Go na Le Majana a a Tlhokegang a a Tshelang Kwa Namibia!

Go na Le Majana a a Tlhokegang a a Tshelang Kwa Namibia!

NAMIBIA e boleele jwa dikilometara di ka nna 1 500 kafa borwabophirima jwa lotshitshi lwa Afrika. Lotshitshi lotlhe lwa naga eno lo na le dithotana tsa motlhaba, dithabana tse di matlapa, le dipoa tse dikgolo tse di lokgarapana. Majana a a tlhokegang a mebalabala a tswakane le maje a dintshi tsa Namibia. Tota le diteemane di a tle di bonwe fano. Mme naga eno e na le sengwe se se tlhwatlhwakgolo go feta maje ano. Namibia e na le majana a a tlhokegang a a tshelang—batho ba ba tswang mo ditšhabeng tsa teng tse dintsi.

Baagi ba ntlhantlha ba Namibia ba ne ba bua dipuo tse di batlileng di tshwana tse di bidiwang Khoisan. Puo ya bone e ne e itsiwe ka modumo wa teng wa go thwantsha loleme. Mo bathong ba ba buang Se-Khoisan gompieno, go na le Ba-Damara ba ba mmala o motshwana, batho ba ba mmala o moswaana ba bakhutshwane ba ba bidiwang Ba-Nama le Basarwa ba ba tumileng ka go tsoma. Merafe e le mentsi ya batho ba bantsho e ne ya goroga kwa Namibia mo makgolong a bosheng jaana a dingwaga. Bano ke bangwe ba ba mo ditšhabeng tse dikgolo tse tharo: Ba-Ovambo (morafe o mogolo thata kwa Namibia), Baherero le Ba-Kavango. Bayuropa ba ne ba simolola go thibelela kwa Namibia mo lekgolong la bo19 la dingwaga. Bafaladi ba le bantsi ba ne ba goroga fa diteemane di sena go bonwa kwa metlhabeng eno ya sekaka.

Baagi ba Namibia ba botlhokwa ka gonne ke karolo ya batho ba lefatshe ba Modimo a neng a ba ntshetsa Morwawe, ka gone a ba bulela tsela e e isang botshelong jo bo sa khutleng. (Johane 3:16) Makgolokgolo a batho ba Namibia ba ba tswang mo merafeng e le mentsi ba setse ba amogetse molaetsa wa poloko. Batho bano ba ka tshwantshiwa le majana a a tlhokegang a a tshelang ka gonne e le karolo ya “dilo tse di eletsegang tsa merafe” tse jaanong di phuthelwang mo ntlong ya ga Jehofa ya kobamelo.—Hagai 2:7.

Moepo wa Semoya o a Simologa

E ne e le ka 1928 fa go ne go simololwa go epiwa majana a a tlhokegang a semoya a Namibia. Mo ngwageng oo lekala la Afrika Borwa la Mokgatlho wa Watch Tower le ne la romela dibuka tsa Baebele di le 50 000 kwa bathong ba ba neng ba phatlaletse le naga yotlhe. Ngwaga o o latelang Mokeresete mongwe wa motlodiwa wa Afrika Borwa yo o neng a bidiwa Lenie Theron o ne a boela kwa bathong ba ba bontshitseng kgatlhego. Mo dikgweding tse nnè fela o ne a raletse naga eno e kgolo, a tsamaisitse dibuka tsa Baebele di feta 6 000 ka Seburu, Seesemane le ka Sejeremane. Tiro eno yotlhe e ne e se ya lefela.

Ka sekai, akanya ka Bernhard Baade, ramoepo mongwe wa Mojeremane. Ka 1929 o ne a amogela mae a tswa kwa go molemirui mongwe yo o neng a phuthela lee lengwe le lengwe ka tsebe ya kgatiso ya Watch Tower. Bernhard o ne a bala tsebe nngwe le nngwe ka tlhoafalo, a ipotsa gore ke mang yo o kwadileng buka eno. Kgabagare o ne a fitlha mo tsebeng ya bofelo, e e neng e na le aterese ya Mokgatlho wa Watch Tower wa kwa Jeremane. Bernhard o ne a kwala a kopa dibuka tse dingwe mme ya nna motho wa ntlha kwa Namibia go emela boammaaruri.

Go Goroga Badiri ba Nako e e Tletseng

Ka 1950, barongwa ba le banè ba ba neng ba thapisiwa kwa Sekolong sa Baebele sa Watchtower sa Gileate ba ne ba goroga kwa Namibia. Palo ya barongwa e ne ya tlhatlogela go borobedi ka 1953. Mo go bone go ne go na le Dick le Coralie Waldron, banyalani bangwe ba kwa Australia ba ba sa ntseng ba direla kwano ka boikanyegi. Baboledi ba bangwe ba bantsi ba nako e e tletseng ba Bogosi ba ba tswang mo Afrika Borwa le kwa dinageng di sele le bone ba ne ba nna le seabe mo go epeng majana a a tlhokegang a semoya kwa Namibia. Barongwa ba bangwe, mmogo le baalogi ba Sekolo sa Thapiso sa Bodiredi, ba ile ba romelwa kwa Namibia.

