A o A Gakologelwa?

A o ile wa ipelela go bala ditokololo tsa bosheng tsa Tora ya Tebelo? Fa e le gore go ntse jalo, o tla itumelela go ikgopotsa tse di latelang:

▫ A boammaaruri jwa bodumedi bo ka bonwa?

Jesu Keresete o ne a re: “Lo tlaa itse boammaaruri, mme boammaaruri bo tlaa lo golola.” (Johane 8:32) Jesu ga a ka a bolela fela gore boammaaruri bo ka bonwa mme gape o ne a bontsha gore go bo bona go botlhokwa mo kobamelong ya rona go Modimo. O ne a raya mosadi mongwe wa Mosamaria a re: ‘Baobamedi ba boammaaruri ba tla obamela Rara ka Moya le ka boammaaruri.’ (Johane 4:23)—4/15, tsebe 5.

▫ Robert Estienne e ne e le mang, mme o ne a dira eng gore a sale a gopolwa ka sone?

Robert Estienne e ne e le mogatisi yo o neng a tshela mo lekgolong la bo16 la dingwaga. O ne a dirisa botshelo jwa gagwe jotlhe a gatisa Dikwalo tse di Boitshepo mme a gagamala ka tlhoafalo gore a ribolole mafoko a Baebele jaaka a ne a kwadilwe kwa tshimologong. Thulaganyo ya gagwe ya go kgaoganya Baebele ka ditemana tse di kwadilweng dinomoro ke thulaganyo e e santseng e dirisiwa mo lefatsheng lotlhe gompieno.—4/15, ditsebe 10, 14.

▫ Re solegelwa molemo jang fa re bala Baebele letsatsi le letsatsi?

Dikwalo di nna di ntse di na le sengwe se sesha, mme boperofeti jo bo buang ka metlha ya bofelo bo re kgatlha thata fa re akanya ka dilo tse re di boneng, tse re di utlwileng, le tse di re diragaletseng. Fa re ntse re nna le boitemogelo jo bo oketsegileng mo botshelong mme re kgona go itshokela mathata, re anaanela thata kgakololo ya Baebele. (Diane 4:18)—5/1, tsebe 15.

▫ Ditemana tsa Baebele di ka gakologelwa jang?

Fa o ntse o bala Baebele, tshwaya ditemana tse di rileng tse o batlang go di gakologelwa, kana o di kwale mo dikarateng mme o di beye mo o tla di bonang teng letsatsi le letsatsi. Fa o ntse o leka go tshwara ditemana ka tlhogo, tlhatlhanya ka tsone mme o di dirise. O se ka wa leka go ithuta di le dintsi ka tlhogo ka nako e le nngwe, gongwe o ka nna wa ithuta e le nngwe kana di le pedi beke nngwe le nngwe.—5/1, ditsebe 16, 17.

▫ Efangele ya ga Luke e tshotse tshedimosetso efe e e oketsang se bakwadi ba bangwe ba Efangele ba se kwadileng?

Lefa bontsi jwa se Luke a se kwadileng bo tshwana le se se mo pegong ya ga Mathaio, diperesente di le 59 tsa yone ga di tshwane. Luke o kwadile ka dikgakgamatso di le thataro tse di kwadilweng fela mo bukeng ya gagwe mme o begile ditshwantsho tsa ga Jesu tse di sa umakiwang ke bakwadi ba bangwe ba Efangele go feta palo eo e menagane gabedi.—5/15, tsebe 12.

▫ Ke marang afe a a tlhomologileng a lesedi la boammaaruri a a neng a senolwa ka 1935?

Ka ngwaga oo batho ba ga Jehofa ba ne ba lemoga gore boidiidi jo bogolo jo bo umakilweng mo go Tshenolo 7:9, 14 bo ne bo sa lebise go setlhopha sa bobedi se se yang kwa legodimong, mme bo ne bo lebisa go ba ba nang le tsholofelo ya go tshela mo lefatsheng. (Johane 10:16)—5/15, tsebe 20.

▫ Re ka gomotsa ba ba tlhokafaletsweng jang ka ditsela dife tse di nang le mosola?

