“Madi a Tswa Kae?”

BATHO ba ba boneng bidio ya Mokgatlho wa Watch Tower “Jehovah’s Witnesses—The Organization Behind the Name” ba kgatlhegile tota. Ba bona banna le basadi ba ba siameng ba ba tswang mo ditsong tse di farologaneng le mo maemong a a farologaneng, ba nyenya mme ba dira mmogo ka kutlwano. Ga ba kgatlhiwe fela ke badiri ba ba dikete ba ba itumetseng bao, mme gape ba gapiwa maikutlo ke dikago tse dintsi kwa ntlokgolong ya Mokgatlho kwa Brooklyn le kwa dipolasing tsa bone kwa Wallkill, kwa New York. Bidio eo e supa gore mo teng ga dikago tseo go fitlhelwa tegenologi ya maemo a a kwa godimo—metšhine e e gatisang le go rokelela dikgatiso di le dimilione kgwedi le kgwedi ka lebelo le le kwa godimo, mefuta e mentsi thata e e farologaneng ya dikhomputara, le mafapha a mangwe a mantsi a a tshegetsang go gatisiwa ga dibuka.

Seno se supa tsela e kgolo e madi a dirisiwang ka yone. Ka jalo bangwe ba botsa gore, “Madi a tswa kae?”

Batho ba ba etelang ntlokgolo ya Mokgatlho ba kgatlhega ka tsela e e tshwanang. Ba golola melala ya bone gore ba bone kago ya bonno e e nang le matlhatlaganyane a le 30, e e leng nngwe ya dikago tse dintsi tse go nnang badiredi ba baithaopi ba ba fetang 3 000 ba ba dirang koo mo go tsone. Batho ba le bantsi ba ba etelang Lefelo la Thutelo la Watchtower le le dikilometara di le 110 kwa bokone jwa Brooklyn ba tla ba jele kgakge. Lefa e santse e agiwa, go nna badiri ba le 1 200 mo go yone. Ditlelase tse pedi tsa barongwa di tlile go thapisiwa teng ngwaga le ngwaga ba bo ba romelwa kwa moseja kwa dikabelong tsa bone. Gape kaelo e e yang kwa diphuthegong tse di fetang 10 000 tsa Basupi ba ga Jehofa kwa United States e tswa teng. Makala a mantsi mo lefatsheng lotlhe a sa tswa go oketsa dikago tsa one kgotsa a ntse a di oketsa. Go dirisiwa madi a mantsi go dira dilo tseno tsotlhe. Batho ba botsa gore, “Madi a tswa kae?”

Karabo ke gore a tswa mo bathong fela ba ba tshwanang le mongwe le mongwe wa rona. Ke batho fela, mo lefatsheng lotlhe, ba ba eletsang go dira gotlhe mo ba ka go kgonang go tsweledisa tiro e e botlhokwa ya Bokeresete ya go rera le go ruta. Moya ono wa go dira ka go rata ga o simologe gone jaanong.

Sekao se se Tlhomilweng ke Iseraele wa Bogologolo

Go ne ga tlhokega gore go ntshiwe meneelo ya bopelotshweu dingwaga tse di fetang 3 500 tse di fetileng. Jehofa o ne a laetse Moshe gore a age motlaagana, kgotsa “mogope wa bophuthegelo,” gore o tle o dirisiwe fa A obamelwa. Thulaganyo e e neng a e neilwe ke Modimo e ne e batla dilo tse di botlhokwatlhokwa. Jehofa o ne a laola jaana: “Ntshetsang Jehofa tshupelo mo go lona; mongwe le mongwe yo pelo ya gagwe e ratang, a e lere, tshupelo ya ga Jehofa.” (Ekesodo 35:4-9) Batho ba ne ba arabela jang? Pego e re bolela gore “Ba tla, mongwe le mongwe yo pelo ya gagwe e mo tlhotlheletsang, le mongwe le mongwe yo mowa wa gagwe o mo ratisitseng, mme ba lere - le tshupelo ya ga Jehofa, ya tiro ya mogope wa bophuthegelo, le ya tirelo yotlhe ya one, le ya diaparo tse di itshepileng.” ‘Tshupo eno ya peelego’ e ne ya oketsega ka bonya ka bonya, ya nna kgolo mo e leng gore e ne e ‘fetile selekanyo sa tiro e Jehofa o laetseng gore e dirwe.’ (Ekesodo 35:21-29; 36:3-5) A bo batho ba ne ba supa moya wa bopelotshweu o e seng wa bopelotshetlha jang ne!

