Go Sireletsa Bana Ba Lona mo Tirisong ya Madi E E Sa Tshwanelang

¹ “Bona, bana ke boswa jwa Jehofa.” (Pes. 127:3) Fa lona jaaka batsadi lo na le boswa jo bo ntseng jalo, jo bo tlhwatlhwakgolo, jo bo tswang kwa go Jehofa, lo na le boikarabelo jo bo itumedisang le mororo e le jo bo boima jwa go katisa bana ba lona, go ba tlhokomela, le go ba sireletsa. Ka sekai, a lo dirile gotlhe mo go tlhokegang go sireletsa bana ba lona ba babotlana gore ba se ka ba tshelwa madi? Bana ba lona ba tla dira jang fa ba lebane le kgang ya go tshelwa madi? A lo ile lwa buisana ka se lo ka se dirang jaaka lelapa ka se lo tla se dirang go fenya seemo sa tshoganetso se se tshosetsang gore lo ka tshelwa madi?

² Fa lo baakanyetsa lelapa la lona maemo a a ntseng jalo ga go tlhokege gore lo tlhobaele kana lo ikutlwe lo tshwenyegile go sa tlhokege. Lo ka se akanyetse le go ipaakanyetsa go sa le gale sengwe le sengwe se se tla diregang mo botshelong, mme lefa go ntse jalo go na le dilo di le dintsi tse lona batsadi lo ka di dirang go sale gale go sireletsa bana ba lona gore ba se ka ba tshelwa madi. Fa lo itlhokomolosa boikarabelo jono go ka nna ga felela ka gore ngwana wa lona a tshelwe madi fa a alafiwa. Ke eng se se ka dirwang?

³ Go Botlhokwa Gore O Bo O Tlhatswegile Pelo Tota: O tshwanetse go akanya ka tsela e e masisi gore o tlhatswegile pelo go le kana kang le molao wa Modimo ka madi. A o ruta bana ba gago go utlwa Jehofa mo kgannyeng eno, fela jaaka o ba ruta go utlwa molao wa gagwe o o malebana le boikanyegi, boitsholo, boitlhaodi le dilo tse dingwe mo botshelong? A eleruri re ikutlwa jaaka molao wa Modimo o ne o laela jaana mo go Duteronome 12:23: “O itise gore o se ka wa ja madi”? Temana ya 25 e oketsa jaana: “O se ka wa a ja; gore go tle go ye sentle nao, le bana ba gago morago ga gago, mogang o dirang se se molemo mo matlhong a ga Jehofa.” Ngaka e ka nna ya bolela gore madi a tla ‘dira gore dilo di tsamaye sentle’ ka ngwana wa gago yo o lwalang, mme lefa go ntse jalo, o tshwanetse wa ititaya sehuba gore wena le bana ba gago ga lo kitla lo tshelwa madi pele go tlhaga maemo a tshoganetso, o leba kamano ya gago le Jehofa e le botlhokwa go gaisa sepe se go bolelwang gore se ka lelefatsa botshelo se se akaretsang go roba molao wa gagwe wa bomodimo. Seno se ka dira gore re amogelwe ke Modimo gone jaanong le go bona botshelo jo bo sa khutleng mo isagweng!

⁴ Ee, Basupi ba ga Jehofa ba tsaya botshelo bo le botlhokwa. Ga ba eletse go swa. Ba batla go tshela gore ba kgone go baka Jehofa le go dira thato ya gagwe. Leo ke lengwe la mabaka a go bo ba ya kwa dikokelong le go isa bana ba bone kwa go tsone gore ba alafiwe. Ba kopa dingaka gore di ba alafe, mme fa ba bolelelwa gore go botlhokwa go alafa ka madi kana dingaka di bolela gore ke one kalafi, ba kopa gore go dirisiwe mekgwa e mengwe ya kalafi go sa dirisiwe madi. Go na le ditsela di le dintsi tse di ka dirisiwang kwantle ga madi. Dingaka tse di nang le kitso di a di dirisa. Mekgwa e mengwe ya kalafi ga se e e ikakanyediwang fela mme lefa go ntse jalo e alafa sentle e bile ke mekgwa ya kalafi e e ka latelwang e e kwadilweng mo makwalopakeng a maemo a a kwa godimo a kalafi. Diketekete tsa dingaka go dikologa lefatshe di dirisana mmogo le rona ka go re naya kalafi e e siameng kwantle ga go dirisa madi, le mororo ka dinako tse dingwe go sa ntse go le thata go bona dingaka tse di ka alafang bana ba Basupi kwantle ga go dirisa madi.

