Ba Tla Utlwa Jang Fa re Sa Boele?
1 “Ba tla . . . utlwa yañ ha ba sena morèredi?” (Bar. 10:14) Ee ruri, ba tla tlhaloganya jang boammaaruri fa rona re sa dire maeto a go boela a a nang le matswela? Re tlhoka go dira loeto lwa go boela gongwe le gongwe koo re ileng ra tlotla le mongantlo gone ka molaetsa wa Bogosi. Mo kgweding eno re ka nna ra ya go tsweletsa motlotlo wa rona gape le batho bao re ileng ra tlotla le bone re tlotla ka dintlha tse dingwe tsa Dikwalo tse di tswang mo bukaneng epe fela e re e tsamaisitseng, mme seo se ka nna sa dira gore re atlege go simolola thuto ya Bibela.
2 Fa e le gore o tsamaisitse bukana ya “Isagwe E E Bolokesegileng—Ka Moo O ka e Bonang,” o ka nna wa simolola motlotlo o o tla gogelang mo thutong ya Bibela ka tsela eno. O supa khabara ya yone ya kafa pele, o ka nna wa botsa jaana:
◼ “A o ka rata go tshela mo lefatsheng leo mo go lone wena le lelapa la gago lo ka itumelelang isagwe e e bolokesegileng? [Letela karabo. Morago ga foo ya kwa serapeng sa 2.] Rotlhe re eletsa seo, le mororo batho ba bantsi ba sa dumele gore go tla tsamaya go direga. Go ka se ka ga palela Modimo yo o solofetsang gore o tla diragatsa seno.” Bala Isaia 32:17, 18 fela jaaka e nopotswe mo serapeng sa 2, kana e bale go tswa mo Bibeleng ya gago. Tswelela pele o tlhalosa gore go na le batho ba ba setseng ba itumela e bile ba na le kagiso ya mogopolo ka ntlha ya tsholofelo e ba nang le yone ka isagwe. Tlotla ka dintlha tse di tswang mo Dikwalong tse di mo serapeng sa 3, mme morago ga foo o tlhalose ka moo go ithuta bukana eno go ka thusang mongantlo ka teng go ithuta mo go oketsegileng. Fa motho a kgatlhega, dira dithulaganyo tsa go dira loeto lwa go boela ka bonako gore o tle go tsweletsa motlotlo.
3 Fa o boela kwa o tsamaisitseng bukana ya “A Go Na le Modimo o o Amegang?” gone, gongwe fa o bua sengwe se se tshwanang le seno go ka nna le matswela:
◼ “Mo loetong lwa me lwa nako e e fetileng re ile ra tlotla ka potso e e reng, A go na le Modimo o o amegang? A o akanya gore Modimo o amega thata ka rona mo e leng gore o tla fedisa go boga le thubakanyo e e leng teng? [Fa motho a sena go araba, ya kwa serapeng sa 32, mme o tswele pele.] Modimo o solofeditse gore o tla emisetsa lefatshe le le boikepo leno ka le lesha le go tla nnang batho ba ba siameng mo go lone ba ba tla kgonang go nna ka kagiso. [Bala Pesalema 37:11.] Nna le wena re ka tshela mo lefatsheng le lesha fa re dumela mo Bibeleng e bile re dirisa kgakololo ya yone.” Tlhalosa thulaganyo e re nang le yone ya go thusa batho go ithuta Bibela.
4 Fa o dira loeto lwa go boela kwa o tsamaisitseng boroutšhara ya “Bonañ Dilō Cotlhe Ke Di Diha Sesha,” o ka nna wa simolola ka go supa setshwantsho se se kafa ntle mme morago ga foo wa botsa potso e e reng:
◼ “O akanya gore go tla nna jang go tshela mo lefatsheng le le nang le tsotlhe tse re di tlhokang? [Letela karabo ya mongantlo.] Se o se bonang mo setshwantshong seno ga se fela selo se se ikakanyediwang; ke selo se se theilweng mo ditsholofetsong tse di tlhomameng tse go buiwang ka tsone mo Bibeleng. [Bala Tshenolō 21:4 le Pesalema 37:11, 29.] Nka rata go go tlhalosetsa gore wena le lelapa la gago le ka bona jang masego ano.” Fa mongantlo a bontsha kgatlhego, tswelela pele ka motlotlo, mme o buelele thuto ya Bibela.
5 Fa re bona batho bao ka boammaaruri ba batlang boammaaruri, re supa fa re ba rata tota ka go boela kwa go bone go ya go ba thusa gore ba dire se ba se utlwileng. Re dirisa boammaaruri jo bo boitshepo jo re bo filweng gore rona mmogo le ba ba re reetsang re bone masego a a tla nnelang ruri.—1 Tim. 4:16.