Itse Bakaulengwe ba Gago Sentle
1 Kamano ya rona le baobamedikarona e ama dilo tse dintsi go feta go nna teng fela kwa dipokanong le bone kwa Holong ya Bogosi. Re batho ba ba dirang go rata ga Modimo, mme seo se dira gore re nne le kamano ya semoya le Jesu. (Mar. 3:34, 35) Seo gape se dira gore re nne le kamano ya lelapa ya semoya le ba bangwe mo phuthegong ya Bokeresete, bakaulengwe le bokgaitsadi ba rona ba semoya, bao re laelwang gore re ba rate. (Yoh. 13:35) Ka jalo, bao ba kopanelang le “ba ntlo ea Modimo” ba tshwanetse go leka go itsane sentle.—Baef. 2:19.
2 Itse Maina a Bakaulengwe ba Gago: A o itse maina a bakaulengwe le bokgaitsadi botlhe ba ba mo Thutong ya gago ya Buka ya Phuthego? Gantsi ke setlhopha se sennye, e leng selo se se dirang gore go nne motlhofo gore o itse maina a bontsi fa e se botlhe ba ba nnang teng. Fa e le gore ga o itse le maina a bone, a o ka bolela gore o ba itse sentle?
3 Go tweng ka go itse ba bangwe, go akaretsa le bana ba ba nnang teng kwa dipokanong kwa Holong ya Bogosi? Re ka tswa re tlwaetse go tsalana le setlhopha se sennye sa ditsala. Le mororo go se phoso go itumelela botsalano jwa ka metlha jwa batho ba ba rileng, ga re batle go dumedisa batho ba le mmalwa fela ka lorato le go tlotla ka dilo tse di agang le bone fela. Re tshwanetse go ‘pitlologa,’ re dira maiteko a go itse bakaulengwe le bokgaitsadi ba rona botlhe sentle. (2 Bakor. 6:11-13) Kwantle ga pelaelo seo se tla akaretsa go itse maina a bone.
4 Bakaulengwe ba ba tshwarang dipokano tsa phuthego ba tshwanetse go leka go itse maina a batho botlhe ba ba nnang teng. Go bitsa mongwe le mongwe ka leina la gagwe go tswa kwa seraleng go dira gore ba akanye gore dikakgelo tsa bone di a anaanelwa, mme gape go thusa ba bangwe go itse maina a bone. Gone mme, go tla nna go nna le batho bangwe ba basha kana baeng mo gare ga bareetsi e leng selo se se ka dirang gore go nne boima go itse leina la mongwe le mongwe. Lefa go ntse jalo, go tswelela pele re dira maiteko ka tlhoafalo go kgothatsa ba bangwe e bile go supa fa re ba kgatlhegela tota.—Bar. 1:11, 12.
5 Nna wa Ntlha go Batla go Itse Ba Bangwe Sentle: Gantsi balebedi ba ba etang ba kgona go itse bakaulengwe le bokgaitsadi ba bantsi sentle. Ba dira seno jang? Ka tsela tseno tse tharo tse di botlhokwa: (1) Ba dira le bone ka metlha mo tirelong ya tshimo; (2) fa maemo a bone a letla, ba amogela ditaletso tsa go ba etela kwa magaeng a bone; mme (3) e nna bone ba ntlha go dumedisa bagolo mmogo le bana kwa dipokanong.
6 A go na le ditsela tse o bonang gore o ka pitlologa ka tsone mo botsalanong jwa gago gore o tle o itse bakaulengwe ba gago botoka? Eleruri re ka laletsa ba bangwe gore ba ye le rona tirelong ya tshimo. Go ya ka ntlo le ntlo, go dira maeto a go boela, go ya kwa dithutong tsa Bibela, kana go neela bosupi jwa mmila ka dimakasine ke ditsela tse dintle tse re ka tlwaelanang ka tsone. Gape go molemo go laletsa ba bangwe kwa ntlong ya gago, gongwe lo ja mmogo kana go ja dijonyana tse di motlhofo mmogo gangwe le gape. Go nna wa ntlha go atamela batho ba ba sa tswang go kopanela kana ba ba leng ditlhong ga go ba age fela semoyeng mme gape go lere masego a magolo.—Dit. 20:35; 1 Bathes. 5:11.
7 Paulo o ne a itse bakaulengwe ba gagwe sentle. Go umaka ba bantsi ba bone ka maina mo makwalong a gagwe go supa gore o ne a ba kgatlhegela eleruri e bile o ne a ba rata tota. (1 Bathes. 2:17; 2 Tim. 4:19, 20) Maiteko a rona a go itse bakaulengwe ba rona sentle a tla re tlisetsa masego rotlhe.