⁵ Go Batla Ngaka E E Ka Dirisanang Mmogo: Dingaka di amega ka dilo di le dintsi fa di alafa balwetsi, mme fa o ba kopa go alafa ngwana wa gago kwantle ga go mo tshela madi, seno se ka oketsa kgwetlho e ba lebaneng le yone. Dingaka tse dingwe di ka dumela go alafa bagolo di dira go ya kafa ba eletsang ka teng malebana le madi fa fela ba tladitse dipampiri tse di ba gololang tse di dumalanang le tsone. Tse dingwe ka mo go tshwanang di ka nna tsa dumela go alafa bana ba bannye ba ba itshupileng ba na le tlhaloganyo ya segolo, e re ka dikgotlatshekelo tse dingwe di lemogile gore bana ba ba nang le tlhaloganyo ya segolo ba na le tshwanelo ya go ka itlhophela kalafi. (Bona Tora ya Tebelo ya June 15, 1991, ditsebe 16-17, e e tlhalosang gore ngwana yo o nang le tlhaloganyo ya segolo go tewa ofe.) Lefa go ntse jalo, dingaka di ka nna tsa gana go alafa bana ba bannye, segolobogolo masea, fa di sa dumelelwe gore di tshele madi. E bile tota, ke dingaka di sekaenyana fela tse di ka go tlhomamisetsang ka botlalo gore ga di kake tsa dirisa madi lefa maemo e ka nna afe fa di alafa ngwana. Ka ntlha ya mabaka a kalafi le a semolao, dingaka di le dintsi di ikutlwa di ka se ka tsa kgona go tlhomamisa jalo. Lefa go ntse jalo, palo e e ntseng e oketsega ya dingaka e batla go alafa bana ba Basupi ba ga Jehofa mme ba dira gotlhe mo ba ka go kgonang go dira jaaka re eletsa malebana le madi.

⁶ Ka ntlha ya seno, go tweng fa e le gore fa o ntse o batlela ngwana wa gago ngaka e e tshwanetseng, o bona nngwe e go itsiweng gore e dirisana mmogo sentle le Basupi ba ga Jehofa e bile mo nakong e e fetileng e ile ya dirisa mokgwa o o tshwanang le oo wa go sa tshele Basupi madi, lefa go ntse jalo e ikutlwa gore molao ga o e letle go go tlhomamisetsa ka mo go feletseng gore madi a ka se dirisiwe? Lefa go ntse jalo, e go tlhomamisetsa gore e akanya gore le mo nakong eno ga go ka ke ga nna le mathata. O ka nna wa swetsa ka gore o tlhophe yone. Mo maemong ano o ka nna wa swetsa gore o ka e naya tetla ya go tswelela pele e alafa. Lefa go ntse jalo, e tlhalosetse sentle gore seno ga se reye gore fa o e file tetla ya go alafa ngwana wa gago go raya gore o e naya tetla ya go mo tshela madi. Go dira jalo e tla nna boikarabelo jo o bo sikarang go sa lebege e kete tshwetso ya gago ke ya motho a ineela.

⁷ Ke boammaaruri gore, fa o ne o ka bona kalafi e nngwe e e botoka e e neng e ka fokotsa fela thata kana e e tlosang bothata jwa go dirisa madi gotlhelele, he go bonala o ne o ka dirisa one mokgwa oo o o seng kotsi thata. Go tla lebelelwa gore o dire boiteko jo bogolo thata go batla ngaka kana ngaka e e arang e e tla go tlhomamisetsang go gaisa tse dingwe tsotlhe fa e dumela gore ga e kitla e dirisa madi. Selo se se tla go thusang ke gore o nne o lebeletse gore mathata a ka nna a tsoga. Dira gotlhe mo o ka go kgonang go batla ngaka e e dirisanang mmogo sentle le batho go sa le gale. Leka go tila dingaka le dikokelo tse di senang tirisanommogo ka mo o ka kgonang ka teng.

