Jehofa o Naya Nonofo
1 Rona re le batho ba ga Jehofa, re filwe tiro ya go rera mafoko a a molemo mme ka nako e tshwanang re tshela ka mokgwa o “montle mo go Baditšhaba.” (1 Pet. 2:12; Math. 24:14) Ka ntlha ya metlha e e tlhokofatsang le makoa a rona le ditlhaelo tsa rona, le ka motlha re ka se ka ra kgona go dira tiro eno ka borona fela. (2 Tim. 3:1-5) A bo re itumela jang ne go bo re ka ikanya Jehofa gore o tla re thusa!
2 Moaposetoloi Paulo o ne a itshokela diteko di le dintsi. (2 Bakor. 11:23-27) O ne a kgona jang go di itshokela mme a bo a wetsa tiro e a e filweng? Jehofa o ne a mo naya “bogolo jo bo leng bogolo thata jwa nonofo.” (2 Bakor. 4:7) Paulo o ne a dumela gore o ne a thusitswe ke Modimo fa a ne a kwala jaana: “Nka dira dilo tsotlhe ka ene yo o nnonotshang.” (Bafil. 4:13) Jehofa o tla re thusa ka tsela e e tshwanang. Re ka bona jang thuso eno?
3 Ka go Rapela re sa Khutle: Jesu o ne a re kgothaletsa gore re ‘nne re lope, re batla, re kgwanyakgwanye,’ mme re se ka ra itlhoboga. (Luke 11:5-10) Fa re sa khutlele go nna re ntse re rapela seo se bontsha Jehofa gore re amegile go le kana kang, gore dilo tse re di batlang di botlhokwa go le kana kang, le gore maikaelelo a rona ke a boammaaruri tota. (Pes. 55:17; 88:1, 13; Bar. 1:9-11) Paulo o ne a bona botlhokwa jwa go nnela ruri mo thapelong fa a ne a re kgothaletsa gore ‘re rapele ka go bisa go khutla.’ (1 Bathes. 5:17) Thapelo ke nngwe ya ditsela tse di botlhokwatlhokwa tse re ka bonang thuso ya ga Jehofa ka tsone.
4 Ka go Latela Kaelo ya Puso ya Modimo: “Puso ya Modimo” ke “fa Modimo e le ene a laolang” ka lorato. Go laola ga gagwe go re solegela molemo fa re mo tsaya jaaka mookamedi wa rona, e bile re latela ditaelo tsa gagwe fa re dira ditshwetso tse dikgolo le tse dinnye. “Motlhanka yo o boikanngo le yo o botlhale” o emela puso ya Modimo mo lefatsheng. (Math. 24:45-47) Go botlhokwa gore re dirisane mmogo le mokgatlho o “motlhanka” a o dirisang fa e le gore re batla gore Jehofa a re segofatse. (Bapisa Bahebere 13:17.) Jehofa o tla re duela ka go bo re ikanyega mo go ene le ka go bo re iketleeleditse go utlwa melao ya gagwe ka go re naya maatla a re a tlhokang ka nako e e tshwanetseng.—Baheb. 4:16.
5 Ka go Atamalana le Bakaulengwe ba Rona: Lorato ke lotshwao lo lo tlhaolang barutwa ba ga Jesu. (Joh. 13:34, 35) Ka go bo re na le botho jo bo farologaneng thata, go ka nna ga nna le dikgotlhang gare ga rona ka go bo re sa dumalane ka dilo dingwe. Re tshwanetse gore re nne pelotlhomogi, re itshwarelane. (Baef. 4:32) Seno se dira gore re nne re atamalane le bakaulengwe ba rona mo tumelong le gore re kgothatsege go bo ba ema ba tiile fa ba lebane le diteko. ‘Re ntse re itse fa tsone dipogiso tseo di diragalela bakaulengwe ba [rona],’ Modimo o tla re nonotsha fa re lebane le dikgatelelo tse di tshwanang le tseo.—1 Pet. 5:9.
6 Ka go Nna le Thulaganyo e Ntle ya Thuto ya Motho ka Namana: Fa re nonotsha megopolo ya rona le dipelo tsa rona ka tsela ya semoya seo se tla re thusa gore re emelane le tlhaselo ya ga Satane. (1 Pet. 5:8) Fa re na le thulaganyo e ntle ya thuto ya motho ka namana seo se tla oketsa kitso ya bomodimo e re nang le yone. Re ka e dirisa fa re lebana le mathata a letsatsi le letsatsi. Paulo o ne a gatelela gore ‘kitso ya boammaaruri’ e botlhokwa thata gore re bolokege. (1 Tim. 2:3, 4) Go botlhokwa gore re je dijo tsa semoya ka metlha.
7 Re kgona go bona dilo tsotlhe tse di ka re thusang gore re nne re nonofile ka phuthego ya Bokeresete. Fa re tshegetsa ditiro tsa yone ka pelo yotlhe seo se tla re thusa gore re ‘tsamaye re sa idibale.’—Isa. 40:29-31.