho ba bangwe ba bo utlwang. (Bapisa Diane 21:13.) Eleruri Jehofa o tla akaretsa bana bao ba ba duleng ditlhabelo mo “tsogo[ng] ya basiami le ya basiamolodi,” e re ka a le Modimo o o bontshang kutlwelobotlhoko mo baneng.—Ditiro 24:15; Ekesodo 22:22-24.