⁸ Mo dinageng tse dingwe lebaka le lengwe le le ka dirang gore o tshelwe madi kana o se ka wa a tshelwa ke tsela e kalafi ya kokelo e duelwang ka yone. Fa batsadi ba na le inshorense ya kalafi kana sepe fela se ba ka se supang gore ba tla kgona go duela se se tla ba dumelelang gore ba batle ngaka e ba e ratang, go nna motlhofo gore bana ba se ka ba isiwa kwa dingakeng kana kwa badiring ba kokelo ba ba senang tirisanommogo. Gantsi fa lelapa le na le madi a a lekaneng seo se laola gore le tla amogela mofuta ofe wa kalafi le tirisanommogo go tswa mo dingakeng le mo dikokelong. Gape, gore ngaka kana kokelo e dumele go amogela ngwana gantsi go tla ikaega ka gore a batsadi ba tla kgona go duelela madi a kalafi. Mme basadi ba ba solofetseng go bona bana, go botlhokwa gore ba tlhokomele botsogo jwa bone fa ba santse ba le baimana! Seno se ka thusa go thibela go belega pele ga nako le malwetsi a a amanang le seo, e re ka gantsi kalafi e e dirisediwang masea a a belegweng pele ga nako le mathata a bone e akaretsa madi.

⁹ Ka dinako tse dingwe dingaka di ngongorega ka gore Basupi ba ga Jehofa ga ba tlotle ka gore ba ikutlwa jang ka madi go fitlha ka motsotso wa bofelo. Seno ga se a tshwanela go diragala. Sengwe sa dilo tsa ntlha tse batsadi ba Basupi ba tshwanetseng go se dira fa ba ya kwa kokelong kana fa ba batla thuso ya ngaka ke gore ba tlotle ka boemo jwa bone malebana le madi. Fa e le gore go a ariwa, kopa go sale gale go kopana le ngaka e e idibatsang. Ngaka e e arang e ka go thusa go dira seno. Diforomo tsa go amogela molwetsi di tshwanetse tsa tlhatlhobiwa ka kelotlhoko. O na le tshwanelo ya go thala mola mo godimo ga sepe se o sa dumalaneng le sone. Gore ba se ka ba belaela, kwala ka mokwalo o o bonalang sentle mo foromong ya go amogela molwetsi gore lefa maemo a ka nna jang ga o dumele kana ga o batle madi gotlhelele, ka ntlha ya mabaka a bodumedi le a botsogo.

¹⁰ Thuso E E Tswang mo Phuthegong ya ga Jehofa: Phuthego ya ga Jehofa e dirile dithulaganyo dife go go thusa go sireletsa bana ba gago gore ba se ka ba tshelwa madi? Di dintsi fela thata. Mokgatlho o gatisitse dikgatiso tse dintsi gore di re rute malebana le madi le mekgwa e mengwe e go sa dirisiweng madi mo go yone. O ithutile boroutšhara jwa Madi A Ka Boloka Botshelo jwa Gago Jang? le dikgatiso tse dingwe tse di buang ka kgang eno. E bile o na le bakaulengwe le bokgaitsadi ba gago mo phuthegong ya lona ba ba ka go thusang thata le go go tshegetsa. Fa go nna le mathata, bagolwane ba ka nna ba bona go le molemo gore ba rulaganye batho ba ba tla nnang ba tlhokometse kwa kokelong ka diura di le 24, mme segolo jang fa e ka nna mogolwane a na le motsadi wa molwetsi kana mongwe yo o atamalaneng thata wa lelapa. Gantsi molwetsi o tshelwa madi bosigo fa ba losika le ditsala ba ile gae.

¹¹ Mo Afrika Borwa le mo dinageng tse di bapileng le yone, go na le Dikomiti tsa Dipuisano le Dikokelo di le 12 tse di leng mo ditoropong tse dikgolo. Diphuthego tsotlhe di abetswe komiti e e nang le bakaulengwe ba ba katisitsweng ba ba tla kgonang go thusa. Fa lo ba tlhoka, dirang gore bagolwane ba lona ba ba kope go tla go thusa. Ga ba a tshwanela go bilediwa mathatanyana a a sa reng sepe, mme lefa go ntse jalo lo se ka lwa diega go ba bitsa fa lo lemoga gore go ka nna le mathata. Gantsi ba ka kgona go lo neela maina a dingaka tse di dirisanang mmogo le go akantsha mekgwa e mengwe e e ka dirisiwang. Fa go tlhokega e bile fa go kgonega, bakaulengwe bano ba ka rulaganyetsa go nna teng le go thusa go rarabolola bothata.

