“Majana a a Tlhokegang a Boammaaruri”
“Majana a a tlhokegang a boammaaruri.” Ke ka fa lekwalo lengwe le le neng le kwaletswe lekala la kwa Nigeria la Basupi ba ga Jehofa le tlhalosang ka gone dimakasine tse pedi tse di kgethegileng. Mokwadi e ne e le lekawana lengwe, le le neng la tlhalosa jaana:
“Ke kwala jaana go tlhalosa ka fa ke lo lebogang thata ka ntlha ya maiteko a lona a go bua ka mo e ka nnang sengwe le sengwe se se malebana le botshelo jwa letsatsi le letsatsi mo dimakasineng tsa Tora ya Tebelo le Tsogang!
“Ke na le dingwaga di le 17. Ngogola seteishene sa rona sa radio se ne sa duelela kgaisano ya tlhamo e e nang le setlhogo se se reng ‘Lorato lo Akaretsa mo Gontsi Go na Le Fela Tlhakanelodikobo—AIDS ke Selo sa Mmatota.’ Tlhamo eno e ne e sa tshwanela go nna le mafoko a a kwa tlase ga a le makgolo a le manè. Motho yo o neng a kwala tlhamo e ntle go di gaisa tsotlhe o ne a tla thopa sekgele sa 1000 naira [R58,50]. Gone mme, ba ne ba bolela gore, batho ba se ka ba kwalela fela go thopa sekgele mme, go na le moo, ba tshwanetse go ithuta sengwe. . . .
“Ke ne ka bona tshedimosetso e e malebana le AIDS mo dimakasineng tsoopedi. Malebana le lorato, go ne go na le ditlhogo tse dintsi. Ke ne ka dirisa dintlha go tswa mo makasineng wa Tsogang! [ya Seesemane] ya August 8, 1978.
“Go ne go ise go fete le dikgwedi tse pedi morago ga gore ke romele tlhamo ya me, fa maduo a ntshiwa. Ke ne ka gakgamala, ke ne ka nna wa ntlha mo dinageng tsa Cross River le Akwa Ibom!
“Tshedimosetso yotlhe e ke e dirisitseng e tswa mo dimakasineng tseno. Go itumedisa tota go bo Jehofa a re naya tshedimosetso e e tshwanelang jaana mo lefatsheng leno le le hutsafatsang le le le boikepo leno. Jaaka Bakeresete ba boammaaruri, re itse gore lorato lo akaretsa mo gontsi thata go na le fela tlhakanelodikobo. Mme e bile, go tshela botshelo jwa boitsholo jo bo phepa go re sireletsa mo malwetseng a a tshwanang le AIDS.
“Ke ne ke ikutlwa ke tlhotlheletsega go lo lebogela majana a a tlhokegang ano a boammaaruri a lo a re nayang lo sa lape. E kete Jehofa a ka tswelela pele a segofatsa maiteko a lona fa lo ntse lo tswelela pele go gatisa dimakasine tseno tse di botlhokwa.”