Go Tlhagolela Kgatlhego mo Maetong a go Boela
1 Bodihedi bo tshwantshiwa sentle le temothuo, mme go dira maeto a go boela go bapisiwa le go lema le go nosetsa. (Math. 13:23; Luke 10:2; 2 Bakor. 9:10) Jaaka “badihi mmōgō le Modimo,” re na le boikarabelo jwa gore re thuse peo epe fela e e sa tswang go tlhoga gore e gole le gore e tle e ungwe. (1 Bakor. 3:6, 9) Re ka dira seno jang ka tsela e e molemolemo?
2 Nna bonako go boela kwa bathong botlhe ba ba neng ba supa kgatlhego. Sekaseka pego ya gago ya ntlo le ntlo, mme o dire tshwetso ya gore o tla etela mang le gore o tla tlotla eng le ene. Gantsi kgang e o tla tlotlang ka yone e tla ikaega ka se o se buileng mo loetong lwa ntlha. Nna motho yo o fetofetogang, yo o nnang a akantse ka dintlha tse dingwe tsa Dikwalo tse a ka buang ka tsone. Go molemo ka metlha go dirisa Bibela, o lemoga gore e na le maatla a go fitlhelela pelo.—Baheb. 4:12.
3 Fa e le gore o ne o tlogetse boroutšhara jwa “A Ruriruri Modimo O Amega Ka Rona?,” o ka nna wa simolola jaana:
◼ “Batho ba bantsi ba ba tlhoafetseng ba dumela gore Modimo o tla senya lefatshe, mme ba bangwe ba boifa gore motho ke ene a tla go dirang. Wena o akanya jang? [Letela karabo.] Bibela e re bolela gore go na le gore Modimo o fedise lefatshe, o tla tlosa tshiamololo mo go lone, a le dira lefelo le go tla agang kagiso le polokesego mo go lone.” Lebisa tlhokomelo mo tsebeng ya 22, mme o bale Diane 2:21, 22, e e nopotsweng foo. Fa go supiwa kgatlhego, tlhalosa ka thulaganyo ya thuto ya Bibela kana tsamaisa dimakasine tsa bosheng, mme o rulaganyetse go boa gape go tla go tlotla ka lefatshe le lesha le Modimo a le solofetsang.
4 Fa o tsamaisitse boroutšhara jwa “Bonañ,” o ka nna wa bolela jaana:
◼ “Mo loetong lwa me lo lo fetileng, re ne ra bala mo Bibeleng ka tsholofetso ya Modimo ya go dira lefatshe paradaise e e tshwanang le e e leng kafa ntle ga boroutšhara jo ke go bo tlogeletseng. O ka bona masego ano fa o ithuta mo go oketsegileng kaga go rata ga Modimo le ka moo seo se re amang ka teng.” Bala Yohane 17:3, mme morago ga foo o ye kwa serapeng sa 52 le 53 mo tsebeng ya 27. Bolela ka bokhutshwane gore ke ka ntlha yang fa go le botlhokwa gore re nne le kitso ya boammaaruri ka Lefoko la Modimo.
5 Fa o boela kwa o tsamaisitseng boroutšhara jwa “Lebaka la Go Bo Botshelo Bo le Gone” mo mothong yo o ratang bodumedi, o ka nna wa fitlhela go tshwanela go bolela jaana:
◼ “Gongwe o setse o kile wa nna wa boeletsa Thapelo ya Morena ka makgetlo a le mantsi. Ke eng se o se akanyang fa o kopa gore Bogosi jwa Modimo bo tle?” Fa mongantlo a sena go araba, bua ka dirapa 8 le 9 mo tsebeng ya 26, mme morago ga foo o bale Daniele 2:44. Gongwe o ka nna wa tsweletsa motlotlo ka go tlhalosa gore Bogosi jwa Modimo bo tlile go fedisa boikepo le go boga fa bo tla. Tlhalosa gore fa re le batho ba ba siameng mo matlhong a Modimo, re ka bona botshelo jo bo sa khutleng mo Paradaiseng e e tla nnang mo lefatsheng leno.
6 Gakologelwa gore o ka boela kwa go mongwe le mongwe yo o neng a dumela go reetsa, go sa kgathalesege gore a o tsere dibuka kana ga a di tsaya. Leka go seegela kwa thoko nako beke nngwe le nngwe go dira maeto a go boela. Jehofa o tla segofatsa maiteko a gago a magolo a go tlhagolela kgatlhego e o e boneng. E kete seno se ka tlisa pako mo leineng la gagwe.—Yoh. 15:8.