¹² Go Lebelela le go Emelana le Kgotlatshekelo Fa E Tsena mo Kgannyeng: Go tweng fa ngaka kana kokelo e ikaelela go bona taolo ya kgotlatshekelo go tshela ngwana wa gago madi? A eno ke nako ya gore o itlhoboge, o akanya gore ga go na sepe se o ka se dirang? Le e seng! O santse o ka dira gore a se ka a tshelwa madi. O tshwanetse go ipaakanyetsa maemo a a ntseng jalo go sa le gale. Ke eng se se ka dirwang?

¹³ Fa o tlhaloganya mengwe ya melaometheo ya semolao e e kaelang kana e e tlhotlheletsang dikokelo le baatlhodi mo dikgannyeng tseno go tla go thusa thata fa o iphemela. Molaomotheo mongwe o o ntseng jalo o o botlhokwa thata ke gore go ya ka molao batsadi ga ba na thata e e feletseng ya go gana kana go dumela gore bana ba bone ba alafiwe. Le mororo gantsi bagolo ba na le tshwanelo ya go dumela kana go gana kalafi go ya ka tsela e ba batlang ka yone, batsadi ga ba a gololesega go gana kalafi e go akanngwang gore e siametse botsogo jwa ngwana wa bone lefa tota ba e gana ka ntlha ya bodumedi jwa bone.

¹⁴ Molaomotheo ono wa motheo o ne o supiwa mo tshwetsong e e neng ya dirwa ka 1944 kwa Kgotlatshekelong ya Makgaolakgang ya United States. e e neng e re: “Batsadi ba ka tswa ba gololesegile go nna baswelatumelo. Mme ga ba a gololesega, mo maemong a a tshwanang go dira bana ba bone baswelatumelo fa ba ise ba fitlhe mo dingwageng tse go ya ka molao ba ka kgonang go itlhophela ka botlalo.” One mokgwa ono wa go amega thata ka botsogo jwa ngwana jwa mmele le tlhokomelo ya gagwe o teng mo melaong ya tlhokomelo ya bana gompieno. Melao eno, e e diretsweng go thibela gore bana ba se ka ba sotlwa, e diretswe gape go sireletsa bana gore ba se ka ba tlhokomologiwa mo go tsa kalafi.

¹⁵ Eleruri batsadi ba Bakeresete ga ba gane gore bana ba sirelediwe gore ba se ka ba sotliwa le gore ba se ka ba tlhokomologiwa. Mme lefa go ntse jalo, melao ya go tlhokomologa bana le mafoko a a nopotsweng fa godimo a Kgotlatshekelo ya Makgaolakgang gantsi a dirisiwa ka tsela e e sa tshwanelang mo dikgetsing tse di amang bana ba Basupi ba ga Jehofa. Ka ntlha yang? Boammaaruri ke gore, batsadi ba Basupi ga ba a ikaelela go dira bana ba bone “baswelatumelo.” Fa e le gore ba ne ba batla go dira jalo, ke eng fa tota ba isa bana ba bone kokelong? Go farologana le seo, batsadi ba Basupi ba rata go batlela bana ba bone kalafi. Ba rata bana ba bone mme ba batla gore ba nne le botsogo jo bo siameng. Mme lefa go ntse jalo ba dumela gore Modimo o ba file tiro ya go batlela bana ba bone kalafi e e molemo go gaisa. Ba batla gore bolwetsi jwa bana ba bone bo alafiwe kwantle ga go tshelwa madi. Ga se fela gore tsela e e ntseng jalo ya go dirisa mekgwa e mengwe kwantle ga madi e botoka e bile e babalesegile go gaisa madi, mme se se botlhokwa le go feta, e dira gore bana ba bone ba amogelwe ke Moneibotshelo Jehofa Modimo.

