Tswelela Pele o Bua Boammaaruri
1 Baaposetoloi ba ne ba bolela jaana: “Ga re na sepe fa e se go bua fela dilo tse re di bonyeng le tse re di utlwileng.” (Dit. 4:20) Gompieno le rona re tshwanetse go tswelela pele re bua boammaaruri. Lefa gone go tsamaisa dimakasine tsa Tora ya Tebelo le Tsogang! e le tsela nngwe e re bonang batho ba ba tla reetsang ka yone, re tshwanetse go dira maeto a go boela fa e le gore re batla go ruta batho ba ba kgatlhegang go gontsi ka boammaaruri.
2 Fa o boela kwa o tsamaisitseng makasine o o kgethegileng wa “Tsogang!” ya May o o nang le setlhogo se se reng “Fa go sa Tlhole Go na Le Dintwa,” o ka nna wa buelela thuto ya Baebele ka go botsa jaana:
◼ “Maloba, re ne ra bua ka dintwa tsa ditšhaba le seabe se bodumedi bo nnileng le sone mo go tsone. A o lemogile gore ditiragalo tse di ntseng jalo di bontsha sentle gore re tshela mo nakong e Baebele e reng ke metlha ya bofelo? [Mmontshe buka ya Kitso. Bala serapa sa ntlha mo kgaolong ya 11 mme o bo o tlhalosa lebokoso le le mo tsebeng ya 102.] Buka eno e tlhalosa kgang eno le tse dingwe tse 18 tse di leng mo diteng tsa yone. [Mmontshe tsebe ya 3.] Fa o ka ntetla, nka rata go go bontsha kafa buka eno e ka go thusang ka teng go tlhaloganya dikgang tse di botlhokwa tseno tsa Baebele.” Fa a go letla, simolola thuto mo tsebeng ya 6.
3 Fa o ile wa solofetsa gore o tla boa gape go tla go tlhalosa gore re ka kgona jang go itumelela botshelo jo bo babalesegileng gone jaanong, o ka nna wa simolola ka go bolela sengwe se se tshwanang le seno:
◼ “Fa re ne re kopana la ntlha, ke ne ka go balela temana nngwe mo Baebeleng e e neng ya re neela mabaka a go bo re ka nna le tsholofelo ka isagwe ya batho. Gompieno ke rata go go bontsha sengwe se se re bontshang gore ke mang yo o ka dirang gore re ikutlwe re bolokesegile gone jaanong.” Bala Pesalema 4:8. Bula buka ya Kitso mo tsebeng ya 168 mme o bo o bala serapa sa 19. Morago ga foo o bo o botsa ka gore: “A o ka rata go nna le thuto ya legae ya mahala ya Baebele e e tla go bontshang sentle gore o ka bona jang mofuta ono wa polokesego mo botshelong?” Fa a araba ka gore ee, bula kgaolo ya 1.
4 Gore o tle o akaretse batho ba o tsamaisitseng makasine wa “Tsogang!” wa June 8 mo go bone mo tselaneng ya gago ya dimakasine o ka nna wa leka go simolola jaana:
◼ “Go ne go bonala o kgatlhegela thata go bala makasine wa Tsogang! o o neng o bua ka kgang ya go tlhorontshiwa ka tsa tlhakanelodikobo kwa tirong. A tshedimosetso ya one e ne ya go kgatlha? [Letela karabo.] Batho ba ba balang makasine wa Tsogang! gantsi ba bolela gore ba rata tsela e e siameng le e e phepafetseng e e tlhalosang dikgang tse di botlhokwa tse di ntseng jalo ka teng. Ke akanya gore o tla fitlhela go ntse jalo le ka makasine ono wa bosheng. [Buelela setlhogo se se kafa ntle ka bokhutshwane.] A o ka rata go e bala?”
5 O ka nna wa buelela thuto ka tlhamalalo fa o dira loeto lwa go boela ka go bolela jaana:
◼ “Re tsamaisa dimakasine tsa rona mo lefatsheng lotlhe gore re itsise batho gongwe le gongwe ka se Baebele e se rutang. Fa batho ba anaanela dilo tse ba di ithutang, re ithaopela go ithuta le bone Baebele mahala kwa gae. [Mmontshe lebokoso le le reng, ‘A O ne O Tla Rata go Etelwa?’ le le mo tsebeng e e kafa morago ga makasine wa Tora ya Tebelo.] Re dirisa buka eno ya Kitso E E Isang Botshelong Jo bo Sa Khutleng gore e nne yone e e re kaelang. Mma ke go bontshe ka bokhutshwane gore thuto e tshwarwa jang.”
6 Fa re tswelela pele re bua boammaaruri, re ka tlhomamisega gore go tla nna le bangwe ba ba tla reetsang ba bo ba arabela sentle.—Mar. 4:20.