Selo se sengwe se se dirileng gore go nne le koketsego ya semoya kwa Namibia e ile ya nna go ranolwa le go gatisiwa ga dibuka tsa Baebele ka dipuo tse di buiwang thata koo, tse di jaaka Seherero, Sekwangali, Sekwanyama, Se-Nama/Se-Damara le Sendonga. Fa e sa le ka 1990, go ntse go na le ofisi ya thanolo e bile e le legae la baithaopi ba nako e e tletseng kwa motsemogolo, Windhoek. Karen Deppisch, yo o ntseng a dira le monna wa gagwe mo tirong ya go rera ya nako e e tletseng mo dikarolong di le dintsi tsa Namibia, a re: “Batho ba le bantsi ba a gakgamala fa re ba neela dibuka ka puo ya bone, segolobogolo e re ka ba na le dibuka di sekaenyana fela tsa mofuta ope fela ka puo eo.”

Go Phatsimisa Majana a a Tlhokegang

Mangwe a majana a a tlhokegang a mmatota a kwa Namibia a ile a phatsimisiwa ke motsamao wa makhubu le motlhaba ka diketekete tsa dingwaga. Mme legale, dithulaganyo tseo tsa tlholego ga di dire gore go nne le majana a a tlhokegang a a tshelang. Go tlhoka gore batho ba ba sa itekanelang ba leke ka natla gore ba “latlhe botho jo bogologolo” mme ba apare botho jo bosha jo bo tshwanang le jwa ga Keresete. (Baefeso 4:20-24) Ka sekai, go tlotla bagologolwane ba ba suleng ke ngwao e e nweleletseng mo merafeng e le mentsi ya Namibia. Batho ba ba sa obameleng bagologolwane gantsi ba bogisiwa ke ba malapa le baagelani. Fa batho ba utlwa mo Baebeleng gore baswi “ga ba itse sepe,” ba lebana le teko. (Moreri 9:5) Ka tsela efe?

Mosupi mongwe wa Moherero o tlhalosa jaana: “E ne e le kgwetlho e kgolo go ikobela boammaaruri. Ke ne ka dumela go ithuta Baebele le Basupi ba ga Jehofa, mme go ne ga ntsaya nako gore ke dirise dilo tse ke neng ke di ithuta. Sa ntlha, ke ne ke tshwanetse go tlhomamisa gore a ke tla sireletsega fa ke sa ikobele dingwao. Ka sekai, ke ne ke feta mafelo mangwe ka koloi mo Namibia ke sa eme go ya go baya leje mo godimo ga lebitla kana ke sa tsholetse hutshe gore ke dumedise baswi. Fa go ntse go ya, ke ne ka tlhatswega pelo gore ga go na sepe se se ka ntiragalelang fa ke sa obamele bagologolwane ba ba suleng. A bo ke itumetse jang ne gore Jehofa o segofaditse maiteko a me a go thusa lelapa la gaetsho le batho ba bangwe ba ba neng ba kgatlhegela go ithuta boammaaruri!”

Go Tlhokega Baepi ba Semoya

Pele barongwa ba goroga ka 1950, go ne go na le mmoledi a le mongwe fela wa dikgang tse di molemo kwa Namibia. Palo eno e ile ya oketsega ka iketlo go nna tlhora ya baboledi ba le 995. Le fa go ntse jalo, go sa ntse go na le tiro e ntsi e e tlhokang go dirwa. Tota e bile, go na le dikgaolo dingwe tse di iseng di rerelwe. A o ka direla kwa baboledi ba ba tlhoafetseng ba Bogosi ba tlhokegang thata teng? Fa go le jalo, tsweetswee, tla ka kwano mo Namibia mme o re thuse go batla le go phatsimisa majana a mangwe a a tlhokegang a semoya.—Bapisa Ditiro 16:9.

[Mmapa/Ditshwantsho mo go tsebe 26]

(For fully formatted text, see publication)

AFRIKA

NAMIBIA

[Ditshwantsho]

Dikgang tse di molemo di rerelwa merafe yotlhe ya Namibia

[Metswedi ya Ditshwantsho]

[Ditshwantsho mo go tsebe 26]

Namibia ke naga e e nang le majana a a tlhokegang a mantle

[Setshwantsho mo go tsebe 28]

A o ka kgona go ya go direla koo baboledi ba Bogosi ba tlhokegang thata teng?