¹⁶ Go sa kgathalesege melemo ya mokgwa wa kalafi o o sa diriseng madi, dingaka di le dintsi le badiredi ba tlhokomelo ya bana ba leba kalafi ya go tshela madi jaaka mokgwa wa motheo o o ka tlhokegang kana o o ka bolokang botshelo mo maemong mangwe a a rileng. Ka jalo, fa batsadi ba Basupi ba gana gore go tshelwe madi jaaka go akantshitswe, go ka tsoga mathata. Ka tlwaelo fela, dingaka ga di a tshwanela go alafa bana kwantle ga tetla ya batsadi. Gore ba tle ba fenye bothata jwa gore batsadi ba gana go ba fa tetla ya go dirisa madi, dingaka kana badiri ba bangwe ba kokelo ba ka nna ba batla tetla ya moatlhodi mongwe e a e ba nayang e le taolo ya kgotlatshekelo. Taolo e e ntseng jalo e e ntshiwang ke kgotlatshekelo e ka bonwa ka badiredi ba tlhokomelo ya bana kana ke dingaka kana ke badiredi ba kokelo ba dira jalo gore ba sireletse bana mo go se ba se bitsang go itlhokomolosa go batlela ngwana kalafi.a

¹⁷ Gantsi ditaelo tse di ntshiwang ke kgotlatshekelo gore go dirisiwe madi di bonwa ka bofefo fa batsadi ba boleletswe go le gonnye kana ba sa itse gotlhelele. Dingaka, baokamedi ba tsa kalafi, kana badiredi ba tlhokomelo ya bana ba leka go buelela ditaelo tseo tse ba di batlang ka bofefo ka go bolela gore maemo a a leng teng a tshoganetso a kalafi ga a letle nako ya gore batsadi ba itsisiwe ka sengwe le sengwe se se diragalang. Lefa go ntse jalo, gantsi fa dingaka di bodiwa, di dumela gore ga se gore maemo a tshoganetso a mmatota a bo a le teng mme ba a bo ba batla fela taelo ya kgotlatshekelo ka gore ba bo ba akanya ka nako ya “fa go ka direga” gore go tlhokege gore go tshelwe madi mo isagweng. Jaaka batsadi ba ngwana, lo tshwanetse gore lo itse gore dingaka, baokamedi ba tsa kalafi, kana badiredi ba tlhokomelo ya bana ba dirang ka ngwana wa lona ka dinako tsotlhe. Molao wa re, fa go kgonega lo itsisiwe ka maiteko a go batla taelo ya kgotlatshekelo mme lo fiwe nako ya gore lo bolele gore lona lo ikutlwa jang ka kgang eo kwa kgotlatshekelo.

¹⁸ Dilo tseno tse di fitlhelwang mo molaong di gatelela botlhokwa jwa go batla ngaka e e nang le tirisanommogo. Dirisana le ene, mme ka thuso ya batho ba ba leng mo Komiting ya Dipuisano le Dikokelo, mo thuse go batla mokgwa wa go alafa a sa dirise madi mo bolwetsing jwa ngwana wa gago kana go dira gore ngwana wa gago a fudusediwe kwa ngakeng e nngwe kana kwa kokelong e e ka mo alafang ka tsela eo. Mme fa e le gore go na le ditsela dingwe tse di supang gore ngaka, mookamedi wa tsa kalafi, kana modiredi wa tlhokomelo ya bana ba akanya go bona taelo ya kgotlatshekelo, o tshwanetse go nna bofefo go botsa gore a ke se ba ikaeletseng go se dira. Ka dinako tse dingwe seno se dirwa ka mogala mo sephiring. Fa e le gore ba rulagantse go ya kgotlatshekelong, gatelela gore o batla go itse kaga seo gore le wena o tle o kgone go bolelela moatlhodi se o se batlang. (Dia. 18:17) Fa go na le nako, gantsi go botoka go batla thuso ya mmueledi. Mo mabakeng a mangwe babueledi ba ile ba tlhophiwa ke kgotlatshekelo. Fa o na le mmueledi wa gago kana yo o tlhophilweng ke kgotlatshekelo, Mokgatlho o ka nna wa mo naya tshedimosetso e e tla mo thusang gore a go emele ka tsela e e molemolemo ka mo go ka kgonegang ka teng mo maemong ano.