Baiseraele ba ne ba kopiwa gape gore ba ntshe meneelo ka bopelotshweu mo e ka nnang dingwaga tse di kwa tlase ga 500 moragonyana. Selo se Kgosi Dafite a neng a eletsa go se dira, e leng go agela Jehofa ntlo e e neng e tla nnela ruri kwa Jerusalema, se ne se tloga se diragadiwa ke morwawe Solomone. Dafite ka boene o ne a kgobokanya a bo a ntsha moneelo o e neng e le karolo e kgolo ya se se neng se tla tlhokiwa. Batho ba bangwe ba ne ba kopanela fa Dafite a ne a itsise gore go ‘itomololelwe Jehofa.’ Matswela e ne ya nna afe? “Foo batho ba itumela ka ba ntsha ka peleego, gonne ba ne ba naya Jehofa ka boitumelo ka pelo e e itekanetseng; kgosi Dafite le ene a itumela ka boitumelo jo bogolo.” (1 Ditirafalo 22:14; 29:3-9) Tlhwatlhwa ya selefera le gouta fela e ne e ka nna dimilione di le dikete tse 180 tsa diranta ka ditlhwatlhwa tsa gompieno!—2 Ditirafalo 5:1.

Re kgona go bona mo dikaing tseno gore ga gona ope yo o neng a patelediwa go aba. Go ne go abiwa fela ka “peelego” le ka “pelo e e itekanetseng.” Jehofa o ne a tla se ke a itumedisiwe ke sepe fela kwantle ga seno. Ka tsela e e tshwanang, fa go ne go tlhokega gore go ntshiwe moneelo wa madi go thusa Bakeresete ba ba tlhokang, moaposetoloi Paulo o ne a kwala gore e ne e sa tshwanela go nna “se se ntshiwang ka patiko.” O ne a oketsa ka gore: “A motho mongwe le mongwe a dire ka fa o ikaeletseng mo pelong ya gagwe ka teng; e seng ka go ngongorega, le fa e le ka patelelo, gonne Modimo o rata yo o abang ka pelotshweu fela.”—2 Bakorinthe 9:5, 7.

Se se Tlhokegang Gompieno

A gompieno go tlhokega gore go ntshiwe meneelo? Eleruri go a tlhokega, e bile go tla tswelela go tlhokega fa nako e ntse e tsamaya. Ka ntlha yang?

Bakeresete ba filwe ditaelo tse di tlhamaletseng malebana le metlha eno ya bofelo. Jesu o ne a laela barutwa ba gagwe jaana: “Ke gone tsamayang, lo dire merafe yotlhe barutwa, lo ba kolobetse mo ineng la Rara, le la Morwa, le la Mowa o o Boitshepo. Lo ba rute go tlhokomela dilo tsotlhe tse ke di lo laoletseng.”—Mathaio 28:19, 20.

Jaaka re ntse re atamela konelo ya ‘bokhutlo jwa tsamaiso eno ya dilo,’ gore re kgone go fitlhelela tiro eno e kgolo ya go ruta le ya go rera re tlhoka nako le madi a mantsi. Ka ntlha yang? Ka ntlha ya se se tlhokegang gore re kgone go isa molaetsa wa Bogosi jwa Modimo “go ya fela kwa sekhutlong sa lefatshe.” (Ditiro 1:8) Batho ba bantsi ga ba itse Dikwalo sentle thata jaaka Bajuta ba lekgolo la ntlha la dingwaga. Totatota, batho ba bantsi mo lefatsheng ga ba a tlwaelana le Baebele e bile ga ba e tseye e le Lefoko la Modimo. Bareri ba tshwanetse go thapisiwa ba bo ba romelwa kwa dinageng tse di kgakala. (Baroma 10:13-15) A o ko o akanye gore go kopanyelediwa dipuo di le kae! Batho ba ba reretsweng ba tshwanetse go nna le Dibaebele le dikgatiso tse di theilweng mo Baebeleng gore ba di bale ba bo ba di ithute ka dipuo tsa bone. Go tlhoka thulaganyo e kgolo gore di fitlhelele botlhe ka thulaganyo le gore ba gole semoyeng gore le bone ba tle ba kgone go thusa ba bangwe.—2 Timotheo 2:2.

Jesu o ne a re ‘mafoko a a molemo a bogosi,’ a tshwanetse gore pele a ‘rerwe mo lefatsheng lotlhe go nna tshupo mo merafeng yotlhe; mme ke gone bokhutlo bo tla tlang.’ (Mathaio 24:14) Ka jalo, ke nako ya gore re neele gotlhe mo re ka go kgonang gore re kgone go wetsa tiro eno e e botlhokwa. Madi a rona a tla dirisiwa ka tsela e e molemo le go feta pele ga dikhumo di tlhoka mosola.—Esekiele 7:19; Luke 16:9.

Madi a ya Kae?

