Kafa o Anaanelang Loso Lwa ga Keresete ka Gone
1 “Morwa Motho [o] na a sa tla go dihèlwa, me e le go dihèla, le go ntsha botshelō yoa gagwè go nna thèkololō ea batho ba le bantsi.” (Math. 20:28) Ga go na monna ope yo mongwe yo o kileng a tshela mo lefatsheng yo o ka dirang seo Jesu Keresete a ileng a se direla setho. Ka tsela eo a neng a tshela ka yone mme kgabagare ka go swela ga gagwe mo koteng ya pogisetso, o ne a re tsenya mo tseleng eo mo go yone re tlileng go amogela mpho e kgolo go di gaisa tsotlhe eo e ka amogelwang ke mongwe le mongwe eleng botshelo jo bo sa khutleng. Mme lefa go ntse jalo, batho ba le bantsi ga ba anaanele go le kalo seo Keresete a ileng a se dira.
2 A o ke o akanye ka seo se neng sa diragala ka nako ya fa Jesu a ne a kopana ka tshoganetso le balepero ba le some. Ka nako ya fa ba ne ba bona Jesu, ba ne ba tlhaeletsa jaana: “Yesu, Morèna, re utlwèlè botlhoko.” (Luke 17:13) O ne a ba utlwela botlhoko mme a ba laya, go ya ka Molao, gore ba ye go itlhagisa kwa baperesiting. Fa ba ntse ba le mo tseleng, balepero ba ba some bano botlhe ba ne ba fola.
3 Mme lefa go ntse jalo ke a le mongwe fela yo o neng a boela mo go Jesu go tla go mo leboga. Go tweng ka ba bangwe ba le robongwe? Ba ne ba tswelela pele fela ba tsamaya ba sa akanye sepe kaga go leboga motho yo o ba diretseng molemo. (Luke 17:15-17) Rona re tshwana le mang? Re batla go tshwana le monna yo o neng a boa. O ne a anaanela tota ka boammaaruri. A eo ke tsela eo re ikutlwang ka yone ka loso lwa ga Keresete?
4 Go Supa Gore Re A Anaanela: Ngwaga nngwe le nngwe Mokgatlho o akantsha gore go balwe ditemana tse di kgethegileng mo Bibeleng beke pele ga letlha la Segopotso. Ditemana tsa Bibela tseo go akantshitsweng gore di balwe di ka bonwa kafa tlase ga matlha a April 12-17 mo go 1992 Calendar of Jehovah’s Witnesses. Re ka bontsha gore re a anaanela ka go bala le go tlhatlhanya ka ditiragalo tseno tseo di neng tsa diragala mo botshelong jwa ga Jesu pele fela ga loso lwa gagwe.
5 Tiro eo re e dirang mo tirelong ya tshimo e amana le go anaanela ga rona Segopotso. Bagolwane ba tla batla go rulaganya dilo sentle gore babulatsela mmogo le baboledi ba tle ba kgone go rulaganyetsa tiro e e oketsegileng ya tshimo mo kgweding ya April.
6 Gantsi eno ke kgwedi eo mo go yone diketekete di nnang le seabe mo tirong ya bobulatsela jo bo thusang. Mo kgweding ya April ya ngwaga e e fetileng ba le 6 559 ba ne ba nna le seabe mo tirong ya bobulatsela jo bo thusang mono Afrika Borwa. A wena o ka kgona go dira jalo mo kgweding eno ya April? Fa e le gore ga o kgone go nna mmulatsela yo o thusang, rulaganya dilo gore o tle o kgone go oketsa seabe sa gago mo tirong ya go rera go ya ka moo maemo a letlang ka gone.
7 Dira Gore O Anaanele Ba Bangwe: Batho ba le bantsi ba ba kgatlhegang ba kopanela le rona kwa moletlong wa Segopotso ngwaga nngwe le nngwe. Ka sekai, mo bathong ba le 10 650 158 bao ba neng ba le teng mo Segopotsong lefatshe ka bophara mo kgweding ya March ya ngwaga e e fetileng, ba ba fetang 6 370 000 ba bone e ne e le batho ba ba kgatlhegang. Seno se bontsha gore go kgonega fela thata gore phuthego e gole mo isagweng.
8 Re tshwanetse gore re dirise ditaletso tse di gatisitsweng tsa Mokgatlho re bo re dire dithulaganyo tsa gore re tlamele batho bao re ithutang Bibela nabo mmogo le batho bao ba kgatlhegang ka sepalangwa koo go tlhokegang gone. Nnang botsalano fela thata ka nako ya fa lo ba laletsa.
9 Ba thuseng go lemoga gore ke ka ntlha yang fa Segopotso se ile sa tlhongwa, gore ke bomang bao ba jang ditshwantshetso, le gore ditshwantshetso tseno di emela eng. (1 Bakor. 11:23-26) Gape, ba tlhalosetseng ka tsholofelo eo bao ba jang ditshwantshetso ba nang nayo le eo babogedi bao ba sa jeng ditshwantshetso ba nang nayo. (Yoh. 10:16; Tshen. 14:3, 4) Seno se tla thusa batho ba ba kgatlhegang go tlhaloganya gore botlhe ba tlhoka go ‘bontsha tumelo’ le gore go nna gone mo Segopotsong sa loso lwa ga Keresete gangwe fela ka ngwaga ga go a lekana.—Yoh. 3:16.
10 Segopotso sa loso lwa ga Keresete ke tiragalo e e kgethegileng fela thata. Re tla bo re bontsha gore tota re anaanela dilo tsotlhe tseo Jehofa le Keresete ba di re diretseng ka go se baakanyetsa ka botlalo. Go dira gore batho bao re ithutang Bibela nabo mmogo le batho ba bangwe bao ba kgatlhegang ba anaanele tiragalo eno go tla ba thusa gore le bone ba bontshe tumelo mo thekololong eo Jehofa a e re diretseng ka Jesu Keresete.