¹⁹ Fa e le gore o isiwa kgotlatshekelong ka ntlha ya go gana go tshelwa madi, kgopolo ya ngaka ya gore madi a botlhokwa go boloka botshelo jwa ngwana kana botsogo jwa gagwe e ka nna ya reediwa thata. Moatlhodi, jaaka motho yo o senang kitso ya kalafi, gantsi o tla ikaega ka kitso ya tsa kalafi ya ngaka. Seno se ntse jalo segolobogolo fa batsadi ba neilwe sebaka se sennye kana ba sa newe gotlhelele gore ba ikemele mo kgetsing mme ngaka e letlelelwa go tlhalosa mabaka a yone a gore madi a tlhokega “ka potlako,” e sa ganediwe ke ope. Mekgwa e e ntseng jalo ya go reetsa letlhakore le le lengwe ga e thuse ka gope gore go bonwe boammaaruri. Boammaaruri ke gore, ke kgang e e itsiweng ke dingaka fela gore madi a a tlhokega e bile ke selo se se ikakanyediwang ke ngaka mme ga se a tlhomama. Gantsi, fa ngaka e nngwe e bolela gore madi a tlhokega thata go boloka botshelo jwa ngwana, ngaka e nngwe e e kileng ya alafa bolwetsi jo bo tshwanang e sa dirise madi, o tla bolela gore madi ga a tlhokege go alafa molwetsi yono.

²⁰ O tla dirang fa mmueledi kana moatlhodi a go botsa gore ke ka ntlha yang o gana gore ngwana wa gago a tshelwe madi a a “bolokang botshelo”? Le mororo la ntlha o ka nna wa batla go tlhalosa gore o dumela gore baswi ba tla tsoga le gore o na le tumelo e e nonofileng gore Modimo o tla tsosa ngwana wa gago fa a swa, karabo e e ntseng jalo ka boyone e tla tlhatswa yo o amegileng ka botsogo jwa ngwana pelo fela gore tumelo ya gago e go ile kwa tlhogong mme ene o tshwanetse go tsaya kgato go sireletsa ngwana wa gago.

²¹ Se kgotlatshekelo e tlhokang go se itse ke gore, le mororo o gana go tshela madi segolobogolo ka ntlha ya bodumedi, ga o gane kalafi. Moatlhodi o tlhoka go bona gore ga lo batsadi ba ba tlhokomologang bana kana ba ba sotlang bana mme go na le moo, a bone gore lo batsadi ba ba lorato ba ba batlang gore ngwana wa bone a alafiwe. Ke fela gore ga lo dumele gore melemo ya madi e go builweng ka yone e feta dikotsi tse di ka nnang tsa bolaya le mathata a seo se ka a tsosang, segolobogolo fa mekgwa e mengwe ya kalafi e e senang dikotsi tseno e le teng.

²² Go ya ka gore seemo ke sefe, o ka nna wa itsise moatlhodi gore ke kgopolo ya ngaka e le nngwe fela ya gore madi a a tlhokega, mme lefa go ntse jalo dingaka di farologana mo mekgweng ya tsone ya kalafi, le gore o ka itumela fa ba ka go fa sebaka sa go batla ngaka e nngwe e e tla alafang ngwana wa gago ka mekgwa e e leng teng gongwe le gongwe ya kalafi e go sa dirisiweng madi mo go yone. Gongwe o ka tswa o setse o thusitswe ke Komiti ya Puisano le Dikokelo go bona ngaka e e ka alafang ngwana wa gago kwantle ga go dirisa madi e bile e ka nna ya neela bosupi jo bo mosola kwa kgotlatshekelong, gongwe ka mogala. Kwantle ga pelaelo komiti ya puisano le dikokelo e tla kgona go naya moatlhodi—le e leng ngaka e e gatelelang gore go nne le taelo ya kgotlatshekelo—ditlhogo tse di nang le tshedimosetso ya kalafi tse di bontshang gore bolwetsi jwa ngwana wa gago bo ka alafiwa jang kwantle ga go dirisa madi.

²³ Fa baatlhodi ba kopiwa fela ka bonako gore ba ntshe taolo ya kgotlatshekelo, gantsi ba bo ba sa sekaseka kana ba sa gakololwa ka dikotsi tse dintsi tsa madi, tse di tshwanang le AIDS, bolwetsi jwa sebete, le dikotsi tse dingwe tse dintsi. O ka nna wa lemotsha moatlhodi seno, mme gape o ka nna wa mmolelela gore wena jaaka motsadi wa Mokeresete, o tsaya go dirisa madi a motho yo mongwe e le go roba molao wa Modimo ka tsela e e masisi le gore go patelela go tshela ngwana wa gago madi go tshwana fela le go mmetelela. Wena le ngwana wa gago (fa a godile sentle go ka ipuelela) lo ka tlhalosa gore lo ila go leswefadiwa go go ntseng jalo ga mmele mme lo ikuele mo moatlhoding gore a se ka a ntsha taelo e e ntseng jalo mme a go letle gore o batle mokgwa o mongwe wa go alafa ngwana wa gago.

