Dirisa Tshono Eno e E sa Tshwaneng le Epe!

PETER o ne a setse a gatetse pele mo dithutong tsa gagwe tsa kalafi fa a ne a kgatlhiwa ke molaetsa wa Baebele wa poloko. Fa a sena go aloga le go simolola go dira e le ngaka mo bookelong bongwe, baokamedi ba gagwe ba ne ba nna ba mo kgothaletsa go nna ngaka e e arang boboko. Eno e ne e le tshono e bontsi jwa dingaka tse di santseng di le disha di neng di ka e latela kwantle ga go okaoka.

Lefa go ntse jalo, Petera o ne a dira tshwetso ya go tlogela tshono eno. Ka ntlhayang? A e ne e le ka gonne a inyatsa e bile a sa go kgatlhegele thata? Ga go a nna jalo ka gonne Peter o ne a akanyetsa seo ka kelotlhoko. Morago ga go nna Mosupi wa ga Jehofa yo o ineetseng le yo o kolobeditsweng, o ne a batla go dirisa nako e e oketsegileng mo dikarolong tse di farologaneng tsa bodiredi jwa Bokeresete. O ne a lemoga gore fa a sena go nna ngaka e e arang boboko, tiro ya gagwe e ne e tla mo jela nako e ntsi thata le maatla. A e ne e le boeleele kana e le botlhale go ka tlogela tshono eno e e sa tshwaneng le epe?

Mo bathong ba bangwe, tshwetso eo ya ga Peter e ne e ka bonala e le boeleele. Lefa go ntse jalo, o ne a tsaya tsia ditemana tsa Baebele tse di jaaka Baefeso 5:15, 16. Moaposetoloi Paulo o ne a rotloetsa Bakeresetekaene jaana mo go yone: “Lo lebe thata ka fa lo sepelang ka teng, e seng jaaka ba ba seng botlhale, mme jaaka ba ba botlhale, ka go swela lobaka molemo ka metlha e, e bosula.”

Tsweetswee tlhokomela mafoko, ‘lobaka lo lo molemo.’ A ranotswe go tswa mo lefokong la Segerika le le dirisiwang thata mo Baebeleng go kaya nako kana lobaka lo lo lemogiwang ka dilo dingwe tse di rileng kana tse di tshwanelang tiragalo nngwe. Fano Paulo o ne a gatelela gore Bakeresete ba tshwanetse go nna le nako ya dilo tsa botlhokwa. Eleruri, ba tshwanetse gore “ba tlhomamise dilo tse di botlhokwa segolo.” (Bafilipi 1:10) Ke kgang fela ya go rulaganya dilo go ya ka botlhokwa jwa tsone.

Ka jalo he, ke eng se Modimo a ikaeletseng go se dira mo motlheng wa rona? Ke eng se Modimo a se batlang mo go ba ba mo ratang? Boporofeti jwa Baebele bo supa sentle gore malatsi a re mo go one ke ‘metlha ya bokhutlo,’ kgotsa “metlha ya bofelo.” (Daniele 12:4; 2 Timotheo 3:1) Keresete Jesu ga a tlogela pelaelo epe ya gore ke eng se e tshwanetseng go nna sa botlhokwa thata mo metlheng ya rona. O ne a bolela ka tlhamalalo gore pele ga bokhutlo jwa tsamaiso eno e e boikepo ya dilo, “mafoko a a molemo a, a bogosi a tlaa rerwa mo lefatsheng lotlhe, go nna tshupo mo merafeng yotlhe.” Ke morago ga foo fela bokhutlo bo tlaa tlang.—Mathaio 24:3, 14.

Ka jalo, re tshwanetse go dirisa tshono nngwe le nngwe go rera mafoko a a molemo a Bogosi le go dira barutwa. (Mathaio 28:19, 20) E re ka ditiro tseno di se kitla di boelediwa gape, eno ke tshono ya bofelo go dira tiro eno e e bolokang botshelo ka bojotlhe. “Jaanong ke motlha o o lebosegang.” Ee ruri, “jaanong ke letsatsi la poloko.”—2 Bakorinthe 6:2.

