Diboroutšhara—Didirisiwa Tse di Molemolemo mo Bodiheding
1 Motho yo o dirang tiro ya diatla o tsamaya a tshwere didirisiwa tse di farologaneng, nngwe le nngwe e diretswe tiro e e rileng. Jaaka baboledi ba Bogosi, re na le diboroutšhara tse dintsi tse di farologaneng tse di re thusang gore re thuse batho ba re ba rerelang ka dilo tse ba di tlhokang semoyeng ka botswerere. (Dia. 22:29) Mo ntlong e nngwe o ka nna wa kopana le motho yo o tshwenyegileng thata mo maikutlong. Mo go e nngwe mongantlo a ka tswa a eletsa go bona puso e e dirang dilo ka tshiamo, fa motho yo mongwe ene a ipotsa gore a go na le lebaka lepe la go tshela. Re ka dirisa diboroutšhara tsa rona jang go thusa batho bano?
2 Fa o tsamaisa boroutšhara jwa “A Ruriruri Modimo O Amega Ka Rona?,” o ka nna wa bolela jaana:
◼ “Batho ba bangwe ba ba bonang go boga le tshiamololo mo lefatsheng ba pega Modimo molato ka ntlha ya dilo tsotlhe tse di diragalang. Ba bolela gore e re ka Modimo e le mothatayotlhe, a ka kgona go fedisa go boga fa e le gore ruri o amega ka rona. Wena o ikutlwa jang ka seo? [Letela karabo.] Pesalema 72:12-14 e bontsha gore Modimo eleruri o amega ka rona. Go boga le tshiamololo ga se molato wa gagwe. O solofeditse gore badirabosula ba tla tloga ba fedisiwa. Boroutšhara eno, A Ruriruri Modimo O Amega Ka Rona?, e supa se a tla se dirang le gore rona re ka solegelwa molemo jang mo go seo.” O ka nna wa tsweletsa motlotlo ka dikakgelo tse di mo tsebeng ya 27, mo serapeng sa 22.
3 Fa o dirisa boroutšhara jwa “Lebaka la Go Bo Botshelo Bo le Gone,” o ka nna wa rata go simolola jaana:
◼ “Kgabagare mo e ka nnang mongwe le mongwe o ipotsa ka lebaka la go bo botshelo bo le gone. A ke go tshela dingwaga di le 70 kana 80 fela mme morago ga foo o bo o swa? Kana a go na le lebaka la go tshela? Wena o akanya jang? [Letela karabo.] Mo go Pesalema 37:29, re bona boikaelelo jwa Modimo jo bo itumedisang ka motho le ka lefatshe.” Fa o sena go bala lokwalo loo, ya kwa setshwantshong se se mo tsebeng ya 31, mme o akgele mo go oketsegileng gore go tla nna jang go tshela mo Paradaiseng.
4 Boroutšhara jwa “Bonañ” bo ka buelelwa ka go supa setshwantsho sotlhe se se kafa ntle mme o botse jaana:
◼ “O akanya gore go tlhokega eng gore lefatshe le nne jaana? [Letela karabo.] Mongwe le mongwe mo setshwantshong seno o na le ntlo le tiro e a e itumelelang. Go na le kagiso e bile go na le dijo tse dintsi, mme lefatshe ga le a kgotlelwa. Lefa ba ka leka thata jang, mebuso ya batho ga e kgone go dira gore lefatshe le nne jaana. Lefa go ntse jalo, Bibela e re tlhomamisetsa gore Modimo o tla ‘dira dilo tsotlhe sesha.’ [Bula tsebe ya 30, mme o bale Tshenolō 21:3, 4.] Boroutšhara jono bo ka go thusa gore o ithute gore o tshwanetse go dira eng gore o tle o kgone go tshela mo lefatsheng le lesha leo.” Fa motho a kgatlhega, bula tsebe ya 3, mme o supe kafa thuto ya Bibela e tshwarwang ka teng.
5 O ka nna wa simolola jaana fa o dirisa boroutšhara jwa “Botshelo mo Lefatsheng”:
◼ “Batho ba bantsi ba akanya gore ba tla tshwanela gore ba ye legodimong gore ba tle ba itumelele botshelo jo bo sa khutleng, mme lefa go ntse jalo, wena o akanyang ka go tshelela ruri mo lefatsheng? [Letela karabo.] Bibela e re tlhomamisetsa gore re ka kgona go tshelela ruri, mme e re bolelela gore re ka kgona seo jang.” Bala Yohane 17:3. Morago ga foo bontsha mongantlo setshwantsho sa 49 mme o botse jaana: “A o ka rata go tshela mo lefatsheng le le ntseng jaana?” Tsamaisa boroutšhara, mme o rulaganyetse loeto lwa go boela.
6 Diboroutšhara tseno di bua ka dilo tse di diragalang, di araba dipotso tse batho ba di botsang, e bile di a gomotsa. Fa re dirisa didirisiwa tseno ka botswerere, re ka kgona go thusa batho ba ba dipelo di phepa gore ba “hitlhè mo kicoñ ea boamarure.”—1 Tim. 2:4.