Letshwao le le Lereng Kgololo
1 Pele ga fa Jehofa a diragatsa dikatlholo tsa gagwe tsa tshiamo, nako le nako o neela tlhagiso a bo a dira tsela ya gore batho ba ba pelonomi ba falole. Mo metlheng ya ga Esekiele, go ne go na le batho ba ba neng ba fegelwa le go sonelela dilo tse di makgapha tse di neng di dirwa. Jehofa o ne a dira gore batho ba ba tshwanelang bao ba tshwaiwe gore ba tle ba falole. (Esek. 9:4-6) Tiro ya rona ya go rera le yone e fitlhelela one maikaelelo ao. Re ka kgona go nna le seabe se se botlhokwa mo go seno.
2 Go bona batho ba ba dipelo di phepa ke kgato ya ntlha fela. Re rulaganyetsa go dira loeto lwa go boela. Dipaakanyetso tsa go dira loeto lwa go boela di dirwa ka nako ya loeto lwa ntlha ka go kwala se o se tsamaisitseng le kgang e lo neng lo tlotla ka yone. Gore re atlege fa re boela go ikaegile thata ka gore re ipaakanyeditse go bua eng le go dira eng fa re boela.
3 Fa o boela kwa o tsamaisitseng “Tora ya Tebelo” gone, o ka nna wa bua ka setlhogo sa yone se segolo:
◼ “Ela tlhoko gore mo tsebeng e e kafa ntle ya Tora ya Tebelo go na le polelo e e reng ‘E Itsise Bogosi Jwa ga Jehofa.’ Se se dirang gore makasine ono o tlhomologe jaana ke ka go bo o buelela Bogosi jwa Modimo jaaka jone fela jo bo tla rarabololang mathata a lefatshe. O tlhalosa gore Bogosi jwa Modimo bo tla dira eng fa go rata ga Modimo go diragadiwa mo lefatsheng. Ano ke one mafoko a a molemo a Jesu a neng a bolela gore a tla bolelwa mo lefatsheng lotlhe.” Bala Mathaio 24:14, mme o tlhalose ka moo motho a ka kgonang go bona Tora ya Tebelo ka metlha ka gone le ka moo motho a ka e dirisang go ithuta Baebele.
4 O ka tswa o batla go tlhoma mogopolo fela mo Baebeleng ka boyone mme o gatelele botlhokwa jwa go e bala ka metlha. O ka nna wa bolela jaana:
◼ “Go bonala mo e ka nnang mongwe le mongwe yo re mo itseng a ka itumelela go bona kgakololo e e molemo ya gore re ka lebana jang le mathata a letsatsi le letsatsi. Wena o akanya gore re ka kgona go bona kae kgakololo e re ka e ikanyang? [Letela karabo.] Batho ba le bantsi ba ba neng ba ikanya kgakololo ya ditsala kana ba ba ileng ba duela madi gore ba bone kgakololo ya batho ba ba rutegileng ba ile ba kgobega marapo thata. Kafa letlhakoreng le lengwe, dimilione tsa batho di ile tsa fitlhela gore Baebele ke yone fela e e nang le kgakololo e ba ka e ikanyang tota. Baebele e re kaela ka moo re ka emelanang ka gone le mathata ape fela a re ka lebanang le one. [Bala 2 Timotheo 3:16, 17.] Le mororo o ka tswa o fitlhetse gore go thata go tlhaloganya Baebele, mma ke go bontshe gore o ka e dirisa jang gore o bone letlotlo la kgakololo e e botlhale.” Tswelela pele o bule mo intekeseng ya buka ya Go Fetolana kafa tlase ga “Lorato” mme o tlhalose ka ditshupiso tse dingwe.
5 O ka nna wa tlhopha go dirisa buka ya “O Ka Tshelela Ruri mo Lefatsheng la Paradaise,” mokgele wa gago e le go simolola thuto ya Baebele ka go simolola jaana:
◼ “Re rata ba malapa a rona mme re ba batlela dilo tsotlhe tse di molemo. Lelapa la gago le ka solegelwa molemo jang fa le ka tshela mo lefatsheng le le ntseng jaana?” Mmontshe ditshwantsho tse di mo ditsebeng 156-7. Bala lokwalo lo le longwe kana di le pedi tse di nopotsweng mo ditsebeng tseo, mme o mo tlhalosetse gore ke dilo tse di solofediwang ke Jehofa Modimo yo o sa kakeng a aka. Lebisa mongantlo mo lenaaneng la dikgaolo tse di mo ditsebeng 5-6, mme o mmotse gore ke setlhogo sefe se se mo kgatlhang thata; bula kgaolo e a e tlhophileng mme o tlotle ka serapa se le sengwe kana di le pedi.
6 A o ka rata go thusa motho yo mongwe gore a tshwaelwe phalolo? Go atlega go ikaegile ka gore re ‘swetse bodiredi jwa rona’ ka go baakanyetsa sentle le go boela ka bonako kwa bathong botlhe ba ba kgatlhegang.—2 Tim. 4:5.