Go Dira Tshwetso e e Botlhale

Peter—lekawana le le umakilweng kwa tshimologong—o ne a akanyetsa tshwetso e a e dirileng ka kelotlhoko mme a sekaseka se a neng a ka se dira. O ne a lemoga gore ga go phoso go ithutela go nna ngaka e e arang boboko. Mme gone, ke eng se se neng se le botlhokwa mo go ene? E ne e le tiro ya gagwe mo bodireding jwa Bokeresete, a etse tlhoko kafa tiro eno e tshwanetseng go dirwa ka potlako ka teng. Mme gape, o ne a na le dilo tse a neng a patelesega go di dira. O ne a nyetse mme o ne a tshwanetse go tlamela mosadi wa gagwe yo o nang le seabe mo tirong ya go rera ya nako e e tletseng. (1 Timotheo 5:8) Gape Peter o ne a tshwanetse go duela dikoloto tse di amanang le thuto ya gagwe. O ne a swetsa ka go dira eng?

Peter o ne a dira tshwetso ya go nna moitse wa radiology le go dirisa mokgwa wa go lemoga bolwetse ka ultrasound. Eno e ne e le tiro e e neng e ka dirwa ka nako e e tlwaelegileng ya mmereko. Gape o ne a tla katisiwa mo diureng tsa tiro. Ee, ba bangwe ba ka tsaya tiro eno e le ya maemo a a kwa tlasenyana, lefa go ntse jalo, e ne e tla mo letla go nna le nako e e oketsegileng go dira dilo tsa semoya ka botlalo.

Gape go na le selo se se neng sa tlhotlheletsa tshwetso ya ga Peter. Lefa a ne a sa atlhole ba bangwe ba ba neng ba dira tshwetso e e farologaneng, o ne a itse gore go tshwarega thata mo dilong tsa lefatshe go ka baya Mokeresete mo kotsing. Go ka mo dira gore a itlhokomolose maikarabelo a semoya. Seno se lemotshega mo sekaing se sengwe se se amanang le mmereko.

Moreri mongwe wa Bogosi wa nako e e tletseng e ne e le motaki yo o katisitsweng. O ne a kgona go itlamela ka madi ka go rekisa ditshwantsho tsa gagwe. Ka nako ya fa a ne a dirisa nako e ntsi ya gagwe mo bodireding jo bo botlhokwa thata jwa Bokeresete, o ne a kgona go itlamela sentle. Lefa go ntse jalo, o ne a simolola go eletsa thata gore a tsweledise pele tiro ya gagwe ya botaki. O ne a tshwarega thata mo ditshwantshong le mo ditirong tsa botaki, a tlogela bodiredi jwa nako e e tletseng mme kgabagare a se ka a tlhola a tlhagafalela tiro ya go rera ka Bogosi. Fa nako e ntse e ya, a tsenelela mo boitshwarong jo bo seng jwa dikwalo mo go neng ga felela ka gore a se tlhole a nna karolo ya phuthego ya Bokeresete.—1 Bakorinthe 5:11-13.

Nako ya Rona e Kgethegile

Ka jaanong re le batho ba ba direlang Jehofa, ruri re batla go nna re ikanyega mo go ene. Re a itse gore re tshela mo nakong e e kgethegileng thata mo hisitoring ya motho. E le gore re nne re direle Modimo le go itshokela maemo a gompieno ka tsela e e molemo, re ka nna ra tlhoka go fetola dilo dingwe. Re ka bapisa seno le nako ya fa rapolasi a roba. Eo ke nako ya tiro e e kgethegileng e mo go yone badiri ba polasi ba tshwanetseng go dira ka natla thata go feta malatsi a mangwe le go oketsa nako ya go bereka. Ka ntlhayang? Gonne thobo e tshwanetse go wediwa mo lobakeng lo lo lekanyeditsweng lwa nako.

Nako e e saletseng tsamaiso ya jaanong e e boikepo ya dilo e lekanyeditswe. Gone jaanong, Mokeresete wa boammaaruri o tshwanetse go dira ka natla go latela sekao sa ga Jesu le go tsamaya mo dikgatong tsa gagwe go feta lefa e le leng pele. Tsela ya gagwe ya botshelo fa a ne a le mo lefatsheng e bontsha ka phepafalo gore ke eng se e neng e le sa botlhokwa thata mo go ene. O ne a re: “Re na le go dira ditiro tsa yo o nthomileng go sa ntse go le motshegare; bosigo bo etla, jo go se nang ope yo o ka dirang mo go jone.” (Johane 9:4) Fa Jesu a ne a re, bosigo bo etla, o ne a bua ka nako ya fa a tla bo a lekwa, a bapolwa le go swa, fa bodiredi jwa gagwe jwa mo lefatsheng bo ne bo tla bo bo khutla mme a se kitla a kgona go nna le seabe mo ditirong tsa ga Rraagwe wa legodimo.