Reetsa. Ba kgothatse. Nna teng. Tsaya dikgato o dire sengwe fa go tshwanela. Kwala lekwalo kana o romele karata e e gomotsang. Rapela le bone. (Jakobe 5:16) Tswelela pele o ba thusa.—6/1, ditsebe 13, 14.

▫ Ke eng se bakaulengwe le bokgaitsadi ba semoya ba ka se dirang go thusa ba ba nnang mo malapeng a a kgaoganeng ka bodumedi gore ba itshoke?

Bua mafoko a a kgothatsang, a a siameng, e bile e le a a gomotsang le bone ka metlha. (1 Bathesalonika 5:14) Seno se tla lapolosa mogopolo wa bone le mmele wa bone. Fa go kgonega e bile go tshwanela, ba laletse fa o dira ditiro tsa puso ya Modimo le tsa boitlosobodutu. Ba rapelele. (Baroma 1:9; Baefeso 1:16)—6/1, tsebe 29.

▫ Ke matswela afe a a nnang teng fa o le pelotelele mo bodireding jwa tshimo?

Bopelotelele bo thusa mmoledi wa Bogosi gore a itshoke lefa a tlhokomologiwa kgotsa a ganediwa. Badiredi ba ba pelotelele ba naya dikarabo tse di bonolo ba bo ba tsamaya ka tidimalo go na le gore ba omane le beng ba matlo ba ba bogale, mme ka tsela e e ntseng jalo ba dira gore kagiso le boipelo di nne teng. (Mathaio 10:12, 13) Mo godimo ga moo, ba sekadinku ba tla kgatlhegela molaetsa wa Bogosi.—6/15, tsebe 9.

▫ Ke ka ntlha yang fa go itse Baebele go le tlhwatlhwakgolo jaana?

Go itse boammaaruri go re golola mo maakeng, mo tsietsong, le mo tumelobotlhoding. Fa re tshela go dumalana le boammaaruri, bo re thusa go itshokela mathata le go re tlhotlheletsa gore re nne le tsholofelo e e re thusang go emelana le diteko.—7/1, tsebe 8.

▫ Phuthego ya Bokeresete ya batlodiwa e ne ya tsaya boikarabelo bofe jo bogolo mo Iseraele wa tlholego?

Tshiamelo ya go rera ka bogolo jwa ga Jehofa mo ditšhabeng. (Isaia 43:21; 1 Petere 2:9)—7/1, tsebe 19.

▫ Mafoko a ga moaposetoloi Petere a gore monna o tshwanetse go naya ‘mosadi wa gagwe tlotlo’ a kaya eng? (1 Petere 3:7)

Monna yo o tlotlang mosadi wa gagwe ga a mo ise kwa tlase. Go na le moo, o supa ka mafoko a gagwe le ditiro—mo sephiring le mo bathong—gore o mo tseela kwa godimo. (Diane 31:10-31)—7/15, tsebe 19.

▫ Ke ka ntlha yang fa go ka twe go leleka modiraphoso yo o sa ikwatlhaeng mo phuthegong ya Bokeresete ke go supa lerato?

Go kgaola motho go supa go rata Jehofa le ditsela tsa gagwe. (Pesalema 97:10) Kgato eno e bontsha ba ba mo tseleng e e siameng lerato ka gore e tlosa motho yo o ka ba tlhotlheletsang go dira bosula; gape seno se sireletsa boitsheko jwa phuthego. (1 Bakorinthe 5:1-13)—7/15, tsebe 25.

▫ “Motlhanka yo o boikanngo le yo o botlhale,” yo Jesu a buang ka ene mo go Mathaio 24:45-47, o ka lemogiwa jang gompieno?

Ba lemogiwa segolobogolo ka tiro e ba e dirang ya go rulaganyetsa dikgatiso tse di theilweng mo Baebeleng, mo go ruteng le mo go rereng ‘mafoko a a molemo a bogosi,’ le ka go bo ba ngaparetse Lefoko la Modimo, Baebele thata. (Mathaio 24:14; 28:19, 20)—8/1, tsebe 16.