²⁴ Fa lo iphemela ka tsela e e siameng, moatlhodi o kgona go bona dilo kafa letlhakoreng le lengwe sentle—kafa lo ikutlwang ka teng—jaaka batsadi. Ka ntlha ya seo ba ka se ka ba itlhaganelela go dumela gore go tshelwe madi. Mo makgetlhong a mangwe baatlhodi ba ile ba iletsa dingaka thata go dirisa madi, mo ba bileng ba ba bolelela gore ba akanyetse pele mekgwa e mengwe e ba ka e dirisang, kana ba naya batsadi sebaka sa go batla dingaka tse di ka alafang kwantle ga madi.

²⁵ Fa o dirisana le batho ba ba batlang go patelela gore go tshelwe madi, go botlhokwa gore le ka motlha o se ka wa supa gore ga o a tlhomama mo go se o se dumelang. Ka dinako tse dingwe baatlhodi (le dingaka) ba botsa batsadi gore a ga ba batle go ba “rwesa” boikarabelo jwa go dira tshwetso ya go tshela madi, ba ikutlwa gore seo se ka golola digakolodi tsa batsadi. Mme lefa go ntse jalo, lo tshwanetse lwa tlhalosetsa mongwe le mongwe yo o amegang mo kgannyeng eno sentle gore, lona jaaka batsadi lo ikutlwa gore ke boikarabelo jwa lona gore lo nne lo dire gotlhe mo lo ka go kgonang gore go se ka ga tshelwa madi. Ke boikarabelo jo lo bo filweng ke Modimo. O ka se bo rwese motho yo mongwe.

²⁶ Ka jalo he, fa o bua le dingaka le baatlhodi, o tshwanetse wa bo o itse go tlhalosa boemo jwa gago sentle le ka tsela e e tlhatswang pelo. Fa go ntshiwa taelo ya kgotlatshekelo lefa o dirile maiteko a mantsi, nna o ntse o kopa ngaka gore e se ka ya tshela madi mme o mo kgothaletse gore a dirise mokgwa o mongwe wa go alafa. Nna o ntse o mo kopa gore a sekaseke ditlhogo tse di nang le tshedimosetso ya kalafi le kgakololo e e tswang kwa dingakeng dipe fela tse di ka ratang gore go ikgolaganngwe le tsone malebana le bolwetsi bongwe gore go se ka ga dirisiwa madi. Mo makgetlhong a a fetang le le lengwe, ngaka e e neng e bonala e sa ineele, e ne ya re fa e tswa kwa kamoreng e go arelwang mo go yone ya bolela ka boipelo gore ga e a dirisa madi. Ka jalo, lefa go setse go ntshitswe taelo ya kgotlatshekelo, le ka motlha o se ka wa kgobega marapo lefa go ka diragala eng!—Bona tokololo ya Tora ya Tebelo ya June 15, 1991, mo go “Dipotso Tse Di Tswang go Babadi.”

²⁷ Gakologelwa gore Jesu o ne a re: “Lo itise mo bathong; gonne ba tlaa lo neela ditshekong . . . Lo tlaa isiwa fa pele ga balaodi le dikgosi ka ntlha ya me, go tla lo nna tshupo mo go bone le mo go Baditšhaba.” Gore re tle re gomotsege fa re le mo maemong ao, Jesu o ne a oketsa ka go bolela gore moya o o boitshepo o tla re thusa gore re gakologelwe se re ka se buang se se siameng le se se mosola.—Math. 10:16-20.

²⁸ “Yo o elang lefoko tlhoko o tlaa bona molemo, mme le fa e le mang yo o ikanyang Jehofa, o a ba a le sego.” (Dia. 16:20) Batsadi, baakanyetsang go sa le gale gore lo sireletse bana ba lona gore ba se ka ba tshelwa madi a a kgotlelang semoyeng. (Dia. 22:3) Bana, amogelang katiso ya batsadi ba lona ka go ipaakanyetsa ka tsela eno le ka go tsenya seno mo dipelong tsa lona. Jaaka lelapa, ‘lo itise gore lo se ka lwa ja madi . . . gore go tle go ye sentle ka lona’ ka go bo Jehofa a lo segofatsa le go lo amogela.—Dute. 12:23-25.

[Ntlha e e kwa tlase]