Mokgatlho wa Watch Tower o gatisa dibuka tsa Baebele ka dipuo tse di fetang 230, mmogo le ka Mokwalo wa Difofu le dibidio tsa puo ya diatla tsa bosusu. Seo se tlhoka ditlhopha tsa baranodi le batho ba ba balang gore a go kwadilwe sentle mo puong nngwe le nngwe. Totatota go jesa kgakge fa o akanya fela ka go dira tiro eno, segolobogolo ya makasine wa Tora ya Tebelo, o o gatisiwang kgwedi nngwe le nngwe ka dipuo di le 121 mme o gatisiwa ka nako e le nngwe mo go tse 101 tsa tsone. Mme go botlhokwa gore batho go dikologa lefatshe ba amogele le go bala tshedimosetso e e tshwanang. Ngwaga le ngwaga ditlhwatlhwa tsa dipampiri le didirisiwa tse dingwe tse di dirisiwang go gatisa molaetsa wa Bogosi ka mokwalo kgotsa ka direkoto tse di reediwang kana tsa bidio di a oketsega. Ditshenyegelo tse di ntseng jalo di tshwanetse go duelelwa ka meneelo e e tswang mo bakaulengweng.

Tiro ya go rera le ya go ruta e dirwa mo tshimong e e akaretsang diphuthego di le 75 000 tsa Basupi ba ga Jehofa mo lefatsheng lotlhe. Balebedi ba ba etang ba ba thapisitsweng ba etela phuthego nngwe le nngwe gabedi ka ngwaga go bopaganya batho le go ba kgothatsa. Dikopano le tsone di na le seabe se se botlhokwa go naya tao. Go tshwanetse gore go hirisiwe mafelo a magolo gore go tshwarelwe dikopano tse dikgolo tse di nonotshang mo tumelong. Meneelo ya lona gape e dirisiwa mo mabakeng ano.

Diphuthego mo mafelong a a farologaneng di kopana go tshwara dipokano tse tlhano beke le beke fa dikopano tsone ka kakaretso di tshwarwa fela gararo ka ngwaga. (Bapisa Ekesodo 34:23, 24.) Ka go bo batho ba bantsi ba ntse ba amogela mafoko a a molemo, diphuthego di le diketekete tse dintšha di ntse di oketsega ngwaga le ngwaga. Go agiwa Diholo tsa Bogosi di le makgolokgolo ngwaga le ngwaga, mme tse dintsi di a tokafadiwa le go okediwa, ka thuso ya dimilione tsa diranta tse Mokgatlho o adimanang ka tsone. Lefa gone go dirisiwa letlole le le lengwe gantsintsi fela, go tswelela go ntse go tlhokega tse dintsi.

Lefelo le lengwe le go nnileng le koketsego e e gakgamatsang kwa go lone ke kwa ditšhabeng tse di kwa Yuropa Botlhaba tse pele di neng di wela ka fa tlase ga se pele e neng e le Soviet Union. A bo dikgang tse di neng di tswelela di bolela gore tiro e ne e buletswe mo mafelong ano di ne di itumedisa jang ne! Jaanong barongwa ba romelwa kwa bontsing jwa dinaga tseno. Go tlhomilwe makala a masha mo dinageng tse dingwe, mo go oketsang palo ya badiredi ba baithaopi ba ba dirang gore lelapa la lefatshe lotlhe la Bethele le fete 15 000. Ee, dikago tsa makala tse ba nnang mo go tsone di tshwanetse go rekwa kgotsa go agiwa. Meneelo ya lona e thusa gore se se tlhokegang seno se dirwe.

Ga se gore Satane le badimona ba gagwe ga ba bone tiro eno yotlhe. Ba dira gotlhe mo ba ka go kgonang go senya maiteko a batlhanka ba ba ikanyegang ba ga Jehofa kgotsa go ba direla mathata. (Tshenolo 12:17) Seno se raya morwalo o o oketsegang wa dintwa tse di ka fa molaong gore go sirelediwe ditshwanelo tsa batho ba Modimo tsa go rera le go tshela tumalanong le melao ya tshiamo. Mo godimo ga moo, bakaulengwe le bokgaitsadi ba rona ba ba amilweng ke tshenyo ya ntwa mo tsamaisong ya ga Satane ya dilo, mmogo le masetlapelo a tlholego, ba tlhoka go thusiwa ka dilo tsa namolo. Meneelo ya lona e thusa thata gore ba fiwe thuso eno e e botlhokwa.

