O se Ka wa Nna o Galefetse Mongwe
GO KA nna ga lebega go le thata go tila go galefa fa mongwe a re utlwisa botlhoko. Baebele e naya kgakololo e e nang le mosola e e ka dirisiwang mo maemong a a ntseng jalo. Moaposetoloi Paulo o ne a kwala jaana, “Lo nne bogale, mme lo se ka lwa leofa; a letsatsi le se lo phirimele lo sa le bogale.”—Baefeso 4:26.
Fa mongwe a re direla phoso, ke ga tlholego fela gore re mo galefele ka selekanyo se se rileng. Lebaka la go bo Paulo a re “lo nne bogale” le raya gore go galefa go ka tswa go siame ka dinako tse dingwe—gongwe e a bo e le tsela e re arabelang ka yone fa re sa tshwarwa sentle kgotsa fa re sa direlwa sengwe ka tshiamo. (Bapisa 2 Bakorinthe 11:29.) Mme fa kgang e tlogelwa e sa rarabololwa, le e leng fa motho a ne a na le mabaka a a utlwalang a go galefa go ka felela ka matlhotlhapelo, a a ka felelang ka sebe se segolo. (Genesise 34:1-31; 49:5-7; Pesalema 106:32, 33) Jaanong, o ka dira eng fa o ikutlwa o tenegile thata?
Mo mabakeng a mantsi a a amanang le diphoso tse di seng masisi, o ka baakanya seemo mo pelong ya gago ka go ‘tuulala’ kgotsa ka go atamela motho yo o go utlwisitseng botlhoko le go buisana ka kgang. (Pesalema 4:4; Mathaio 5:23, 24) Lefa e ka nna ka tsela epe fela, go botoka thata go fedisa kgang ka bonako gore go se ka ga nna le letlhoo mme la felela ka matlhotlhapelo.—Baefeso 4:31.
Jehofa o re itshwarela maleo a rona fela ka go rata, le e leng maleo a re a dirang re sa itse. A le rona ka tsela e e tshwanang re ka se ka ra itshwarela batho ba bangwe fa ba re direla diphoso tse di seng kalo?—Bakolosa 3:13; 1 Petere 4:8.
Se se kgatlhang ke gore lefoko la Segerika le le rayang “go itshwarela” fa le ranolwa ka tlhamalalo le raya go “tlogela.” Go itshwarela ga go reye gore motho o tshwanetse go fokotsa phoso e e dirilweng lefa e le gone go e itlhokomolosa. Ka dinako tse dingwe go ka raya fela go tlogela seemo, ka go lemoga gore go nna o galefetse mongwe go ka go okeletsa mathata fela le go senya kutlwano ya phuthego ya Bokeresete. Mo godimo ga moo, go nna o galefetse mongwe go ka senya botsogo jwa gago!—Pesalema 103:9.