Ke boammaaruri gore, mo nakong ya bodiredi jwa ga Jesu jwa dingwaga tse tharo le sephatlo, o ne a dirisa bontlhabongwe jwa nako ya gagwe a dira dikgakgamatso le go fodisa malwetse. Lefa go ntse jalo, o ne a dirisa nako e ntsi ya gagwe a rera molaetsa wa Bogosi le go “rerela bagolegwi kgololo” go tswa mo bodumeding jwa maaka. (Luke 4:18; Mathaio 4:17) Jesu o ne a dira ka natla thata mo bodireding jwa gagwe mme gape a ipha nako go thapisa barutwa ba gagwe e le gore ba tle ba age mo motheong oo a o tlhomileng le go tswelela ka tiro ya go rera ba tlhagafetse. Jesu o ne a dirisa tshono nngwe le nngwe go dira dilo tsa Bogosi pele ga tse dingwe e bile o ne a batla gore barutwa ba gagwe ba dire fela jalo.—Mathaio 5:14-16; Johane 8:12.

Le rona ba re leng balatedi ba ga Jesu ba gompieno, re tshwanetse go leba maemo a batho ba leng mo go one jaaka Jehofa Modimo a a leba. Tsamaiso eno ya dilo e feletswe ke nako, mme Modimo ka kutlwelobotlhoko o batla gore botlhe ba nne le tshono ya go bona poloko. (2 Petere 3:9) Ka jalo, a go botlhale go dira se Jehofa a se ratang pele ga re ka dira dilo tse dingwe tsotlhe? (Mathaio 6:25-33) Segolobogolo mo nakong e e kgethegileng go tshwana le eno, selo seo ka tlwaelo se tsewang se le botlhokwa se ka nna se e seng sa botlhokwa mo matshelong a rona re le Bakeresete.

A mongwe wa rona a ka ikotlhaela go bo a ile a dira pele dilo tse Modimo a di ratang pele ga a ka dira tse dingwe mo botshelong jwa gagwe? Nnyaa ruri, gonne tsela ya Bokeresete ya go intsha setlhabelo e duela ka tsela e e gakgamatsang. Ka sekai, Jesu o ne a bolelela barutwa ba gagwe jaana: “Ammaaruri ke a lo raya, ga go motho ope yo o tlogetseng ntlo, kgotsa bomorwa rraagwe, kgotsa bokgaitsadie, kgotsa mmaagwe, kgotsa rraagwe, kgotsa bana, kgotsa masimo, ka ntlha ya me, le ka ntlha ya Mafoko a a Molemo, yo o se ketlang a bona ga lekgolo, le jaana mo lobakeng lono, e bong matlo, le bomorwa rraagwe, le bokgaitsadie, le bommaagwe, le bana, le masimo, di na le dipogiso; mme mo lefatsheng le le tlang o tlaa bona botshelo jo bo sa khutleng.”—Mareko 10:29, 30.

Ga go ope yo o ka ntshang tlhwatlhwa ya madi go bona boitumelo jo bo bonwang ke bao ba dirisang nako ya bone go baka Jehofa le go bolela molaetsa wa Bogosi. Ba itumelela masego a le mantsi! Seno se akaretsa ditsala tsa boammaaruri, kgotsofalo ya go dira go rata ga Modimo, go amogelwa ke Modimo ka boitumelo le tebelelo ya go tshela ka bo sa khutleng. (Tshenolo 21:3, 4) A bo e le tshegofatso jang ne, go thusa batho ka tsela ya semoya le go tlotlomatsa leina le le boitshepo la ga Jehofa re le Basupi ba gagwe! Kwantle ga pelaelo, “go swela lobaka molemo” ruri ke tsela e e botlhale le e e solegelang molemo. Jaanong ke nako ya go nna le seabe mo go boleleng mafoko a a molemo a Bogosi jwa Modimo go feta lefa e le leng pele. A o tla dirisa tshono eno e e sa tshwaneng le epe o bo o e ngangatlela thata?

[Ntlha e e kwa tlase]