Tshwanelo ya Molwetse Ya go Fa Tetla ya Kalafi e Tlhomamisitswe Sesha
KATLHOLO ya bosheng e e neng ya ntshiwa ke Moatlhodi wa Preliminary Investigations of the Court of Messina, kwa Italy, e ne ya tlhomamisiwa gape gore dikeletso tsa kalafi tsa molwetse yo o godileng di kgoreletsa dingaka. Tshwetso eno e ne ya dirwa malebana le kgetsi nngwe ya mongwe wa Basupi ba ga Jehofa.
Ka January 1994, Antonino Stellario Lentini, Mosupi mongwe wa dingwaga tse 64 yo e neng e le molwetse yo o dutlang madi, o ne a potlakisediwa kwa kokelong kwa Taormina, Messina. Mosadi wa ga Antonino e bong Catena, o ne a tlhalosetsa badiredi ba kokelo gore jaaka Basupi ba ga Jehofa, ene le monna wa gagwe ba ne ba se kitla ba dumela kalafi ya go tshelwa madi. (Ditiro 15:20, 28, 29) Dikeletso tsa bone di ile tsa tlotlwa.
Lefa go ntse jalo, fa Antonino a ntse a fudusediwa kwa kokelong e nngwe, o ne a emisa go tlhola a hema mme fa a fitlha koo boemo jwa gagwe bo ne bo le maswe thata. Ka bonako fela morago ga foo, o ne a swa. Catena o ne a utlwile botlhoko thata, mme lefa go ntse jalo o ne a gomodiwa thata ke tsholofetso ya Baebele ya tsogo ya baswi. (Ditiro 24:15) Morago ga foo, o ne a gakgamadiwa ke fa mmakaseterata—yo gongwe a neng a tsiediwa ke dikgang tse di sokameng tsa metswedi ya tshedimosetso—a ne a mo latofatsa ka gore o bolaile monna wa gagwe ka gonne o ne a gana gore a ariwe ka tsela e dingaka di neng di bona e le botlhokwa.
Morago ga sebaka se se ka fetang ngwaga, ka July 11, 1995, Catena o ne a gololwa ka gore o ne a sa tlola molao ope. Tota e bile, bomankge ba tsa kalafi ba ne ba tlhalosa gore, fa ba akanya ka boemo jwa molwetse, go tsaya kgato ka karo epe go ne go se kitla go thusa ka sepe.
Mme dikakgelo tsa moatlhodi di ne di lebisitse mo kgannyeng ya moruthutha. O ne a tlhalosa gore go thata gore kgotlatshekelo e amogele mogopolo wa gore badiri ba tsa kalafi ba tshwanetse go tsaya kgato fa molwetse kana batho ba ba mo emelang ba gana kalafi. O ne a oketsa ka gore, molao wa kalafi o o amanang le boitshwaro wa kwa Italy, “o bona go le botlhokwa go bona tetla ya motho yo o amegang pele go ka tsewa kgato epe.” Ka jalo, o ne a bolela gore Catena “o ne a gana kafa molaong gore monna wa gagwe a se ka a fiwa kalafi eno.”
Katlholo eno e tlhomamisa sesha tshwanelo ya mogodi ya go gana kalafi e e thulanang le dikeletso tsa gagwe.