Jehofa o Tla lo Duela

Go dirisa madi a rona le nako ya rona ka bopelotshweu go tsweledisa tiro ya Morena go ka lere masego. Ka tsela e e ntseng jang? Ka gore Modimo, yo dilo tsotlhe e tlileng go nna tsa gagwe kwa bofelong, o tla re duela. Diane 11:25 e bolela jaana: “Motho yo o fang ka pelontle o tlaa nontshiwa, le yo o nosang le ene ka esi o tlaa nosiwa.” Ruri Jehofa o a itumela fa re dira seabe sa rona go tsweledisa kobamelo ya gagwe. (Bahebere 13:15, 16) O ne a solofetsa Baiseraele ba bogologolo ba ba neng ba tlile go tlisa meneelo e e neng e batliwa mo kgolaganong ya Molao jaana: “Mme lo tle lo nteke ka gone,” go bua Jehofa wa masomosomo, “lo bone boo ga nketla ke le bulela dikgoro tsa legodimo, ke lo goromeletsa lesego le go se ketlang go nna le bonno jo bo lekanyeng go le baya.” (Malaki 3:10) Letlotlo leno la semoya le batlhanka ba ga Jehofa gompieno ba le ipelelang ke bosupi jwa gore Modimo o diragatsa tsholofetso ya gagwe.

Tiro eno e e botlhokwatlhokwa ya go bolelela batho botlhe letsatsi la poloko le ya go thusa batho ba ba dipelo di ikanyegang gore ba bone tsela e e isang botshelong ga e na go nnela ruri. (Mathaio 7:14; 2 Bakorinthe 6:2) Mme “dinku di sele” tsa Morena tsotlhe di tshwanetse go kgobokanngwa. (Johane 10:16) A bo go le botlhokwa jang ne go diragatsa kgwetlho eo gompieno! Mme a bo mongwe le mongwe wa rona a tla itumela jang ne, fa a leba kwa morago a le kwa lefatsheng leo le lesha la tshiamo, mme a re, ‘Ke nnile le seabe se se tletseng fa go ne go kgobokanngwa la bofelo’!—2 Petere 3:13.

[Lebokoso mo go tsebe 30, 31]

Ditsela tse bangwe ba Ntshang Meneelo e e Ntshediwang Tiro ya go Rerwa ga Bogosi ka Tsone

MENEELO E E NTSHEDIWANG TIRO YA LEFATSHE LOTLHE: Batho ba bantsi ba beela kwa thoko madi a ba a tsenyang mo mabokoseng a meneelo kwa Holong ya Bogosi. Kgwedi le kgwedi diphuthego di romela madi ano kwa ntlokgolong ya lefatshe lotlhe kwa Brooklyn, New York kgotsa kwa lekaleng le le gaufi.

DIMPHO: Meneelo ya boithatelo ya madi e ka romelwa ka tlhamalalo go Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, kana a romelwa kwa ofising ya lekala la Mokgatlho le le thusang naga ya lona. Dibenya kana dilo tse dingwe tse di tlhwatlhwakgolo le tsone di ka ntshiwa meneelo. Lekwalo le lekhutshwane le le tlhalosang gore eno ke mpho fela le tshwanetse go romelwa le meneelo eno.

THULAGANYO YA MENEELO E E IKAEGILENG KA MABAKA MANGWE: Madi a ka nna a newa Mokgatlho wa Watch Tower gore o a tlhokomele go fitlha motho yo o a ntshitseng a tlhokafala, go dumalanwe gore fa mong wa madi a ka a tlhoka, o tla a busediwa.

INSHORENSE: Mokgatlho wa Watch Tower o ka kwalwa jaaka o o tla bonang madi a inshorense kana a thulaganyo ya go rola tiro/phenshene. Mokgatlho o tshwanetse go itsisiwe ka thulaganyo lefa e ka nna epe fela e e ntseng jalo.

DITOKO LE DIBONTO: Ditoko le dibonto di ka nna tsa fiwa Mokgatlho wa Watch Tower e le mpho e e feletseng kana ka thulaganyo e mo go yone madi a lotseno a tswelelang a ntse a duelwa mong wa tsone.

DITSHA LE DIKAGO TSA TSONE: Ditsha le dikago tse di ka kgonang go rekisiwa di ka nna tsa neelwa Mokgatlho wa Watch Tower jaaka mpho e e feletseng kana tsa bolokiwa di ntse di le kafa tlase ga mong wa tsone fa a santse a tshela, yo o ka nnang a tswelela a nna mo go tsone fa a santse a tshela. Motho o tshwanetse go itsise Mokgatlho pele a ka kwadisa setsha sepe le dikago tsa sone semolao mo leineng la Mokgatlho.

DIWILI: Dithoto kana madi di ka tlogelelwa Watch Tower Bible and Tract Society of Pennsylvania ka wili e e kwadilweng semmuso. Go tshwanetse ga romelwa kopi ya wili kwa Mokgatlhong.

Go bona tshedimosetso e e oketsegileng mabapi le dikgang tseno, kwalela go Treasurer’s Office, Watch Tower Bible and Tract Society of Pennsylvania, Private Bag X2067, Krugersdorp, 1740, kana kwa ofising ya Mokgatlho wa lekala le le thusang naga ya lona.